નારાયણીય · અધ્યાય 10.84

ક્વચિદથ તપનોપરાગકાલે પુરિ નિદધત્ કૃતવર્મકામસૂનૂ ।
યદુકુલમહિલાવૃતઃ સુતીર્થં સમુપગતોઽસિ સમન્તપઞ્ચકાખ્યમ્ ॥

બહુતરજનતાહિતાય તત્ર ત્વમપિ પુનન્ વિનિમજ્જ્ય તીર્થતોયે ।
દ્વિજગણપરિમુક્તવિત્તરાશિઃ સમમિલથાઃ કુરુપાણ્ડવાદિમિત્રૈઃ ॥

તવ ખલુ દયિતાજનૈઃ સમેતા દ્રુપદસુતા ત્વયિ ગાઢભક્તિભારા ।
તદુદિતભવદાહૃતિપ્રકારૈરતિમુમુદે સમમન્યભામિનીભિઃ ॥

તદનુ ચ ભગવન્! નિરીક્ષ્ય ગોપાનતિકુતુકાદુપગમ્ય માનયિત્વા ।
ચિરતરવિરહાતુરાઙ્ગરેખાઃ પશુપવધૂઃ સરસં ત્વમન્વયાસીઃ ॥

સપદિ ચ ભવદીક્ષણોત્સવેન પ્રમુષિતમાનહૃદાં નિતમ્બિનીનામ્ ।
અતિરસપરિમુક્તકઞ્ચુલીકે પરિચયહૃદ્યતરે કુચે ન્યલૈષીઃ ॥

રિપુજનકલહૈઃ પુનઃ પુનર્મે સમુપગતૈરિયતી વિલમ્બનાભૂત્ ।
ઇતિ કૃતપરિરમ્ભણે ત્વયિ દ્રાગતિવિવશા ખલુ રાધિકા નિલિલ્યે ॥

અપગતવિરહવ્યથાસ્તદા તા રહસિ વિધાય દદાથ તત્ત્વબોધમ્ ।
પરમસુખચિદાત્મકોઽહમાત્મેત્યુદયતુ વઃ સ્ફુટમેવ ચેતસીતિ ॥

સુખરસપરિમિશ્રિતો વિયોગઃ કિમપિ પુરાભવદુદ્ધવોપદેશૈઃ ।
સમભવદમુતઃ પરં તુ તાસાં પરમસુકૈક્યમયી ભવદ્વિચિન્તા ॥

મુનિવરનિવહૈસ્તવાથ પિત્રા દુરિતશમાય શુભાનિ પૃચ્છ્યમાનૈઃ ।
ત્વયિ સતિ કિમિદં શુભાન્તરૈરિત્યુરુહસિતૈરપિ યાજિતસ્તદાસૌ ॥

સુમહતિ યજને વિતાયમાને પ્રમુદિતમિત્રજને સહૈવ ગોપાઃ ।
યદુજનમહિતાસ્ત્રિમાસમાત્રં ભવદનુષઙ્ગરસં પુરેવ ભેજુઃ ॥

વ્યપગમસમયે સમેત્ય રાધાં દૃઢમુપગૂહ્ય નિરીક્ષ્ય વીતખેદામ્ ।
પ્રમુદિતહૃદયઃ પુરં પ્રયાતઃ પવનપુરેશ્વર! પાહિ માં ગદેભ્યઃ ॥