ગર્ગસંહિતા · શ્લોક 4.7-2

માધુર્યખણ્ડઃ - સપ્તમોઽધ્યાયઃ
કૃષ્ણકૃતમયોધ્યાગોપીગણાનાં પાણિપીડનમ્ -
શ્રીનારદ ઉવાચ -
અથ દૂતઃ સિન્ધુદેશાન્ માથુરાન્પુનરાગતઃ ।
ચરન્ વૃન્દાવને કૃષ્ણાતીરે કૃષ્ણં દદર્શ હ

કૃષ્ણં પ્રણમ્ય રહસિ કૃતાઞ્જલિપુટઃ શનૈઃ ।
પ્રદક્ષિણીકૃત્ય દૂતો વિમલોક્તમુવાચ સઃ

દૂત ઉવાચ -
સ્વયં પરં બ્રહ્મ પરઃ પરેશઃ
પરૈરદૃશ્યઃ પરિપૂર્ણદેવઃ ।
યઃ પુણ્યસંઘૈઃ સતતં હિ દૂરઃ
તસ્મૈ નમઃ સજ્જનગોચરાય

ગોવિપ્રદેવશ્રુતિસાધુધર્મ
રક્ષાર્થમદ્યૈવ યદોઃ કુલેઽજઃ ।
જાતોઽસિ કંસાદિવધાય યોઽસૌ
તસ્મૈ નમોઽનંતગુણાર્ણવાય

અહો પરં ભાગ્યમલં વ્રજૌકસાં
ધન્યં કુલં નન્દવરસ્ય તે પિતુઃ ।
ધન્યો વ્રજૌ ધન્યમરણ્યમેતદ્
યત્રૈવ સાક્ષાત્પ્રકટઃ પરો હરિઃ

યદ્‌રાધિકાસુન્દરકણ્ઠરત્‍નં
યદ્‌ગોપિકાજીવનમૂલરૂપમ્ ।
તદેવ મન્નેત્રપથિ પ્રજાતં
કિં વર્ણયે ભાગ્યમતઃ સ્વકીયમ્

ગુપ્તો વ્રજે ગોપભિષેણ ચાસિ
કસ્તૂરિકામોદ ઇવ પ્રસિદ્ધઃ ।
યશશ્ચ તે નિર્મલમાશુ શુક્લી
કરોતિ સર્વત્ર ગતં ત્રિલોકીમ્

જાનાસિ સર્વં જનચૈત્યભાવં
ક્ષેત્રજ્ઞ આત્મા કૃતિવૃન્દસાક્ષી ।
તથાપિ વક્ષ્યે નૃપવાક્યમુક્તં
પરં રહસ્યં રહસિ સ્વધર્મમ્

યા સિંધુદેશેષુ પુરી પ્રસિદ્ધા
શ્રીચમ્પકા નામ શુભા યથૈન્દ્રી ।
તત્પાલકોઽસૌ વિમલો યથેન્દ્રઃ
ત્વત્પાદપદ્મે કૃતચિત્તવૃત્તિઃ

સદા કૃતં યજ્ઞશતં ત્વદર્થં
દાનં તપો બ્રાહ્મણસેવનં ચ ।
તીર્થં જપં યેન સુસાધનેન
તસ્મૈ પરં દર્શનમેવ દેહિ

તત્કન્યકાઃ પદ્મવિશાલનેત્રાઃ
પૂર્ણં પતિં ત્વાં મૃગયંત્ય આરાત્ ।
સદા ત્વદર્થં નિયમવ્રતસ્થા-
સ્ત્વત્પાદસેવાવિમલીકૃતાઙ્ગાઃ

ગૃહાણ તાસાં વ્રજદેવ પાણીન્
દત્વા પરં દર્શનમદ્‌ભુતં સ્વમ્ ।
ગચ્છાશુ સિન્ધૂન્ વિશદીકુરુ ત્વં
વિમૃશ્ય કર્તવ્યમિદં ત્વયા હિ

શ્રીનારદ ઉવાચ -
દૂતવાક્યં ચ તચ્છ્રુત્વા પ્રસન્નો ભગવાન્હરિઃ ।
ક્ષણમાત્રેણ ગતવાન્ સદૂતશ્ચમ્પકાં પુરીમ્

