મહાભારત · અધ્યાય 3.24

તતસ્તેષુ પ્રયાતેષુ કૌન્તેયઃ સત્યસન્ગરઃ ।
અભ્યભાષત ધર્માત્મા ભ્રાતૄન્સર્વાન્યુધિષ્ઠિરઃ ॥

દ્વાદશેમાઃ સમાઽસ્માભિર્વસ્તવ્યં નિર્જને વને ।
સમીક્ષધ્વં મહારણ્યે દેશં બહુમૃગદ્વિજમ્ ॥

બહુપુષ્પફલં રમ્યં શિવં પુણ્યજનોચિતમ્ ।
યત્રેમા દ્વાદશ સમાઃ સુખં પ્રતિવસેમહિ ॥

એવમુક્તે પ્રત્યુવાચ ધર્મરાજં ધનઞ્જયઃ ।
ગુરુવન્માનવવરં માનયિત્વા મનસ્વિનમ્ ॥

ભવાનેવ મહર્ષીણાં વૃદ્ધાનાં પર્યુપાસિતા ।
અજ્ઞાતં માનુષે લોકે ભવતો નાસ્તિ કિઞ્ચન ॥

ત્વયા હ્યુપાસિતા નિત્યં બ્રાહ્મણા વેદપારગાઃ ।
દ્વૈપાયનપ્રભૃતયો નારદશ્ચ મહાતપાઃ ॥

યઃ સર્વલોકદ્વારાણિ નિત્યં સઞ્ચરતે વશી ।
દેવલોકાદ્બ્રહ્મલોકં ગન્ધર્વાપ્સરસામપિ ॥

અનુભાવાંશ્ચ જાનાસિ બ્રાહ્મણાનાં ન સંશયઃ ।
પ્રભાવાંશ્ચૈવ વેત્થ ત્વં સર્વેષામેવ પાર્થિવ ॥

ત્વમેવ રાજઞ્જાનાસિ શ્રેયઃકારણમેવ ચ ।
યત્રેચ્છસિ મહારાજ નિવાસં તત્ર કુંર્મહે ॥

ઇદં દ્વૈતવનં નામ સરઃ પુણ્યજનોષિતમ્ ।
બહુપુષ્પફલં રમ્યં નાનાદ્વિજનિષેવિતમ્ ॥

અત્રેમા દ્વાદશ સમા વિહરેમેતિ રોચયે ।
યદિ તેઽનુમતં રાજન્કિમન્યન્મન્યતે ભવાન્ ॥
યુધિષ્ઠિર ઉવાચ ।

મમાપ્યેતન્મતં પાર્થ ત્વયા યત્સમુદાહૃતમ્ ।
ગચ્છામઃ પુણ્યવિખ્યાતં મહદ્દ્વૈતવનં સરઃ ॥
વૈશમ્પાયન ઉવાચ ।

તતસ્તે પ્રયયુઃ સર્વે પાણ્ડવા ધર્મચારિણઃ ।
બ્રાહ્મણૈર્બહુભિઃ સાર્ધં પુણ્યં દ્વૈતવનં સરઃ ॥

બ્રાહ્મણાઃ સાગ્નિહોત્રાશ્ચ તથૈવ ચ નિરગ્નયઃ ।
સ્વાધ્યાયિનો ભિક્ષવશ્ચ તથૈવ વનવાસિનઃ ॥

બહવો બ્રાહ્મણાસ્તત્ર પરિવવ્રુર્યુધિષ્ઠિરમ્ ।
તપસ્વિનઃ સત્યશીલાઃ શતશઃ સંશિતવ્રતાઃ ॥

તે યાત્વા પાણ્ડવાસ્તત્રબ્રાહ્મણૈર્બહુભિઃ સહ ।
પુણ્યં દ્વૈતવનં રમ્યં વિવિશુર્બરતર્ષભાઃ ॥

તત્સાલતાલામ્રમધૂકનીપ- કદમ્બસર્જાર્જુનકર્ણિકારૈઃ ।
તપાત્યયે પુષ્પધરૈરુપેતં મહાવનં રાષ્ટ્રપતિર્દદર્શ ॥

મહાદ્રુમાણાં શિખરેષુ તસ્થુ- ર્મનોરમાં વાચમુદીરયન્તઃ ।
મયૂરદાત્યૂહચકોરસઙ્ઘા- સ્તસ્મિન્વને બર્હિણકોકિલાશ્ચ ॥

કરેણુયૂથૈઃ સહ યૂથપાનાં મદોત્કટાનામચલપ્રભાણામ્ ।
મહાન્તિ યૂથાનિ મહાદ્વિપાનાં તસ્મિન્વને રાષ્ટ્રપતિર્દદર્શ ॥

મનોરમાં ભોગવતીમુપેત્ય પૂતાત્મનાં ચીરજટાધરાણામ્ ।
તસ્મિન્વને ધર્મભૃતાં નિવાસે દદર્શ સિદ્ધર્ષિગણાનનેકાન્ ॥

તતઃ સ યાનાદવરુહ્ય રાજા સભ્રાતૃકઃ સજનઃ કાનનં તત્ ।
વિવેશ ધર્માત્મવતાં બરિષ્ઠ- સ્ત્રિવિષ્ટપં શક્ર ઇવામિતૌજાઃ ॥

તં સત્યસન્ધં સહિતાઽભિપેતુ- ર્દિદૃક્ષવશ્ચારણસિદ્ધસઙ્ઘાઃ ।
વનૌકસશ્ચાપિ નેરન્દ્રસિંહં મનસ્વિનં તં પરિવાર્ય તસ્થુઃ ॥

સ તત્રવૃદ્ધાનભિવાદ્ય સર્વાન્ પ્રત્યર્ચિતો રાજવદ્દેવવચ્ચ ।
વિવેશ સર્વૈઃ સહિતો દ્વિજાગ્ર્યૈઃ કૃતાઞ્જલિર્ધર્મભૃતાં વરિષ્ઠઃ ॥

સ પુણ્યશીલઃ પિતૃવન્મહાત્મા તપસ્વિભિર્મપરૈરુપેત્ય ।
પ્રત્યર્ચિતઃ પુષ્પધરસ્ય મૂલે મહાદ્રુમસ્યોપવિવેશ રાજા ॥

ભીમશ્ચ કૃષ્ણા ચ ધનઞ્જયશ્ચ યમૌ ચ તે ચાનુચરા નરેન્દ્રમ્ ।
વિમુચ્યવાહાનવશાશ્ચ સર્વે તત્રોપતસ્થુર્ભરતપ્રબર્હાઃ ॥

લતાવતાનાવનતઃ સ પાણ્ડવૈ- ર્મહાદ્રુમઃ પઞ્ચભિરેવ ધન્વિભિઃ ।
બભૌ નિવાસોપગતૈર્મહાત્મભિ- ર્મહાગિરિર્વારણયૂથપૈરિવ ॥