નારાયણીય · અધ્યાય 10.85

તતો મગધભૂમૃતા ચિરનિરોધસંક્લેશિતં
શતાષ્ટકયુતાયુતદ્વિતયમીશ! ભૂમીભૃતામ્ ।
અનાથશરણાય તે કમપિ પૂરુષં પ્રાહિણો-
દયાચત સ માગધક્ષપણમેવ કિં ભૂયસા ॥

યિયાસુરભિમાગધં તદનુ નારદોદીરિતાદ્
યુધિષ્ઠિરમખોદ્યમાદુભયકાર્યપર્યાકુલઃ ।
વિરુદ્ધજયિનોઽધ્વરાદુભયસિદ્ધિરિત્યુદ્ધવે
શશંસુષિ નિજૈઃ સમં પુરમિયેથ યૌધિષ્ઠિરીમ્ ॥

અશેષદયિતાયુતે ત્વયિ સમાગતે ધર્મજો
વિજિત્ય સહજૈર્મહીં ભવદપાઙ્ગસંવર્ધિતૈઃ ।
શ્રિયં નિરુપમાં વહન્નહહ ભક્તદાસાયિતં
ભવન્તમયિ! માગધે પ્રહિતવાન્ સભીમાર્જુનમ્ ॥

ગિરિવ્રજપુરં ગતાસ્તદનુ દેવ! યૂયં ત્રયો
યયાચ સમરોત્સવં દ્વિજમિષેણ તં માગધમ્ ।
અપૂર્ણસુકૃતં ત્વમું પવનજેન સંગ્રામયન્
નિરીક્ષ્ય સહ જિષ્ણુના ત્વમપિ રાજયુધ્વા સ્થિતઃ ॥

અશાન્તસમરોદ્ધતં વિટપપાટનાસંજ્ઞયા
નિપાત્ય જરસઃ સુતં પવનજેન નિષ્પાટિતમ્ ।
વિમુચ્ય નૃપતીન્ મુદા સમનુગૃહ્ય ભક્તિં પરાં
દિદેશિથ ગતસ્પૃહાનપિ ચ ધર્મગુપ્ત્યૈ ભુવઃ ॥

પ્રચક્રુષિ યુધિષ્ઠિરે તદનુ રાજસૂયાધ્વરં
પ્રસન્નભૃતકીભવત્સકલરાજકવ્યાકુલમ્ ।
ત્વમપ્યયિ જગત્પતે! દ્વિજપદાવનેજાદિકં
ચકર્થ કિમુ કથ્યતે નૃપવરસ્ય ભાગ્યોન્નતિઃ ॥

તતઃ સવનકર્મણિ પ્રવરમગ્ર્યપૂજાવિધિં
વિચાર્ય સહદેવવાગનુગતઃ સ ધર્માત્મજઃ ।
વ્યધત્ત ભવતે મુદા સદસિ વિશ્વભૂતાત્મને
તદા સસુરમાનુષં ભવનમેવ તૃપ્તિઃ દધૌ ॥

તતઃ સપદિ ચેદિપો મુનિનૃપેષુ તિષ્ઠત્સ્વહો
સભાજયતિ કો જડઃ પશુપદુર્દુરૂટં વટુમ્ ।
ઇતિ ત્વયિ સ દુર્વચોવિતતિમુદ્વમન્નાસના-
દુદાપતદુદાયુધઃ સમપતન્નમું પાણ્ડવાઃ ॥

નિવાર્ય નિજપક્ષગાનભિમુખસ્ય વિદ્વેષિણસ્-
ત્વમેવ જહિષે શિરો દનુજદારિણા સ્વારિણા ।
જનુસ્ત્રિતયલબ્ધયા સતતચિન્તયા શુદ્ધધીસ્-
ત્વયા સ પરમેકતામધૃત યોગિનાં દુર્લભામ્ ॥

તતઃ સુમાહિતો ત્વયા ક્રતુવરે નિરૂઢે જનો
યયૌ જયતિ ધર્મજો જયતિ કૃષ્ણ ઇત્યાલપન્ ।
ખલઃ સ તુ સુયોધનો ધુતમનાઃ સપત્નશ્રિયા
મયાર્પિતસભામુખે સ્થલજલભ્રમાદભ્રમીત્ ॥

તદા હસિતમુત્થિતં દ્રુપદન્દનાભીમયો-
રપાઙ્ગકલયા વિભો! કિમપિ તાવદુજ્જૃમ્ભયન્ ।
ધરાભરનિરાકૃતૌ સપદિ નામ બીજં વપન્
જનાર્દન! મરુત્પુરીનિલય! પાહિ મામામયાત્ ॥