ગણ્ડવ્યૂહસૂત્ર · અધ્યાય 23

56 સમન્તભદ્રચર્યાપ્રણિધાનમ્ ।
અથ ખલુ સુધનઃ શ્રેષ્ઠિદારકઃ ત્રિસાહસ્રમહાસાહસ્રલોકધાતુપરમાણુરજઃસમકલ્યાણમિત્રપર્યુપાસિતઃ સર્વજ્ઞતાસંભારોપચિતચેતાઃ સર્વકલ્યાણમિત્રાવવાદાનુશાસનીષુ પ્રદક્ષિણગ્રાહિતયા પ્રતિપન્નઃ સર્વકલ્યાણમિત્રાશયસમતાપ્રસૃતઃ સર્વકલ્યાણમિત્રારાગણાવિરાગણબુદ્ધિઃ સર્વકલ્યાણમિત્રાવવાદાનુશાસનીનયસમુદ્રાનુગતઃ મહાકરુણાશયસાગરસંભૂતગર્ભો મહામૈત્રીનયમેઘસર્વજગદ્વિરોચનઃ મહાપ્રીતિવેગસંવર્ધિતશરીરઃ વિપુલબોધિસત્ત્વવિમોક્ષપ્રશાન્તવિહારી સમન્તસુખપ્રસૃતત્યાગચક્ષુઃ સર્વતથાગતગુણસમુદ્રપ્રતિપત્તિસુપરિપૂર્ણઃ સર્વતથાગતાધિમુક્તિપથપ્રસૃતઃ સર્વજ્ઞતાસંભારવીર્યવેગવિવર્ધિતઃ સર્વબોધિસત્ત્વચિત્તાશયસુપરિણામિતબુદ્ધિઃ સર્વત્ર્યધ્વતથાગતપરંપરાવતીર્ણઃ સર્વબુદ્ધધર્મનયસાગરાનુબુદ્ધઃ સર્વતથાગતધર્મચક્રનયસાગરાનુગતઃ સર્વલોકોપપત્તિપ્રતિભાસસંદર્શનગોચરઃ સર્વબોધિસત્ત્વપ્રણિધાનનયસાગરાવતીર્ણઃ સર્વકલ્પબોધિસત્ત્વચર્યાસંપ્રસ્થિતઃ સર્વજ્ઞતાવિષયાવભાસપ્રતિલબ્ધઃ સર્વબોધિસત્ત્વેન્દ્રિયવિવર્ધિતઃ સર્વજ્ઞતામાર્ગાવભાસપ્રતિલબ્ધઃ સર્વદિગ્વિતિમિરાલોકપ્રાપ્તઃ સર્વધર્મધાતુનયપ્રસૃતબુદ્ધિઃ સર્વક્ષેત્રનયાવભાસસંજાતઃ સર્વસત્ત્વપ્રસારાર્થક્રિયાપ્રતિસ્રોતોનુગતઃ સર્વાવરણપ્રપાતપર્વતવિકિરણો ઽનાવરણધર્મતાનુગતઃ સમન્તતલભૂમિધર્મધાતુગર્ભબોધિસત્ત્વવિમોક્ષપ્રશાન્તવિહારી સર્વતથાગતગોચરમન્વેષમાણઃ સર્વતથાગતાધિષ્ઠિતઃ સમન્તભદ્રસ્ય બોધિસત્ત્વસ્ય ગોચરં વિચારયમાણઃ સ્થિતો ઽભૂત્ । સમન્તભદ્રસ્ય બોધિસત્ત્વસ્ય નામધેયં શ્રુત્વા બોધિચર્યાં શ્રુત્વા પ્રણિધાનવિશેષં ચ શ્રુત્વા સંભારસંભવપ્રસ્થાનપ્રતિષ્ઠિતવિશેષં ચ શ્રુત્વા અભિનિર્હારનિર્યાણપથવિશેષં ચ શ્રુત્વા સમન્તભદ્રભૂમ્યાચારવિચારં ચ શ્રુત્વા ભૂમિસંભારં ચ શ્રુત્વા લમ્ભવિશેષં ચ શ્રુત્વા ભૂમિપ્રતિલમ્ભવેગં ચ શ્રુત્વા ભૂમ્યાક્રમણં ચ શ્રુત્વા ભૂમિપ્રતિષ્ઠાનં ચ શ્રુત્વા ભૂમિપરાક્રમવિક્રમં ચ શ્રુત્વા ભૂમિગૌરવં ચ શ્રુત્વા ભૂમ્યધિષ્ઠાનં ચ શ્રુત્વા ભૂમિસંવાસં ચ શ્રુત્વા સમન્તભદ્રબોધિસત્ત્વદર્શનપરિતૃષિતસ્તસ્મિન્નેવ વજ્રસાગરગર્ભબોધિમણ્ડે તથાગતસિંહાસનાભિમુખઃ સર્વરત્નગર્ભપદ્માસનનિષણ્ણઃ આકાશધાતુવિપુલેન ચિત્તેન સર્વાભિનિવેશોચ્ચલિતેન, સુભાવિતયા સર્વક્ષેત્રસંજ્ઞયા, સર્વસઙ્ગસમતિક્રાન્તેન ચિત્તેન, સર્વધર્માનાવરણગોચરેણ અપ્રતિહતેન ચિત્તેન, સર્વદિક્સમુદ્રસ્ફરણેન અનાવરણેન ચિત્તેન, સર્વજ્ઞતાવિષયાક્રમણેન શુદ્ધેન ચિત્તેન, બોધિમણ્ડાલંકારવિપશ્યનાપરિશુદ્ધેન
સુવિભક્તેન ચિત્તેન, સર્વબુદ્ધધર્મસમુદ્રાવતીર્ણેન વિપુલેન ચિત્તેન, સર્વસત્ત્વધાતુપરિપાકવિનયસ્ફરણેન મહદ્ગતેન ચિત્તેન, સર્વબુદ્ધક્ષેત્રપરિશોધનેન અપરિમાણેન ચિત્તેન, સર્વબુદ્ધપર્ષન્મણ્ડલપ્રતિભાસપ્રાપ્તેન સર્વકલ્પસંવાસાપર્યાદત્તેન અનન્તેન ચિત્તેન સર્વતથાગતબલવૈશારદ્યાવેણિકબુદ્ધધર્મપર્યવસાનેન । એવં ચિત્તમનસિકારપ્રયુક્તસ્ય ખલુ પુનઃ સુધનસ્ય શ્રેષ્ઠિદારકસ્ય પૂર્વકુશલમૂલાભિષ્યન્દિતસર્વતથાગતાધિષ્ઠાનેન ચ સમન્તભદ્રસ્ય બોધિસત્ત્વસ્ય પૂર્વકુશલમૂલસભાગતયા સમન્તભદ્રસ્ય બોધિસત્ત્વસ્ય દર્શનાય દશ પૂર્વનિમિત્તાનિ પ્રાદુરભૂવન્ । કતમાનિ દશ? યદુત સર્વબુદ્ધક્ષેત્રાણિ ( ગ્વ્ 421 ) વિશુધ્યન્તિ સ્મ સર્વતથાગતબોધિમણ્ડાલંકારવિશુદ્ધ્યા । સર્વબુદ્ધક્ષેત્રાણિ વિશુધ્યન્તિ સ્મ સર્વાક્ષણાપાયદુર્ગતિપથવિનિવૃત્તતયા । સર્વબુદ્ધક્ષેત્રાણિ વિશુધ્યન્તિ સ્મ ધર્મનલિનીવ્યૂહબુદ્ધક્ષેત્રવિશુદ્ધ્યા । સર્વબુદ્ધક્ષેત્રાણિ વિશુધ્યન્તિ સ્મ સર્વસત્ત્વકાયચિત્તપ્રહ્લાદનપ્રાપ્તતયા । સર્વબુદ્ધક્ષેત્રાણિ વિશુધ્યન્તિ સ્મ સર્વરત્નમયસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ સર્વસત્ત્વધાતુલક્ષણાનુવ્યઞ્જનપ્રતિમણ્ડિતસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ સર્વસત્ત્વધાતુલક્ષણાનુવ્યઞ્જનપ્રતિમણ્ડિતસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ સર્વવ્યૂહાલંકારમેઘસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ સર્વસત્ત્વધાત્વન્યોન્યમૈત્રહિતચિત્તાવ્યાપન્નચિત્તસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ બોધિમણ્ડાલંકારવ્યૂહસંસ્થાનતયા । સર્વબુદ્ધક્ષેત્રાણિ વિશુધ્યન્તિ સ્મ સર્વસત્ત્વબુદ્ધાનુસ્મૃતિમનસિકારપ્રયુક્તસંસ્થાનતયા । ઇમાનિ દશ પૂર્વનિમિત્તાનિ પ્રાદુરભવન્ સમન્તભદ્રસ્ય બોધિસત્ત્વસ્ય મહાસત્ત્વસ્ય દર્શનાય ॥