વિમલસ્ય મહાયજ્ઞે વેદધ્વનિસમાકુલે ।
સદૂતઃ કૃષ્ણ આકાશાત્સહસાઽવતતાર હ

શ્રીવત્સાંકં ઘનશ્યામં સુન્દરં વનમાલિનમ્ ।
પીતાંબરં પદ્મનેત્રં યજ્ઞવાટાગતં હરિમ્

તં દૃષ્ટ્વા સહસોત્થાય વિમલઃ પ્રેમવિહ્વલઃ ।
પપાત ચરણોપાંતે રોમાંચી સન્કૃતાઞ્જલિઃ

સંસ્થાપ્ય પીઠકે દિવ્યે રત્નૃહેમખચિત્પદે ।
સ્તુત્વા સમ્પૂજ્ય વિધિવદ્‌રાજા તત્સંમુખે સ્થિતઃ

ગવાક્ષેભ્યઃ પ્રપશ્યન્તીઃ સુન્દરીર્વીક્ષ્ય માધવઃ ।
ઉવાચ વિમલં કૃષ્ણો મેઘગંભીરયા ગિરા

શ્રીભગવાનુવાચ -
મહામતે વરં બ્રૂહિ યત્તે મનસિ વર્તતે ।
યાજ્ઞવલ્ક્યસ્ય વચસા જાતં મદ્દર્શનં તવ

વિમલ ઉવાચ -
મનો મે ભ્રમરીભૂતં સદા ત્વત્પાદપંકજે ।
વાસં કુર્યાદ્ દેવદેવ નાન્યેચ્છા મે કદાચન

શ્રીનારદ ઉવાચ -
ઇત્યુક્ત્વા વિમલો રાજા સર્વં કોશધનં મહત્ ।
દ્વિપવાજિરથૈઃ સાર્દ્ધં ચક્રે આત્મનિવેદનમ્

સમર્પ્ય વિધિના સર્વાઃ કન્યકા હરયે નૃપ ।
નમશ્ચકાર કૃષ્ણાય વિમલો ભક્તિતત્પરઃ

તદા જયજયારાવો બભૂવ જનમણ્ડલે ।
વવૃષુઃ પુષ્પવર્ષાણિ દેવતા ગગનસ્થિતાઃ

તદૈવ કૃષ્ણસારૂપ્યં પ્રાપ્તોઽનંગસ્ફુરદ્દ્યુતિઃ ।
શતસૂર્યપ્રતીકાશો દ્યોતયન્મંડલં દિશામ્

વૈનતેયં સમારુહ્ય નત્વા શ્રીગરુડધ્વજમ્ ।
સભાર્યઃ પશ્યતાં નૄણાં વૈકુણ્ઠં વિમલો યયૌ

દત્વા મુક્તિં નૃપતયે શ્રીકૃષ્ણો ભગવાન્સ્વયમ્ ।
તત્સુતાઃ સુન્દરીર્નીત્વા વ્રજમંડલમાયયૌ

તત્ર કામવને રમ્યે દિવ્યમન્દિરસંયુતે ।
ક્રીડન્ત્યઃ કંદુકૈઃ સર્વાઃ તસ્થુઃ કૃષ્ણપ્રિયાઃ શુભાઃ

યાવતીશ્ચ પ્રિયા મુખ્યાઃ તાવદ્ રૂપધરો હરિઃ ।
રરાજ રાસે વ્રજરાડ્ અઞ્જયંસ્તન્મનાઃ પ્રભુઃ

રાસે વિમલપુત્રીણાં આનન્દજલબિન્દુભિઃ ।
ચ્યુતૈર્વિમલકુણ્ડોઽભૂત્ તીર્થાનાં તીર્થમુત્તમમ્

દૃષ્ટ્વા પીત્વા ચ તં સ્નાત્વા પૂજયિત્વા નૃપેશ્વર ।
છિત્વા મેરુસમં પાપં ગોલોકં યાતિ માનવઃ

અયોધ્યાવાસિનીનાં તુ કથાં યઃ શૃણુયાન્નરઃ ।
સ વ્રજેદ્ધામ પરમં ગોલોકં યોગિદુર્લભમ્

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
અયોધ્યાપુરવાસિન્યુપાખ્યાનં નામ સપ્તમોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા