લઘુયમસ્મૃતિ · શ્લોક 61 -80

પ્રાયશ્ચિત્તે તતશ્ ચીર્ણે કુર્યાદ્ બ્રાહ્મણભોજનમ્ ।
વિંશતિં ગાવૃષં ચૈવ દદ્યાત્ તેષાં ચ દક્ષિણામ્ ॥

કૃમિભિર્ વ્રણસંભૂતૈર્ મક્ષિકાભિશ્ ચ પાતિતૈઃ ।
કૃચ્છ્રાર્ધં સંપ્રકુર્વીત શક્ત્યા દદ્યાચ્ ચ દક્ષિણામ્ ॥

પ્રાયશ્ચિત્તં ચ કૃત્વા વૈ ભોજયિત્વા દ્વિજોત્તમાન્ ।
સુવર્ણમ્ આષકં દદ્યાત્ તતઃ શુદ્ધિર્ વિધીયતે ॥

ચણ્ડાલશ્વપચૈઃ સ્પૃષ્ટે નિશિ સ્નાનં વિધીયતે ।
ન વસેત્ તત્ર રાત્રૌ તુ સદ્યઃ સ્નાનેન શુધ્યતિ ॥

અથ વસેદ્ યદા રાત્રાવ્ અજ્ઞાનાદ્ અવિચક્ષણઃ ।
તદા તસ્ય તુ તત્ પાપં શતધા પરિવર્તતે ॥

ઉદ્ગચ્છન્તિ હિ નક્ષત્રાણ્ય્ ઉપરિષ્ટાચ્ ચ યે ગ્રહાઃ ।
સંસ્પૃષ્ટે રશ્મિભિસ્ તેષામ્ ઉદકે સ્નાનમ્ આચરેત્ ॥

કુડ્યાન્તર્જલવલ્મીક મૂષિકોત્કરવર્ત્મસુ ।
શ્મશાને શૌચશેષે ચ ન ગ્રાહ્યાઃ સપ્ત મૃત્તિકાઃ ॥

ઇષ્ટાપૂર્તં તુ કર્તવ્યં બ્રાહ્મણેન પ્રયત્નતઃ ।
ઇષ્ટેન લભતે સ્વર્ગં પૂર્તે મોક્ષં સમશ્નુતે ॥

વિત્તાપેક્ષં ભવેદ્ ઇષ્ટં તડાગં પૂર્તમ્ ઉચ્યતે ।
આરામશ્ ચ વિશેષેણ દેવદ્રોણ્યસ્ તથૈવ ચ ॥

વાપી કૂપતડાગાનિ દેવતાયતનાનિ ચ ।
પતિતાન્ય્ ઉદ્ધરેદ્ યસ્ તુ સ પૂર્તફલમ્ અશ્નુતે ॥

શુક્લાયા મૂત્રં ગૃહ્ણીયાત્ કૃષ્ણાયા ગોઃ શકૃત્ તથા ।
તામ્રાયાશ્ ચ પયો ગ્રાહ્યં શ્વેતાયા દધિ ચોચ્યતે ॥

કપિલાયા ઘૃતં ગ્રાહ્યં મહાપાતકનાશનમ્ ।
સર્વતીર્થે નદી તોયે કુશૈર્ દ્રવ્યં પૃથક્ પૃથક્ ॥

આહૃત્ય પ્રણવેનૈવ હ્ય્ ઉત્થાપ્ય પ્રણવેન ચ ।
પ્રણવેન સમાલોડ્ય પ્રણવેન તુ સંપિબેત્ ॥

પાલાશે મધ્યમે પર્ણે ભાણ્ડે તામ્રમયે તથા ।
પિબેત્ પુષ્કરપર્ણે વા તામ્રે વા મૃન્મયે શુભે ॥

સૂતકે તુ સમુત્પન્ને દ્વિતીયે સમુપસ્થિતે ।
દ્વિતીયે નાસ્તિ દોષસ્ તુ પ્રથમેનૈવ શુધ્યતિ ॥

જાતેન શુધ્યતે જાતં મૃતેન મૃતકં તથા ।
ગર્ભસંસ્રવણે માસે ત્રીણ્ય્ અહાનિ વિનિર્દિશેત્ ॥

રાત્રિભિર્ માસતુલ્યાભિર્ ગર્ભસ્રાવે વિશુધ્યતિ ।
રજસ્ય્ ઉપરતે સાધ્વી સ્નાનેન સ્ત્રી રજસ્વલા ॥

સ્વગોત્રાદ્ ભ્રશ્યતે નારી વિવાહાત્ સપ્તમે પદે ।
સ્વામિગોત્રેણ કર્તવ્યાસ્ તસ્યાઃ પિણ્ડોદકં ક્રિયાઃ ॥

દ્વે પિતુઃ પિણ્ડદાનં સ્યાત્ પિણ્ડે પિણ્ડે દ્વિનામતા ।
ષણ્ણાં દેયાસ્ ત્રયઃ પિણ્ડા એવં દાતા ન મુહ્યતિ ॥

સ્વેન ભર્ત્રા સહ શ્રાદ્ધં માતા ભુક્ત્વા સ દૈવતમ્ ।
પિતામહ્ય્ અપિ સ્વેનૈવ સ્વેનૈવ પ્રપિતામહી ॥