અપરે દશ મહાવભાસાઃ પ્રાદુરભવન્ સમન્તભદ્રસ્ય બોધિસત્ત્વસ્ય મહાસત્ત્વસ્ય દર્શનપૂર્વનિમિત્તમ્ । કતમે દશ? યદુત સર્વલોકધાતુપરમાણુરજઃસુ એકૈકસ્મિન્ પરમાણુરજસિ સર્વતથાગતજાલાનિ વિદ્યોતયન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વબુદ્ધપ્રભામણ્ડલમેઘા નિશ્ચર્ય અનેકવર્ણા નાનાવર્ણા અનેકશતસહસ્રવર્ણાઃ સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વરત્નમેઘાઃ સર્વતથાગતપ્રતિભાસવિજ્ઞપનાન્નિશ્ચરિત્વા સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વતથાગતાર્ચિશ્ચક્રમણ્ડલમેઘા નિશ્ચરિત્વા સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વગન્ધપુષ્પમાલ્યવિલેપનધૂપમેઘા નિશ્ચરિત્વા સમન્તભદ્રસ્ય બોધિસત્ત્વસ્ય સર્વગુણધર્મસમુદ્રમેઘાન્નિગર્જમાણા દશદિક્સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વચન્દ્રસૂર્યજ્યોતિર્મેઘા નિશ્ચરિત્વા સમન્તભદ્રબોધિસત્ત્વપ્રભાં પ્રમુઞ્ચમાનાઃ સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વસત્ત્વકાયસંસ્થાનપ્રદીપમેઘા નિશ્ચરિત્વા બુદ્ધરશ્મિવત્પ્રભાસમાનાઃ સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વતથાગતકાયપ્રતિભાસમણિરત્નવિગ્રહમેઘા નિશ્ચરિત્વા દશસુ દિક્ષુ સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વતથાગતકાયસંસ્થાનરશ્મિવિગ્રહમેઘા નિશ્ચરિત્વા સર્વબુદ્ધાધિષ્ઠાનપ્રણિધાનમેઘાનભિપ્રવર્ષમાણાઃ સર્વધર્મધાતું સ્ફરન્તિ સ્મ । સર્વલોકધાતુપરમાણુરજોભ્ય એકૈકસ્માત્પરમાણુરજસઃ સર્વરૂપગતવર્ણાવભાસા બોધિસત્ત્વકાયપ્રતિભાસમેઘસમુદ્રાઃ સર્વસત્ત્વનિર્માણકાર્યપ્રયોગાઃ સર્વસત્ત્વસર્વાભિપ્રાયપરિપૂરિનિષ્પાદના નિશ્ચરિત્વા સર્વધર્મધાતું સ્ફરન્તિ સ્મ । ઇમે દશ મહાવભાસાઃ પ્રાદુરભૂવન્ સમન્તભદ્રસ્ય બોધિસત્ત્વસ્ય દર્શનપૂર્વનિમિત્તમ્ ॥

અથ ખલુ સુધનઃ શ્રેષ્ઠિદારક ઇમાન્ દશ પૂર્વનિમિત્તાવભાસાન્ દૃષ્ટ્વા સમન્તભદ્રસ્ય બોધિસત્ત્વસ્ય દર્શનાવકાશપ્રતિલબ્ધઃ સ્વકુશલમૂલબલોપસ્તબ્ધઃ સર્વતથાગતાધિષ્ઠાનસર્વબુદ્ધધર્માવભાસસંજાતઃ સમન્તભદ્રબોધિસત્ત્વપ્રણિધાનાવિષ્ટઃ સર્વતથાગતગોચરાભિમુખઃ ઉદારબોધિસત્ત્વગોચરનિશ્ચયબલાધાનપ્રાપ્તઃ સમન્તભદ્રબોધિસત્ત્વદર્શનસર્વજ્ઞતાપ્રભાલાભસંજ્ઞી સમન્તભદ્રબોધિસત્ત્વદર્શનાભિમુખેન્દ્રિયઃ ( ગ્વ્ 422 ) સમન્તભદ્રબોધિસત્ત્વદર્શનમહાવીર્યવેગપ્રાપ્તઃ સમન્તભદ્રબોધિસત્ત્વપરિગવેષમાણાવિવર્ત્યવીર્યપ્રયોગઃ સર્વદિગભિમુખેનેન્દ્રિયચક્રેણ સમન્તભદ્રચક્ષુર્વિષયાવક્રમણેન બોધિસત્ત્વશરીરેણ સર્વતથાગતારમ્બણસંપ્રેષિતેન અનવશેષબુદ્ધપાદમૂલગતસમન્તભદ્રબોધિસત્ત્વાનુબદ્ધેન ચિત્તેન સમન્તભદ્રબોધિસત્ત્વારમ્બણપરિગવેષણાવિપ્રવસિતેનાશયેન સર્વારમ્બણેષુ સમન્તભદ્રબોધિસત્ત્વદર્શનસંજ્ઞાગતગર્ભઃ સમન્તભદ્રબોધિસત્ત્વપથપ્રસૃતેન જ્ઞાનચક્ષુષા આકાશધાતુવિપુલેનાશયેન મહાકરુણાવજ્રસુસંગૃહીતેનાધ્યાશયેન અપરાન્તકોટીગતકલ્પાધિષ્ઠાનેન સમન્તભદ્રબોધિસત્ત્વાનુબન્ધનપ્રણિધાનેન સમન્તભદ્રબોધિસત્ત્વચર્યાસમતાનુગતયા ક્રમવિક્રમવિશુદ્ધ્યા સર્વતથાગતવિષયસંવસનેન સમન્તભદ્રબોધિસત્ત્વભૂમિપ્રતિષ્ઠાનજ્ઞાનવિહારેણ સમન્વાગતો ઽદ્રાક્ષીત્ સમન્તભદ્રં બોધિસત્ત્વં ભગવતો વૈરોચનસ્ય તથાગતસ્યાર્હતઃ સમ્યક્સંબુદ્ધસ્ય પુરતો મહારત્નપદ્મગર્ભે સિંહાસને નિષણ્ણં બોધિસત્ત્વપર્ષન્મણ્ડલસમુદ્રગતં બોધિસત્ત્વગણપરિવૃતં બોધિસત્ત્વસંઘપુરસ્કૃતં સર્વપર્ષમણ્ડલાનુસૃતાભ્યુદ્ગતકાયં સર્વલોકાનભિભૂતં સર્વબોધિસત્ત્વાનુવ્યવલોકિતમપર્યન્તજ્ઞાનવિષયમસંહાર્યગોચરમચિન્ત્યવિષયં ત્ર્યધ્વસમતાનુગતં સર્વતથાગતસમતાનુપ્રાપ્તમ્ । સ તસ્ય સર્વરોમવિવરેભ્યઃ એકૈકસ્માદ્રોમવિવરાત્ સર્વલોકધાતુપરમાણુરજઃસમાન્ રશ્મિમેઘાન્નિશ્ચરિત્વા ધર્મધાતુપરમાકાશધાતુપર્યવસાનાન્ સર્વલોકધાતૂનવભાસ્ય સત્ત્વાનાં દુઃખં પ્રશમયમાનાનપશ્યત્ । સ તસ્ય કાયાત્ સર્વબુદ્ધક્ષેત્રપરમાણુરજઃસમાન્ પ્રભામણ્ડલમેઘાન્નિશ્ચરિત્વા નાનાવર્ણાન્ સર્વબોધિસત્ત્વાનુદારપ્રીતિપ્રામોદ્યવેગાન્ વિવર્ધયમાનાનપશ્યત્ । મૂર્ધતોં ઽસકૂટાભ્યાં સર્વરોમવિવરેભ્યશ્ચ નાનાવર્ણાન્ ગન્ધાર્ચિમેઘાન્નિશ્ચાર્ય સર્વતથાગતપર્ષન્મણ્ડલાનિ સ્ફરિત્વા અભિપ્રવર્ષમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્સર્વબુદ્ધક્ષેત્રપરમાણુરજઃસમાન્ સર્વપુષ્પમેઘાન્નિશ્ચાર્ય સર્વતથાગતપર્ષન્મણ્ડલાનિ સ્ફરિત્વા અભિપ્રવર્ષમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ સર્વબુદ્ધક્ષેત્રપરમાણુરજઃસમાન્ સર્વગન્ધવૃક્ષમેઘાન્નિશ્ચાર્ય આકાશધાતુપર્યવસાનં સર્વધર્મધાતું ગન્ધવૃક્ષમેઘાલંકારાંલંકૃતં કૃત્વા અક્ષયગન્ધચૂર્ણવિલેપનકોશપ્રયુક્તાન્ સર્વતથાગતપર્ષન્મણ્ડલાનિ સ્ફરિત્વા અભિપ્રવર્ષમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્સર્વવસ્ત્રમેઘાન્નિશ્ચાર્ય આકાશધાતુપર્યવસાનં સર્વધર્મધાતું સંછાદ્ય અલંકુર્વાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્સર્વબુદ્ધક્ષેત્રપરમાણુરજઃસમાન્ સર્વપટ્ટદામમેઘાન્ સર્વભારણમેઘાન્ સર્વમુક્તાહારમેઘાંશ્ચિન્તામણિરત્નમેઘાન્નિશ્ચાર્ય
સર્વતથાગતપર્ષન્મણ્ડલાનિ સ્ફરિત્વા અભિપ્રવર્ષમાણાનપશ્યત્ સર્વસત્ત્વાનાં સર્વાભિપ્રાયપરિનિષ્પત્તયે । સર્વરોમવિવરેભ્ય એકૈકસ્માદ્રોમવિવરાત્ સર્વબુદ્ધક્ષેત્રપરમાણુરજઃસમાન્ રત્નદ્રુમમેઘાન્નિશ્ચાર્ય આકાશધાતુપર્યવસાનં સર્વધર્મધાતું સ્ફરિત્વા વિસ્ફુટરત્નદ્રુમમેઘાલંકારાલંકૃતં કૃત્વા સર્વતથાગતપર્ષન્મણ્ડલાનિ મહારત્નવર્ષૈરભિપ્રવર્ષમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્સર્વબુદ્ધક્ષેત્રપરમાણુરજઃસમાન્ રૂપધાતુદેવનિકાયમેઘાન્નિશ્ચાર્ય બોધિસત્ત્વં સંવર્ણયતઃ સર્વલોકધાતું સ્ફરમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ સર્વબ્રહ્મગતિપર્યાપન્નદેવનિકાયનિર્મિતમેઘાન્નિશ્ચાર્ય અભિસંબુદ્ધાન્ ( ગ્વ્ 423 ) તથાગતાન્ ધર્મચક્રપ્રવર્તનાયાધ્યેષમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ સર્વકામધાતુદેવેન્દ્રકાયમેઘાન્નિશ્ચર્ય સર્વતથાગતધર્મચક્રાણિ સંપ્રતીચ્છમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ પ્રતિચિત્તક્ષણં સર્વબુદ્ધક્ષેત્રપરમાણુરજઃસમાન્ ત્ર્યધ્વપર્યાપન્નસર્વબુદ્ધક્ષેત્રમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા અલયનાનામત્રાણાનામપ્રતિશરણાનાં સત્ત્વાનાં લયનત્રાણપ્રતિશરણભૂતાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ પ્રતિચિત્તક્ષણં સર્વબુદ્ધક્ષેત્રપરમાણુરજઃસમાન્ સર્વબુદ્ધોત્પાદબોધિસત્ત્વપર્ષન્મડલપરિપૂર્ણપરિશુદ્ધક્ષેત્રમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા ઉદારાધિમુક્તિકાનાં સત્ત્વાનાં વિશુદ્ધયે વર્તમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્પ્રતિચિત્તક્ષણં સર્વબુદ્ધક્ષેત્રપરમાણુરજઃસમાન્ વિશુદ્ધસંક્લિષ્ટક્ષેત્રમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા સંક્લિષ્ટાનાં સત્ત્વાનાં વિશુદ્ધયે સંવર્તમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્પ્રતિચિત્તક્ષણં સર્વબુદ્ધક્ષેત્રપરમાણુરજઃસમાન્ સંક્લિષ્ટચિત્તવિશુદ્ધક્ષેત્રમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા એકાન્તસંક્લિષ્ટાનાં વિશુદ્ધયે સંવર્તમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્પ્રતિચિત્તક્ષણં સર્વબુદ્ધક્ષેત્રપરમાણુરજઃસમાન્ સર્વબોધિસત્ત્વકાયમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા સર્વસત્ત્વચર્યામનુવર્તમાનાનનુત્તરાયાં સમ્યક્સંબોધૌ સર્વસત્ત્વાનાં પરિપાચયમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્પ્રતિચિત્તક્ષણં સર્વલોકધાતુપરમાણુરજઃસમાન્ બોધિસત્ત્વકાયમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા સર્વસત્ત્વકુશલમૂલવિવર્ધનતાયૈ સર્વબુદ્ધનામાન્યુદીરયમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્સર્વબુદ્ધક્ષેત્રપરમાણુરજઃસમાન્ બોધિસત્ત્વકાયમેઘાન્નિશ્ચર્ય આકાશધાતુપર્યવસાનં સર્વધર્મધાતું સ્ફરિત્વા સર્વબુદ્ધક્ષેત્રપ્રસરેષુ પ્રથમચિત્તોત્પાદમુપાદાય સર્વબોધિસત્ત્વાનાં સર્વકુશલમૂલાભિનિર્હારમુપસંહરમાણાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ સર્વબુદ્ધક્ષેત્રપરમાણુરજઃસમાન્ બોધિસત્ત્વમેઘાન્નિશ્ચરિત્વા

સર્વબુદ્ધક્ષેત્રેષુ એકૈકસ્મિન્ બુદ્ધક્ષેત્રે સમન્તભદ્રબોધિસત્ત્વચર્યાવિશુદ્ધયે સર્વબોધિસત્ત્વપ્રણિધાનસાગરાનભિદ્યોતયમાનાનપશ્યત્ । સર્વરોમવિવરેભ્ય એકૈકસ્માદ્રોમવિવરાત્ સર્વબુદ્ધક્ષેત્રપરમાણુરજઃસમાન્ સર્વસત્ત્વાભિપ્રાયપરિપૂરણાન્ સર્વજ્ઞતાસમુદાગમપ્રીતિવેગવિવર્ધનાન્ સમન્તભદ્રબોધિસત્ત્વચર્યામેઘાન્નિશ્ચર્ય અભિપ્રવર્ષમાણાનપશ્યત્ । સ તસ્ય સર્વરોમવિવરેભ્ય એકૈકસ્માદ્રોમવિવરાત્સર્વબુદ્ધક્ષેત્રપરમાણુરજઃસમાન્ સર્વબુદ્ધક્ષેત્રાભિસંબોધિસંદર્શનાન્ સર્વજ્ઞતાસમુદાગમમહાધર્મવેગવિવર્ધનાનભિસંબોધિમેઘાન્નિશ્ચરમાણાનપશ્યત્ ॥
