જાતકમાલા · શ્લોક 55-73

યદ્ અપહૃતમ્ અનાર્યૈસ્ તસ્ય માંસં શરીરાદ્ યદિ તદ્ અપરિશેષં પિણ્ડિતં સ્યાત્ કથં ચિત્ ।
ગિરિમ્ અપિ સ સુમેરું લઙ્ઘયેન્ માંસરાશિર્ ન ચ મનસિ વિષદો ન ચ ખેદો બભૂવ

ક્ષયમ્ ઉપયયુર્ અઙ્ગેષ્વ્ એવ શસ્ત્રાણિ તસ્ય પ્રકૃતિમૃદુષુ સાધોર્ અક્ષતાધ્યાશયસ્ય ।
અભિરુચિતપરાર્થપ્રીતિસંભોગશાન્તે ન ચ મનસિ વિષાદો ન ચ ખેદો બભૂવ

યે ચાસ્ય રક્તૈર્ વિલિલેપુર્ અઙ્ગા તે રેજિરે રોગવિષાદમુક્તાઃ ।
યે ચાપિ રક્તાનિ પપુઃ સરોગાસ્ તે સર્વલોકાઃ પુપુષુર્ વિરોગાઃ

જનમ્ અપગતરોગં વીક્ષમાણસ્ય હર્ષો મનસિ ભુવનબન્ધોર્ લબ્ધગાધો બભૂવ ।
પિશિતમ્ અનુપયોગં વીક્ષમાણસ્ય ભૂયો ઽપ્ય્ અભવદ્ અરતિદોલં ચઞ્ચલં તસ્ય ચેતઃ

ઉત્કૃત્તચર્મપટલસ્ફુટતામ્રમાંસો રન્ધ્રોદ્વમદ્રુધિરશેષવિશેષતામ્રઃ ।
કાયઃ સ તસ્ય વિકૃતઃ કૃતનિશ્ચયસ્ય રેજે જવાકુસુમરાશિર્ ઇવાભ્રચુમ્બી

વિચ્છિદ્યમાનઃ સુનિશાતશસ્ત્રૈસ્ તદ્ દુઃખમ્ એકાશ્રયમ્ ઈક્ષમાણઃ ।
સુખેન દુઃખં સ નિરાચકાર લબ્ધ્વા પરત્રાત્મનિ ચૈકમત્યમ્

પરિણામખરા બતાધમાયા ગતિર્ આત્માભિનિવેશવાસનાયાઃ ।
ઉપદિગ્ધધિયો યયા મનુષ્યાઃ પિતૃભૂતેષ્વ્ અપિ સાધુષુ સ્ખલન્તિ

એતસ્ય માંસં બુભુજે કૃપાલોર્ યો યઃ સ સ વ્યાધિમ્ અપાચકાર ।
ક્રમેણ કૃચ્છ્રં જગદ્ ઉત્તતાર વિપત્સમુદ્રં તદ્ અનેન કૃત્સ્નમ્

અથ સર્વ એવ લોકો વિગતનિખિલરોગોપસર્ગસ્ તસ્મિન્ મહાસત્ત્વે સમુપજાતપ્રેમગૌરવબહુમાનઃ પ્રણમ્ય શ્વાનં બોધિસત્ત્વમ્ અબ્રવીત્ ॥
અહો કૃપાભ્યાસવિશેષભદ્રતા ગુણેષ્વ્ અહો ભક્તિર્ અપેતકલ્મષા ।
અહો પરાર્થપ્રતિપત્તિપેશલં તવાર્ય કર્મેદમ્ અતીતમાનુષમ્

અહો જગચ્છ્રેષ્ઠમહાદયાર્દ્રતા અહો સ્વસૌખ્યવ્યવસાયનિઃસ્પૃહા ।
શુભેષ્વ્ અહો નિશ્ચયનિશ્ચલં મનો મનસ્વિનાં બોધિપથાનુપાતિનામ્

અહો બતાચિન્ત્યમ્ ઉપાયકૌશલમ્ અહો પરાર્થે ઽભિરતેર્ ઉદાત્તતા ।
અચિન્ત્યચર્યાતિશયાય સાધવે નમો ઽસ્તુ તુભ્યં જગદેકબન્ધવે

ત્વં નઃ પિતા યદિ પિતા ત્વમ્ ઇવાર્થકામઃ શાસ્તા ત્વમ્ એવ યદિ ધર્મગુરુસ્ ત્વમ્ એવ ।
ત્વમ્ દૈવતં યદિ ન તજ્ જનવાદમાત્રમ્ આર્તાયનં તુ જગતઃ પરમં ત્વમ્ એવ

તસ્માદ્ આજ્ઞાભિષેકેણ પવિત્રયિતુમ્ અર્હસિ ।
ઉપદિગ્ધમ્ ઇમં લોકં યુષ્મદાયાસચેતસા

અથ બોધિસત્ત્વઃ સમુપજાતપ્રસાદમાનસમ્ અવગમ્ય તમ્ એનમ્ અબ્રવીત્ ॥
પીડા મમેયમ્ ઇતિ નૈવમ્ ઇદં પ્રધાર્યં સત્ત્વાર્થમ્ એવ ગતિચક્રચલસ્ય નિત્યમ્ ।
પીડા મમાભવદ્ ઉદીક્ષ્ય વિપત્પરીતાન્ યુષ્માન્ નિરામયસુખં ત્વ્ અધુના મનો મે

કૃત્યં ન મે પરહિતાદ્ અપરં ગરીયઃ સંસારચારકનિબન્ધનમ્ એતદ્ એવ ।
તસ્માત્ કુકાર્યમલિનામ્ અતિલઙ્ઘ્ય ચર્યાં મત્પ્રીતયે સતતમ્ આત્મહિતં કુરુધ્વમ્

લોકાન્ ઇમાન્ સ્વકૃતકર્મભુજો વિદિત્વા મૃત્યોર્ અપર્વપરુષસ્ય કરોદરસ્થાન્ ।
પાપાન્ય્ અસહ્યપરિતાપફલોદયાનિ પ્રાણાત્યયે ઽપિ પરિવર્જયિતું યતધ્વમ્

સ્વન્તાન્ય્ અનાશરમણીયફલપ્રદાનિ જન્માટવીગહનપથ્યદનોપમાનિ ।
પુણ્યાનિ સંચિનુત મત્પ્રતિકારબુદ્ધ્યા કલ્યાણમિત્રવચનં હિ ન લઙ્ઘનીયમ્

ઇતિ સમનુશિષ્ય પ્રાણિનસ્ તાન્ મહાત્મા નિશિતપરશુધારાજર્જરક્લાન્તદેહઃ ।
અવસિતકરણીયઃ પર્યુદસ્યાત્મભાવં તમ્ અતિવિકૃતરૂપં સ્વર્ગમ્ એવારુરોહ

ઇતિ જગદુપજીવ્યા ઉત્તમશ્રીસમુદ્રા વિપદશનિનિપાતવ્યાહતા વ્યુષ્ટિયોગાત્ ।
વિગતજલદપઙ્કવ્યોમપર્યન્તદીર્ઘાઃ શશિન ઇવ મયૂખા લોકમ્ ઉત્તારયન્તિ