મુણ્ડમાલાતન્ત્રમ્ · અધ્યાય 1

----
મુક્તબોધ ઇન્દોલોગિચલ્ રેસેઅર્છ્ ઇન્સ્તિતુતે
ઉસે ઓf થિસ્ મતેરિઅલ્ (એ-તેxત્સ્) ઇસ્ ચોવેરેદ્ બ્ય્ ચ્રેઅતિવે ચોમ્મોન્સ્ લિચેન્સે બ્ય્-ન્ચ્ 4.0
ચતલોગ્ નુમ્બેર્: મ્00537
ઉનિfઓર્મ્ તિત્લે: મુણ્ડમાલાતન્ત્રમ્ 1
એદિતોર્ : રસિક મોહન ચટ્ટોપાધ્યાય
દેસ્ચ્રિપ્તિઓન્:
થિસ્ તન્ત્ર ઇસ્ અ દિffએરેન્ત્ તેxત્ fરોમ્ મુણ્ડમાલાતન્ત્ર ઇઇ, થોઉઘ્ થેય્ ચોઇન્ચિદે ઇન્ થેઇર્ ચોન્તેન્ત્સ્ અન્દ્ ચોન્ચેર્ન્સ્ અન્દ્ બેલોન્ગ્ તો થે સમે પેરિઓદ્. અ fઐર્લ્ય્ લતે તન્ત્ર.
નોતેસ્:
દત-એન્તેરેદ્ બ્ય્ થે સ્તff ઓf મુક્તબોધ ઉન્દેર્ થે સુપેર્વિસિઓન્ ઓf મર્ક્ સ્.ગ્. દ્ય્ચ્zકોwસ્કિ.
રેવિસિઓન્ 0: સેપ્ત્. 19, 2021
પુબ્લિસ્હેર્ :
પુબ્લિચતિઓન્ યેઅર્ :
પુબ્લિચતિઓન્ ચિત્ય્ : ચલ્ચુત્ત
પુબ્લિચતિઓન્ ચોઉન્ત્ર્ય્ : ઇન્દિઅ
----
કૈલાસશિખરે રમ્યે ગન્ધર્વગણસેવિતે ।
હરવક્ષઃસ્થિતા દેવી પૃચ્છતિ સ્મ નગાત્મજા

શ્રીદેવી ઉવાચ
દેવદેવ મહાદેવ સૃષ્ટિસ્થિત્યન્તકારક ।
નીલકણ્ઠ જગન્નાથ પ્રભો શઙ્કર ભો હર

નમસ્તુભ્યં જગન્નાથ મમ નાથામરપ્રભો ।
શરણાઽઽગત - દીનાર્ત્ત - પરિત્રાણ - પરાયણ

સર્વાધાર નિરાધાર સાધાર ધરણીધર ।
વેદવિદ્યાધરાધાર ગઙ્ગાધર નમોઽસ્તુ તે

શ્રુતં પરમતન્ત્રં વૈ સારાત્ સારં પરાત્ પરમ્ ।
યત્ શ્રુત્વા શીઘ્રમાયાતિ શિવલોકમનામયમ્

કાલીતન્ત્રે કુબ્જિકાયાં તથા કાલીવિલાસકે ।
ડામરે યામલે કાલીસર્વસ્વે યોનિતન્ત્રકે

સમ્મોહને વિક્રમે ચ તન્ત્રે ચૈવ કુલાર્ણવે ।
માતૃકાભેદતન્ત્રે ચ સમયાચારતન્ત્રકે

વીરતન્ત્રે તોડલે ચ તથા ભૈરવતન્ત્રકે ।
જ્ઞાનતન્ત્રે ચ નિર્વાણે શ્રુતં પરમમાદરાત્

ઇદાનીં શ્રોતુમિચ્છામિ ગુહ્યાદ્ ગુહ્યતરં પરમ્ ।
સારાત્ સારતરં દેવ પાવનં સર્વદેહિનામ્ ।
શ્રુત્વા જીવઃ શિવત્વં ચ લભતે નાત્ર સંશયઃ

શ્રીશિવ ઉવાચ
ધન્યાસિ પતિભક્તાસિ પ્રાણતુલ્યાસિ શઙ્કરિ ।
યોષિચ્ચપલભાવત્વાત્ પુરા નોક્તં ત્વયિ પ્રિયે

ઇદાનીં સ્થિરતાં જ્ઞાત્વા કથયામિ ત્વયિ પ્રિયે ।
અસ્તિ ચૈકં મુણ્ડમાલાતન્ત્રં પરમસાધનમ્

જ્ઞાત્વા જીવઃ શિવો ભૂત્વા વિહરેત્ ક્ષિતિમણ્ડલે ।
અતિગોપ્યં મહેશાનિ તન્ત્રરાજં મનોહરમ્

મુણ્ડે મુણ્ડે ચ કથિતં કથિતં મુણ્ડમાલયા ।
શૃણુ ગુહ્યં વરારોહે કિં પૃચ્છસિ નગાત્મજે

શ્રીપાર્વતી ઉવાચ
દેવદેવ મહાદેવ વિશ્વનાથ મહેશ્વર ।
ત્રયાણામેવમાચારં ત્રયાણાં ભાવશોધનમ્ ।
ત્રયાણાં સમયાચારં યેન દુર્ગા પ્રસીદતિ

શ્રીશિવ ઉવાચ
યથા કાલી તથા તારા તથા ત્રિપુરસનુદરી ।
ભૈરવી તુ વના વિદ્યા છિન્ના ચ બગલામુખી

ધૂમા ભીમાઽન્નપૂર્ણા ચ દુર્ગા ચ કમલાત્મિકા ।
માતઙ્ગી ધનદા પર્ણાવતી સર્વાર્થસિદ્ધિદા

નાનાદેવી મહાવિદ્યા ઉપવિદ્યાં પૃથક્ પૃથક્ ।
નાનાતન્ત્રે મહેશાનિ કથિતા શિવસુન્દરિ

આચારં વિવિધં દુર્ગે દક્ષિણં દક્ષિણેતરમ્ ।
મુણ્ડમાલામહાતન્ત્રં સર્વેષાં જ્ઞાનસાધનમ્

એકા દુર્ગા મહેશાનિ એકો દેવઃ સદાશિવઃ ।
અહમેકઃ શિવો દેવો નાન્યો દેવઃ કથઞ્ચન

સા વૈ ભવાની મે પત્ની સર્વદા જ્ઞાનમાલભેત્ ।
તદૈવ જાયતે સિદ્ધિર્ભક્તિરવ્યભિચારિણી

જ્ઞાનં વિના પરં તત્ત્વં ન જાનામિ મહીતલે ।
અત એવ પરં જ્ઞાનં ભાવયેત્ સર્વકોવિદઃ

દુર્લભ્યં શૃણુ દેવેશિ મમ સાધનકારણમ્ ।
અતઃ પરતરં દેવિ દુર્ગમં પરસાધનમ્

સર્વશાન્તિકરં ચૈવ સર્વદુઃખહરં પરમ્ ।
સર્વરોગક્ષયકરં સર્વસાધનશોધનમ્

બ્રહ્માદીનાં ચ દુર્લભ્યં સર્વેષાં શિવદુર્લભમ્ ।
યઃ શાક્તો ધરણીમધ્યે સ શિવો નાત્ર સંશયઃ

યાસાં વિજ્ઞાનમાત્રેણ જીવન્મુક્તઃ પ્રજાયતે ।
ભક્ત્યા ભક્ત્યા જપેન્મન્ત્રં સાધકો ધરણીતલે

જીવન્મુક્તઃ સદા મુક્તઃ સર્વકર્મસુ કોવિદઃ ।
યોઽન્યેભ્યો દર્શયેદ્ યશ્ચ ભુક્તિં મુક્તિં ચ કાઙ્ક્ષતિ

સ્વપ્નલબ્ધઘનેનૈવ ધનવાન્ સ ભવેદ્ યદિ ।
શુક્તૌ રજતવિભ્રાન્તિર્યથા જાયેત પાર્વતિ

તથાન્યદર્શનેભ્યશ્ચ ભુક્તિં મુક્તિં ચ કાઙ્ક્ષતિ ।
વિના દુર્ગાં ન મે જ્ઞાનં વિના દુર્ગાં ન મે રતિઃ

વિના દુર્ગાં ન નિર્વાણં સત્યં સત્યં વદામ્યહમ્ ।
ન ત્ર્યક્ષા ભક્તિરમલા પ્રેયસી પરમા ક્રિયા

શક્તિદ્વયં સમાશ્રિત્ય શક્તેઃ પરમપૂજકઃ ।
આદ્યં દેવિ સુદુર્જ્ઞેયં મધ્યં પઞ્ચ વિભૂષિતમ્

શેષં કુલમયેનેશં નાસ્તિ નાસ્તિ વરાનને ।
સત્યં વેદ્મિ હિતં વેદ્મિ પુનર્વેદ્મિ વરાનને

વિના દુર્ગાપરિજ્ઞાનાત્ કો વા તરતિ કોવિદઃ ।
કો વેદ પરમં તત્ત્વં કો વેદ નિખિલં પદમ્

કો વેદ ભૈરવાચારં યો વેદ સ ચ કોવિદઃ ।
સ કુલીનઃ સ શૂરશ્ચ સ પઞ્ચમવિભૂષિતઃ

યો જાનાતિ જગદ્ધાત્રિ જગદીશે જયાવહે ।
મધ્યસ્થઃ પાર્વતીતત્ત્વં ન પુનર્દેહભાગ્ભવેત્

આદૌ ગુરું સમભ્યર્ચ્ય અન્તે પરમસાધનમ્ ।
ક્રિયાશક્તિરતો જન્તુઃ સર્વભાગ્ જાયતે ખલુ

નિદાનં નાસ્તિ દુર્ગાયા મમૈવ જગદમ્બિકે ।
અન્યેષામસ્તિ વૈ સ્વર્ગે ધરણીતલકેતને

અતઃ સત્યં પુનઃ સત્યં પુનઃ સત્યં વદામ્યહમ્ ।
ભાવાભાવસમાયુક્તા યાન્તિ મોક્ષં નિરામયમ્

યા પૃચ્છા તે નિગદિતા સર્વં જાનામિ શઙ્કરિ ।
વિદિતા પરમા વિદ્યા કરાલવદના શિવા

એતસ્યાશ્ચરિતં યસ્તુ એતસ્યાઃ સાધકસ્ય ચ ।
ચરિતં દુર્લભં લોકે તેષાં મધ્યે વદામ્યહમ્

ગુરુરેકઃ શિવઃ સાક્ષાદ્ ગુરુઃ સર્વાર્થસાધકઃ ।
ગુરુરેવ પરં તત્ત્વં સર્વં ગુરુમયં જગત્

વિના ગુરુપ્રસાદેન કોટિપુરશ્ચરણેન કિમ્ ।
ગુરુપૂજાં વિના દેવિ નહિ સિધ્યતિ ભૂતલે

ગુરુપૂજાં વિના દેવિ ઇષ્ટપૂજાં કરોતિ યઃ ।
મન્ત્રસ્ય તસ્ય તેજાંસિ હરતે ભૈરવઃ સ્વયમ્

દેવતાગુરુમન્ત્રાણામૈક્યં સમ્ભાવયન્ ધિયા ।
તદા સિદ્ધો ભવેન્મન્ત્રઃ પ્રકટે હાનિરેવ ચ

શ્રીપાર્વતી ઉવાચ
ઐક્યજ્ઞાનં મહાદેવ કથમુત્પદ્યતે પ્રભો ।
નરાકૃતિગુરુર્મન્ત્રે દેવતા ધ્યાનરૂપિણી ॥
મન્ત્રાશ્ચાક્ષરરૂપેણ કથમૈક્યં ભવેચ્છિવ

શ્રીશિવ ઉવાચ
ધન્યાસિ પ્રાણતુલ્યાસિ પતિભક્તાસિ પાર્વતિ ।
એકજાતિસ્વરૂપેણ સ્વભાવાદેકજન્મતઃ

એતેષાં ભાવયોગે તુ એકસાધનમેવ હિ ।
ગુરોર્જાતશ્ચ મન્ત્રશ્ચ મન્ત્રા જાતા તુ સુન્દરિ

અત એવ વરારોહે દેવતાયાઃ પિતામહઃ ।
પિતુશ્ચ ભાવનાદ્ દેવિ તથા ચૈવ પિતુઃ પિતુઃ

તદુદ્ભવં તોષમેતિ વિપરીતે વિપર્યયઃ ।
ગુરુઃ કર્તા ગુરુર્હર્તા ગુરુઃ પાતા મહીતલે

ગુરોઃ સન્તોષમાત્રેણ તુષ્ટાઃ સ્યુઃ સર્વદેવતાઃ ।
ગુરૌ તુષ્તે શિવસ્તુષ્ટો રુષ્ટે રુષ્ટસ્ત્રિલોચનઃ

ગુરૌ તુષ્ટે શિવા તુષ્ટા રુષ્ટે રુષ્ટા ચ સુન્દરી ।
અતો ગુરુર્મહેશાનિ સંસારાર્ણવલઙ્ઘને

કર્તા પાતા ચ હર્તા ચ ગુરુર્મોક્ષપ્રદાયકઃ ।
જીવઃ શિવઃ શિવો દેવઃ સજીવઃ કેવલઃ શિવઃ

પાશબદ્ધો ભવેજ્જીવઃ પાશમુક્તઃ સદાશિવઃ ।
પ્રણમ્ય ગુરુપાદાબ્જં ધ્યાત્વા ચ ગુરુપાદુકામ્

જ્ઞાત્વા પરમતત્ત્વં વૈ યો ભજેત્ કુલચણ્ડિકામ્ ।
સ કૃતાર્થઃ સ ધન્યશ્ચ સ કૃતજ્ઞઃ સ પણ્ડિતઃ

સ્વભાવજ્ઞો મહાદેવિ જાયતે નાત્ર સંશયઃ ।
ધ્યાતઃ સ્મૃતઃ પૂજિતો વા નમિતો વાપિ યત્નતઃ

જ્ઞાનતોઽજ્ઞાનતો વાપિ પૂજાકાલં વિમુક્તિદઃ ।
ચિન્મયસ્યાદ્વિતીયસ્ય નિષ્કલસ્યાશરીરિણઃ

ઉપાસકાનાં કાર્યાર્થં બ્રહ્મણો રૂપકલ્પના ।
સર્વદેવમયીં દેવીં સર્વદેવમયીં પરામ્

અજ્ઞાનાં ચિન્તયેદ્ દેવીં પરંબ્રહ્મસ્વરૂપિણીમ્ ।
નિત્યા ચ નિષ્કલઙ્કા ચ નિરાધારા નિરાશ્રયા

સર્વધારા નિરાધારા વિજયા ચ જયાવહા ।
સગુણા નિર્ગુણા ચેતિ મહામાયા દ્વિધા મતા

સગુણા માયયા યુક્તા તયા હીના ચ નિર્ગુણા ।
સગુણા ચ યદા દેવી સગુણોઽયં સદાશિવઃ

નિર્ગુણા ત્વં મહામાયે નિર્ગુણોઽહં ન સંશયઃ ।
ત્વમેવ નિર્ગુણો શક્તિરહમેવ ચ નિર્ગુણઃ

યો ભજેત્ સગુણો દેવિ ચાચિરાત્ સોઽપિ નિર્ગુણઃ ।
ગુણાતીતં પરં બ્રહ્મ નિરીહં વર્ણવર્જિતમ્

તદેવ પરમા વિદ્યા કાલ્યાદિસગુણાન્વિતા ।
સાધકસ્ય હિતાર્થાય શાક્તસ્યાનુગ્રહાય ચ ॥
ઉત્થિતા પરમા વિદ્યા સગુણા નાત્ર સંશયઃ

॥ ઇતિ મુણ્ડમાલાતન્ત્રે પાર્વતીશ્વરસંવાદે પ્રથમઃ પટલઃ

અથ દ્વિતીયઃ પટલઃ
એકદા પાર્વતી દેવી કરાલવદના શિવા ।
પપ્રચ્છ પાર્વતિ દેવી હસન્તી કાલિકા પરા

શ્રીપાર્વતી ઉવાચ
મહાદેવ મહેશાન મહેશ્વર સદાશિવ ।
પૃચ્છામ્યેકં મહાભાગ કૃપયા કથય પ્રભો

વિના વ્યાનં કુમ્ભકં ચ પ્રાણાયામં ચ કુલ્લુકામ્ ।
જપં તપો ધારણં ચ સેતું ચૈવ વિના કરમ્

વિના હંસં વિના પિણ્ડં વિના ભાવં વિના પદમ્ ।
કથં વા જાયતે સિદ્ધિર્વદ નાથ જગદ્ગુરો

શ્રીશિવ ઉવાચ
બ્રાહ્મણૈઃ ક્ષત્રિયૈર્વૈશ્યૈઃ શૂદ્રૈરેવ ચ જાતિભિઃ ।
વામરાશિપ્રભાવેણ કર્તવ્યં જપપૂજનમ્

યે શાક્તા બ્રાહ્મણા દેવિ ક્ષત્રિયા બ્રાહ્મણાઃ સ્મૃતાઃ ।
વૈશ્યાશ્ચ બ્રાહ્મણાશ્ચણ્ડિ સર્વે શૂદ્રાશ્ચ બ્રાહ્મણાઃ

બ્રાહ્મણાઃ શઙ્કરાશ્ચણ્ડિ ત્રિનેત્રશ્ચન્દ્રશેખરઃ ।
રક્તપુષ્પૈર્જગદ્ધાત્રીં પૂજયેદ્ધરવલ્લભામ્

વજ્રપુષ્પેણ દેવેશિ દેવીં ત્રિભુવનેશ્વરીમ્ ।
પૂજયેદ્ ભક્તિભાવેન દુર્ગાં મોક્ષવિધાયિનીમ્

હરસમ્પર્કહીનાયા લતાયાઃ કામમન્દિરે ।
જાતં કુસુમમાદાય મહાદેવ્યૈ નિવેદયેત્

સ્વયમ્ભુકુસુમં દેવિ રક્તચન્દનસંજ્ઞકમ્ ।
યથા ત્રિશૂલપુષ્પં ચ વજ્રપુષ્પં વરાનને

અનુકલ્પં લોહિતાગ્રં ચન્દનં હરવલ્લભમ્ ।
કદાચિત્ કસ્ય મુક્તિઃ સ્યાત્ કદાચિદ્ ભુક્તિરેવ ચ

એતસ્યાઃ સાધકસ્યાથ ભુક્તિર્મુક્તિઃ કરે સ્થિતા ।
યોગી ચેન્નહિ ભોગી સ્યાદ્ ભોગી ચેન્નહિ યોગવાન્

યોગભોગાત્મકં કૌલં તસ્માત્ કૌલં સમભ્યસેત્ ।
નહિ યોગી ન વા ભોગી ન યોગી યોગવાનિતિ

યોગી ભોગી ન વા ભોગી ભવેદ્ ભોગી ન સંશયઃ ।
શિવભક્તિં વિના દેવિ યો ધાવતિ ચ મૂઢધીઃ

ન યોગી સ્યાન્ન ભોગી સ્યાત્ કલ્પકોટિશતૈરપિ ।
રુદ્રસ્ય ચિન્તનાદ્ રુદ્રો વિષ્ણુઃ સ્યાદ્ વિષ્ણુચિન્તનાત્

દુર્ગાયાશ્ચિન્તનાદ્ દુર્ગા ભવત્યેવ ન સંશયઃ ।
યથા શિવસ્તથા દુર્ગા યા દુર્ગા શિવ એવ સા

તત્ર યઃ કુરુતે ભેદં સ એવ મૂઢધીર્નરઃ ।
દેવિ વિષ્ણુશિવાદીનામેકત્વં પરિચિન્તયેત્

ભેદકૃન્નરકં યાતિ રૌરવં પાપપૂરુષઃ ।
નહિ દુર્ગાસમા પૂજા નહિ દુર્ગાસમં ફલમ્

નહિ દુર્ગાસમં જ્ઞાનં નહિ દુર્ગાસમં તપઃ ।
દુર્ગાયાશ્ચરિતં યત્ર તત્ર કૈલાસમન્દિરમ્

ઇદં સત્યમિદં સત્યમિદં સત્યં વરાનને ।
સ્વર્ગે મર્ત્યે ચ પાતાલે નાસ્તિ શાક્તાત્ પરઃપ્રિયઃ

સૌરાણાં ગાણપત્યાનાં વૈષ્ણવાનાં તથૈવ ચ ।
તતોઽન્તે ચૈવ શાક્તાનાં ક્રમશઃ ક્રમશઃ પ્રિયે

શૃણુ દેવિ વરારોહે નાસ્તિ શાક્તાત્ પરો જનઃ ।
શાક્તોઽપિ શઙ્કરઃ સાક્ષાત્ પરંબ્રહ્મસ્વરૂપભાક્

આરાધિતા યેન કાલી તાર ત્રિપુરસુન્દરી ।
ષોડશી ચૈવ માતઙ્ગી છિન્ના ચ બગલામુખી

આરાધિતા મહેશાનિ સ શિવો નાત્ર સંશયઃ ।
અતિગોપ્યં વરારોહે શાક્તાનાં પરમં પદમ્

યો જાનાતિ મહીમધ્યે સ શિવો નાત્ર સંશયઃ ।
બ્રહ્માદ્યર્ચિતપાદાબ્જં યો ભજેત્ સતતં મુદા

સ યાત્યચિરકાલેન મુક્તિમન્દિરમેવ હિ ।
એકા વિદ્યા ચ પ્રકૃતિરેકસ્તુ પુરુષઃ શિવઃ

એકોઽહં વૈષ્ણવત્વં ચ એકમેવ પ્રભાષતે ।
એવં ચ મનસા દુર્ગાં યો ભજેદ્ધરવલ્લભામ્

પૂજયેદ્ યન્ત્રપુષ્પૈષ્તુ સાધકો ભુવિ મણ્ડલે ।
કાકકઞ્ચું વિધાયૈવં પ્રાણાયામં વિશુદ્ધિદમ્

કુમ્ભકં માતૃકાન્યાસં પ્રાણાયામં પુનઃ પુનઃ ।
પ્રાણાયામત્રયં ભદ્રે અધમોત્તમમધ્યમમ્

અધમાદ્ જાયતે સ્વેદો મધ્યમાદ્ ગાત્રચાલનમ્ ।
ઉત્તમાચ્ચ ક્ષિતિત્યાગો જાયતે નાત્ર સંશયઃ

પ્રાણોઽપાનઃ સમાનશ્ચોદાનવ્યાનૌ ચ વાયવઃ ।
નાગઃ કૂર્મોઽથ કૃકરો દેવદત્તો ધનઞ્જયઃ

પ્રાણાયામેન સર્વેષાં વિશ્રામો જાયતે ભૃશમ્ ।
જવાપુષ્પૈર્દ્રોણપુષ્પૈઃ કરવીરૈર્મનોહરૈઃ

કૃષ્ણાપરાજિતાપુષ્પૈર્વજ્રૈશ્ચ મુનિપુષ્પકૈઃ ।
પૂજયેત્ પરયા ભક્ત્યા ચણ્ડિકાં પરમેશ્વરીમ્

કાલીં કરાલવદનાં મુણ્ડમાલાવિભૂષિતામ્ ।
પ્રણમેદ્ ભક્તિભાવેન પૂજયેદ્ધરવલ્લભામ્

હિમદિગ્વિહિતો જન્તુઃ સર્વાલઙ્કારભૂષિતઃ ।
રક્તામ્બરપરીધાનો રક્તામાલ્યાનુલેપનઃ

ક્રમેણૈબં મહેશાનિ સોઽહમિત્યેવ ચિન્તયન્ ।
એવમીશાસને દુર્ગાં સ્થિત્વા ચ સાધકોત્તમઃ

શ્મશાનં શવમારુહ્ય મધ્યસ્થો નરસાધકઃ ।
જપત્વા મહામનું ગુહ્યં વસેત્ કૈલાસમન્દિરે

શિવોઽહં ચ શિવેયં ચ સદા વૈ મધ્યભાવના ।
આદ્યા માદ્યાં સમાસ્થાય ધ્યાયેત્ કુણ્ડલિનીં મુદા

કદાચિત્ તારિણીં વિદ્યાં દુર્ગાં તારકતારિણીમ્ ।
પૂજયેત્ ક્રિયયા શક્ત્યા બ્રહ્મવિદ્યાં મનોરમામ્

સહસ્રારે મહાદેવં નીલકણ્ઠં સદાશિવમ્ ।
બ્રહ્માદિગોપ્યં દેવેશં ધ્યાયેત્ શક્તિસમન્વિતમ્

ઇદં ચ દુર્લભં તન્ત્રં મન્ત્રં યન્ત્રં મહીતલે ।
વાક્યં પરમનિર્વાણં દામ્ભિકે પશુસઙ્કટે

ગોપ્તવ્યં વૈ વરારોહે સ્વયોનિરિવ પાર્વતિ ।
દિવા રાત્રૌ મહાભાગે પ્રજપેત્ પરમં મનુમ્

જપ્ત્વા ભવેન્મહાજ્ઞાની ગાણપત્યં લભેત્ તુ સઃ ।
અહમેવ શિવં બ્રહ્મ શિવોઽહં ભૈરવો હ્યહમ્

ભૈરવોઽહં ભૈરવોઽહં રમણી મમ ભૈરવી ।
મનસા જ્ઞાનમાસાદ્ય સાધકેન્દ્રો ભવેદ્ ભુવિ

એવં જ્ઞાનં પરં નિત્યં નિર્વિકારં મનોરમમ્ ।
પ્રાપ્યૈવં સર્વદા જીવો વિહરેત્ ક્ષિતિમણ્ડલે

પાદ્યાર્ઘ્યાચમનીયાદ્યૈઃ પૂજયેત્ પરમેશ્વરીમ્ ।
સદાનન્દઃ સ વિજ્ઞેયઃ સર્વધર્માર્થસાધકઃ

ભક્ત્યા ચ ક્રિયયા ચણ્ડિ પ્રણમેદ્ યસ્તુ કાલિકામ્ ।
જીવઃ શિવત્વં લભતે સત્યં સત્યં ન સંશયઃ

ક્વ યમઃ ક્વ તપો વિષ્ણુઃ ક્વ કલિઃ કર્મહિંસકઃ ।
સર્વં ચ માનસં ક્લેશં સદા સત્યં વિભાવયેત્

એવં વિધાનમાસાદ્ય પ્રજપેત્ ભાવયેત્ સુધીઃ ।
સોઽચિરેણૈવ કાલેન શિવત્વં લભતે જનઃ

સદા ક્રિયા પ્રકર્તવ્યા ક્રિયયા સિદ્ધિમુત્તમામ્ ।
પ્રાપ્નોતિ સર્વદા શુદ્ધિમત એવં ન વા ત્યજેત્

શ્મશાનસિદ્ધિર્વૈરાગ્યં શવસિદ્ધિર્વરાનને ।
દુર્ગાનુગ્રહમાત્રેણ ભવિષ્યતિ ન સંશયઃ

દિવ્યસ્તુ દેવવત્ પ્રાયો વીરશ્ચોદ્ધતમાનસઃ ।
પશુભાવસ્તથા દેવિ શુદ્ધશ્ચ ધરણીતલે

શ્રુત્વા હસન્તી કાલી સા કરાલકમલા કલા ।
દિગમ્બરા દિવ્યદેહા પ્રાહ દેવં ત્રિલોચનમ્

ગોપ્યં યત્ કથિતં નાથ શ્રુતં પરમમાદરાત્ ।
અતિગોપ્યં રહસ્યં ચ શ્રોતુમિચ્છામ્યહં પુનઃ

દિવ્યં ચ દુર્લભં નાથ વીરો જાતિવિહિંસકઃ ।
પશૌ નાધિષ્ઠિતા દુરા વીરતન્ત્રે પુરા શ્રુતમ્ ॥
ઇદાનીં શ્રોતુમિચ્છામિ બ્રહ્મવાક્યં સદાશિવમ્

શ્રીશિવ ઉવાચ
શ્રુતં ભૈરવતન્ત્રં ચ યોનિતન્ત્રં કુલાર્ણવમ્ ।
કુલાચારં તથા ગુપ્તસાધનં ગુરુતન્ત્રકમ્

નિર્વાણં સમયાચારં વીરતન્ત્રં શ્રુતં પુરા ।
ડામરં ડમરં ડીનં શ્રુતં કાલીવિલાસકમ્

સપ્તકોટિમહાગ્રન્થા મમ વક્ત્રાદ્ વિનિર્ગતાઃ ।
યામલં દેવિ બ્રહ્મોદ્યં યામલં વિષ્ણુયામલમ્

શિવયામલકં દેવિ યામલં મિત્રયામલમ્ ।
શક્તિયામલકં દુર્ગે કથિતં ચ શ્રુતં ત્વયા

તથાપિ હૃદયગ્રન્થિરસ્તિ તે પરમેશ્વરિ ।
પુરા સુકથિતં તન્ત્રં પુરા દેવિ ત્વયા શ્રુતમ્

સઙ્કેતં સમયાચારં તન્ત્રં સઙ્કેતકં તથા ।
કુલસઙ્કેતકં નામ સઙ્કેતં બહુવિસ્તરમ્

શ્મશાનસાધનં ભદ્રે શવસાધનમેવ ચ ।
એતત્ તે કથિતં દેવિ નાનાભાવં પૃથગ્વિધમ્

કિન્ત્વેકં શૃણુ ચાર્વઙ્ગિ કથયામિ સમાસતઃ ।
મત્સ્યં માંસં ચ મદ્યં ચ મુદ્રા મૈથુનમેવ ચ

દિવ્યાનાં ચૈવ વીરાણાં સાધનં ભાવસાધનમ્ ।
ન મદ્યં પ્રપિબેદ્ વિપ્રો ન મુદ્રાં ભક્ષયેદ્ સદા

ન મૈથુનમગમ્યાસુ કર્તવ્યં સિદ્ધિનાશનમ્ ।
અવધૂતઃ શિવઃ સાક્ષાદવધૂતઃ સદાશિવઃ

અવધૂતી શિવા દેવી અવધૂતાશ્રમો મહાન્ ।
અવધૂતશ્ચ દ્વિવિધો ગૃહસ્થશ્ચ હિતાનુગઃ

સચેલશ્ચાપિ દિગ્વાસો વિધિયોનિવિહારવાન્ ।
સદારઃ સર્વદાવસ્થો હ્યર્દ્ધહાસો દિગમ્બરઃ

ગૃહાવધૂતો દેવેશિ દ્વિતીયસ્તુ સદાશિવઃ ।
ન કલૌ સાધનં મદ્યં પ્રત્યક્ષં વરવર્ણિનિ

ગૃહાવધૂતઃ સર્વત્ર કર્તવ્યં ચ દિગમ્બરિ ।
અત એવ વરારોહે મિશ્રાચારં પ્રકલ્પયેત્

એવમાચારમિશ્રેણ પૂજયેદ્ યસ્તુ કાલિકામ્ ।
સન્તુષ્ટા સા જગદ્ધાત્રી મોક્ષમાર્ગવિધાયિની

સ્વકરસ્થશ્ચ ભોગશ્ચ સ્વકરસ્થશ્ચ મોક્ષકઃ ।
દેવીમન્ત્રપ્રસાદેન કિં ન સિધ્યતિ ભૂતલે

સુરાણાં ચાઽસુરાણાં ચ કિન્નરાણાં ચ પાર્વતિ ।
શરણ્યં તારિણીપાદપદ્મં મોક્ષપ્રદાયકમ્

જવાપરાજિતાદ્રોણકરવીરૈઃ સિતેતરૈઃ ।
ગન્ધૈર્માલૂરપત્રૈશ્ચ નૈવેદ્યૈર્વિવિધૈરપિ

એવં વિધિર્વિધાતવ્યઃ ક્રિયાસિદ્ધિકરાત્મકઃ ।
તદૈવ જાયતે સિદ્ધો જીવન્મુક્તઃ સદાશિવઃ

નારિકેલોદકં ચાર્દ્રં જલં સર્વાર્થસાધનમ્ ।
કાંસ્યે ગુડે સવ્યકરે કૃત્વા કારણકલ્પનમ્

તદા પૂજા વિધાતવ્યા મદ્યેન નગનન્દિનિ ।
બ્રાહ્મણી ક્ષત્રિયા વૈશ્યા શૂદ્રાણી સર્વમઙ્ગલા

શુક્લં રક્તં તથા પીતં કૃષ્ણં ચ ભદ્રમીરિતમ્ ।
શુક્લપુષ્પં બ્રાહ્મણે તુ રક્તપુષ્પં ચ ક્ષત્રીયે

વૈશ્યે ચ પીતપુષ્પં ચ શૂદ્રે કૃષ્ણં તદીરિતમ્ ।
સંવિદાસુરયોર્મધ્યે સંવિદૈવ ગરીયસી

અનુકલ્પાનિ ચાન્યાનિ ન દદ્યાત્ કેવલાં સુરામ્ ।
સંવિદાપાનમાત્રેણ સ વીરઃ સ ચ મદ્યપઃ

વાગ્જાલશાસ્ત્રે કથિતં નિષિદ્ધં નગનન્દિનિ ।
ન ગ્રાહ્યં તસ્ય વાક્યં ચ ગ્રાહ્યં તન્ત્રાત્મકં વચઃ

શિવા કર્ત્રી શિવા હર્ત્રી શિવા શિવવિધાયિની ।
શિવેયં રમણી દેવી શિવોઽહં શિવકામિની

સદાશિવશિવરાધ્યા શિવાનન્દવિધાયિની ।
વામાનન્દઃ શિવાનન્દો ભવેદ્ ભવસમો જનઃ ॥
ત્રયાણાં ભાવતત્ત્વજ્ઞો ભવયેવં વરાનને

॥ ઇતિ મુણ્ડમાલાતન્ત્રે પાર્વતીશ્વરસંવાદે દ્વિતીયઃ પટલઃ ॥
અથ તૃતીયઃ પટલઃ
કૈલાસશિખરાસીનમિન્દુખણ્ડવિભૂષિતમ્ ।
પાર્વતી પરયા ભક્ત્યા પ્રાહ દેવં ત્રિલોચનમ્ ॥
શ્રોતુમિચ્છામ્યહં નાથ તન્ત્રાન્ બહુ પરિપ્લુતાન્

શ્રીપર્વતી ઉવાચ
દેવદેવ મહાદેવ સંસારાર્ણવતારક ।
નમસ્તે દેવ દેવેશ નીલકણ્ઠ ત્રિલોચન

નમસ્તે પાર્વતીનાથ દશવિદ્યાપતે નમઃ ।
ગઙ્ગાધર જગત્સ્વામિન્ પ્રભો શઙ્કર ભો હર

નિઃશેષજગદાધાર નિરાધાર નિરીહક ।
નિર્બીજ નિર્ગુણાભાષ સગુણાન્તકર પ્રભો

નમસ્તે વિજયાધાર વિજયેશ જયાત્મક ।
વિજયાનન્દ સન્તોષ વિજયાપ્રાણવલ્લભ

જગદીશ જગદ્બન્દ્ય જયેશ જગદીશ્વર ।
વિશ્વનાથ પ્રસીદ ત્વં પ્રસન્નો ભવ શઙ્કર

શ્રીશિવ ઉવાચ
સપ્તકોટિમહાવિદ્યા ઉપવિદ્યા તથૈવ ચ ।
શ્રીવિષ્ણોઃ કોટિમન્ત્રેષુ કોટિમન્ત્રે શિવસ્ય ચ

શૂદ્રાણામધિકારોઽસ્તિ સ્વાહાપ્રણવવર્જિતે ।
સર્વેષાં દુર્લભો માર્ગો દુર્ગામાર્ગો મહેશ્વરિ

ભક્તાનાં ખલુ શાક્તાનાં સુલભાત્ સુલભઃ પ્રિયે ।
નાતઃ પરતરો દેવો નાતઃ પરતરં સુખમ્

નાતઃ પરતરા વિદ્યા નાતઃ પરતરં પદમ્ ।
શૃણુ દેવિ વરારોહે પરાત્ પરં પ્રિયે

કેવલં દક્ષિણં સવ્યમાશ્રિત્ય યદિ સાધકઃ ।
ભાવયેત્ પરમાં વિદ્યામુમેશો નાત્ર સંશયઃ

શૃણુ ચણ્ડિ વરારોહે કરાલાસ્યે દિગમ્બરે ।
સ્તૌતિ ત્વાં સતતં ભક્ત્યા નમસ્તે જગદમ્બિકે

શ્રીશિવ ઉવાચ
ઘોરદંષ્ટ્રે કરાલાસ્યે સુરામાંસબલિપ્રિયે ।
ચણ્ડમુણ્ડક્ષયકરે મુણ્ડમાલાવિભૂષિતે

નમસ્તેઽસ્તુ મહામાયે દુર્ગે મહિષવાહિનિ ।
નમસ્તે જગદીશાનદયિતે સર્વમઙ્ગલે

વક્ષ્યે પરમતત્ત્વં વૈ સારાત્ સારં પરાત્ પરમ્ ।
શૃણુ દેવિ જગદ્ધાત્રિ સાવધાનાઽવધારય

યોનિમુદ્રાપ્રકરણં પૂર્વં ચ ગદિતં મયા ।
ત્રિકોણં ગુણસંયુક્તં યોનિં પરમકારણમ્

સંગચ્છેત્ તુ શિવાબુદ્ધ્યા શિવરૂપી ન સંશયઃ ।
તુષેણ બદ્ધો વ્રીહિઃ સ્યાત્ તુષાભાવે તુ તણ્ડુલઃ

કર્મબદ્ધો ભવેજ્જીવઃ કર્મમુક્તઃ સદાશિવઃ ।
જીવાનાં પરમો રોગઃ કર્મભોગઃ સુદારુણઃ

તસ્માત્ તારાં જગદ્ધાત્રીં પૂજયેદ્ ભક્તિભાવતઃ ।
જટા - ભસ્મ - વ્યાઘ્રચર્મધારી પરમપાવનઃ

નિરન્તરં જપેદ્ યસ્તુ સાધકેન્દ્રો ધરાતલે ।
સ ધન્યઃ સ કવિર્વીરો દિવ્યસ્તુ પરમઃ પશુઃ

ભાવશુદ્ધિર્જ્ઞાનશુદ્ધિઃ પરશુદ્ધિસ્તુ સઙ્ગતા ।
ચિતાશુદ્ધિઃ પીઠશુદ્ધિર્ધ્યાનશુદ્ધિસ્તુ સચ્છિવા

જ્ઞાત્વા પરમતત્ત્વં વૈ જ્ઞાનં મોક્ષૈકસાધનમ્ ।
ભવેત્ તુ પરયા બુદ્ધ્યા જીવઃ શિવત્વમાલભેત્

વિહારં જગદમ્બાયાઃ સહસ્રારે મનોરમમ્ ।
સદાશિવેન સંયોગં યઃ કરોતિ સ પણ્ડિતઃ

જ્ઞાનિનાં ચ મતં વક્ષ્યે જ્ઞાનિનાં ચ મતં મુદા ।
જ્ઞાનાઽજ્ઞાનસમાયુક્તઃ સર્વદા વિહરેદ્ ભુવિ

ઇડા વામે સ્થિતા નાડી વિધુસ્તત્રાપિ તિષ્ઠતિ ।
દક્ષેઽપિ પિઙ્ગલા નાડી સૂર્યસ્તત્રાપિ તિષ્ઠતિ

મધ્યે સુષુમ્ના તન્મધ્યે બ્રહ્મનાડી મનોહરા ।
મધ્યમં ખં વિદધ્યાદ્ યો જનો મૃત્યુઞ્જયો ભવેત્

ચિત્રિણીમધ્યગં વાયું પૂરણં રેચનં યદા ।
કરોતિ વામનાસાગ્રૈરપિ સત્યં સુરેશ્વરિ

દક્ષે તુ દક્ષિણા વામા વિરામા ચાઽસિતાસિતા ।
નાડી વામે કપાલા ચ વિજિહ્વા શૂલકારિણી

કઙ્કાલા નિષ્કલઙ્કા ચ સવ્યદક્ષિણતઃ ક્રમાત્ ।
ભિત્વા ચ ક્રમશશ્ચક્રં યોગિન્દ્રૈરપ્યલભ્યગમ્

નભોમધ્યગતં ચક્રં સહસ્રાબ્જં મનોરમમ્ ।
કાલીપુરં તત્ર રમ્યં સર્વવર્ણાત્મકં પ્રિયે

વિધાય ચૈનાં મનસા બુદ્ધ્યા કાયેન ચણ્ડિકામ્ ।
તત્રૈવ ધ્યાનમાસાદ્ય પ્રકરોતિ જપાર્ચનમ્

યદિ ધ્યાનં વરારોહે કરોતિ સતતં મુદા ।
તદૈવ જાયતે સિદ્ધિર્મુક્તિરવ્યભિચારિણી

ન ચ ધ્યાનં ન વા પૂજા ન સ્તુતિઃ પરમાર્થિકા ।
પૂજયેત્ તાં જગદ્ધાત્રીં કુસુમૈર્માનસોદ્ભવૈઃ

કામરૂપે દ્વિજાગારે શ્વપચસ્ય ગૃહેઽથવા ।
ગઙ્ગાદ્વારે પ્રયાગે ચ યા મુક્તિઃ પાવની મુખે

યત્ર કુત્ર મૃતો જ્ઞાની તત્રૈવ મોક્ષમાપ્નુયાત્ ।
દુર્ગાસ્મરણજં પુણ્યં દુર્ગાસ્મરણજં ફલમ્

દુર્ગાયાઃ સ્મરણેનૈવ કિં ન સિધ્યતિ ભૂતલે ।
શૈવો વા વૈષ્ણવો વાપિ શાક્તો વા ગિરિનન્દિનિ

ભજેદ્ દુર્ગા સ્મરેદ્દુર્ગાં જયેદ્ દુર્ગાં શિવપ્રિયામ્ ।
તત્ક્ષણાદ્ દેવદેવેશિ મુચ્યતે ભવબન્ધનાત્

ક્ષીરોદ્ધૃતં યદ્વ * * * તત્ર ક્ષિપ્તં ન પૂર્વવત્ ।
પૃથક્ ત્વયા ગુણેભ્યઃ સ્યાત્ તદ્વદાત્મા ઇહોચ્યતે

ક્ષીરેણ સહિતં તોયં ક્ષીરમેવ યથા ભવેત્ ।
અવિશેષો ભવેત્ તદ્વદ્ જીવાત્મપરમાત્મનોઃ

યથા ચન્દ્રાર્કયોર્બિમ્બો જલપૂર્ણઘટેષુ ચ ।
ઘટે ભગ્ને જલેષ્વેવ પ્રલીનૌ ચન્દ્રસૂર્યકૌ

ન જાયતે ન મ્રિયતે આત્મા તુ પરમઃ શિવઃ ।
આત્મજ્ઞાનં સમાસાદ્ય સંસારાર્ણવલઙ્ઘને

તરત્યેવં સદા ચણ્ડિ જીવઃ શિવત્વમાલભેત્ ।
પાર્વતીચરણદ્વન્દ્વભજનાત્ કિન્નરો ભવેત્

સ્વર્ગો ભોગશ્ચ મોક્ષશ્ચ શાક્તાનાં ન ભવેત્ કિમુ ।
શાક્તાનાં ચૈવ નિન્દા વૈ યે કુર્વન્તિ નરાધમાઃ

તેષાં લોહિતપાનં વૈ કુર્વન્તિ ભૈરવા ગણાઃ ।
ભૈરવાશ્ચૈવ ભૈરવ્યઃ સદા હિંસન્તિ પામરાન્

તેષાં ક્ષતજપાનં વૈ કુર્વન્તિ બહુરક્તપાઃ ।
શાક્તાન્ હિંસન્તિ ગર્જન્તિ નિન્દતિ બહુજલ્પકાઃ

ભિનત્તિ તેષાં દેવેશિ શિરાંસિ શિવવલ્લભા ।
શાક્તાનામુત્તમો નાસ્તિ સ્વર્ગે મર્ત્યે રસાતલે

શાક્તસ્તુ શઙ્કરો જ્ઞેયસ્ત્રિનેત્રશ્ચન્દ્રશેખરઃ ।
સ્વયં ગઙ્ગાધરો ભૂત્વા વિહરેત્ ક્ષિતિમણ્ડલે

નાસ્તિ તન્ત્રસમં શાસ્ત્રં ન ભક્તઃ કેશવાત્ પરઃ ।
ન યોગી શઙ્કરો જ્ઞાની ન દુર્ગા દેવતા પરા

દક્ષિણાંશે યદ્વિક્ષીણા ઉરો બાહ્યમધઃ ક્ષિપેત્ ।
ગતિર્મૃત્યુઃ પલાઙ્કોઽર્દ્ધં ખેદયુક્તા ચ મુક્તિદા

દુર્ગાયા મન્ત્રનિકરં નાનાતન્ત્રે ત્વયા શ્રુતમ્ ।
નાનામન્ત્રં ન કુત્રાપિ કથિતં ન શ્રૂતં ત્વયા

દુર્ગા દુર્ગેતિ દુર્ગેતિ દુર્ગાનામ પરં મનુમ્ ।
યો ભજેત્ સતતં ચણ્ડિ જીવન્મુક્તઃ સ માનવઃ

મહોત્પાતે મહાઘોરે મહાવિપદિ સઙ્કટે ।
મહાદુઃખે મહાશોકે મહાભયસમુત્થિતે

યઃ સદા સંસ્મરેદ્ દુર્ગાં યો જપેત્ પરમં મનુમ્ ।
સ જીવલોકે દેવેશિ નીલકણ્ઠત્વમાપ્નુયાત્

જીવઃ શિવઃ શિવા વામાઽભિરામા શિવનન્દિનિ ।
એવં ભાવં સમાશ્રિત્ય ક્રિયાભક્તિસમન્વિતઃ

ભવત્યેવં ક્વ વા દુઃખં ક્વ ભયં નરકં ક્વ વા ।
ક્વ કલિશ્ચ ક્વ કાલશ્ચ સર્વં સત્યમયં વપુઃ

કાલ્યાશ્ચૈવ હિ તારાયાસ્ત્રિપુરાયાશ્ચ સુન્દરિ ।
ભૈરવ્યા ભુવનાયાશ્ચ ચરિતં મુક્તિદાયકમ્

મુક્તિશયયાં જ્ઞાનમયીં સદા સન્તોષકારિણીમ્ ।
યેનૈવ ભાવમાસાદ્ય ગચ્છેદ્ દુઃખવિનાશિનીમ્

જપનં પાર્વતીદેવ્યાઃ પૂજનં પાર્વતીપદમ્ ।
શરણં પાર્વતીદેવ્યાશ્ચરણં ભવનાશનમ્

કાલસ્ય યન્ત્રણાત્ કાલી કરાલારિવિમર્દનાત્ ।
તસ્માત્ પદાઙ્ઘ્રિભજનાદ્ દેવીપુત્રો ભવેદ્ ધ્રુવમ્

પુરા નિગદિતં ચણ્ડિ નાનાચારં પૃથગ્વિધમ્ ।
ઇદાનીં યાગવૃત્તાન્તં મનસઃ શૃણુ શઙ્કરિ

હૃત્પદ્મે ભાવયેદ્ દુર્ગાં દેવીં દુર્ગતિનાશિનીમ્ ।
કરાલાં ઘોરદંષ્ટ્રાં ચ મુણ્ડમાલાવિભૂષિતામ્

શવારૂઢાં શ્મશાનસ્થાં તારિણીં ચ દિગમ્બરામ્ ।
અર્દ્ધહાસાં લલજ્જિહ્વાં મેઘશ્યામાં વરપ્રદામ્

ભવાનીં યઃ સ્મરેન્નિત્યમન્તે સ પાર્વતીપતિઃ ।
સહસ્રારે સ્થિતં લિઙ્ગં તપ્તચામીકરપ્રભમ્

કદા શુક્લં કદા કૃષ્ણં પીતં નીલં કદા કદા ।
કદા વર્ણમયં લિઙ્ગં સ્વરાદિપરિભૂષિતમ્

પદ્મમધ્યસ્થિતં લિઙ્ગં જ્યોતિર્મયમચિન્તકમ્ ।
જીવાદિભૂષિતં લિઙ્ગં કર્ણિકોપરિ સંસ્થિતમ્

સદાશિવં તતો ભક્ત્યા પ્રણમેદ્ ભક્તિસંયુતઃ ।
તદા સિદ્ધિમવાપ્નોતિ નાન્યથા કલ્પકોટિભિઃ ॥
કિં બહૂક્ત્યા મહેશાનિ ગુરુભક્ત્યા ચ સિધ્યતિ

॥ ઇતિ મુણ્ડમાલાતન્ત્રે પાર્વતીશ્વરસંવાદે તૃતીયઃ પટલઃ

અથ ચતુર્થઃ પટલઃ
દેવી ઉવાચ
પૃચ્છામ્યેકં મહાભાગ યોગેન્દ્ર ભક્તવત્સલ ।
પૃચ્છામિ પરમં તત્ત્વં દેવદેવ સદાશિવ

શ્રીશિવ ઉવાચ
કથયિષ્યે જગદ્ધાત્રિ દુર્ગાયાશ્ચરિતં શૃણુ ।
એકા દુર્ગા જગદ્ધાત્રી એકો હિ પરમઃ શિવઃ

