નારાયણીય · અધ્યાય 10.55

અથ વારિણિ ઘોરતરં ફણિનં પ્રતિવારયિતું કૃતધીર્ભગવન્! ।
દ્રુતમારિથ તીરગનીપતરું વિષમીરુતશોષિતપર્ણચયમ્ ॥

અધિરુહ્ય પદામ્બુરુહેણ ચ તં નવપલ્લવતુલ્યમોજ્ઞરુચા ।
હદવારિણિ દૂરતરં ન્યપતઃ પરિઘૂર્ણિતઘોરતરઙ્ગગણે ॥

ભુવનત્રયભારભૃતો ભવતો ગુરુભારવિક્રમ્પિવિજૃમ્ભિજલા ।
પરિમજ્જયતિ સ્મ ધનુઃશતં તટિની ઝટિતિ સ્ફુટઘોષવતી ॥

અથ દિક્ષુ વિદિક્ષુ પરિક્ષુભિતભ્રમિતોદરવારિનિનાદભરૈઃ ।
ઉદકાદુદગાદુરગાધિપતિસ્ત્વદુપાન્તમશાન્તરુષાન્ધમનાઃ ॥

ફણશૃઙ્ગસહસ્રવિનિઃસૃમરજ્વલદગ્નિકણોગ્રવિષામ્બુધરમ્ ।
પુરતઃ ફણિનં સમલોકયથા બહુશૃઙ્ગિણમઞ્જનશૈલમિવ ॥

જ્વલદક્ષિપરિક્ષરદુગ્રવિષશ્વસનિષ્મભરઃ સ મહાન્ભુજગઃ ।
પરિદશ્ય ભવન્તમનન્તબલં સમવેષ્ટયદસ્ફુટચેષ્ટમહો ॥

અવિલોક્ય ભવન્તમથાકુલિતે તટગામિનિ બાલકધેનુગણે ।
વ્રજગેહતલેઽપ્યનિમિત્તશતં સમુદીક્ષ્ય ગતા યમુનાં પશુપાઃ ॥

અખિલેષુ વિભો! ભવદીયદશામવલોક્ય જિહાસુષુ જીવભરમ્ ।
ફણિબન્ધનમાશુ વિમુચ્ય જવાદુદગમ્યત હાસજુષા ભવતા ॥

અધિરુહ્ય તતઃ ફણિરાજફણાન્ નનૃતે ભવતા મૃદુપાદરુચા ।
કલશિઞ્ચિતનૂપુરમઞ્ચુમિલત્કરકઙ્કણસંકુલસંક્વણિતમ્ ॥

જહૃષુઃ પશુપાસ્તુતુષુર્મુનયો વવૃષુઃ કુસુમાનિ સુરેન્દ્રગણાઃ ।
ત્વયિ નૃત્યતિ મારુતગેહપતે! પરિપાહિ સ માં ત્વમદાન્તગદાત્ ॥