મૃત્યુવઞ્ચનોપદેશતારાસાધન · શ્લોક 1-16

મૃત્યુવઞ્ચનોપદેશતારાસાધન
ઉત્થાય પૂર્વસંધ્યાયાં ભૂપ્રદેશે મનોહરે ।
મૃદ્વાસનોપવિષ્ટઃ સન્ સ્વહૃદિ ચન્દ્રમણ્ડલે

પઞ્ચમસ્ય પ્રથમં તુ દ્વિતીયસ્વરયોજિતમ્ ।
અર્ધેન્દુબિન્દુસંયુક્તં સિતરશ્મિવિભૂષિતમ્

તસ્ય શુક્લમયૂખૈસ્ તુ તારામ્ આકૃષ્ય વ્યોમનિ ।
દ્વિભુજાં સિતદેહાં તુ વરદોત્પલધારિણીમ્

પઞ્ચોપચારપૂજાભિઃ પૂજયિત્વા તુ ભક્તિતઃ ।
પાપાનાં દેશનાં પશ્ચાત્ તતઃ પુણ્યાનુમોદનમ્

તત્પરિણામનાં ચૈવ ત્રિશરણગમનં તથા ।
ઓં શૂન્યતાજ્ઞાનવજ્રસ્વભાવાત્મકો ઽહમ્ ઇતિ પઠેત્

ઇતિ સ્વપરશૂન્યં વૈ ધ્યાત્વા યોગી વિધાનવિત્ ।
સિતારવિન્દમધ્યસ્થચન્દ્રબિમ્બાસનોપરિ

પૂર્વોક્તબીજનિષ્પન્નાં તારાદેવીં મનોરમામ્ ।
આબદ્ધવજ્રપર્યઙ્કાં વરદોત્પલધારિણીમ્

શરચ્ચન્દ્રકરાકારાં પૃષ્ઠચન્દ્રસમાશ્રિતામ્ ।
સર્વાલઙ્કારસમ્પૂર્ણાં ષોડશાબ્દવપુષ્મતીમ્

સર્વસંબુદ્ધતત્પુત્રમાતરં કામરૂપધામ્ ।
ધ્યાત્વાર્યતારાં હૃદયે તસ્યાશ્ ચક્રં સિતદ્યુતિ

અષ્ટકોષ્ઠકમ્ અષ્ટાભિર્ અક્ષરૈઃ પરિપૂરિતમ્ ।
ઓંહાવ્યઞ્જનમધ્યસ્થસાધ્યનામાદ્યનાભિકમ્

ધ્યાયાદ્ એકાગ્રચિત્તઃ સન્ ષણ્ માસાન્ દૃઢનિશ્ચયઃ ।
જપેદ્ અખિન્નચિત્તઃ સન્ મન્ત્રમ્ એનં દશાક્ષરમ્

ઓઙ્કારમ્ આદિતો દત્ત્વા પશ્ચાત્ તારે પ્રયોજયેત્ ।
તુત્તારે સ્યાત્ તુરે પશ્ચાત્ સ્વાહાન્તં સાર્વકર્મિકઃ

બ્રહ્મેન્દ્રવિષ્ણુચન્દ્રાર્કરુદ્રદિક્પાલમન્મથૈઃ ।
અપ્ય્ અખણ્ડિતરોમાગ્રો મૃત્યું જયતિ મુક્તવત્

વલીપલિતદૌર્ભાગ્યવ્યાધિદારિદ્ર્યસંક્ષયઃ ।
સિંહાદ્યષ્ટમહાભીતિદુઃખસંદોહનાશનમ્

અયાચિતાન્નપાનાદિહર્મ્યવસ્ત્રાદિસંગમઃ ।
ખડ્ગાઞ્જનપાદલેપભદ્રકુમ્ભાદિસિદ્ધયઃ

કવિતા વક્તૃતા મેધા પ્રજ્ઞા ચૈકાન્તનિર્મલા ।
અન્યા ચ વાઞ્છિતા સિદ્ધિશ્ ચક્રાદ્ અસ્માત્ પ્રજાયતે