મદંશાશ્ચૈવ યે ભૂતાસ્તે શૈવા નાત્ર સંશયઃ ।
ત્વદંશાશ્ચૈવ શાક્તાશ્ચ સત્યં વૈ ગિરિનન્દિનિ

બહુવર્ષસહસ્રાન્તે શૈવાઃ શક્તિપરાયણાઃ ।
શાક્તાશ્ચ શાઙ્કરા દેવિ યસ્ય કસ્ય કુલોદ્ભવાઃ

ચાણ્ડાલા બ્રાહ્મણાઃ શૂદ્રાઃ ક્ષત્રિયા વૈશ્યસમ્ભવાઃ ।
એતે શાક્તા જગદ્ધાત્રિ ન માનુષ્યાઃ કદાચન

પશ્યન્તિ માનુષાન્ લોકે કેવલં ચર્મચક્ષુષા ।
શ્રદ્ધયાઽશ્રદ્ધયા વાપિ યઃ કશ્ચિન્માનવઃ સ્મરેત્

દુર્ગાં દુર્ગશતોત્તીર્ય સ યાતિ પરમાં ગતિમ્ ।
યથેન્દ્રશ્ચ કુબેરશ્ચ વરુણઃ સાધકો યથા

તથા ચ સાધકો લોકે દુર્ગાભક્તિપરાયણઃ ।
અભક્ત્યાપિ ચ ભક્ત્યા વા યઃ સ્મરેદ્ રુદ્રગેહિનીમ્

સુખં ભુક્ત્વેહ લોકે તુ સ યાસ્યતિ શિવાલયમ્ ।
ઇહૈવ સ્વર્ગં નરકં મોક્ષં વા ગિરિનન્દિનિ

ઇહ લોકે તુ વાસઃ સ્યાત્ સર્વશક્તિમયં જગત્ ।
દુર્ગાયાઃ શતનામાનિ શૃણુ ત્વં ભવગેહિનિ

દુર્ગા ભવાની દેવેશી વિશ્વનાથપ્રિયા શિવા ।
ઘોરદંષ્ટ્રા કરાલાસ્યા મુણ્ડમાલાવિભૂષિતા

રુદ્રાણી તારિણી તારા માહેશી ભવવલ્લભા ।
નારાયણી જગદ્ધાત્રી મહાદેવપ્રિયા જયા

વિજયા ચ જયારાધ્યા શર્વાણી હરવલ્લભા ।
અસિતા ચાણિમા દેવી લઘિમા ગરિમા તથા

મહેશશક્તિર્વિશ્વેશી ગૌરી પર્વતનન્દિની ।
નિત્યા ચ નિષ્કલઙ્કા ચ નિરીહા નિત્યનૂતના

રક્તા રક્તમુખી વાણી વસુયુક્તા વસુપ્રદા ।
રામપ્રિયા રામરતા રઘુનાથવરપ્રદા

બાહ્યેશ્વરી બાહ્યરતા કૃષ્ણા કૃષ્ણવરપ્રદા ।
યશોદા રાધિકા ચણ્ડી દ્રૌપદી રુક્મિણી તથા

ગુહપ્રિયા ગુહરતા ગુહવંશવિલાલિની ।
ગણેશજનની માતા વિશ્વરૂપા ચ જાહ્નવી

ગઙ્ગા કાલી ચ કાશી ચ ભૈરવી ભુવનેશ્વરી ।
નિર્મલા ચ સુગન્ધા ચ દેવકી દેવપૂજિતા

દક્ષજા દક્ષિણા દક્ષા દક્ષયજ્ઞવિનાશિની ।
સુશીલા સુન્દરી સૌમ્યા માતઙ્ગી કમલાત્મિકા

નિશુમ્ભનાશિની શુમ્ભનાશિની ચણ્ડનાશિની ।
ધૂમ્રલોચનસંહર્ત્રીં મહિષાસુરમર્દિની

ઉમા ગૌરી કરાલા ચ કામિની વિશ્વમોહની ।
જગદીશપ્રિયા જન્મનાશિની ભવનાશિની

ઘોરવક્ત્રા લલજ્જિહ્વા અટ્ટહાસા દિગમ્બરા ।
ભારતી સ્વર્ગતા દેવિ ભોગદા મોક્ષદાયિની

ઇત્યેવં શતનામાનિ કથિતાનિ વરાનને ।
નામસ્મરણમાત્રેણ જીવન્મુક્તો ન સંશયઃ

યઃ પઠેત્ પ્રાતરુત્થાય સ્મૃત્વા દુર્ગાપદદ્વયમ્ ।
મુચ્યતે જન્મબન્ધેભ્યો નાત્ર કાર્યા વિચારણા

સિદ્ધિકાલે દિવાભાગે નિશાયાં વા નિશામુખે ।
પઠિત્વા શતનામાનિ મન્ત્રસિદ્ધિં લભેદ્ ધ્રુવમ્

અજ્ઞાત્વા સ્તવરાજં તુ દશવિદ્યાં લભેદ્ યદિ ।
તથા નૈવ ચ સિદ્ધિઃ સ્યાત્ સત્યં સત્યં મહેશ્વરિ

કામરૂપે કામભાગે કામિનીકામમન્દિરે ।
કામિનીવલ્લભો ભૂત્વા વિહરેત્ ક્ષિતિમણ્ડલે

વામભાગે તુ રમણીં સંસ્થાપ્ય વરવર્ણિનિ ।
તામ્બૂલપૂરિતમુખઃ સર્વદા તારિણીં ભજેત્

મહાનિશાભાગમધ્યે વામે તુ વામલોચનામ્ ।
કૃત્વા જપતિ તન્મન્ત્રં સિદ્ધિદં સર્વદેહિનામ્

વિલોક્ય મુખપદ્મં ચ વામાયા રમણીમુખઃ ।
પ્રકરોત્યટ્ટહાસં ચ તતો દુર્ગા પ્રસીદતિ

પરં બ્રહ્મ પરં ધામ પરમાનન્દકારકમ્ ।
નિત્યાનન્દં નિર્વિકારં નિરીહં તારિણીપદમ્

ધ્યાત્વા મોક્ષમવાપ્નોતિ સત્યં પરમસુન્દરિ ।
યથા દુર્ગા તથા વામા યથા વામા તથા શિવા

શિવભક્તિમયો ભૂત્વા વિહરેત્ સર્વદા શુચિઃ ।
વિના કાલીપદદ્વન્દ્વં કઃ શાક્તો ધરણીતલે

શક્તિહીનઃ શવઃ સાક્ષાત્ શક્તિયુક્તઃ સદાશિવઃ ।
શક્તિયુક્તો ભવેદ્ વિષ્ણુરથવા વિષ્ણુરેવ હિ

રાજમાર્ગં શક્તિમાર્ગં જાનીહિ જગદમ્બિકે ।
અન્યપૂજા ન કર્તવ્યા ન સ્તુતિર્ન ચ ભાવના

ન ચ ધ્યાનં યોગસિદ્ધિર્નાન્યમન્ત્રં વિચક્ષણૈઃ ।
કેવલં કાલિકાપાદપદ્મં ભવવિઘટ્ટનમ્

નાન્યો દેવો ન વા તીર્થં ન ધ્યાનં ન ચ જલ્પના ।
ન તીર્થભ્રમણં ચણ્ડિ ન વાત્ર યોગધારણા

સ્તુતિર્દુર્ગા મતિર્દુર્ગા સ્થિતિર્દુર્ગા સદાશિવઃ ।
ક્ષુધા નિદ્રા દયાભ્રાન્તિઃ ક્ષાન્તિર્દુર્ગા યતો ગતિઃ

શક્તિઃ શિવઃ શિવઃ શક્તિઃ શક્તિર્બ્રહ્મા જનાર્દનઃ ।
શક્તિઃ સૂર્યશ્ચ ચન્દ્રશ્ચ કુબેરો વરુણશ્ચ યઃ

શક્તિરૂપં જગત્ સર્વં યો ન વેત્તિ સ પાતકી ।
એવં શક્તિમયં વિશ્વં યો વેદ ધરણીતલે

સ વેદ ધરણીમધ્યે કાલિકાં જગદમ્બિકામ્ ।
સ એવ સર્વશાસ્ત્રેષુ કોવિદઃ સર્વવલ્લભઃ

શ્મશાનસિદ્ધિં લભતે નાત્ર કાર્યા વિચારણા ।
શૂન્યાગારં શ્મશાનં વા તુલ્યં પરમકોવિદૈઃ

યો વા ગચ્છતિ તત્રૈવ સ વિશ્વેશો ભવેદ્ ધ્રુવમ્ ।
નિશાભાગે ચતુર્દશ્યામમાયાં હરવલ્લભે

જપેદયુતસંખ્યં ચ સ સિદ્ધઃ સર્વકર્મસુ ।
સ યોગીન્દ્રઃ સ ભાવજ્ઞઃ સ ઘીરઃ સર્વકર્મસુ

નિત્યાનદઃ સ વિજ્ઞેયઃ સર્વકાર્યવિશારદઃ ।
પ્રભાતેઽશ્વત્થમૂલે તુ ગત્વા પરમકોબિદઃ

પૂજયેત્ પરયા ભક્ત્યા સામિષૈર્લોહિતૈરપિ ।
બોલ્વૈર્બિલ્વદલૈર્વાપિ બિલ્વપુષ્પં વરાનને

જપેલ્લક્ષં ચતુર્દશ્યામારભ્ય નગનન્દિનિ ।
પઞ્ચમેન યજેદ્ દેવીં બિલ્વમૂલે દિવાનિશમ્

તદા વાક્સિદ્ધિમાપ્નોતિ ક્ષુદ્રો વાચસ્પતિર્ભવેત્ ।
આસનં દ્વાદશવિધં સઙ્કેતાસનમુત્તમમ્

ભદ્રપીઠાસનં પદ્માસનં સિદ્ધાસનં તથા ।
સિદ્ધસિદ્ધાસનં દેવ્યાસનં ચ કુક્કુટાસનમ્

વીરાસનં પરં ભદ્રે ચાસનં વરદાસનમ્ ।
સિંહાસનં પરં દેવિ શ્મશાનાસનમુત્તમમ્

શવાસનં વરારોહે દેવાનામપિ દુર્લભમ્ ।
યત્રાશ્રયેત્ પરં બ્રહ્માસનં પરમભૂષિતમ્

વામભાગે સ્ત્રિયં સ્થાપ્ય ધૂમામોદસુગન્ધિભિઃ ।
તામ્બૂલચર્વણાદ્યૈશ્ચ પૂજયેદ્ ભવગેહિનીમ્

ભવાનીં તારિણીં વિદ્યાં બ્રહ્મવિદ્યાં મનોહરામ્ ।
સ્તુત્વા મોક્ષમવાપ્નોતિ તત્ક્ષણાદેવ શાઙ્કરિ

વિશ્વમાતર્જયાધારે વિશ્વેશ્વરિ નમોઽસ્તુ તે ।
કરાલવદને ઘોરે ચન્દ્રશેખરવલ્લભે

માં તારય મહાભાગે દેહિ સિદ્ધિમનુત્તમામ્ ।
કામકલ્પલતારૂપે કામેશ્વરિ કલામતે

કામરૂપે ચ વિજયે નિસ્તારે યશવાહિની ।
ગૃહીત્વા શવચાણ્ડાલં ધૃત્વા ભાલં મુખં શિરઃ

નાસાં કર્ણૌ ચ હૃત્પદ્મં નાભિં લિઙ્ગં ગુદં તથા ।
બાહૂ પૃષ્ઠં ચ જઠરં ધૃત્વા ધૃત્વા મુહુર્મુહુઃ

આદૌ માયાં પુનર્માયાં પુનર્માયાં નિયોજયેત્ ।
વધૂબીજં તથા લજ્જા સર્વાઙ્ગે નિક્ષિપેન્મનુમ્

અષ્ટોત્તરમનું જપ્ત્વા કૃત્વા ચ વન્દનં શિવમ્ ।
પુનર્વિહારબીજેન નીલદ્રવ્યેણ ચક્ષુષા

તત્ક્ષણાદ્ દેવદેવેશિ જાયતે નાત્ર સંશયઃ ।
શૂન્યાગારે મહેશાનિ ભવેદ્ ધનદદિઙ્મુખઃ

શઙ્ખમાલા ગૃહીતવ્યા સ્ફાટિકી વાઽથ રાજતી ।
ચામીકરમયી માલા પ્રવાલઘટિતાઽથવા

મૂર્ધ્નિ દેશે કુલ્લુકાં ચ જપ્ત્વા શતમનુત્તમમ્ ।
તદા મન્ત્રં જપેન્મન્ત્રી મહેશો નાત્ર સંશયઃ

સ શક્તઃ શિવભક્તશ્ચ ભૈરવશ્ચ સદાશિવઃ ।
કુલીનશ્ચ કુલજ્ઞશ્ચ યો જપેત્ તારિણીમનુમ્

હૃત્પદ્મગાં જગદ્ધાત્રીં મૂર્ધ્નિં સંસ્થાં સુરેશ્વરીમ્ ।
ભુજઙ્ગિનીં જાગરિણીં ભુજગાદિવિભૂષિતામ્

નારદાદ્યૈઃ સાધકેન્દ્રૈઃ સેવિતાં સિદ્ધસેવિતામ્ ।
અશ્વત્થે બિલ્વમૂલે વા સ્વજાયામન્દિરેઽથવા

દેવીં વા કામિનીં વાપિ ધ્યાયેત્ પરમદેવતામ્ ।
આદ્યાં જ્યોતિર્મયીં વિદ્યામભયાં વરદાં શિવામ્

પ્રણમેત સ્તુતિભિશ્ચણ્ડીં સર્વદોષનિકૃન્તનીમ્ ।
શ્મશાનસ્થઃ શિવસ્થોઽપિ પઠેત્ કવચમુત્તમમ્

તદા શ્મશાને દેવેશિ શવે વા વરવર્ણિનિ ।
સિદ્ધિર્ભવિષ્યતિ તદા પરપક્ષા ન ભૈરવાઃ

ઉન્મત્તઃ ક્રોધનશ્ચૈવ ભૈરવો બટુકાત્મકઃ ।
સંહારો ભીષણશ્ચૈવ તથા ચ કાલભૈરવઃ

મહાકાલભૈરવશ્ચ એતે વૈ વસુસઙ્ખ્યકાઃ ।
દૃષ્ટ્વા શ્મશાનં દેવેશિ શવસાધનમેવ ચ

નૃત્યન્તિ ભૈરવાઃ સર્વે ગર્જન્તિ રક્તલોચનાઃ ।
અદ્ય મત્સદૃશો વાપિ અદ્યૈવ વાતુલોઽપિ વા

શવશ્મશાનયોર્મધ્યે ન જાનામિ કથઞ્ચન ।
મા ભૈષીર્ભૈરવાઃ સર્વે વદિષ્યન્તિ ચ બન્ધનાત્

સિંહવ્યાઘ્રવરાહાદ્યાઃ કે વા ગર્જન્તિ સર્વતઃ ।
મા ભૈષીશ્ચૈવ મા ભૈષીર્મા ભૈષીશ્ચૈવ સાધક

યો વા વદિષ્યતિ પુરઃ સ ગુરુસ્તત્ત્વકોવિદઃ ।
વિના તન્ત્રપરિજ્ઞાનાદ્ વિના ગુરુનિષેવણાત્

પ્રાણાયામાદ્ વિના ધ્યાનાદ્ વિના મન્ત્રવિચાલનાત્ ।
વિના જ્ઞાનાદ્ વિના ન્યાસાદ્ વિના શવવિબન્ધનાત્

વિના ભાવાદ્ વિના લાભાદ્ વિના સત્સઙ્ગસેવનાત્ ।
વિના જાપાદ્ વિના તાપાદ્ વિનાપિ કામમન્દિરાત્

નહિ સિધ્યતિ દેવેશિ પ્રત્યક્ષં હરવલ્લભા ।
યદિ ભાગ્યવશાદ્ દેવિ પ્રત્યક્ષં હરવલ્લભા ॥
તદૈવ જાયતે સિદ્ધિર્મહાવિદ્યા પ્રસીદતિ

॥ ઇતિ મુણ્ડમાલાતન્ત્રે પાર્વતીશ્વરસંવાદે ચતુર્થઃ પટલઃ

અથ પઞ્ચમઃ પટલઃ
એકદા પાર્વતી દેવી કૈલાસનિલયાશ્રયા ।
અટ્ટહાસં પ્રકુર્વન્તી પ્રાહ ગદ્ગદયા ગિરા

શ્રીપાર્વતી ઉવાચ
દેવદેવ મહાદેવ વિશ્વનાથ સદાશિવ ।
પૃચ્છામિ જગદીશાન મમ મન્દિરઘર્ષણમ્

કિંવિધં વાપિ ભો નાથ કસ્મિન્ કાલે મહેશ્વર ।
શિવશક્તિમયં બ્રહ્મ નિત્યાનન્દમયં વપુઃ

નવકન્યાપૂજનં ચ શ્રુતં વિશ્વેશ્વર પ્રભો ।
કુમારીપૂજનં દેવ શ્રુતં તવ પ્રસાદતઃ

શ્રીશિવ ઉવાચ
શૃઙ્ગારં દ્વાદશવિધં વિપરીતં ચતુર્વિધમ્ ।
ચતુર્વિધં ચ શૈવાનાં નવેષુ ચ કરેષુ ચ

યો ન જાનાતિ વિશ્વેશિ સ પશુર્નાત્ર સંશયઃ ।
પશોરગ્રે ન પ્રકાશ્યં ન પ્રકાશ્યં કથઞ્ચન

પશુસ્તુ દારુણઃ શત્રુઃ સર્વભાવવિલોપકૃત ।
કલ્પકોટિશતેનાપિ વત્સરેણાપિ શાઙ્કરિ

નહિ સિધ્યતિ વિશ્વેશિ સત્યં સત્યં વદામ્યહમ્ ।
શૃઙ્ગારરસલાવણ્યં યો ન જાનાતિ પણ્ડિતઃ

સ મૂર્ખઃ સર્વશાસ્ત્રેષુ શક્તિભ્રષ્ટો ન સંશયઃ ।
શૃઙ્ગારરસલાવણ્યે શાક્તાનન્દો યથા ભવેત્

ન શૈવે વૈષ્ણવે વાપિ સૌરે વા ગાણપત્યકે ।
તથાનન્દો મહેશાનિ જાયતે ન કથઞ્ચન

શિવો જાતિઃ શિવો ગાત્રં શિવો ધર્મઃ શિવો રતિઃ ।
શિવઃ કર્તા શિવઃ પાતા શિવો હર્તા શિવાત્મકઃ

શિવો બુદ્ધિઃ શિવઃ શાન્તિઃ શિવો ગતિઃ શિવો મતિઃ ।
શિવઃ ક્રિયા શિવઃ શક્તિઃ શિવો મુક્તિઃ શિવાત્મિકા

શિવોઽહં નાત્ર સન્દેહો જીવોઽહં શિવ એવ હિ ।
ઇત્યેવં યસ્ય મનસિ વર્તતે ગિરિનન્દિનિ

તદૈવ જાયતે સિદ્ધિર્મુક્તિરવ્યભિચારિણી ।
શક્તિમાર્ગે વારારોહેઽવધૂતઃ શઙ્કરઃ સ્વયમ્

અવધૂતી યસ્ય વામાઽવધૂતસ્તુ સ્વયં ભવેત્ ।
યત્ર કુત્ર નિવાસશ્ચ કૈલાસો નાત્ર સંશયઃ

મન્દિરં તસ્ય કૈલાસં સ્તમ્ભં મણિમયં સ્મૃતમ્ ।
વૃક્ષાશ્ચ પર્વતાશ્ચૈવ ક્ષુદ્રાઃ સર્વપ્રિયે શિવે

ક્ષુદ્રાશ્ચ બાન્ધવા રુદ્રાઃ સુપ્રધાનાઃ સદાશિવાઃ ।
ભૈરવાઃ કિઙ્કરાઃ સર્વે ભૈરવ્યશ્ચેટિકાદિકાઃ

એવં કૈલાસભવનં સર્વાનન્દકરં પરમ્ ।
મનોહરં સુખમયં સર્વશાન્તિમયં તથા

સર્વપ્રિયં ગુણમયં સર્વસૌખ્યાદિસમ્ભવમ્ ।
એવં સર્વમયં સૌખ્યં યો વૈ દ્રક્ષ્યતિ હે પ્રિયે

સર્વશક્તિયુતો ભૂત્વા વિહરેત્ ક્ષિતિમણ્ડલે ।
કૃષ્ણાષ્ટમ્યાં નવમ્યાં વા પ્રજપેદયુતં નિશિ

તદા સિદ્ધિમવાપ્નોતિ મન્ત્રકાલપુરઃસરઃ ।
એવં ક્રિયા પ્રકર્તવ્યા ગુપ્તા ગુપ્તતરા સ્મૃતા

ગુપ્તા ગુપ્તરા પૂજા પ્રકરાત્ સિદ્ધિનાશિની ।
અન્તઃશાક્તા બહિઃશૈવાઃ સભાયાં વૈષ્ણવા મતાઃ

નાનારૂપધરાઃ કૌલા વિચરન્તિ મહીતલે ।
એવં વિધાનસમ્ભૂતં શ્રુતં તન્ત્રં ચ મોહનમ્

કુલજ્ઞાનં કુલીનસ્ય યોગિનીહૃદયં શ્રુતમ્ ।
સમ્મોહનં વીરતન્ત્રં શ્રુતં શ્રીતન્ત્રમુત્તમમ્

કુલાર્ણવસ્તથા કાલીતન્ત્રં કાલીવિલાસકમ્ ।
શ્રીકાલીકલ્પલતિકા શ્રુતા પરમમાદરાત્

મતભેદે ચ ગુપ્તા સા પૂજા પ્રકટનાશિની ।
અન્તઃશાક્તા બહિઃશાક્તાઃ ક્રિયાશાક્તા વરાનને

ભક્તિશાક્તાઃ કામશાક્તા ધ્યાનશાક્તા મહેશ્વરિ ।
રતિશાક્તાઃ શક્તિશાક્તાઃ સર્વકર્મસુ નાન્યથા

અન્તઃશૈવા બહિઃશિવાઃ સભાયાં વા ગૃહેઽથવા ।
વૈષ્ણવાસ્તાદૃશા એવ સર્વકાલેષુ શઙ્કરિ

ઇત્યેવં પરમો ભાવો ગદિતઃ સર્વયોનિષુ ।
એવં ભાવં સમાશ્રિત્ય શાક્તાઃ પરમપૂજકાઃ

નિત્યાનન્દમયાઃ સર્વે ત્રિનેત્રાશ્ચન્દ્રશેખરાઃ ।
સદા શક્તિવિહારં ચ સદાનન્દપરિપ્લુતાઃ

સદાનન્દઃ સ વિજ્ઞેયઃ સર્વકર્મસુ કૌશલઃ ।
કુલધર્મં સમાશ્રિત્ય યે વસન્તિ મહીતલે

તે શિવાસ્તે શિવા જીવા ભવન્તિ કુલધર્મતઃ ।
કુલીનઃ શઙ્કરો દેવ કુલીનસ્તુ હરિઃ સ્વયમ્

કુલીનો વાસવો દેવઃ કુલીનસ્તુ પિતામહઃ ।
કુલીના મુનયઃ સર્વે કુલીનાઃ પિતરઃ સ્મૃતાઃ

કિન્નરાશ્ચ કુલીનાશ્ચ નરાશ્ચ પશુજીવિનઃ ।
અસુરાશ્ચ કુલીનાશ્ચ કુલજા ન કુલીનકાઃ

અતો ન ભક્તિર્નો મુક્તિરસુરાણાં કદાચન ।
રાક્ષસાશ્ચ કુલીનાશ્ચ ગન્ધર્વાપ્સરયક્ષજાઃ

દેવીભક્તિં સમાસ્થાય કૃતાર્થશ્ચ મહીતલે ।
વિના દુર્ગાપરિજ્ઞાનાદ્ વિફલં પૂજનં જપઃ

તપઃ ક્રિયા વિશુદ્ધિઃ સ્યાદેતત્ સર્વમનર્થકમ્ ।
મૂર્ખો વા પણ્ડિતો વાપિ બ્રાહ્મણો વા વરાનને

ક્ષત્રિયો વૈશ્યજઃ શૂદ્રશ્ચાણ્ડાલો વરવર્ણિનિ ।
સર્વે તુલ્યાશ્ચ શાક્તાશ્ચ હ્યેતત્ સર્વાર્થસાધકમ્

શૃણુ દેવિ વરારોહે મમ વાક્યં સુનિશ્ચિતમ્ ।
શૃઙ્ગારરસલાવણ્યં કોવિદઃ સર્વકર્મસુ

શૃઙ્ગારાજ્જાયતે સૃષ્ટિઃ શૃઙ્ગારાજ્જાયતે રતિઃ ।
શૃઙ્ગારાચ્છઙ્કરસ્તુષ્ટઃ શૃઙ્ગારાદપિ પાર્વતિ

સન્તુષ્ટા ત્વં ચ સન્તુષ્ટો હ્યહમેવ વરાનને ।
શૃઙ્ગારશબ્દં લલિતં કર્કશં વા સુરેશ્વરિ

શૃઙ્ગારશબ્દમાત્રેણ જના યાસ્યન્તિ સદ્ગતિમ્ ।
સ્ત્રિયો દેવ્યઃ સ્ત્રિયઃ પ્રાણાઃ સ્ત્રિય એવ હિ ભૂષણમ્

સ્ત્રીદ્વેષો નૈવ કર્તવ્યસ્તાસુ નિન્દાં પ્રહારકમ્ ।
વર્જયેદ્ દેવદેવેશિ ઘૃણાલજ્જાવિવર્જિતઃ

સ્ત્રીરૂપં તારિણીરૂપં યો વેત્તિ ધરણીતલે ।
સ સ્ત્રીપતિશ્ચ વિજ્ઞેયઃ સ એવ પાર્વતીપતિઃ

કુજે શનૈશ્ચરે વારે ગુરૌ વા ભાર્ગવે તથા ।
તૃતીયાં વા દ્વિતીયાં વા પૂજયેદ્ ભક્તિભાવતઃ

પ્રથમો ભક્તિસમ્પન્નો જનો વાપિ જનાર્દનઃ ।
આદ્યાં જ્યોતિર્મયીં દેવીં ચતુર્થી વાપિ શાઙ્કરિ

પૂજયેત્ પઞ્ચમીં વિદ્યાં પઞ્ચમેન વિભૂષિતામ્ ।
પઞ્ચાનનપ્રિયાં દુર્ગાં પૂજયેદ્ ભક્તિભાવતઃ

એષા ક્રિયા વરારોહે સાત્ત્વિકી રાજસી તથા ।
તામસી ચૈવ દેવેશિ શ્રુતા પૂજા મહેશ્વરિ

યા યા પૂજા નિગદિતા સા સા પૂજા ત્વયા શ્રુતા ।
ઇદાનીં કુણ્ડપુષ્પેણ ગોલપુષ્પેણ શાઙ્કરી

ચક્રપુષ્પેણ શૂલેન વજ્રપુષ્પેણ પાર્વતિ ।
કાલપુષ્પેણ દેવેશિ પૂજયેદ્ધરવલ્લભામ્

તદા સિદ્ધિમવાપ્નોતિ સત્યં સત્યં ન સંશયઃ ।
કુલમાર્ગે રતો જીવઃ શિવ એવ ન સંશયઃ

કુલધર્માર્થગો જન્તુર્વિહરેત્ કુલમાર્ગકે ।
કુલપુષ્પં સમાશ્રિત્ય કુલીનાશ્રમમાશ્રયેત્

કલૌ મત્સ્યં કલૌ માંસં મદ્યં મુદ્રાં ચ મૈથુનમ્ ।
યથા દિવ્યસ્તથા વીરો નાસ્તિ ભિન્નઃ શુચિસ્મિતેઃ

ભક્ષણાત્ પઞ્ચમસ્યાપિ ન દોષો જાયતે નૃણામ્ ।
અશક્તાનામકર્તવ્યં સર્વયોનિવિવર્ધનમ્

મદ્યપાનમકર્તવ્યમકર્તવ્યં કલૌ યુગે ।
શાક્તાનાં ચૈવ શાક્તાનાં કર્તવ્યં સર્વસિદ્ધિદમ્

મહાપીઠાશ્રયં વાપિ મહાપીઠસ્ય દર્શનમ્ ।
મહાપીઠે યજેદ્ દેવીં ભક્ત્યા પરમયા યુતઃ

પૂજયેદ્ રક્તપુષ્પૈશ્ચ રક્તગન્ધાનુલેપનૈઃ ।
બિલ્વપત્રૈસ્તથા પુષ્પૈર્મણિપુષ્પૈશ્ચ ચમ્પકૈઃ

રક્તામ્બુજૈ રક્તમાલ્યૈ રક્તાભરણબૂષણૈઃ ।
મહિષૈશ્ચ યજેદ્ દેવીં ભેષજૈઃ ક્ષતજૈરપિ

છાગજૈલોહિતૈર્દેવીં ગાત્રજૈર્બ્રાહ્મણૈરપિ ।
એવં વિધિવિધાનેન પૂજનં તવ સુન્દરિ

કર્તવ્યં દ્વિજલોકેષુ ગૃહ્યં તવ મહેશ્વરિ ।
એવં તવ વિધાતવ્યા પૂજા ત્રિભુવનેશ્વરિ

તદા સિધીશ્વરો ભૂત્વા ગાણપત્યં લભેત્ તુ સઃ ।
ન પ્રકાશ્યં પશોરગ્રે મમ દિવ્યં સુરેશ્વરિ

પશોર્દર્શનમાત્રેણ નશ્યન્તિ વીરશુદ્ધયઃ ।
મહાસિદ્ધિકરી પૂજા માનસી મુક્તિદાયિની

અન્તર્યાગાત્મિકા સર્વજીવત્વપરિનાશિની ।
બાહ્યપૂજા રાજસી ચ સર્વસૌભાગ્યદાયિની

ભુક્તિમુક્તિપ્રદા ચૈવ સર્વાપત્પરિનાશિની ।
સર્વદોષક્ષયકરી સર્વશત્રુવિનાશિની

સર્વરોગક્ષયકરી સર્વબન્ધવિમોચની ।
ન વીરાણાં પશૂનાં ચ બાહ્યપૂજાઽધમાધમા

કેવલાનાં ચ દિવ્યાનાં ચ બાહ્યપૂજાઽધમા ઇતિ ।
તોડલે યામલે દેવિ શ્રુતા પૂજા ચ વિસ્તરાત્

તથાપિ પૂજા સંક્ષેપાદ્ મયોક્તા ગિરિનન્દિનિ ।
સ્તુતિપાઠાદ્ દૃઢજ્ઞાનાત્ પૂજનાચ્છિવસુન્દરિ

સુપ્રસન્ના મહાવિદ્યા જપાત્ સિદ્ધિર્ભવિષ્યતિ ।
જપાદ્ ભક્તિર્જપાદ્ ભુક્તિર્જપાન્મુક્તિર્જપાત્ ક્રિયા

જપાત્ તન્ત્રં જપાન્મન્ત્રં જપાદ્ યન્ત્રં સુરેશ્વરિ ।
જપાત્ કાન્તિર્જપાત્ શાન્તિર્જપાત્ શ્રદ્ધા જપાદ્ દયા

જપાત્ તુષ્ટિર્જપાત્ પુષ્ટિર્જપાદ્ ગતિર્જપાન્મતિઃ ।
જપાદ્ બુદ્ધિર્જપાલ્લક્ષ્મીર્જપાજ્જાતિર્જપાત્ સ્થિતિઃ ॥
જપાચ્છાન્તિર્જપાચ્છાન્તિર્જપાચ્છાન્તિર્ન સંશયઃ

॥ ઇતિ મુણ્ડમાલાતન્ત્રે પાર્વતીશ્વરસંવાદે પઞ્ચમઃ પટલઃ

અથ ષષ્ઠઃ પટલઃ
દેવી ઉવાચ
પુરા શ્રુતં મહાદેવ શવસાધનમેવ ચ ।
શ્મશાનસાધનં નાથ શ્રુતં પરમમાદરાત્

ન સ્તોત્રં કવચં નાથ શ્રુતં ન શવસાધને ।
કવચેન મહાદેવ સ્તોત્રેણૈવ ચ શઙ્કર ॥
કથં સિદ્ધિર્ભવેદ્ દેવ કવચં બ્રૂહિ સામ્પ્રતમ્

શ્રીશિવ ઉવાચ
શૃણુ દેવિ વરારોહે દુર્ગે પરમસુન્દરિ ।
સિદ્ધ્યર્થે વિનિયોગશ્ચ કવચસ્ય નિયન્ત્રણાત્

સિદ્ધિં સિદ્ધેશ્વરી પાતુ મસ્તકં પાતુ કાલિકા ।
કપાલં કામિની ભાલં પાતુ નેત્રં નગેશ્વરી

કર્ણૌ વિશ્વેશ્વરી પાતુ હૃદયં જગદમ્બિકે ।
કાલી સદા પાતુ મુખં જિહ્વાં નીલસરસ્વતી

કરૌ કરાલવદના પાતુ નિત્યં સુરેશ્વરી ।
દન્તં ગુહ્યં નખં નાભિં પાતુ નિત્યં હિમાત્મજા

નારાયણી કપોલં ચ ગણ્ડા ગણ્ડં સદૈવ તુ ।
કેશં મે ભદ્રકાલી ચ દુર્ગા પાતુ સુરેશ્વરી

પુમાન્ રક્ષતુ મે ચણ્ડી ધનં પાતુ ધનેશ્વરી ।
સ્તનૌ વિશ્વેવરી પાતુ સર્વાઙ્ગં જગદીશ્વરી

ઉગ્રતારા સદા પાતુ મહાનીલસરસ્વતી ।
પાતુ જિહ્વાં મહામાયા પૃષ્ઠં મે જગદમ્બિકા

હરપ્રિયા પાતુ નિત્યં શ્મશાને જગદીશ્વરી ।
શવે પાતુ ચ શર્વાણી સદા રક્ષતુ ચણ્ડિકા

કાત્યાયની કુલં પાતુ સદા ચ શવવાહિની ।
ઘોરદંષ્ટ્રા કરાલાસ્યા પાર્વતી પાતુ સર્વદા

કમલા પાતુ રાજ્યં મે મન્ત્રં મન્ત્રેશ્વરી તથા ।
ઇત્યેવં કવચં દેવિ દેવાનામપિ દુર્લભમ્

યઃ પઠેત્ સતતં દેવિ સિદ્ધિમાપ્નોતિ નિશ્ચિતમ્ ।
સિદ્ધિકાલે સમુત્પન્ને કવચં પ્રપઠેદ્ યદિ

અજ્ઞાત્વા કવચં દેવિ યશ્ચ સિદ્ધિમુપક્રમઃ ।
યશ્ચ સિદ્ધિમવાપ્નોતિ ન મુક્તિર્ન ચ સદ્ગતિઃ

અત એવ મહામાયે કવચં સિદ્ધિકારકમ્ ।
દેવાનાં ચ નરાણાં ચ કિન્નરાણાં ચ દુર્લભમ્

પઠિત્વા કવચં ચણ્ડિ શીઘ્રં સિદ્ધિમવાપ્નુયાત્ ।
મહોત્પાતે મહાદુઃખે મહાવિપદિ સઙ્કટે

પ્રપઠેત્ કવચં દેવિ પઠિત્વા મોક્ષમાપ્નુયાત્ ।
શૂન્યાગારે શ્મશાને વા કામરૂપે મહાઘટે

સ્વવામામન્દિરે કાલેઽપ્યથવા કામમન્દિરે ।
મન્ત્રં મન્ત્રી જપેદ્ બુદ્ધ્યા ભક્ત્યા પરમયા યુતઃ

મૂલે દલે ફલે વાપિ નલે કાલેઽનિલે મલે ।
જલે પઠેત્ પ્રાણબુદ્ધ્યા મનસા સાધકોત્તમઃ

નાડીશુદ્ધિં તતઃ કૃત્વા ભાવ શુદ્ધિં મહેશ્વરિ ।
વિહરેદ્ધરિમધ્યે ચ સર્વશાસ્ત્રાર્થકોવિદઃ

ચિતામારુહ્ય સિદ્ધેશો નીલકણ્ઠત્વમાપ્નુયાત્ ।
વામે ચલતિ કા નાડી દક્ષિણે ખલુ જાહ્નવી

મધ્યે કુલાચલા નાડી દુર્લભા ધરણીતલે ।
ચિત્રિણી પદ્મિની શઙ્ખા વિજૃમ્ભા શોણદા તથા

કઙ્કાલા કૂટજા નાડી કપોલા ગોલજા ખલા ।
નિજદેહે વસન્ત્યેતા બ્રહ્મનાડીં સમાશ્રિતાઃ

સર્વાસાં ધરણીમધ્યે ગૌરી સૂક્ષ્મા ચ તારિણી ।
ઘણ્ટાકર્ણા લોલજિહ્વા વિકટા ચન્દ્રવલ્લભા

મહાનીલા વીરભદ્રા સુલજ્જા નખદા શુભા ।
બલાકા કાકિની રાકા કાલઘણ્ટા શિવા સિતા

દર્દુરા ચ દુરારાધ્યા વિશોકવદનાઽનઘા ।
જમ્ભિની પુક્કસા શોણા યશોદા મખદા ખદા

ખગા ખરવતી નાડી કોલા હેલા હલાહલા ।
ઇડા ચ પિઙ્ગલા ચૈવ સુષુમ્ના પ્રાગરૂપિણી

ગાન્ધારી કોટરાક્ષી ચ કુલજા કુલપણ્ડિતા ।
સવ્યે કનખલા નાડી દક્ષિણે કામપાલિકા

વિહારં નીલકણ્ઠસ્ય દેવાનામપિ દુર્લભમ્ ।
ક્રોડે વિશ્વમ્ભરા કામા કરાલા મેઘવાહિની

ઘનભા ઘનદા ચણ્ડી સુશીલા વરપણ્ડિતા ।
વિશ્વારણ્યા વિશ્વવસની બહુપાદા કટાક્ષજા

નન્દિની શોણદા ગઙ્ગા કાશી કમલવાસિની ।
એવં યદિ મહામાયે ભાવયેત્ સુરપૂજિતામ્

તદૈવ જાયતે સિદ્ધિઃ સત્યં સત્યં ન સંશયઃ ।
બહુપાદકટા ઘોરા નિર્જિતા ઘનભેદિની

નાડીવિહારસમ્પર્કાજ્જીવન્મુક્તો ન સંશયઃ ।
શૃણુ દેવેશિ ઘોરાભે કરાલભે દિગમ્બરે

ચિન્તામણિપ્રસાદેન કિં ન સિધ્યતિ ભૂતલે ।
મૂલે ચતુર્દલે પદ્મે સ્વાધિષ્ઠાને ચ ષડ્દલે

મણિપૂરેઽનાહતે ચ આજ્ઞાચક્રે મહેશ્વરિ ।
એવં ચક્રે પરિન્યસ્તૈર્દશદ્વાદશષોડશૈઃ

દલૈસ્તુ મઙ્કુરં વર્ણં ન્યસ્તં ગાવશતં મતમ્ ।
યત્ર કાલીપુરં દેવિ બ્રહ્માદ્યૈરપિ સેવિતમ્

નીલકણ્ઠં ત્રિલોકેશં સહસ્રાબ્જનિવાસિનમ્ ।
કોટીશં કુલકોટીશં સાધકેન્દ્રૈઃ સુશોભિતમ્

ધ્યાયેત્ પરમનિર્વિણ્ણો દેવઃ પરમપાવનઃ ।
જીવઃ શિવસ્તુ વિજ્ઞેયો વિશ્વેશઃ સર્વદા રતિઃ

બ્રહ્મતત્ત્વં વરારોહે દેવાનામપિ દુર્લભમ્ ।
સ્વરાદિનિષ્ઠિતં લિઙ્ગં સ્વરવ્યઞ્જનભૂષિતમ્

વર્ણમાલાપરિન્યસ્તં લિઙ્ગં ભુવનશોભિતમ્ ।
મહાબીજં મહોત્સાહૈર્નાદિતં પરમાત્મકમ્

નીલકણ્ઠં મહાદેવં સદા શક્તિસમન્વિતમ્ ।
ધ્યાયેત્ તુ પૂજયેદ્ દેવં મનસા વચસા ઇતિ

તદૈવ સાધકો લોકે ચાન્તર્યાગપરાયણઃ ।
અન્તર્યાગં મહામાયે સાધકાનામગમ્યકમ્

બ્રહ્માણ્ડં વૈ શરીરં તુ સર્વેષાં પ્રાણધારિણામ્ ।
બ્રહ્માણ્ડે યે ગુણાઃ સન્તિ તે તિષ્ઠન્તિ કલેવરે

શરીરં તત્ત્વઘટિતં નાનારસપરિપ્લુતમ્ ।
ચન્દ્રબિન્દુસમાયુક્તં નાદબિન્દુવિભૂષિતમ્

શરીરં શઙ્કરસ્યાપિ દુર્લભં મુક્તિદાયકમ્ ।
યાવન્મુક્તિર્મહામાયે તાવદેવ હિ સાધકઃ

તાવત્ ક્રિયા ચ ભુક્તિશ્ચ મુક્તિરવ્યભિચારિણી ।
મહાઘોરે સમાક્લેશે શરીરં બ્રહ્મણઃ પદમ્

પાવિતં ચ પ્રસૂનં ચ દેહજં સર્વમઙ્ગજમ્ ।
ગૃહીત્વા કાલિકાં દેવીં મુણ્ડમાલાવિભૂષિતામ્

પૂજયેત્ પરયા ભક્ત્યા શિવ એવ ન સંશયઃ ।
બ્રહ્માણ્ડઘટિતાં મૂર્તિમઙ્ગદૈશ્ચ વિભૂષિતામ્

ચતુર્ભૂજાં લોલજિહ્વાં નાનાશક્તિસમન્વિતામ્ ।
પૂજયેત્ પરમાનન્દો નિજશક્તિસમન્વિતઃ

વામે સ્વવામાં દેવેશિ નાનાલઙ્કારભૂષિતામ્ ।
કુલચક્રસ્ય દેવેશિ પ્રજપેત્ તુ સમઃ શિવઃ

નિશિ ચક્રે કરાલાસ્યાં મુક્તકેશો દિગમ્બરઃ ।
સહસ્રં વાઽયુતં વાપિ જપેન્મદનમન્દિરે

શ્વેતં વા લોહિતં વાપિ કુસુમં પઞ્ચમાન્વિતમ્ ।
એવં વિધિવિધાનેન મહાકાલ્યૈ નિવેદયેત્

દિવા પૂજા વિધાતવ્યા નિશિ પૂજા મહેશ્વરિ ।
સન્ધ્યા પૂજા પ્રકર્તવ્યા તદા સિદ્ધિમવાપ્નુયાત્

ન દિવા ન નિશાભાગે ન સન્ધ્યાયાં કદાચન ।
પૂજયેન્ન જગદ્ધાત્રીં હેલાયાં પરિપૂજયેત્

દિવા ન પૂજયેદ્ દેવીં રાત્રૌ નૈવ ચ નૈવ ચ ।
સર્વદા પૂજયેદ્ દેવીં દિવા રત્રૌ વિવર્જયેત્

યથા ઇડા પિઙ્ગલા ચ સુષુમ્ના બ્રહ્મભેદિની ।
નાડીભ્રમણસમ્પર્કાન્મુક્તિં પ્રાપ્નોતિ સાધકઃ

વિના નાડીપરિજ્ઞાનં વિના નાડીનિષેવણમ્ ।
વિના વિશ્વકરં દેવિ નહિ સિધ્યતિ ભૂતલે

સવ્યે બિલ્વં કરે દક્ષે માલાં સંગૃહ્ય સાધકઃ ।
પ્રજપેત્ પાર્વતીમન્ત્રં સર્વકાર્યાય ભૂતલે

ઘોરદંષ્ટ્રાં કરાલાસ્યામટ્ટહાસાં દિગમ્બરામ્ ।
પ્રણમ્ય ભક્ત્યા દેવેશીં જપેચ્ચિન્તામણિં મનુમ્

ચિન્તામણિપ્રસાદેન કિં ન સિધ્યતિ ભૂતલે ।
ચિન્તામણિં કલ્પલતાં ગૃહીત્વા પરમાં શિવામ્

જપ્ત્વા મહામનું ચણ્ડિ દેવદેવેશ્વરો ભવેત્ ।
જીવઃ શિવત્વં લભતે જ્ઞાનસ્ય વરવર્ણિનિ

ગુરુપાદાબ્જકં દેવિ રહસ્યં પરમાદ્ભુતમ્ ।
વિચિત્રં ચારુપાદાબ્જં પાર્વત્યાઃ શઙ્કરસ્ય ચ

ભજેદૈક્યં વિધાનેન જીવન્મુક્તઃ સ એવ હિ ।
પિણ્ડે યુક્તાઃ પદે યુક્તા રૂપે યુક્તા વરાનને ॥
ગુણાતીતાશ્ચ યે ભક્તાસ્તે મુક્તા નાત્ર સંશયઃ

શ્રીપાર્વતી ઉવાચ
ન પિણ્ડં ન પદં રૂપં ન જાનામિ સુરોત્તમ ।
કથ્યતાં મે દયાસિન્ધો નિશ્ચિતં મતમુત્તમમ્

શ્રીશિવ ઉવાચ
ગુહ્યાદ્ ગુહ્યતરં દેવિ સારમેકં વદામ્યહમ્ ।
પિણ્ડં કુણ્ડલિની શક્તિઃ પદો હંસઃ પ્રકીર્તિતઃ

રૂપં ચાપિ વરારોહે ધ્યાનમેવ ન સંશયઃ ।
મહાકુણ્ડલિનીં દેવીં યો ભજેત્ તુ ભુજઙ્ગિનીમ્

સ કૃતાર્થઃ સ ધન્યશ્ચ સ દેવો વીરસત્તમઃ ।
સ ગુણી સાધકોજ્ઞાની સ માની સ ચ પણ્ડિતઃ

સ કૃતો સર્વબ્રહ્માણ્ડે દેવત્વં લભતે ધ્રુવમ્ ।
યે દિવ્યાઃ સાધકેન્દ્રાશ્ચ યે વીરાઃ સાધકોત્તમાઃ

પશવઃ પશ્વો જ્ઞેયાઃ સર્વશાસ્ત્રાર્થકોવિદાઃ ।
ભાવશુદ્ધિં સમાસ્થાય સર્વકાર્યાર્થકોવિદઃ

સાધકો મુક્તિમાપ્નોતિ સત્યં સત્યં વરાનને ।
શૃણુ દેવિ જગદ્ધાત્રિ સર્વમઙ્ગલમઙ્ગલમ્

તન્ત્રં શૃણુયાદ્ દેવેશિ બ્રહ્મનિર્વાણમાપ્નુયાત્ ।
નિશાભાગે જપેન્મન્ત્રં વામાયુક્તો મહેશ્વરિ

અયુતં ભક્તિભાવેન જીવન્મુક્તઃ સ એવ હિ ।
સહસ્રમયુતં વાપિ કુજવારે નિશામુખે

જપેચ્ચિન્તામણિં મન્ત્રં ક્ષ્માતલે નાત્ર સંશયઃ ।
ચિન્તામણિપ્રસાદેન કિં ન સિધ્યતિ ભૂતલે

યથાવિધિ વિધાનં ચ કૃત્વા ચ મન્મથાલયમ્ ।
વ્રજેત્ તુ ભક્તિભાવેન સ ગચ્છેત્ પરમાં ગતિમ્

નભોગતં મહાપદ્મં સર્વદેવસુપૂજિતમ્ ।
તન્મધ્યસ્થં મહાદેવં નીલકણ્ઠં સદાશિવમ્

યથા શક્તિયુતં દેવિ સર્વાનન્દમનોહરમ્ ।
શુક્લં રક્તં નીલવર્ણં પીતાદિવર્ણશોભિતમ્

મનસા ચિન્તિતં દેવિ દેવં પરમકારણમ્ ।
ધ્યાનં ચ મનસા દેવિ મનસા પરિપૂજિતમ્

મનસા પૂજયેલ્લિઙ્ગં મનસા તર્પણાદિકમ્ ।
મનસા કાલિકાં તારાં મનસા તુ ભુજઙ્ગિનીમ્

મનસા બ્રહ્મનાડીં વૈ વિદધ્યાત્ સર્વકામદામ્ ।
ઇત્યેવં ધ્યાનયોગેન મનસા જગદમ્બિકામ્

પૂજયેત્ પરયા બુદ્ધ્યા સ વિશ્વેશો ભવેદ્ ધ્રુવમ્ ।
સુષુમ્નામધ્યગાં કાલીં કરાલવદનાં શિવામ્

પ્રણમેત્ પાર્વતીં દેવીં મહાનીલસરસ્વતીમ્ ।
ઉગ્રતારાક્રમં વક્ષ્યે દેવાનામપિ દુર્લભમ્

ત્રિકોણવલયામ્ભોજે મહાનીલસરસ્વતીમ્ ।
મયા બુધસ્વરૂપેણ ભાવયેત્ તામહર્નિશમ્

હૃત્પદ્મે ભાવયેત્ ચણ્ડીં હૃત્પદ્મે ભાવયેચ્છિવમ્ ।
હૃત્પદ્મે ભાવમાસાદ્ય પૂજયેદ્ વરવર્ણિનિ

યાવન્નાનાત્વભાવં ચ તાવદેવં પૃથગ્વિધમ્ ।
તવાત્ ક્રિયાઃ પૃથગ્ભાવાસ્તાવન્નાનાવિધા મતાઃ

તાવદ્ ભિન્નાશ્ચ દેવાશ્ચ બ્રહ્મવિષ્ણુમહેશ્વરાઃ ।
ગણેશં ચ દિનેશં ચ વહ્નિં વરુણમેવ ચ

કુબેરં ચાપિ દિક્પાલમેતત્ સર્વં પૃથક્ પૃથક્ ।
તાવન્નાનાવિધાશ્ચેષ્ટાઃ સ્ત્રીપુંનપુંસકાત્મકમ્

તાવદ્ બિલ્વદલં ભિન્નં દેવેશિ તુલસીદલાત્ ।
તાવજ્જવા દ્રોણકૃષ્ણા કરવીરાણિ ભૂતલે

વિભિન્નાનિ ચ દેવેશિ સત્યં વૈ તુલસીદલાત્ ।
તાવદ્ દિવ્યશરીરશ્ચ તાવત્ તુ પશુભાવકઃ

તાવત્ તન્ત્રે ભેદબુદ્ધિસ્તાવદેવ પૃથક્ ક્રિયા ।
હરૌ હરે ભેદબુદ્ધિર્જાયતે જગદમ્બિકે

કરાલવદના કાલી શ્રીમદેકજટા શિવા ।
ષોડશી ભૈરવી ભિન્ના ભિન્ના ચ ભુવનેશ્વરી

છિન્ના ભિન્નાઽન્નપૂર્ણા ચ ભિન્ના ચ બગલામુખી ।
માતઙ્ગી કમલા ભિન્ના ભિન્ના વાણી ચ રાધિકા

ભિન્ના ચેષ્ટા ક્રિયા ભિન્ના ભિન્નો વાચારસંગ્રહઃ ।
યાવન્નૈક્યં પાદપદ્મે ભવાન્યા નૈવ જાયતે

અદ્વૈતે તારિણીપાદપદ્મે પરમપાવને ।
જ્ઞાનપારે સમુત્પન્ને હૃત્પદ્મનિલયં તથા

ઐક્યં ભવતિ ચાર્વઙ્ગિ સર્વં બ્રહ્મમયાત્મકમ્ ।
----------------------------------------જીવેષુ શાઙ્કરિ

ન ચ પાપં ન વા પુણ્યં ન યમો નરકં ન ચ ।
ન સુખં નાપિ દુઃખં ચ ન રોગેભ્યો ભયં તથા

ન ભયં નાપિ શોકં ચ સર્વં બ્રહ્મમયાત્મકમ્ ।
બ્રાહ્મણી ક્ષત્રીયા વૈશ્યા વૈશ્યજા શૂદ્રજાઽન્ત્યજા

તથૈવ તારિણી વિદ્યા યથા વિદ્યા તથા તથા ।
એવં જ્ઞાનં મહેશાનિ યથા વૈ જાયતે પ્રિયે

તથૈવ વિદ્યા દેવેશિ વિદ્યાઽવિદ્યાવિરોધિની ।
જાયતે નાત્ર સન્દેહો બ્રહ્માનન્દમયો ભવેત્

અદ્વૈતં ચ ગુણાતીતં નિર્ગુણં પ્રકૃતેઃ પરમ્ ।
પરમાનન્દસંયુક્તો મુક્તિં યાસ્યતિ નિશ્ચિતમ્

ઇતિ સત્યં પુનઃ સત્યં સત્યં ચણ્ડિ વરાનને ।
તત્ત્વજ્ઞાનાત્ પરં નાસ્તિ નાસ્તિ દેવઃ સદાશિવાત્

નાસ્તિ ભાવસ્તુ મધ્યસ્થાદ્ નાસ્તિ દુર્ગાસમં પદમ્ ।
સોઽહં સોઽહં પુનઃ સોઽહં સોઽહમિત્યેવ જાયતે

તદેવ ચિરકાલેન સોઽહં જ્ઞાનં પ્રજાયતે ।
નાનાત્વબુદ્ધિં કૃત્વા વૈ સાત્ત્વિકીં પરમાત્મિકામ્

ગૃહીત્વા ચ વરારોહે જાયતે પરમાર્થવિત્ ।
જ્ઞાનાત્ પરતરં નાસ્તિ નાસ્તિ નાસ્તિ વરાનને

લબ્ધ્વા હિ તત્ત્વં પરમં મુચ્યતે દેહબન્ધનાત્ ।
કુલવારે કુલીનસ્તુ કુલધર્મં કુલવ્રતઃ

આશ્રયેત્ પરમાનન્દઃ પરમાનન્દમેવ ચ ।
ન કુલીને પરા બુદ્ધિર્ન કુલીનપરા ગતિઃ

ન કુલીને પરા ભક્તિર્ન કુલીને પરા ક્રિયા ।
એવં વદતિ યો યસ્તુ સ મુક્તિં ન ચ યાતિ વૈ

ઇહૈવ સ્વર્ગો દેવેશિ ઇહ કૈલાસમન્દિરમ્ ।
ઇહૈવ ભુક્તિર્ભક્તિશ્ચ મુક્તિરવ્યભિચારિણી

ભોગઃ સ્વર્ગશ્ચ મોક્ષશ્ચ કરસ્થશ્ચૈવ શાઙ્કરિ ।
શાક્તાનાં ત્રિપુરેશાનિ સત્યં ચણ્ડિ ન સંશયઃ

શ્રીપાર્વતી ઉવાચ
નીલકણ્ઠ મહાદેવ મહેશ્વર જગદ્ગુરો ।
પૃચ્છામિ પરમં તત્ત્વં બ્રૂહિ નાથ જગત્પ્રભો

કથં વા જાયતે મુક્તિર્ભુક્તિર્ભક્તિર્મહેશ્વરે ।
જીવઃ શિવત્વં લભતે કેન રૂપેણ શઙ્કર

શ્રીશિવ ઉવાચ
વિશ્વેશ્વરિ જગદ્ધાત્રિ મહામાયે મહેશ્વરિ ।
ગુહ્યાદ્ ગુહ્યતરં વાક્યં શૃણુષ્વ નગનન્દિનિ

શાન્તં દાન્તં કુલીનં ચ સર્વશાસ્ત્રાર્થકોવિદમ્ ।
એવં ગુહ્યં મહેશાનિ આશ્રયેદ્ ભક્તિભાવતઃ

તતઃ પ્રથમતો લબ્ધ્વા ગુરું પરમકારણમ્ ।
ગૃહ્ણીયાત્ પરમં મન્ત્રં દેવ્યાશ્ચ વરવર્ણિનિ

સેતું ચ કુલ્લુકાં જ્ઞાત્વા મન્ત્રસઙ્કેતકં તથા ।
સમયાચારસઙ્કેતં જ્ઞાનભાવં સમભ્યસેત્

પૂજયેત્ પરયા ભક્ત્યા પાર્વતીં પટલક્રમાત્ ।
યથા ગુરુવિધાનેન પૂજયેત્ પરદેવતામ્

ચતુર્ભૂજાં દશભુજાં સહસ્રભુજસંયુતામ્ ।
લોલજિહ્વાં કરાલાસ્યાં મુણ્ડમાલાવિભૂષિતામ્

પ્રણમેત્ પ્રજપેદ્ ધ્યાયેદ્ દેવીં દ્રવ્યૈઃ પ્રપૂજયેત્ ।
જવાપરાજિતાદ્રોણકરવીરૈર્મનોહરૈઃ

પૂજયેદ્ રક્તકુસુમૈઃ સુગન્ધૈશ્ચારુશોભનૈઃ ।
નાનાપુષ્પૈશ્ચ દેવેશિ પૂજયેદ્ ભક્તિભાવતઃ

પાદ્યાર્ઘ્યાચમનીયાદ્યૈર્નાનાદ્રવ્યૈર્મનોહરૈઃ ।
ગન્ધૈઃ પુષ્પૈશ્ચ ધૂપૈશ્ચ દીપૈરમ્બરભૂષણૈઃ

નૈવેદ્યૈર્વિવિધૈર્દ્રવ્યૈસ્તામ્બૂલૈશ્ચર્વણોત્કટૈઃ ।
પુનરાચમનીયૈશ્ચ પૂજયેજ્જગદમ્બિકામ્

એવં પૂજા વિધાતવ્યા યથાશક્ત્યા વરાનને ।
પૂજયિત્વા તુ પ્રણમેત્ પાર્વતીં તન્ત્રજૈઃ સ્તવૈઃ

સ્તોત્રસ્ય કવચસ્યાપિ પઠનાજ્જગદમ્બિકા ।
ભુક્તિમુક્તિપ્રદા ચણ્ડી ભક્તિદા સર્વમઙ્ગલા

બાહ્યપૂજા પ્રકર્તવ્યા ગુરુવાક્યાનુસારતઃ ।
અન્તર્યાગાત્મિકા પૂજા બાહ્યપૂજા મહેશ્વરિ

સર્વપૂજા વિધાતવ્યા યાવજ્જ્ઞાનં ન જાયતે ।
એવં વિપ્રપ્રણામેન જપેન તપસાઽપિ વા

માહેશી સા પ્રસન્નાઽભૂત્ સ્તવેન કવચેન ચ ।
તતો દેવિ મહેશાનિ સિદ્ધિવિદ્યા યદા ભવેત્

તદૈવ પૂજયા સિદ્ધિઃ ક્રિયયા બુદ્ધિયુક્તયા ।
એવં દેવ્યનુગ્રહતો જ્ઞાનમુત્પદ્યતે ખલુ

તદા કાલાત્યયે ચણ્ડિ ક્રિયાભક્તિશ્ચ નિષ્ફલા ।
કેવલા પ્રેયસી મુક્તિર્મહાદેવસ્ય ભાવિની

શ્રીપાર્વતી ઉવાચ
શ્રુતં પરમતન્ત્રં વૈ સારાત્ સારં પરાત્ પરમ્ ।
યત્ શ્રુત્વા મોક્ષમાપ્નોતિ કર્મપાશનિકૃન્તનાત્

શ્રીશિવ ઉવાચ
શૃણુ દેવિ વરારોહે મમૈવ નિશ્ચિતં તવ ।
દુર્ગા હિ પરમં મન્ત્રં દુર્ગા હિ પરમો જપઃ

દુર્ગા હિ પરમં તીર્થં દુર્ગા હિ પરમા ક્રિયા ।
દુર્ગા હિ પરમા ભુક્તિર્દુર્ગા મુક્તિર્મહીતલે

બુદ્ધિર્નિદ્રા ક્ષુધા છાયા શક્તિસ્તૃષ્ણા તથા ક્ષમા ।
ક્રિયા સર્વવરિષ્ઠા ચ વૈદિકી તાન્ત્રિકી ચ યા

એવં સર્વં હિ દુર્ગા હિ દુર્ગાભિન્નં ન તજ્જપઃ ।
ભજેદ્ દુર્ગાપદદ્વન્દ્વં સ્મરેદ્ દુર્ગામહર્નિશમ્

પ્રજપેદ્ દેવિ દુર્ગેતિ મન્ત્રં પરમકારણમ્ ।
ય એવં ભક્તિમાસ્થાય પ્રકરોતિ ક્રિયાં શિવે

સર્વસિદ્ધિયુતો ભૂત્વા વિહરેત્ ક્ષિતિમણ્ડલે ।
નાનાતન્ત્રે પૃથક્ ચેષ્ટા મયોક્તા ગિરિનન્દિનિ

ઐક્યં જ્ઞાનં યદા દેવિ તદા સિદ્ધિમવાપ્નુયાત્ ।
સ્થાવરે જઙ્ગમે ચૈવ યદા તુલ્યમના ભવેત્

કિં ન સિધ્યતિ વિશ્વેશિ પરત્રેહ ચ પાર્વતિ ।
એવં ભુક્તિશ્ચ મુક્તિશ્ચ ભક્તિશ્ચ જગદમ્બિકે

તવ જ્ઞાનં તદૈવાન્તે તતો નિર્વાણમાપ્નુયાત્ ॥
એવં વૈ કથિતં ચણ્ડિ કિં ભૂયઃ શ્રોતુમિચ્છસિ

શ્રીપાર્વતી ઉવાચ
શ્રુતં પરમતત્ત્વં વૈ શ્રુતં પરમમાદરાત્ ।
શ્રુતં કાલ્યાશ્ચ ચરિતં તારાયાશ્ચ શ્રુતં મયા

ઇદાનીં શ્રોતુમિચ્છામિ મન્ત્રસિદ્ધિઃ કથં ભવેત્ ।
વિદ્યાસિદ્ધિઃ કથં દેવ તદ્ વદસ્વ દયાનિધે

શ્રીશિવ ઉવાચ
ઇદાનીં શૃણુ દેવેશિ મન્ત્રસિદ્ધેસ્તુ કારણમ્ ।
મન્ત્રાર્થં મન્ત્રચૈતન્યં યામલે કથિતં મયા

ડામરે ચ શ્રુતં ચણ્ડિ કુલોડ્ડીશે કુલાર્ણવે ।
સંક્ષેપેણ વદિષ્યામિ મન્ત્રસિદ્ધેસ્તુ કારણમ્

કિં બહૂક્ત્યા મહેશાનિ ગુરુભક્ત્યા ચ સિધ્યતિ ।
કુલવારે મહેશાનિ સહસ્રમયુતં જપેત્

શનૈશ્ચરે ચતુર્દશ્યામમાયાં કુજવાસરે ।
સ્થિત્વા કુશાસને જ્ઞાની મન્ત્રસિદ્ધિપરાયણઃ

અયુતં ભક્તિભાવેન સહસ્રં વા વરાનને ।
અન્તર્યાગં તતઃ કૃત્વા સર્વસિદ્ધીશ્વરો ભવેત્

અશ્વત્થે વટમૂલે વા નિમ્બબિલ્વમૂલેઽથવા ।
પૂજયેત્ પરયા બુદ્ધ્યા મન્ત્રસિદ્ધિં જનો લભેત્

વિશ્વેશ્વરિ મહામાયે સર્વવિઘ્નવિનાશિનિ ।
એવં માસત્રયં કુર્યાદન્તર્યાગેન શુધ્યતિ

તદા સિદ્ધિમવાપ્નોતિ સત્યં સત્યં ન સંશયઃ ।
સુષુમ્નાન્તઃ સ્થિતાં દેવીં પદ્મકિઞ્જલ્કવાસિનીમ્

ધ્યાયેન્નાડીવિશુદ્ધેન મન્ત્રસિદ્ધિરનુત્તમા ।
અથવા શૃણુ ચાર્વઙ્ગિ ક્રિયાહીનં મતં મમ

કેવલં ધ્યાનમાસ્થાય મન્ત્રસિદ્ધિર્ભવેદ્ ધ્રુવમ્ ।
કાલિકાં હૃદયામ્ભોજે ધ્યાયેત્ પરમદેવતામ્

યોગસિદ્ધિં સમાસ્થાય મન્ત્રસિદ્ધિર્ભવેન્નૃણામ્ ।
પુરા પૃચ્છામિ ગદિતા દુર્લભા યા મહીતલે

સા પૃચ્છા તે નિગદિતા કિં ન સિધ્યતિ ભૂતલે ।
શક્તિયામલકે સિદ્ધેશ્વરતન્ત્રે કુલાચલે

વિદ્યાસિદ્ધિર્નિગદિતા દુર્લભા ધરણીતલે ।
કાલી તારા મહાવિદ્યા ષોડશી ભુવનેશ્વરી

ભૈરવી છિન્નમસ્તા ચ વિદ્યા ધૂમાવતી તથા ।
બગલા સિદ્ધિવિદ્યા ચ માતઙ્ગી કમલાત્મિકા

એતા દશ મહાવિદ્યાઃ સિદ્ધિવિદ્યાઃ પ્રકીર્તિતાઃ ।
એષા વિદ્યા પ્રકથિતા સર્વતન્ત્રેષુ ગોપિતા

સર્વસિદ્ધિપ્રદા નિત્યા નિત્યાનન્દમયી શિવા ।
વિદ્યાસિદ્ધિર્મહેશાનિ ભવિષ્યતિ યદા ભવેત્

ઐન્દ્રવં ચન્દ્રવદને ચન્દ્રતત્ત્વં વરાનને ।
કુબેરત્વં શિવત્વં વા વિષ્ણુત્વં વિશ્વગેહિની

તત્ક્ષણાદ્ દેવદેવશિ જાયતે નાત્ર સંશયઃ ।
વિદ્યાસિદ્ધેઃ પ્રકરણં પૂર્વોક્તં ત્રિપુરેશ્વરિ

ઇદાનીં કથયામ્યત્ર વિદ્યાસિદ્ધિમનુત્તમામ્ ।
શ્મશાનેઽશ્વત્થમૂલે વા શવે વા શૂન્યમન્દિરે

પ્રજપેત્ કાલિકાં તારાં મહાવિદ્યા પ્રસીદતિ ।
જપેન તપસા સ્તોત્રૈરન્તર્યાગૈર્મનોહરૈઃ

પૂજનૈઃ કવચૈર્દેવિ મહાવિદ્યા પ્રસીદતિ ।
અનેનૈવ વિધાનેન પૂજનં યઃ કરોત્યહો

સુપ્રસન્ના જગદ્ધાત્રી મહામાયા પ્રસિધ્યતિ ।
મન્ત્રસિદ્ધેર્મહાવિદ્યા સિદ્ધેઃ કારણમગ્રતઃ ॥
કથિતં તે જગદ્ધાત્રિ કિં ભૂયઃ શ્રોતુમિચ્છસિ

શ્રીપાર્વતી ઉવાચ
શ્રુતં સિદ્ધેઃ કારણં તુ સર્વસિદ્ધિકરં પરમ્ ।
યજ્જ્ઞાત્વા મોક્ષમાપ્નોતિ જીવઃ પરમકોવિદઃ

નાનાતન્ત્રં શ્રુતં દેવદેવ વિશ્વેશ્વર પ્રભો ।
ઇદાનીં શ્રોતુમિચ્છામિ નીલકણ્ઠ સદાશિવ

માહાત્મ્યં કાલિકાયાશ્ચ તારાયાશ્ચ સુરેશ્વર ।
શ્રોતુમિચ્છામ્યહં નાથ યતસ્ત્વં કાલિકાપતિઃ ॥
તારાપતિસ્ત્વં દેવેશ વદ શીઘ્રં સદાશિવ

શ્રીશિવ ઉવાચ
ધન્યાસિ પતિભક્તાસિ ચાર્વઙ્ગિ શૃણુ મદ્વચઃ ।
કાલિકાયાશ્ચ તારાયા માહાત્મ્યં સિદ્ધિદાયકમ્

યથા કાલી તથા તારા એકદૈવ હિ ભિન્નતા ।
દક્ષાંશા ચૈવ વામાંશા યથાનુક્રમસારતઃ

નહિ કાલિસમા પૂજા નહિ કાલીસમં ફલમ્ ।
નહિ કાલીસમં જ્ઞાનં નહિ કાલીસમં તપઃ

તસ્યૈવ ધન્યા જનની ધન્યસ્તસ્ય પિતામહઃ ।
ધન્યં કુલં યશશ્ચણ્ડિ યેન કાલી સમર્ચિતા

કાલી તારાસમા વિદ્યાચારે સ્તુતિવિચારણે ।
યન્ત્રે મન્ત્રે ફલં તુલ્યં ન વિશેષઃ કથઞ્ચન

ઇત્યેવં ભેદબુદ્ધ્યા તુ કથિતં ચરિતં પ્રિયે ।
અભેદબુદ્ધ્યા દેવેશિ સર્વાસ્તુલ્યા ન સંશયઃ

શ્રીમદેકજટા દેવી ઉગ્રતારા સરસ્વતી ।
વ્યાલાનાં દમને કૃષ્ણરક્ષણે યમુનાજલે

પપાત તારિણી વિદ્યા નીલવર્ણા સરસ્વતી ।
દેવૈશ્ચૈવ હિ દેવેન્દ્રૈર્યોગીન્દ્રૈઃ સાધકોત્તમૈઃ

સાધકૈર્મુનિભિઃ સર્વૈર્ગન્ધર્વૈઃ કિન્નરૈઃ ખગૈઃ ।
વિદ્યાધરૈર્નર્તકૈશ્ચ નાના-ઋષિગણૈરપિ

આરાધિતા મહાકાલી મહાનીલસરસ્વતી ।
વદન્તિ સાધકાઃ સર્વે કાલીં કાલવિનાશિનીમ્

નીલાં સરસ્વતીં વિદ્યામુગ્રતારાં મનોહરામ્ ।
કાલિકાયાશ્ચ તારાયા માહાત્મ્યં દેવદુર્લભમ્

કઃ શક્નોતિ મહીમધ્યે તસ્ય માહાત્મ્યકોવિદઃ ।
દશવિદ્યાઽષ્ટાદશધા વિદ્યારૂપાં સુરેશ્વરીમ્

ભજતે યઃ સાધકેન્દ્રો ભવત્યેવં સુરેશ્વરિ ।
ઇત્યેવં શૃણુ દેવેશિ માહાત્મ્યં ભુવિ દુર્લભમ્

યાસાં વિજ્ઞાનમાત્રેણ જીવન્મુક્તઃ પ્રજાયતે ।
યથા શિવસ્તથા જીવો જીવસ્તુ શિવ એવ હિ

જાયતે પરમં જ્ઞાનં ભાવજ્ઞાનાદ્ વરાનને ।
અપરં શૃણુ ચાર્વઙ્ગિ સાવધાનાઽવધારય

સ્તોત્રં ચ કવચં દેવ્યાઃ કાલિકાયા મહેશ્વરિ ।
તારાયા ન શ્રુતં ચણ્ડિ સર્વમોહનકારણમ્

ષટ્કર્મસિદ્ધિદં મન્ત્રં સ્તોત્રં કવચમુત્તમમ્ ।
ન પ્રકાશ્યં ચ કુત્રાપિ સર્વસમ્પત્પ્રદં પ્રિયે ।
ઇદાનીં કથયામ્યત્ર જીવમોહનકારણમ્

શ્રીપાર્વતી ઉવાચ
વદ નાથ જગત્સ્વામિન્ પ્રભો શ્રીકણ્ઠ શઙ્કર ।
મોહનં કવચં નાથ સ્તોત્રં કવચમેવ હિ

સર્વવિઘ્નહ્વરં દેવિ સર્વશાન્તિકરં તથા ।
દેવાનામપિ દુર્જ્ઞેયં વદ નાથ જગદ્ગુરો

શ્રીશઙ્કર ઉવાચ
નમસ્તે જગદીશાનદયિતે હરવલ્લભે ।
વિશ્વેશ્વરિ જગદ્ધાત્રિ ત્રૈલોક્યમોહનં કુરુ

મન્ત્રોદ્ધારં પ્રવક્ષ્યામિ સાવધાના સુરેશ્વરિ ।
લાન્તં વાન્તં માન્તયુક્તં સ્વર ------------ત્મકં પ્રિયે

કાન્તં શક્તિયુતં દેવિ જલયં ચાપિ વાઽન્વિતમ્ ।
ઋણગ્રજં ષાગ્રજં કુકયુગાગ્રજમેવ હિ

શક્તિયુક્તં મન્ત્રયજ્ઞશેષં સમુદીરયેત્ ।
ઇત્યેવં મન્ત્રરાજં ચ યો જપેજ્જગદમ્બિકે

ત્રૈલોક્યમોહનો ભૂત્વા સર્વસમ્પલ્લભેત્ તુ સઃ ।
ધારણં યુગલં ફાન્તં તાન્તં બિન્દુદ્વિતીયકમ્

વાક્વાદિન્યમુકં મે વશમાનય વૈ ફકી ।
મન્ત્રં ચાયુતમેવં ચ સહસ્રં વાઽયુતં નિશિ

તદૈવ દેવીં દેવં વા નરં વા વશમાનયેત્ ।
ઇયં વશકરી વિદ્યા સર્વતન્ત્રેષુ ગોપિતા

પૂજયેદ્ ભક્તિભાવેન પ્રણમેદ્ રાજમોહિનીમ્ ।
સ્મૃત્વા તુ મનસા દેવીં જપેન્મન્ત્રં કુજે દિને

શનૈશ્ચરદિને દેવિ રાત્રૌ સ્તોત્રં પઠેદ્ યદિ ।
અચિરેણૈવ કાલેન સ ભવેદ્ રાજવલ્લભઃ

ઘોરદંષ્ટ્રે કરાલાસ્યે મત્સ્યમાંસબલિપ્રિયે ।
નમસ્તે વિશ્વજનનિ નમસ્તે વિશ્વભાવિનિ

નમસ્તે જગદીશાનદયિતે ભક્તવત્સલે ।
નમસ્તે પરમાનન્દદાયિનિ રાજમોહિનિ

નમસ્તેઽસ્તુ સાદાનન્દે નમસ્તે શઙ્કરપ્રિયે ।
નમસ્તે મઙ્ગલે તુભ્યં સર્વમઙ્ગલમઙ્ગલે

વિશ્વમાતર્જગદ્ધાત્રિ નમસ્તે ત્રિપુરેશ્વરિ ।
નમસ્તે બ્રહ્મનમિતે નમસ્તે વરદે શિવે

મેઘશ્યામે જગદ્ધાત્રિ કરાલે વિકટે શુભે ।
હરભાર્યે હરારાધ્યે નમસ્તે હરપૂજિતે

હરીન્દ્ર - બ્રહ્મ - ચન્દ્રાદિ - પઞ્ચાનનસુપૂજિતે ।
નમસ્તેઽસ્તુ મહારૌદ્રે મહાઘોરે મહોત્સવે

મહાનન્દે મહાકાલિ મહાકાલપ્રપૂજિતે ।
વિશ્વેશ્વરિ નમસ્તેઽસ્તુ નમસ્તે ભુવનેશ્વરિ

કામરૂપે ચ કામાક્ષે કામપુષ્પવિભૂષિતે ।
સર્વકામપ્રદે દેવિ કામમન્દિરવન્દિતે

સર્વકામસ્વરૂપે ચ કામદેવપ્રપૂજિતે ।
કામેશ્વરિ કલાનાથવદને કામવલ્લભે

ક્રિયામાર્ગરતે કામે નિષ્ઠાકામે કલાત્મિકે ।
નમસ્તે ચણ્ડિકે ચણ્ડે ચણ્ડમુણ્ડવિનાશિનિ

રાજેશ્વરિ રમે રામપૂજિતે રાજવલ્લભે ।
રામપ્રિયે રમરતે બલરામપ્રપૂજિતે

નભશ્ચ્છિન્નકરાલે ચ કરાલે ચણ્ડિ પાર્વતિ ।
નમસ્તે સગુણે દેવિ નિર્ગુણે નિર્ગુણાત્મિકે

જગદ્ધાત્રિ જયે દેવિ વિજયે હરવલ્લભે ।
નમસ્તે શઙ્કરાનન્દદાયિકે શઙ્કરપ્રિયે

નમઃ કૃષ્ણે પીતવર્ણે શુક્લરક્તસ્વરૂપિણિ ।
મહાનીલે નીલવર્ગે મહાનીલસરસ્વતિ

વાગીશ્વરિ નમસ્તેઽસ્તુ પદ્મે પદ્મનિવાસિનિ ।
ઇતિ તે કથિતં દેવિ સ્તોત્રં વૈ જનમોહનમ્

પઠનાત્ સ્તવરાજસ્ય કિં ન સિધ્યતિ ભૂતલે ।
મન્દે ચન્દ્રાત્મજે જીવે નિશાભાગે નિશામુખે

પ્રપઠેત્ સ્તવરાજં તુ સર્વસિદ્ધીશ્વરો ભવેત્ ।
બ્રાહ્મણઃ ક્ષત્રિયો વૈશ્યઃ શૂદ્રો વા વરવર્ણિનિ

સ્તોત્રપ્રપઠનાદ્ દેવિ જગદ્વશનયો ભવેત્ ।
વશીકરણમેતત્ તુ સ્તવરાજં મનોહરમ્

યં યં મન્ત્રેણ દેવેશિ પરમાકર્ષયત્યહો ।
સ એવ વશતાં યાતિ દેવરાજસમો યદિ ॥
ઇત્યેવં કથિતં સ્તોત્રમધુના કવચં શૃણુ

શ્રીશિવ ઉવાચ
શૃણુ દેવિ પ્રવક્ષ્યામિ અપ્રકાશ્યં મહીતલે ।
શ્રુત્વા પઠિત્વા કવચં શવસિદ્ધિમવાપ્નુયાત્

પાર્વતી મસ્તકં પાતુ કપાલં જગદમ્બિકા ।
કપાલં ચાપિ ગણ્ડં ચ દુર્ગા પાતુ મહેશ્વરી

વિશ્વેશ્વરી સદા પાતુ વક્ષોમૂલં શિવપ્રિયા ।
નાભિદેશં જગદ્ધાત્રી જગદાનન્દવલ્લભા

હૃદયં ચણ્ડિકા પાતુ બાહૂ પરમદેવતા ।
કેશાંશ્ચ પઞ્ચમી વિદ્યા સભાયાં પાતુ ભૈરવી

નિત્યાનન્દા યશઃ પાતુ લિઙ્ગં લિઙ્ગેશ્વરી મુદા ।
ભવાની પાતુ મે પુત્રં પત્નીં મે પાતુ દક્ષજા

કામાખ્યા દેહસકલં પાતુ નિત્યં નભોગતમ્ ।
મહાકુણ્ડલિની નિત્યં પાતુ મે જઠરં શિવા

વહ્નિજાયા સદા યજ્ઞે પાતુ કર્મ સ્વધા પુનઃ ।
અરણ્યે વિજને પાતુ દુર્ગા દેવી રણે વને

જલે પાતુ જગન્માતા દેવી ત્રિભુવનેશ્વરી ।
ઇત્યેવં કવચં દેવિ દુર્જ્ઞેયં રાજમોહને

કવચસ્યાપિ પઠનાદ્ રાજરાજેશ્વરો ભવેત્ ।
યત્ર કુત્ર દિને સ્તોત્રં કવચં વરવર્ણિનિ

પઠિત્વા સર્વસૌભાગ્યં લભતે નાત્ર સંશયઃ ।
એવં નિરન્તરં સ્તોત્રં કવચં રાજમોહનમ્

જપેન્મન્ત્રં ક્ષિતિતલે વશ્યં યાતિ મહીપતિઃ ।
પૂજાયાઃ પરયા ભક્ત્યા ક્રિયયા ચ વિના શિવે

કેવલં જપમાત્રેણ સિધ્યત્યેવં ન સંશયઃ ।
યા પૃચ્છા તે નિતદિતા કથિતા વરવર્ણિનિ ॥
ઇદાનીં દેવદેવેશિ કિં ભૂયઃ શ્રોતુમિચ્છસિ

॥ ઇતિ મુણ્ડમાલાતન્ત્રે ષષ્ઠઃ પટલઃ ॥
અથ સપ્તમઃ પટલઃ
શ્રીદેવી ઉવાચ ।
કથ્યતાં મે દયાસિન્ધો જગદીશ જગદ્ગુરો ।
જગત્કર્તા જગત્પાતા જગદ્ધાતા ત્વમેવ હિ

ત્રિષુ લોકેષુ વિશ્વેશ ત્વત્તો ભિન્નઃ કદાચન ।
નાસ્તિ કર્તા મહાદેવ કિમેતત્ કથયામિ તે

ગોલોકે ન ચ કૈલાસે ન બ્રહ્મમન્દિરે પ્રભો ।
ન વૈકુણ્ઠે ન વા સૌરે નક્ષત્રે ન શશિપુરે

વક્તા કર્તા ચ પાતા ચ હર્તા ચ ત્રિપુરેશ્વર ।
પૃચ્છામિ પરમં તત્ત્વં યોગિનીયોગસાધનમ્ ॥
યોગિનીહૃદયામ્ભોજે યોગિનીહૃદયે તથા

શ્રીશિવ ઉવાચ
સેયં ગોપ્યા ચ દેવેશિ બ્રહ્મેતિ યાં વિદુઃ શિવે ।
પરં બ્રહ્મ પરં ધામ સચ્ચિદાનન્દમવ્યયમ્

યોગીન્દ્રાણાં જ્ઞાનગમ્યમગમ્યં મનસા અપિ ।
અન્યેષાં ચ વરારોહે જગદ્ધાત્રિ શૃણુ પ્રિયે

સર્વેષાં ચ મયા જ્ઞાનં જ્ઞાતં ત્વયાખ્યમવ્યયમ્ ।
નારીણાં હૃદયામ્ભોજં ન ચ વેદ કથઞ્ચન

શ્રીપાર્વતી ઉવાચ
સત્યં ચ કથિતં નાથ સત્યમેવ વદામ્યહમ્ ।
અબલાનાં ચ હૃદયં મન્ત્રસાધ્યં ચ કથ્યતામ્

પુરુષા નૈવ નાનન્તિ સ્વભાવાત્ તુ વ્યતિક્રમમ્ ।
દેવદેવ મહાદેવ સંસારાર્ણવતારકમ્

જાનામિ હૃદયં પુંસાં કાઠિન્યં લોલમાનસમ્ ।
અત એવ મહાદેવ શીઘ્રં વદ સદાશિવ

કેન રૂપેણ સા દુર્ગા સુપ્રસન્ના મહીતલે ।
સ્તવેન કવચેનાઽપિ જ્ઞાનેન જગદીશ્વરી ।
પ્રસન્ના ચ મહાવિદ્યા ભવેત્ પરમકારણે

શ્રીશઙ્કર ઉવાચ
શૃણુ દેવિ મહાદેવિ વિશ્વેશ્વરિ જગન્મયિ ।
યેન રૂપેણ સા કાલી તારા ત્રિપુરસુન્દરી

ભૈરવી ચૈવ કમલા દુર્ગા ચ ભુવનેશ્વરી ।
યા યા વિદ્યા મહેશાનિ કથિતા ભુવનેશ્વરી

સા વિદ્યા ચ પ્રસન્નાઽભૂત્ કેવલં જ્ઞાનમાત્રતઃ ।
વિના જ્ઞાનાન્ન વૈ ધ્યાનં ન ક્રિયા ન ચ સદ્ગતિઃ

ન ચ ભુક્તિર્ન વા મુક્તિર્ન ભુક્તિર્બુદ્ધિરેવ હિ ।
શ્મશાનસિદ્ધિશ્ચ ન વા ન ચ સિદ્ધિઃ શવાત્મિકા

ન વિજ્ઞાનં મહેશાનિ ન વા સિદ્ધિઃ પ્રજાયતે ।
જ્ઞાને યદા સમુત્પત્ને સર્વાઃ સિધ્યન્તિ સિદ્ધયઃ

જ્ઞાને જ્ઞાને મહેશાનિ વિકલ્ં પૂજનં જપઃ ।
તપો ભક્તિઃ ક્રિયા સ્તોત્રં કવચં વિફલં પ્રિયે

અત એવ પરં તત્ત્વં જ્ઞાનં પરમસાધનમ્ ।
યો જાનાતિ જગદ્ધાત્રિ સ શિવો નાત્ર સંશયઃ

કૌલિકં કૌલિકં દેવિ ન ત્યજેત્ તુ કથઞ્ચન્ ।
પરિત્યાગે વરારોહે સર્વં ભવતિ નિષ્ફલમ્

એવં શક્તિવિધાનેન શાક્તઃ સર્વવિચારણાત્ ।
જીવન્મુક્તઃ સર્વલોકે જાયતે નાત્ર સંશયઃ

મન્ત્રાર્થં મન્ત્રચૈતન્યં યોનિમુદ્રાં ન વેત્તિ યઃ ।
ન વેત્તિ કિઞ્ચિદ્ દેવેશિ સત્યં ચ વરવર્ણિનિ

સઙ્કેતં ગુરુસઙ્કેતં જીવસઙ્કેતકં તથા ।
દિવ્યાનાં ચૈવ વીરાણાં પશૂનાં વરવર્ણિનિ

ભાવસઙ્કેતકં દેવિ બ્રહ્મસઙ્કેતકં તથા ।
સમયાચારસઙ્કેતં વીરસાધનમુત્તમમ્

શ્મશાનસાધનં ભદ્રે શવસાધનમેવ હિ ।
એવં નાનાવિધાનં ચ મયોક્તં યામલે પ્રિયે

તદા સિદ્ધિમવાપ્નોતિ યસ્તન્ત્રે ખલુ કોવિદઃ ।
કથિતં ડામરે નાઽથ મુક્તિર્યામલકે પ્રિયે

નાનાતન્ત્રે મહેશાનિ કથિતં વરવર્ણિનિ ।
દુર્ગાસેવનમાત્રેણ વિધિવાક્યાનુસારતઃ

મુક્તિં યાતિ નરઃ સત્યં લબ્ધ્વા તત્ત્વં મનોહરમ્ ।
વિના તત્ત્વપરિજ્ઞાનાત્ ન સુખં ન પરાં ગતિમ્

લભતે માનવઃ સત્યં દેવેશિ જગદમ્બિકે ।
કાલી કરાલવદના મુણ્ડમાલાવિભૂષિતા

કામાખ્યા કામિની કામ્યા કરાલાસ્યા દિગમ્બરા ।
અટ્ટહાસા ઘોરનાદા મેઘશ્યામા ભયાનકા

સર્વબીજસ્વરૂપા સા મહાબીજસ્વરૂપિણી ।
સાર્દ્ધપઞ્ચાક્ષરી વિદ્યા વશિષ્ઠાદિપ્રપૂજિતા

સિદ્ધેન્દ્રૈશ્ચાપિ યોગીન્દ્રૈર્મુનીન્દ્રૈરપિ સેવિતા ।
દેવેન્દ્રૈશ્ચાપિ વીરૈન્દ્રૈઃ સાધકેન્દ્રૈઃ પ્રપૂજિતા

એવંભૂતા મહામાયા સર્વતત્ત્વવિભાવિની ।
સઙ્કેતં કાલિકાયાશ્ચ તારાયાશ્ચ શ્રુતં મયા

કાલીતન્ત્રે ભૈરવે ચ શ્રુતં તન્ત્રે ચ યામેલે ।
શ્રુતં ન ભૈરવીતન્ત્રે ભૈરવ્યાશ્ચરિતં પ્રિયે

ભુવનાયાશ્ચ વિદ્યાયાશ્ચરિતં નૈવ સુન્દરિ ।
ઇદાનીં ચાપિ સંક્ષેપાદ્ વદિષ્યામિ વરાનને

પદ્મા ત્રિશક્તિર્ધનદા વાણી પૂર્ણા મહેશ્વરિ ।
દુર્ગા ભગવતી દેવી ભુવનાયાઃ પ્રતિષ્ઠિતાઃ

એકા દેવી જગદ્ધાત્રી નાનારૂપવિધારિણી ।
તાં ભજેત્ સાધકેન્દ્રશ્ચ સર્વજ્ઞાદિપ્રપૂજિતામ્

મહામાયાં જગદ્ધાત્રીં સર્વાલઙ્કારભૂષિતામ્ ।
વાણી માયા પુનર્માયા મહામન્ત્રસ્વરૂપિણી

તતશ્ચ કેવલા માયા સાધકૈરપિ સેવિતા ।
પાશાદિત્ર્યક્ષરી વિદ્યા યમભીતિવિમર્દિની

સર્વસમ્પત્પ્રદા મુક્તિદાયિની મુક્તિવલ્લભા ।
મહાયોગમયી વિદ્યા સર્વજ્ઞાનમયી તતઃ

પૂજિતા સાધકૈઃ સર્વૈઃ સર્વાલઙ્કારભૂષિતા ।
એવં તે કથિતા દેવિ દેવદેવૈઃ પ્રપૂજિતા

ભુવનેશી મહાવિદ્યા દેવાનામપિ દુર્લભા ।
યદિ ભાગ્યવશાદ્ દેવિ ચતુર્થીં લભતે નરઃ ।
ચતુર્વર્ગમયો ભૂત્વા પરં બ્રહ્માઽધિગચ્છતિ

શ્રીદેવી ઉવાચ
દીનબન્ધો દયાસિન્ધો પ્રભો શઙ્કર ભો હર ।
શ્રોતુમિચ્છામિ દેવેશ જ્ઞાનદઃ શઙ્કરો યતઃ

દેવદેવ મહાદેવ નમસ્તુભ્યં સદાશિવ ।
નમસ્તુભ્યં નમસ્તુભ્યં નમસ્તુભ્યં મહેશ્વર

વિશ્વેશ્વર જગદ્બન્ધો નીલકણ્ઠ નમોઽસ્તુ તે ।
જ્ઞાનેશ જ્ઞાનદાનન્દદાયક જ્ઞાનવર્દ્ધક

જ્ઞાનાધીશ જ્ઞાનપતે નમઃ કોચવધૂપતે ।
નમસ્તે પરમાનન્દ નમસ્તે ભક્તવત્સલ

નમસ્તે પાર્વતીનાથ ગઙ્ગાધર નમોઽસ્તુ તે ।
વિશ્વેશ્વર જગદ્બન્ધો જગદીશ સદાશિવ

નમોઽસ્તુ તે મહાદેવ ત્રિલોકેશ મહેશ્વર ।
નમસ્તે યોગતન્ત્રજ્ઞ નમઃ કાલીપતે નમઃ

નમસ્તારાપતે તુભ્યં નમસ્તે ભૈરવીપતે ।
વાણીપતે જગન્નાથ નમસ્તે ચણ્ડિકાપતે

તવ રૂપતરોર્બીજફલરૂપં ફલપ્રદ ।
નમસ્તે સર્વબીજજ્ઞ બીજાધાર નમોઽસ્તુ તે

ઉમાપતે નમસ્તુભ્યં નમસ્તુભ્યં ત્રિલોચન ।
પઞ્ચાનન નમસ્તુભ્યં નમસ્તે શશિશેખર

શમ્ભો મહેશ્વર વિભો વિરૂપાક્ષ ચતુર્ભુજ ।
નમસ્તે પર્વતા ---------ચણ્ડીપતે નમઃ

ત્રિલોકેશ દયાસિન્ધો કરુણામય શઙ્કર ।
ભક્તવત્સલ દેવેશ નીલકણ્ઠ સદાશિવ

નમઃ કાશીપતે તુભ્યં નમસ્તે ચન્દ્રશેખર ।
નમશ્ચણ્ડીપતે તુભ્યં શ્રીપતે પાર્વતીપતે

નમસ્તે જગદાધાર ચતુરાનન વત્સલ ।
નમઃ ક્રિયાપતે તુભ્યં નમસ્તે મુક્તિદ પ્રભો

અહમેવાઽબલા બાલા કથં જાનામિ શઙ્કર ।
નિર્ગુણા સગુણં જ્ઞાતું ન સમર્થા કથઞ્ચન

શ્રીશિવ ઉવાચ
નિર્ગુણા પ્રકૃતિઃ સત્યા અહમેવ ચ નિર્ગુણઃ ।
સદૈવ સગુણા ત્વં હિ સગુણોઽહં સદાશિવઃ

સત્યં ચ નિર્ગુણા દેવી સત્યં સત્યં હિ નિર્ગુણઃ ।
ઉપાસકાનાં સિદ્ધ્યર્થં સગુણા સગુણો મતઃ

નાનાતન્ત્રમતં દેવી નાનાયત્નાત્ પ્રકાશિતમ્ ।
બ્રહ્મસ્વરૂપં વિજ્ઞાતું કઃ સમર્થો મહીતલે

નાનામાર્ગે વિધાવન્તિ પશવો હતબુદ્ધયઃ ।
શ્રીદુર્ગાચરણામ્ભોજં હિત્વા યાન્તિ રસાતલમ્

સત્યં વચ્મિ દૃઢં વચ્મિ હિતં પથ્યં પુનઃ પુનઃ ।
ન મુક્તિશ્ચ ન મુક્તિશ્ચ વિના દુર્ગાનિષેવણાત્

દેવિ દુર્ગા પરં બ્રહ્મ શ્રુતં કાલી શ્રુતં ત્વયા ।
તારાશ્રુતૌ શ્રુતં દેવિ શ્રુતં બ્રહ્મવરેણ ચ

બ્રહ્મા વિષ્ણુશ્ચ રુદ્રશ્ચ વામનશ્ચ દિવૌકસઃ ।
તત્પાદસેવનાદ્ દેવિ વયં વૈ સાધકોત્તમાઃ

ન દેવેશો ગણપતિર્નો બ્રહ્મા નો હરો હરિઃ ।
હરિર્હરિરહં દેવિ સર્વે પાદાબ્જભાવુકાઃ

ત્વત્પ્રસાદાન્મહેશાનિ બ્રહ્મા સૃષ્ટિં કરોત્યસૌ ।
ત્વત્પ્રસાદાત્ હરિઃ પાતા હરો હર્તા મહીતલે

વાસવશ્ચાઽમરાધીશો-----------------રૂપાઃ સ્મૃતાઃ ।
તે સર્વે નિર્જરા દેવિ ત્વત્પ્રસાદાન્મહીતલે

ત્વત્પાદપદ્મસમ્પર્કાદ્ દેવદેવોઽપિ શઙ્કરઃ ।
અતસ્ત્વં જગદીશાનદયિતે ભક્તવત્સલે

દૃષ્ટિં કુરુ મહામાયે નમસ્તસ્યૈ નમો નમઃ ।
ત્વં ચ કાલી ત્વં ચ તારા ષોડશી ત્વં વરાનને

ત્વં દેવિ ભુવના બાલા છિન્ના ધૂમા મહેશ્વરિ ।
ત્વં દેવિ બગલા ભીમા કમલા ત્વં મહેશ્વરિ

માતઙ્ગી ત્વન્નપૂર્ણા ત્વં ધનદા ત્વં શિવપ્રિયે ।
દુર્ગા ત્વં વિશ્વજનની દશાઽષ્ટાદશરૂપિણી

સપ્તકોટિમહાવિદ્યા ઉપવિદ્યાસ્વરૂપિણી ।
કુમારી રમણીરૂપા સુરૂપા નગનન્દિની

શિવપૂજ્યા શિવારાધ્યા બ્રહ્મપૂજ્યા સુરેશ્વરી ।
શિવો ભિન્નઃ શિવા ભિન્ના ન જીવે વામલોચના ।
ઇતિ જાનામિ વિશ્વેશિ સત્યં સત્યં ન સંશયઃ

શ્રીપાર્વતી ઉવાચ
સત્યં મે કથિતં નાથ સત્યરૂપોઽસિ શઙ્કર ।
અહં ચ ત્રિષુ લોકેષુ પાર્વતીશ્વર શઙ્કર ॥
વિશેષં દેવદેવેશ સર્વજ્ઞ કથયસ્વ મે

શ્રીશિવ ઉવાચ
વિશેષં ન ચ જાનામિ કથયસ્વ વરાનને ।
સર્વજ્ઞાઽસિ મહેશાનિ યતઃ સર્વજ્ઞવલ્લભા

શ્રીપાર્વતી ઉવાચ
ગોલોકે ચૈવ રાધાઽહં વૈકુણ્ઠે કમલાત્મિકા ।
બ્રહ્મલોકે ચ સાવિત્રી ભારતી વાક્સ્વરૂપિણી

કૈલાસે પાર્વતી દેવી મિથિલાયાં ચ જાનકી ।
દ્વારકાયાં રુક્મિણી ચ દ્રૌપદી ચ ગજાહ્વયે

ગાયત્રી વેદજનની સન્ધ્યાઽહં ચ દ્વિજન્મનામ્ ।
યોગમધ્યેઽપ્યુષાઽહં ચ પુષ્પે કૃષ્ણાઽપરાજિતા

પત્રે માલૂરપત્રાઽહં પીઠે યોનિસ્વરૂપિણી ।
હરિહરાત્મિકા વિદ્યા બ્રહ્મવિષ્ણુશિવાર્ચિતા

વિશેષાનુગ્રહેણૈવ વિજ્ઞેયા શઙ્કર પ્રભો ।
યત્ર કુત્ર સ્થલે નાથ શાક્તસ્તિષ્ઠતિ ગચ્છતિ

તત્રૈવાઽહં મહાદેવ નિશ્ચિતં મતમુત્તમમ્ ।
શક્તિમાર્ગં પરિત્યજ્ય યોઽન્યમાર્ગં વિધાવતિ

કરસ્થં સ મણિં ત્યક્ત્વા ભૂતિભાવં વિધાવતિ ।
ઇત્યેવં ચ મહાદેવ મયોક્તં જગદીશ્વર ॥
અતઃ પરતરં નાસ્તિ નાસ્તિ નાસ્તિ સદાશિવ

॥ ઇતિ મુણ્ડમાલાતન્તે સપ્તમઃ પટલઃ

અથ અષ્ટમઃ પટલઃ
શ્રીદેવી ઉવાચ
નમસ્તે પાર્વતીનાથ વિશ્વનાથ દયામય ।
જ્ઞાનાત્ પરતરં નાસ્તિ શ્રુતં વિશ્વેશ્વર પ્રભો

દીનનાથ દયાસિન્ધો વિશ્વેશ્વર જગત્પતે ।
ઇદાનીં શ્રોતુમિચ્છામિ ગોપ્યં પરમકારણમ્ ।
રહસ્યં કાલિકાયાશ્ચ તારાયાશ્ચ સુરોત્તમ

શ્રીશિવ ઉવાચ
રહસ્યં કિં વદિષ્યામિ પઞ્ચવક્ત્રૈર્મહેશ્વરિ ।
જિહ્વાકોટિસહસ્રૈસ્તુ વક્ત્રકોટિશતૈરપિ

તથાપિ તસ્ય માહાત્મ્યં ન શક્નોમિ કથઞ્ચન ।
તસ્યા રહસ્યં ગોપ્યં ચ કિં ન જાનામિ શાઙ્કરિ

સ્વસ્યૈવં ચરિતં વક્તું સ્વયમેવ ક્ષમો ભવેત્ ।
અન્યથા નૈવ દેવેશિ ન જાનાતિ કથઞ્ચન

કાલિકાયાઃ શતં નામ નાનાતન્ત્રે ત્વયા શ્રુતમ્ ।
રહસ્યં ગોપનીયં ચ તન્ત્રેઽસ્મિન્ જગદમ્બિકે

કરાલવદના કાલી કામિની કમલા કલા ।
ક્રિયાવતી કોટરાક્ષી કામાખ્યા કામસુન્દરી

કાપાલા ચ કરાલા ચ કાશી કાત્યાયની કુહૂઃ ।
કઙ્કાલા કાલદમના કરુણા કમલાર્ચિતા

કાદમ્બરી કલહરા કૌતુકી કારણપ્રિયા ।
કૃષ્ણા કૃષ્ણપ્રિયા કૃષ્ણપૂજિતા કૃષ્ણવલ્લભા

કૃષ્ણાપરાજિતા કૃષ્ણપ્રિયા ચ કૃષ્ણરૂપિણી ।
કાલિકા કાલરાત્રિશ્ચ કુલજા કુલપણ્ડિતા

કુલધર્મપ્રિયા કામા કામ્યકર્મવિભૂષિતા ।
કુલપ્રિયા કુલરતા કુલીનપરિપૂજિતા

કુલજ્ઞા કમલા પૂજ્યા કૈલાસગણભૂષિતા ।
કટજા કેશિની કામા કામદા કામપણ્ડિતા

કરાલાસ્યા ચ કન્દર્પા કામિનીરૂપશોભિતા ।
કોલમ્બકા કોલરતા કેલિની કેશભૂષિતા

કેશવસ્ય પ્રિયા કાશા કાશ્મીરા કેશવાર્ચિતા ।
કામેશ્વરી કામરૂપા કામદાનવિભૂષિતા

કાલહન્ત્રી કૂર્મમાંસપ્રિયા કૂર્માદિપૂજિતા ।
કેલિની કરકા કારા કરકર્મનિષેવિણી

કટકેશવમધ્યસ્થા કટકીટકરાર્ચિતા ।
કટપ્રિયા કટરતા કટકર્મનિષેવિણી

કુમારીપૂજનરતા કુમારીગણસેવિતા ।
કુલજા ચ પ્રિયા કૌલપ્રિયા કુલનિષેવિણી

કુલીના કુલધર્મજ્ઞા કુલભીતિવિમર્દિની ।
કામધર્મપ્રિયા કામ્યા નિત્યકર્મસ્વરૂપિણી

કામરૂપા કામહરા કામમન્દિરપૂજિતા ।
કામાગારસ્વરૂપા ચ કાલાખ્યા કાલભૂષિતા

ક્રિયાભક્તિરતા કાલ્યા કાઞ્ચની કામાદાયિની ।
કોલપુષ્પામ્બરા કોલા નિકોલા કોલહન્તકા

કોષિકી કેતકી કુમ્ભી કુન્તલાદિવિભૂષિતા ।
ઇત્યેવં શૃણુ ચાર્વઙ્ગિ રહસ્યં સર્વમઙ્ગલમ્

યઃ પઠેત્ પરયા ભક્ત્યા સ શિવો નાત્ર સંશયઃ ।
શતનામપ્રસાદેન કિં ન સિધ્યતિ ભૂતલે

બ્રહ્મા વિષ્ણુશ્ચ રુદ્રશ્ચ વાસવાદ્યા દિવૌકસઃ ।
રહસ્યપઠનાદ્ દેવિ સર્વે ચ વિગતજ્વરાઃ

ત્રિષુ લોકેષુ વિશ્વેશિ સત્યં ગોપ્યમતઃ પરમ્ ।
નાસ્તિ નાસ્તિ મહામાયે તન્ત્રમધ્યે કથઞ્ચન

ક્રિયયા ચ વિના દેવિ વિના ભક્ત્યા મહેશ્વરિ ।
પ્રસન્નાસ્યા કરાલાસ્યા સ્તવપાઠાદ્ દિગમ્બરિ

સત્યં વચ્મિ મહેશાનિ અતઃ પરતરં નહિ ।
ન ગોકુલે ન વૈકુણ્ઠે ન ચ કૈલાસમન્દિરે

અતઃ પરતરા વિદ્યા સ્તોત્રં કવચમેવ ચ ।
ત્રિલોકેષુ જગદ્ધાત્રિ નાસ્તિ નાસ્તિ કદાચન

રાત્રાવપિ દિવાભાગે નિશાભાગે સુરેશ્વરિ ।
પ્રજષેદ્ ભક્તિભાવેન રહસ્યં સ્તવમુત્તમમ્

શતનામપ્રસાદેન મન્ત્રસિદ્ધિઃ પ્રજાયતે ।
કુજવારે ચતુર્દશ્યાં નિશાભાગે જપેત્ તુ યઃ

સ કૃતી સર્વશાસ્ત્રજ્ઞઃ સ કુલીનઃ સદા શુચિઃ ।
સ કુલજ્ઞઃ સ કાલજ્ઞઃ સ ધર્મજ્ઞો મહીતલે

રહસ્યપઠનાત્ કોટિપુરશ્ચરણજં ફલમ્ ।
પ્રાપ્નોતિ દેવદેવેશિ સત્યં પરમસુન્દરિ

સ્તવપાઠાદ્ વરારોહે કિં ન સિધ્યતિ ભૂતલે ।
અણિમાદ્યષ્ટસિદ્ધિઃ સ્યાદ્ ભવત્યેવ ન સંશયઃ

રાત્રૌ બિલ્વતલેઽશ્વત્થમૂલેઽપરાજિતાતલે ।
પ્રપઠેત્ કાલિકાસ્તોત્રં યથાશક્તિ મહેશ્વરિ

શતવારપ્રપઠનાન્મન્ત્રસિદ્ધિર્ભવેદ્ ધ્રુવમ્ ।
ઉપાયો નાસ્તિ દેવેશિ મહામન્ત્રસ્ય સાધને

અતઃ પરતરં દેવિ નાસિ બ્રહ્માણ્ડમણ્ડલે ।
નાનાતન્ત્રં શ્રુતં દેવિ મમ વક્ત્રાત્ સુરેશ્વરિ

મુણ્ડમાલામહાતન્ત્રં મહામન્ત્રસ્ય સાધનમ્ ।
ભક્ત્યા ભગવતીં દુર્ગાં દુઃખદારિદ્ર્યનાશિનીમ્

સંસ્મરેત્ પ્રજપેદ્ ધ્યાયેત્ સ મુક્તો નાત્ર સંશયઃ ।
જીવન્મુક્તઃ સ વિજ્ઞેયસ્તન્ત્રભક્તિપરાયણઃ

યઃ સાધકો મહાજ્ઞાની યશ્ચ દુર્ગાસદાનુગઃ ।
ન ચ ભક્તિર્ન વા મુક્તિર્ન મુક્તિર્નગનન્દિનિ

વિના દુર્ગાં જગદ્ધાત્રિ નિષ્ફલં જીવનં ભવેત્ ।
શક્તિમાર્ગરતો ભૂયો યોઽન્યમાર્ગે પ્રધાવતિ

ન ચ શાક્તાસ્તસ્ય વક્તું પારં પશ્યન્તિ સુન્દરિ ।
વિના દુર્ગાં જગદ્ધાત્રિ વાગ્જાલે શાસ્ત્રમોહિતાઃ

અન્યદેવં ભજન્ત્યેતે ચાન્યે શાસ્ત્રે વિઘૂર્ણિતાઃ ।
વિના તન્ત્રાદ્ વિના મન્ત્રાદ્ વિના યન્ત્રાન્મહેશ્વરિ

ન ચ ભક્તિશ્ચ મુક્તિશ્ચ જાયતે વરવર્ણિનિ ।
તન્ત્રવક્તાગુરુઃ સાક્ષાદ્ યથા ચ જ્ઞાનદઃ શિવઃ

યથા ગુરુર્મહેશાનિ તથા ચ પરમો ગુરુઃ ।
યથા પરાપરગુરુઃ પરમેષ્ઠિર્યથા ગુરુઃ

તથા ચૈવ હિ તન્ત્રજ્ઞસ્તન્ત્રવક્તા ગુરુઃ સ્વયમ્ ।
તન્ત્રં ચ તન્ત્રવક્તારં નિન્દન્તિ તાન્ત્રિકીં ક્રિયામ્

યે જના ભૈરવાસ્તેષાં માંસાસ્થિચર્વણોદ્યતાઃ ।
અત એવ હિ તન્ત્રજ્ઞં ન નિન્દન્તિ કદાચન ॥
ન હસન્તિ ન હિંસન્તિ ન વદન્તિ કદાચન

શ્રીપાર્વતી ઉવાચ
શૃણુ દેવ જગદ્વન્દ્ય મદ્વાક્યં દૃઢનિશ્ચિતમ્ ।
તવ પ્રસાદાદ્ દેવેશ શ્રુતં કાલીરહસ્યકમ્ ॥
ઇદાનીં શ્રોતુમિચ્છામિ તારાયા વદ સામ્પ્રતમ્

શ્રીશિવ ઉવાચ
ધન્યાસિ દેવદેવેશિ દુર્ગે દુર્ગાર્તિનાશિનિ ।
યં શ્રુત્વા મોક્ષમાપ્નોતિ પઠિત્વા નગનન્દિનિ

તારિણી તરલા તન્વી તારા તરણવલ્લરી ।
તીરરૂપા તટશ્યામા તનુક્ષીણપયોધરા

તુવીરા તરલા તીવ્રા નયના નીલવાહિની ।
ઉગ્રતારા જયા ચણ્ડી શ્રીમદેકજટા શિવા

તરુણા શામ્ભવી ચ્છિન્ના ભાગા ચ ભદ્રતારિણી ।
ઉગ્રતારા જયા ચણ્ડી શ્રીમદેકજટા શિવા

તરુણા શામ્ભવી ચ્છિન્ના ભાગા ચ ભદ્રતારિણી ।
ઉગ્રા ઉગ્રપ્રભા નીલા કૃષ્ણા નીલસરસ્વતી

દ્વિતીયા શોભિની નિત્યા નવીના નિત્યનૂતના ।
ચણ્ડિકા વિજયાઽઽરાધ્યા દેવી ગગનવાહિની

અટ્ટહાસ્યા કરાલાસ્યા ચતુરાસ્યાદિપૂજિતા ।
સગુણા સગુણારાધ્યા હરીન્દ્રદેવપૂજિતા

રક્તપ્રિયા ચ રક્તાક્ષી રુધિરા સર્વભૂષિતા ।
બાલપ્રિયા બાલરતા દુર્ગા બલવતી બલા

બલપ્રિયા બલરતા બલરામપ્રપૂજિતા ।
અર્દ્ધકેશેશ્વરી કેશા કેશવેશવિભૂષિતા

પદ્મમાલા ચ પદ્માખ્યા કામાખ્યા ગિરિનન્દિનિ ।
દક્ષિણા ચૈવ દક્ષા ચ દક્ષજા દક્ષિણે રતા

વજ્રપુષ્પપ્રિયા રક્તપ્રિયા કુસુમભૂષિતા ।
માહેશ્વરી મહાદેવપ્રિયા પઞ્ચવિભુષિતા

ઇડા ચ પિઙ્ગલા ચૈવ સુષુમ્ના પ્રાણરૂપિણી ।
ગાન્ધારી પઞ્ચમી પઞ્ચાનનાદિપરિપૂજિતા

ઇત્યેતત્ કથિતં દેવિ રહસ્યં પરમાત્મકમ્ ।
શ્રુત્વા મોક્ષમવાપ્નોતિ તારાદેવ્યાઃ પ્રસાદઃ

ય ઇદં પ્રપઠેત્ સ્તોત્રં તારાયાસ્તુ રહસ્યકમ્ ।
સર્વસિદ્ધીશ્વરો ભૂત્વા વિહરેત્ ક્ષિતિમણ્ડલે

તસ્યૈવ મન્ત્રઃ સિદ્ધઃ સ્યામન્ત્રસિદ્ધિરનુત્તમા ।
ભવત્યેવં મહામાયે સત્યં સત્યં ન સંશયઃ

મન્દે મઙ્ગલવારે ચ યઃ પઠેન્નિશિ સંયતઃ ।
તસ્યૈવ મન્ત્રસિદ્ધિઃ સ્યાદ્ ગાણપત્યં લભેત્ તુ સઃ

શ્રદ્ધયાઽશ્રદ્ધયા વાપિ પઠેત્ તારારહસ્યકમ્ ।
સોઽચિરેણૈવ કાલેન જીવન્મુક્તઃ શિવો ભવેત્

સહસ્રાવર્તનાદ્ દેવિ પુરશ્ચર્યાફલં લભેત્ ।
એવં સતતયુક્તાસ્તે ધ્યાયન્તસ્તામુપાસતે

તે કૃતાર્થા મહેશાનિ મૃત્યુસંસારબન્ધનાત્ ।
રહસ્યં તારિણીદેવ્યાઃ કાલિકાયાઃ શ્રુતં ત્વયા

સારં પરમગોપ્યં ચ શિવધ્યેયં શિવપ્રદમ્ ।
ઇદાનીં ચ વરારોહે ભૂયઃ કિં શ્રોતુમિચ્છસિ

ઇતિ મુણ્ડમાલાતન્ત્રે કાલીતારારહસ્યેષ્ટમઃ પટલઃ

અથ નવમઃ પટલઃ
રહસ્યં પાર્વતીનાથવક્ત્રાત્ શ્રુત્વા ચ પાર્વતી ।
મહાદેવં મહેશાનમીશમાહ મહેશ્વરી

શ્રીપાર્વતી ઉવાચ
ત્રિલોકેશ જગન્નાથ દેવદેવ સદાશિવ ।
ત્વત્પ્રસાદાન્મહાદેવ શ્રુતં તન્ત્રં પૃથગ્વિધમ્

ઇદાનીં વર્તતે શ્રદ્ધાઽઽગમશાસ્ત્રે મમૈવ હિ ।
યદિ પ્રસન્નો ભગવાન્ બ્રૂહ્યુપાયં મહોદયમ્

નાનાતન્ત્રે મહાદેવ શ્રુતં નાનાવિધં મતમ્ ।
કૃતાર્થાસ્મિ કૃતાર્થાસ્મિ કૃતકાર્થાસ્મિ શઙ્કર

પ્રસન્ને શઙ્કરે નાથ કિં ભયં જગતીતલે ।
વિના શિવપ્રસાદેન ન સિધ્યતિ કદાચન ॥
ઇદાનીં શ્રોતુમિચ્છામિ ભુવનાયા રહસ્યકમ્

શ્રીશઙ્કર ઉવાચ
શૃણુ દેવિ પ્રવક્ષ્યામિ ગુહ્યાદ્ ગુહ્યતરં પરમ્ ।
ષઠિત્વા પરમેશાનિ મન્ત્રસિદ્ધિમવાપ્નુયાત્

આદ્યા શ્રીભુવના ભવ્યા ભવબન્ધવિમોચિની ।
નારાયણી જગદ્ધાત્રી શિવા વિશ્વેશ્વરી પરા

ગાન્ધારી પરમા વિદ્યા જગન્મોહનકારિણી ।
સુરેશ્વરી જગન્માતા વિશ્વમોહનકારિણી

ભુવનેશી મહામાયા દેવેશી હરવલ્લભા ।
કરાલા વિકટાકારા મહાબીજસ્વરૂપિણી

ત્રિપુરેશી ત્રિલોકેશી દુર્ગા ત્રિભુવનેશ્વરી ।
નિત્યા ચ નિર્મલા દેવી સર્વમઙ્ગલકારિણી

સદાશિવપ્રિયા ગૌરી સર્વમઙ્ગલશોભની ।
શિવદા સર્વસૌભાગ્યદાયિની મઙ્ગલાત્મિકા

ઘોરદંષ્ટ્રા કરાલાસ્યા મધુમાંસબલિપ્રિયા ।
સર્વદુઃખહરા ચણ્ડી સર્વમઙ્ગલકારિણી

પાર્વતી તારિણી દેવી ભીમા ભયવિનાશિની ।
ત્રૈલોક્યજનની તારા તારિણી તરુણાક્ષમા

ભુક્તિમુક્તિપ્રદા ભક્તિસદાશઙ્કરવલ્લભા ।
ઉમા ગૌરી પ્રિયા સાધ્વી પ્રિયા ચ વારુણપ્રિયા

ભૈરવી ભૈરવાનન્દદાયિની ભૈરવાત્મિકા ।
બ્રહ્મપૂજ્યા ચ બ્રહ્માણી રુદ્રાણી રુદ્રપૂજિતા

રુદ્રેશ્વરી રુદ્રરૂપા ત્રિપુટા ત્રિપુરા મતા ।
ભવાની ચ ભવાનન્દદાયિની ભવગેહિની

સુરપૂજ્યેશ્વરી ચણ્ડી પ્રચણ્ડા ઘોરનાદિની ।
ઘનશ્યામા ઘનવતી મહાઘનનિનાદિની

ઘોરજિહ્વા લલજ્જિહ્વા વૈદેશી નગનન્દિની ।
ત્રૈલોક્યમોહિની વિશ્વમોહિની વિશ્વરૂપિણી

ષોડશી ત્રિપુરા બ્રહ્મદાયિની બ્રહ્મદાઽનઘા ।
ઇત્યેતત્ પરમં બ્રહ્મસ્તોત્રં પરમકારણમ્

યઃ પઠેત્ પરયા ભક્ત્યા જીવન્મુક્તઃ સ એવ હિ ।
બ્રહ્માદ્યા દેવતાઃ સર્વા મુનયસ્તન્ત્રકોવિદાઃ

પઠિત્વા પરયા ભક્ત્યા બ્રહ્મસિદ્ધિમવાપ્નુયુઃ ।
મન્ત્રસઙ્કેતમજ્ઞાત્વા વિદ્યાસઙ્કેતકં તથા

વીરસઙ્કેતકં દેવિ સઙ્કેતં બહુવિસ્તરમ્ ।
-----------------યોનિમુદ્રાત્મકં પ્રિયે

સઙ્કેતં સમયાચારં કુલસઙ્કેતકં તથા ।
બ્રહ્મસઙ્કેતકં ચણ્ડિ કાલસઙ્કેતકં તથા

યન્ત્રસઙ્કેતકં સિદ્ધિસઙ્કેતકં બહુવિસ્તરમ્ ।
કુલાર્ણવે શ્રુતં નાથ શ્રુતં મે મોહને પ્રભો

શ્રીશઙ્ક્ર ઉવાચ
વિદ્યાનામુત્તમા વિદ્યા મહાવિદ્યા પ્રકીર્તિતા ।
યાસાં સ્મરણમાત્રેણ મન્ત્રસિદ્ધિઃ પ્રજાયતે

મન્ત્રસઙ્કેતમજ્ઞાત્વા યો યજેદ્ વિશ્વમોહિનીમ્ ।
શતવર્ષજપેનાપિ તસ્ય સિદ્ધિર્ન જાયતે

વિદ્યાદ્યા ચ દ્વિતીયા ષોડશી ભુવનેશ્વરી ।
ભૈરવીજ્ઞાનમાત્રેણ સિદ્ધિવિદ્યા ભવન્તિ હિ

ઇડાપિઙ્ગલયોર્મધ્યે દુર્ગમા વિશ્વમોહિની ।
તસ્યાઃ પ્રભેદસંસ્કારં યો જાનાતિ સ પણ્ડિતઃ

સ ધન્યઃ સ કૃતી લોકે સ વીરઃ સર્વશઃ શુચિઃ ।
સ ભૈરવશ્ચ વિજ્ઞેયઃ સદા સુખવિવર્દ્ધકઃ

એવં કરાલવદનાં મુણ્ડમાલાવિભૂષિતામ્ ।
યો જાનાતિ જગદ્ધાત્રીં જીવન્મુક્તઃ સ એવ હિ

વિશેષં ચ પ્રવક્ષ્યામિ કુલભક્ત્યા ચ સિધ્યતિ ।
કુલભક્તિં વિના દેવિ ન ભક્તિર્ન ચ સદ્ગતિઃ

સત્યે તુ સુન્દરી આદ્યા ત્રેતાયાં ભુવનેશ્વરી ।
દ્વાપરે તારિણી વિદ્યા કલૌ કાલી પ્રકીર્તિતા

નામભેદં પ્રવક્ષ્યામિ કલ્પભેદં વરાનને ।
ન ભેદઃ કાલિકાયાશ્ચ તારાયા જગદમ્બિકે

ષોડશ્યા ભુવનાયાશ્ચ ભૈરવ્યાસ્ત્રિપુરેશ્વરિ ।
છિન્નાયાશ્ચૈવ ધૂમાયા ભીમાયાઃ પરમેશ્વરિ

તતશ્ચ બગલામુખ્યા માતઙ્ગ્યાશ્ચ સુરેશ્વરિ ।
નચ ભેદો મહેશાનિ વિદ્યાયા વરવર્ણિનિ

શ્રીપાર્વતી ઉવાચ
વિશ્વનાથ મહાદેવ મહેશ્વર જગદ્ગુરો ।
પૃચ્છામ્યેકં મહાભાગ યોગેન્દ્ર વૃષભધ્વજ

કૃષ્ણાયાઃ કરવીરસ્ય દ્રોણસ્ય તુ સદાશિવ ।
બિલ્વપત્રસ્ય માહાત્મ્યમ્ જપાયા વદ શઙ્કર

શ્રીશિવ ઉવાચ
ધન્યાઽસિ પતિભક્તાઽસિ પ્રાણતુલ્યાઽસિ શાઙ્કરિ ।
અતિગોપ્યં જગદ્ધાત્રિ દેવાનામતિદુર્લભમ્

કૃષ્ણાઽપરાજિતા સાક્ષાત્ ભદ્રકાલી ન સંશયઃ ।
કરવીરં ચ ભુવના દ્રોણં ત્રિપુરસુન્દરી

જપા સાક્ષાદ્ ભગવતી સર્વવિદ્યાસ્વરૂપિણી ।
યે સાધકા જગન્માતરર્ચયન્તિ શિવપ્રિયામ્

એતૈશ્ચ કુસુમૈશ્ચણ્ડીં તે શિવા નાત્ર સંશયઃ ।
કિં જપૈઃ કિં તપોભિર્વા કિં દાનૈઃ કિં ત્રિમધ્વકૈઃ

યેનાઽર્ચિતા જગદ્ધાત્રી દ્રોણકૃષ્ણા જપાદિભિઃ ।
રાજસૂયાશ્ચ મેધાદ્યૈર્વાજપેયાઽગ્નિહોમકૈઃ

ફલં યજ્જાયતે ચણ્ડિ તત્ સર્વં કુસુમાર્ચનાત્ ।
જપાં દ્રોણં તથા કૃષ્ણં મન્દરં કરવીરજમ્

સાક્ષાદ્ બ્રહ્મસ્વરૂપં ચ મહાદેવ્યૈ નિવેદયેત્ ।
શ્વેતચન્દનસંયુક્તં રક્તચન્દનલેપિતમ્

યો દદ્યાદ્ ભક્તિભાવેન સ વિશ્વેશો ન સંશયઃ ।
મહાઘોરે મહોત્પાતે મહાવિપદિ સઙ્કટે

મહાદુઃખે મહારોગે મહાશોકે મહાભયે ।
પૂજયેત્ કાલિકાં તારાં ભુવનાં ષોડશીં શિવામ્

બાલાં છિન્નાં ચ બગલાં ધૂમાં ભીમાં કરાલિનીમ્ ।
કમલામન્નપૂર્ણાં ચ દુર્ગાં દુઃખવિનાશિનીમ્

સર્વવિદ્યાજપાદ્રોણકરવીરૈર્મનોહરૈઃ ।
માલૂરપત્રૈઃ કૃષ્ણાભિઃ કૃષ્ણં સમ્પૂજ્ય ભૂતલે

સાધકેન્દ્રો મહેશાનિ સ ભવેન્નાત્ર સંશયઃ ।
લક્ષાણાં મહિષૈર્મેષૈરજૈર્દાનૈઃ ખરૈઃ શુભૈઃ

પૂજિતા સા જગદ્ધાત્રી યદ્યેષા કુસુમાર્ચિતા ।
માહાત્મ્યં ચાપિ કૃષ્ણાયાઃ કૃષ્ણા જાનાતિ ભૂતલે

તદર્દ્ધં ચાઽપ્યહં દેવિ તદર્દ્ધં શ્રીપતિઃ સદા ।
તદર્દ્ધમબ્જજન્મા વૈ તદર્દ્ધં વેદસાધકઃ

અસ્ય પુષ્પસ્ય માહાત્મ્યં સઙ્ક્ષેપાદ્ વચ્મિ શાઙ્કરિ ।
પૃથિવ્યામતલે સ્વર્ગે વૈકુણ્ઠે કાલિકાપુરે

જપાદિકરવીરૈશ્ચ દાનૈઃ કિં કિં ફલં લભેત્ ।
ન જાનામિ જગદ્ધાત્રિ કો વેદ પાર્વતીં વિના

કરવીરૈઃ શ્વેતરક્તૈ રક્તચન્દનમિશ્રિતૈઃ ।
પૂજયેત્ ક્ષ્માતલે યસ્તુ સ વિશ્વેશો ભવેદ્ ધ્રુવમ્

કૃષ્ણાપરાજિતાપુષ્પૈર્યસ્તુ દેવીં પ્રપૂજયેત્ ।
સોઽશ્વમેધસહસ્રાણાં ફલં પ્રાપ્ય શિવો યજેત્

બિલ્વપત્રસ્ય માહાત્મ્યં દેવાનામપિ દુર્લભમ્ ।
યો દદ્યાદ્ બિલ્વપત્રં ચ શિવાયૈ શઙ્કરાય ચ

સદાશિવસમો ભૂત્વા સ ગચ્છેદ્ બ્રહ્મમન્દિરમ્ ।
મહાવિપત્તૌ દેવેશિ જપાં કૃષ્ણાપરાજિતામ્

દ્રોણં વા કરવીરં વા સ ગચ્છેત્ કાલિકાપુરમ્ ।
કિં ચ પાદ્યૈઃ કિં ચ વાદ્યૈર્નૈવેદ્યૈઃ કિં ચ પૂજનૈઃ

મધુદાનૈર્મધુપર્કૈઃ કુમ્ભકૈઃ કિં ચ રેચકૈઃ ।
પૂરકૈઃ કિં ચ વા ધ્યાનૈઃ પ્રાણાયામૈશ્ચ કિં ચ વા

કિં જપૈઃ કિં તપોભિર્વા મત્સ્યૈર્માંસૈશ્ચ પઞ્ચમૈઃ ।
કિમન્યમન્ત્રૈઃ કિં તન્ત્રૈઃ કિં યન્ત્રૈઃ કિં ચ સાધનૈઃ

કિં ચ વૈ વાસવૈઃ કિં વા શ્મશાનૈર્મન્ત્રસાધનૈઃ ।
કિમધ્વરૈર્મન્ત્રપૂતૈમન્ત્રાર્થૈર્મન્ત્રજીવનૈઃ

કિં યોનિમુદ્રયા કિં વા તીર્થૈઃ કિં બ્રહ્મસાધનૈઃ ।
કિં માતૃકાન્યાસવર્ગૈઃ કિં કચ્છૈઃ કિં ઘટૈઃ પટૈઃ

કિં કાકચઞ્ચુભિઃ ષોઢાન્યાસૈઃ કિં કર્મસાધનૈઃ ।
યેનાર્ચિતા ભગવતી કરવીરૈર્જપાદિભિઃ

કૃષ્ણાપરાજિતાપુષ્પૈઃ કરવીરૈર્મનોહરૈઃ ।
દ્રોણૈસ્તુ કેતકીપુષ્પૈર્જપામાલૂરપત્રકૈઃ

પૂજિતા યૈર્ભગવતી તેષાં કિં કર્મસાધનૈઃ ।
ઇત્યેવં ચ શ્રુતં દેવિ રહસ્યં પરમં શિવમ્

શ્રુત્વા યં મોક્ષમાપ્નોતિ સાધકો નાત્ર સંશયઃ ।
તન્ત્રરાજં માહેશાનિ સારાત્ સારતરં પ્રિયે

શ્રુત્વા જ્ઞાત્વા મોક્ષમાશુ લભતે નાત્ર સંશયઃ ।
મહાભયે બન્ધને ચ વિપત્તૌ બહુસઙ્કટે

પૂજયિત્વા જગદ્ધાત્રીં મુચ્યતે ભવબન્ધનાત્ ।
શ્રદ્ધયાઽશ્રદ્ધયા વાપિ યઃ કશ્ચિત્ તારિણીં યજેત્

સ ધન્યઃ સ કવિર્ધીરઃ સર્વશાસ્ત્રાર્થકોવિદઃ ।
સ ચ માની સ ચ જ્ઞાની પૂજયેદ્ યસ્તુ કાલિકામ્ ॥
ઇત્યેવં ચ શ્રુતં દેવિ ભૂયઃ કિં શ્રોતુમિચ્છસ્તિ

॥ ઇતિ શ્રીમુણ્ડમાલાતન્ત્રે નવમઃ પટલઃ

અથ દશમઃ પટલઃ
શ્રીદેવી ઉવાચ
દેવદેવ મહાદેવ નીલકણ્ઠ સદાશિવ ।
નમસ્તે પરમેશાન વિશ્વનાથ નમોઽસ્તુ તે

નમસ્તે પરમેશાન સદાશિવ મહેશ્વર ।
નમસ્તે પરમાનન્દ જ્ઞાનમોક્ષપ્રદાયક

નમસ્તે પાર્વતીનાથ નમસ્તે ભક્તવત્સલ ।
પ્રસીદ માં જગદ્બન્ધો ગોપ્યં વદ સદાશિવ

શ્રીશિવ ઉવાચ
શૃણુ દેવિ જગદ્ધાત્રિ સારાત્ સારતરં પરમ્ ।
શ્રુત્વા મોક્ષમવાપ્નોતિ સાધકેન્દ્રો મહીતલે

શૃણુયાદ્ યો મુણ્ડમાલાતન્ત્રં પરમકારણમ્ ।
જ્ઞાનદં મોક્ષદં ભક્તિમુક્તિસૌખ્યપ્રદં શિવે

ઇત્યેવં પરમં દેવીં દેવાનામપિ દુર્લભમ્ ।
યો વેદ ધરણીમધ્યે સ એવ પરમાર્થવિત્

શક્તિમાર્ગં વિના જન્તોર્ન ભક્તિર્ન ચ સદ્ગતિઃ ।
શક્તિમૂલં જગત્ સર્વં શક્તિમૂલં પરં તપઃ

શક્તિમૂલં પરં કર્મ જન્મ શર્મ મહીતલે ।
વિના શક્તિપ્રસાદેન ન મુક્તિર્જાયતે પ્રિયે

શ્રુતં દેવિ વરારોહે સર્વં ગોપ્યં મહીતલે ।
અન્યદ્ ગોપ્યં કિં વદસિ તત્ સર્વં વદ સુવ્રતે

શ્રીપાર્વતી ઉવાચ
શૃણુ દેવ મહાદેવ કથયસ્વ જગદ્ગુરો ।
કથમુત્પદ્યતે જ્ઞાનં કથયસ્વ કૃપાનિધે

શ્રીશિવ ઉવાચ
અહોભાગ્યમહોભાગ્યમહોભાગ્યં સુરેશ્વરિ ।
કૃતાર્થોઽહં કૃતાર્થોઽહં કૃતરાજ્યો મહેશ્વરિ

જ્ઞાનકાણ્ડં મહેશાનિ સારાત્ સારતરં શિવમ્ ।
જ્ઞાનં ચ દ્વિવિધં જ્ઞેયં દુર્જ્ઞેયં મનસામપિ

જ્ઞાનં પરમતત્ત્વાખ્યં જ્ઞાનં જ્ઞેયાર્થસાધનમ્ ।
અન્ય વિભ્રાન્તિવિષયં જ્ઞાનં સાધારણં મતમ્

એવં ચ ત્રિવિધં શેષં મધ્યમં તત્ત્વવર્જિતમ્ ।
તત્ત્વજ્ઞાનં વરારોહે યોગીન્દ્રાણાં ચ દુર્લભમ્

વિના તત્ત્વપરિજ્ઞાનાદ્ વિફલં પૂજનં તપઃ ।
એકો દેવશ્ચ એકોઽહમાત્મભિન્નશરીરતઃ

ઘટાત્ પટાત્ માહેશાનિ કાલચક્રાન્મહીરુહાત્ ।
એવં જ્ઞાનં તત્ત્વમયં તદા મુક્તોઽચિરેણ તુ

નાનાકારણમેવાસ્ય પૂજનં ધ્યાનમેવ ચ ।
સેવનં ચૈવ તીર્થાનાં શરણં તારિણીપદમ્

સ્મરણં સહરાજસ્ય ભ્રમણં વૈ કુલાવલમ્ ।
સત્સઙ્ગસેવનં વિષ્ણોઃ શઙ્કરસ્યાપિ પૂજનમ્

કાલિકાપાદયુગલં ભજનં જ્ઞાનકારણમ્ ।
યાવન્મનાસ્ત્વમેવ સ્યાત્ તાવદ્ ભિન્ના મહીતલે

તાવજ્જાતિશ્ચ ગોત્રં ચ તાવન્નામ પૃથગ્વિધમ્ ।
તાવલ્લિઙ્ગં પૃથક્ સર્વં વર્ણાનાં પૃથગેવ હિ

તાવન્મિત્રૌ વિપક્ષૌ ચ તાવત્ કલત્રબાન્ધવૌ ।
તાવત્ પૃથગ્વિધા તન્ત્રયન્ત્રમન્ત્રાર્ચનાદિભિઃ

તાવત્ પુણ્યં તાવદેવ પાપપુણ્યવિવર્દ્ધકમ્ ।
તાવત્ ત્વં ચાપ્યયમિયં ચ જાયતે પ્રિયે

યાવન્ન જાયતે ચણ્ડિ વિદ્યાઽવિદ્યાવિરોધિની ।
અવિદ્યાનાશિની વિદ્યા વિદ્યાઽવિદ્યાવિમર્દિની

યા તારિણી મહાવિદ્યા વિદ્યાઽવિદ્યાવિરૂપિણી ।
અત એવ વરારોહે વિદ્યામુત્પાદ્ય ભૂતલે

નિર્વાણમોક્ષમાપ્નોતિ સત્યં પરમસુન્દરિ ।
શ્રીદુરાચરણામ્ભોજે ભક્તિશ્ચાવ્યભિચારિણી

તદૈવ જાયતે બ્રહ્મજ્ઞાનં બ્રહ્માદિદુર્લભમ્ ।
બ્રહ્મા વિષ્ણુશ્ચ રુદ્રશ્ચ વાસવાદ્યા દિવૌકસઃ

ભૈરવાશ્ચૈવ ગન્ધર્વા વિદ્યાભ્યાસસમુત્સુકાઃ ।
બ્રહ્મવિદ્યાસમા વિદ્યા બ્રહ્મવિદ્યાસમા ક્રિયા

બ્રહ્મવિદ્યાસમં જ્ઞાનં નાસ્તિ નાસ્તિ કદાચન ।
તત્ત્વજ્ઞાનં શ્રુતં દેવિ કિં ભૂયઃ શ્રોતુમિચ્છસિ

શ્રીપાર્વતી ઉવાચ
નમસ્તુભ્યં મહાદેવ વિશ્વનાથ જગદ્ગુરો ।
શ્રુતં જ્ઞાનં મહાદેવ નાનાતન્ત્રં તવાઙનાત્

ઇદાનીં ચણ્ડિકાયાસ્તુ ગુહ્યસ્તોત્રં વદ પ્રભો ।
કવચં બ્રૂહિ મે નાથ મન્ત્રચૈતન્યકારણમ્

મન્ત્રસિદ્ધિકરં ગુહ્યાદ્ ગુહ્યં મોક્ષવિધાયકમ્ ।
શ્રુત્વા મોક્ષમવાપ્નોતિ જ્ઞાત્વા વિદ્યાં મહેશ્વરિ

શ્રીશિવ ઉવાચ
દુર્લભં તારિણીમાર્ગં દુર્લભં તારિણીપદમ્ ।
મન્ત્રાર્થં મન્ત્રચૈતન્યં દુર્લભં શવસાધનમ્

શ્મશાનસાધનં યોનિસાધનં બ્રહ્મસાધનમ્ ।
ક્રિયાસાધનકં ભક્તિસાધનં મુક્તિસાધનમ્

સ્તવપ્રસાદાદ્ દેવેશિ સર્વાઃ સિધ્યન્તિ સિદ્ધયઃ ।
નમસ્તે ચણ્ડિકે ચણ્ડિઅ ચણ્ડમુણ્ડવિનાશિનિ

નમસ્તે કાલિકે કાલમહાભયવિનાશિનિ ।
શિવે રક્ષ જગદ્ધાત્રિ પ્રસીદ હરવલ્લભે

પ્રણમામિ જગદ્ધાત્રીં જગત્પાલનકારિણીમ્ ।
જગત્ક્ષોભકરીં વિદ્યાં જગત્સૃષ્ટિવિધાયિનીમ્

કરાલાં વિકટાં ઘોરાં મુણ્ડમાલાવિભૂષિતામ્ ।
હરાર્ચિતાં હરારાધ્યાં નમામિ હરવલ્લભામ્

ગૌરીં ગુરુપ્રિયાં ગૌરવર્ણાલઙ્કારભૂષિતામ્ ।
હરિપ્રિયાં મહામાયાં નમામિ બ્રહ્મપૂજિતામ્

સિદ્ધાં સિદ્ધેશ્વરીં સિદ્ધવિદ્યાધરગણૈર્યુતામ્ ।
મન્ત્રસિદ્ધિપ્રદાં યોનિસિદ્ધિદાં લિઙ્ગશોભિતામ્

પ્રણમામિ મહામાયાં દુર્ગાં દુર્ગતિનાશિનીમ્ ।
ઉમામુગ્રમયીમુગ્રાં તારામુગ્રગણૈર્યુતામ્

નીલાં નીલઘનશ્યામાં નમામિ નીલસુન્દરીમ્ ।
શ્યામાઙ્ગી શ્યામઘટિતાં શ્યામવર્ણવિભૂષિતામ્

પ્રણમામિ જગદ્ધાત્રીં ગૌરીં સર્વાર્થસાધિનીમ્ ।
વિશ્વેશ્વરીં વિશ્વઘોરાં વિકટાં ઘોરનાદિનીમ્

આદ્યામાદ્યગુરોરાદ્યામાદ્યનાથપ્રપૂજિતામ્ ।
શ્રીદુર્ગાં ધનદામન્નપૂર્ણાં પદ્માં સુરેશ્વરીમ્

પ્રણમામિ જગદ્ધાત્રીં ચન્દ્રશેખરવલ્લભામ્ ।
ત્રિપુરાં સુન્દરીં બાલામાલાગણવિભૂષિતામ્

શિવદૂતીં શિવારાધ્યાં શિવધ્યેયાં સનાતનીમ્ ।
સુન્દરીં તારિણીં સર્વશિવાગણવિધૂષિતામ્

નારાયણીં વિષ્ણુપૂજ્યાં બ્રહ્મવિષ્ણુહરપ્રિયામ્ ।
સર્વસિદ્ધિપ્રદાં નિત્યામનિત્યાં ગુણવર્જિતામ્

સગુણાં નિર્ગુણાં ધ્યેયામર્ચિતાં સર્વસિદ્ધિદામ્ ।
વિદ્યાસિદ્ધિપ્રદાં વિદ્યાં મહાવિદ્યાં મહેશ્વરીમ્

મહેશભક્તાં મહેશીં મહાજલપ્રપૂજિતામ્ ।
પ્રણમામિ જગદ્ધાત્રીં શુમ્ભાસુરવિમર્દિનીમ્

રક્તપ્રિયાં રક્તવર્ણાં રક્તબીજવિમર્દિનીમ્ ।
ભૈરવીં ભુવનાં દેવીં લોલજિહ્વાં સુરેશ્વરીમ્

ચતુર્ભુજાં દશભુજામષ્ટાદશભુજાં શુભામ્ ।
ત્રિપુરેશીં વિશ્વનાથપ્રિયાં વિશ્વેશ્વરીં શિવામ્

અટ્ટહાસામટ્ટહાસપ્રિયાં ધૂમ્રવિનાશિનીમ્ ।
કમલાં છિન્નભાલાં ચ માતઙ્ગી સુરસુન્દરીમ્

ષોડશીં ત્રિપુરાં ભીમાં ધૂમાં ચ બગલામુખીમ્ ।
સર્વસિદ્ધિપ્રદાં સર્વવિદ્યામન્ત્રવિશોધિનીમ્

પ્રણમામિ જગત્તારાં સારાં ચ મન્ત્રસિદ્ધયે ।
ઇત્યેવં ચ વરારોહે સ્તોત્રં સિદ્ધિકરં પરમ્

પઠિત્વા મોક્ષમાપ્નોતિ સત્યં વૈ ગિરિનન્દિનિ ।
કુજવારે ચતુર્દશ્યામમાયાં જીવવાસરે

શુક્રે નિશાગતે સ્તોત્રં પઠિત્વા મોક્ષમાપ્નુયાત્ ।
ત્રિપક્ષે મન્ત્રસિદ્ધિઃ સ્યાત્ સ્તોત્રપાઠાદ્ધિ શાઙ્કરિ

ચતુર્દશ્યાં નિશાભાગે શનિભૌમદિને તથા ।
નિશામુખે પઠેત્ સ્તોત્રં મન્ત્રસિદ્ધિમવાપ્નુયાત્

કેવલં સ્તોત્રપાઠાદ્ધિ મન્ત્રસિદ્ધિમનુત્તમામ્ ।
જાગર્ત્તિ સતતં ચણ્ડિ સ્તવપાઠાદ્ ભુજઙ્ગિની

ઇત્યેવં ચ શ્રુતં સ્તોત્રં કવચં શૃણુ પાર્વતિ ।
સદાશિવ ઋષિર્દેવિ ઉષ્ણિક્ છન્દ ઉદાહૃતમ્

વિનિયોગશ્ચ દેવેશિ તતશ્ચ મન્ત્રસિદ્ધયે ।
મસ્તકં પાર્વતી પાતુ પાતુ પઞ્ચાનનપ્રિયા

કેશં મુખં પાતુ ચણ્ડી ભારતી રુધિરપ્રિયા ।
કણ્ઠં પાતુ સ્તનં પાતુ કપાલં ગણ્ડમેવ હિ

કાલી કરાલવદના વિચિત્રા સ્વરઘટ્ટિની ।
રક્ષમૂલં નાભિમૂલં દુર્ગા ત્રિપુરસુન્દરી

દક્ષહસ્તં પાતુ તારા સર્વાણી સર્વમેવ ચ ।
વિશ્વેશ્વરી પૃષ્ઠદેશં નેત્રં પાતુ મહેશ્વરી

હૃત્પદ્મં કાલિકા પાતુ ઉગ્રતારા નભોગતમ્ ।
નારાયણી ગુહ્યદેશં મેઢ્રં મેઢ્રેશ્વરી તથા

પાદયુગ્મં જયા પાતુ સુન્દરી ચાઙ્ગુલીષુ ચ ।
ષટ્પદ્મવાસિની પાતુ સર્વપદ્મં નિરન્તરમ્

ઇડા ચ પિઙ્ગલા પાતુ સુષુમ્ના પાતુ સર્વદા ।
ધનં ધનેશ્વરી પાતુ અન્નપૂર્ણા સદાઽવતુ

બાહ્યં બાહ્યેશ્વરી પાતુ નિત્યં માં ચણ્ડિકાઽવતુ ।
જીવં માં પાર્વતી પાતુ માતઙ્ગી પાતુ સર્વદા

છિન્ના ધૂમા ચ ભીમા ચ ભયે પાતુ જલે વને ।
કૌમારી ચૈવ વારાહી નારસિંહી યશો મમ

પાતુ નિત્યં ભદ્રકાલી શ્મશાનાલયવાસિની ।
ઉદરે સર્વદા પાતુ સર્વાણી સર્વમઙ્ગલા

જગન્માતા જયં પાતુ નિત્યં કૈલાસવાસિની ।
શિવપ્રિયાસુતં પાતુ સુતાં પર્વતનન્દિની

ત્રૈલોક્યં પાતુ બગલા ભુવનં ભુવનેશ્વરી ।
સર્વાઙ્ગં સર્વનિલયા પાતુ નિત્યં ચ પાર્વતી

ચામુણ્ડા પાતુ મે રોમકૂપં સર્વાર્થસાધિની ।
બ્રહ્માણ્ડં મે મહાવિદ્યા પાતુ નિત્યં મનોહરા

લિઙ્ગં લિઙ્ગેશ્વરી પાતુ મહાપીઠં મહેશ્વરી ।
ગૌરી મે સન્ધિદેશં ચ પાતુ વૈ ત્રિપુરેશ્વરી

સુરેશ્વરી સદા પાતુ શ્મશાને ચ શવેઽવતુ ।
કુમ્ભકે રેચકે ચૈવ પૂરકે કામમન્દિરે

કામાખ્યા કામનિલયં પાતુ દુર્ગા સુરેશ્વરી ।
ડાકિની કાકિની પાતુ સત્યં મે શાકિની તથા

હાકિની રાકિણી પાતુ રાકિણી પાતુ સર્વદા ।
જ્વાલામુખી સદા પાતુ મુખં મધ્યે સદાઽવતુ

તારિણી વિભવે પાતુ ભવાની ચ ભબેઽવતુ ।
ત્રૈલોક્યમોહિની પાતુ સર્વાઙ્ગં વિજનેઽવતુ

રાજકુલે મહાઘાતે સઙ્ગ્રામે શત્રુસઙ્કટે ।
પ્રચણ્ડા સાધકં માં ચ પાતુ ભૈરવમોહિની

શ્રીરાજમોહિની પાતુ રાજદ્વારે વિપત્તિષુ ।
સમ્પત્પ્રદા ભૈરવી ચ પાતુ બાલા બલં મમ

નિત્યં માં શમ્ભુવનિતા પાતુ માં ત્રિપુરાન્તકા ।
ઇત્યેવં કથિતં દેવિ રહસ્યં સાર્વકાલિકમ્

ભુક્તિદં મુક્તિદં સૌખ્યં સર્વસમ્પત્પ્રદાયકમ્ ।
યઃ પઠેત્ પ્રાતરુત્થાય સાધકેન્દ્રો ભવેદ્ ભુવિ

કુજવારે ચતુર્દશ્યામમાયાં મન્દવાસરે ।
ગુરૌ ગુરું સમભ્યર્ચ્ય યઃ પઠેત્ સાધકોત્તમઃ

સ યાતિ ભવનં દેવ્યાઃ સત્યં સત્યં ન સંશયઃ ।
એવં યદિ વરારોહે પઠેદ્ ભક્તિપરાયણઃ

મન્ત્રસિદ્ધિર્ભવેત્ તસ્ય વાઽચિરાન્નાત્ર સંશયઃ ।
સત્યં લક્ષપુરશ્ચર્યાફલં પ્રાપ્ય શિવાં યજેત્

રાજમાર્ગં શિવામાર્ગં પ્રાપ્ય જીવઃ શિવો ભવેત્ ।
પઠિત્વા કવચં સ્તોત્રં મુક્તિમાપ્નોતિ નિશ્ચિતમ્

પઠિત્વા કવચં સ્તોત્રં દશવિદ્યાં યજેદ્ યતિઃ ।
વિદ્યાસિદ્ધિર્મન્ત્રસિદ્ધિર્ભવત્યેવ ન સંશયઃ

તદૈવ તામ્બૂલે સિદ્ધિર્જાયતે નાત્ર સંશયઃ ।
શવસિદ્ધિશ્ચિતાસિદ્ધિર્દુર્લભા ધરણીતલે

અયત્નસુભગા સિદ્ધિસ્તામ્બૂલાન્નાત્ર સંશયઃ ।
નિશામુખે નિશાયાં ચ મહાકાલે નિશાન્તરે ॥
પઠેદ્ ભક્ત્યા મહેશાનિ ગાણપત્યં લભેત્ તુ સઃ

॥ ઇતિ મુણ્ડમાલાતન્ત્રે મન્ત્રસિદ્ધિસ્તોત્રકવચં નામ દશમઃ
પટલઃ

॥ ઇતિ પ્રથમં મુણ્ડમાલાતન્ત્રં સમાપ્તમ્ ॥
સ્રોતઃ