અથ ખલુ સુધનઃ શ્રેષ્ઠિદારકઃ સમન્તભદ્રસ્ય બોધિસત્ત્વસ્ય ઇદમૃદ્ધિવિષયવિકુર્વિતં દૃષ્ટ્વા હૃષ્ટઃ તુષ્ટઃ ઉદગ્રઃ આત્તમનાઃ પ્રમુદિતઃ પ્રીતિસૌમનસ્યજાતો ભૂયસ્યા માત્રયા સમન્તભદ્રસ્ય બોધિસત્ત્વસ્ય કાયમુપનિધ્યાયન્ અદ્રાક્ષીત્ સમન્તભદ્રસ્ય બોધિસત્ત્વસ્ય એકૈકસ્માદઙ્ગાદેકૈકાઙ્ગવિભક્તિતઃ એકૈકસ્માચ્છરીરાવયવાત્ એકૈકસ્યાઃ શરીરાવયવવિભક્તેઃ એકૈકસ્માદઙ્ગપ્રદેશાત્ ( ગ્વ્ 424 ) એકૈકતો ઽઙ્ગપ્રદેશવિભક્તિતઃ એકૈકસ્માદ્દેહાત્ એકૈકસ્માદ્દેહવિભક્તિતઃ એકૈકસ્માદ્રોમવિવરાત્ એકૈકસ્માદ્રોમવિભક્તેરિમં ત્રિસાહસ્રમહાસાહસ્રં લોકધાતું સવાયુસ્કન્ધં સપૃથિવીસ્કન્ધં સતેજઃસ્કન્ધં સસાગરં સદ્વીપં સનદીકં સરત્નપર્વતં સસુમેરું સચક્રવાલં સગ્રામનગરનિગમરાષ્ટ્રરાજધાનિં સવનં સભવનં સજનકાયં સનરકલોકં સતિર્યગ્યોનિલોકં સયમલોકં સાસુરલોકં સનાગલોકં સગરુડલોકં સમનુજલોકં સદેવલોકં સબ્રહ્મલોકં સકામધાતુવિષયં સારૂપ્યધાતુવિષયં સાધિષ્ઠાનં સપ્રતિષ્ઠાનં સસંસ્થાનં સમેઘં સવિદ્યુતં સજ્યોતિષં સરાત્રિંદિવસાર્ધમાસં સમાસર્તું સસંવત્સરં સાન્તરકલ્પં સકલ્પમ્ । યથા ચેમં લોકધાતુમ્, એવં પૂર્વસ્યાં દિશિ સર્વલોકધાતૂનદ્રાક્ષીત્ । યથા પૂર્વસ્યાં દિશિ, એવં દક્ષિણાયાં પશ્ચિમાયામુત્તરસ્યામુત્તરપૂર્વાયાં પૂર્વદક્ષિણાયાં દક્ષિણપશ્ચિમાયાં પશ્ચિમોત્તરાયામધઃ ઊર્ધ્વં સમન્તાત્સર્વદિગ્વિદિક્ષુ સર્વલોકધાતૂનદ્રાક્ષીત્ પ્રતિભાસયોગેન સર્વબુદ્ધોત્પાદાન્ સબોધિસત્ત્વપર્ષન્મણ્ડલાન્ સસત્ત્વાન્, યાશ્ચેહ સહાયાં લોકધાતૌ પૂર્વાન્તકોટીગતાઃ સર્વલોકધાતુપરંપરાઃ તા અપિ સર્વાઃ સમન્તભદ્રસ્ય બોધિસત્ત્વસ્ય એકસ્માન્મહાપુરુષલક્ષણાદદ્રાક્ષીત્ સર્વબુદ્ધોત્પાદાઃ સર્વબોધિસત્ત્વપર્ષન્મણ્ડલાઃ સસત્ત્વાઃ સભવનાઃ સરાત્રિંદિવાઃ સકલ્પાઃ । એવમપરાન્તકોટીગતાનપિ સર્વબુદ્ધક્ષેત્રપ્રસરાનદ્રાક્ષીત્ । યથા ચેહ સહાયાં લોકધાતૌ પૂર્વાન્તાપરાન્તકોટીગતાઃ સર્વલોકધાતુપરંપરા અદ્રાક્ષીત્, એવં દશસુ દિક્ષુ સર્વલોકધાતુષુ પૂર્વાન્તાપરાન્તકોટીગતાઃ સર્વલોકધાતુપરંપરાઃ સમન્તભદ્રસ્ય બોધિસત્ત્વસ્ય કાયાદેકૈકસ્માન્મહાપુરુષલક્ષણાદેકૈકસ્માદ્રોમવિવરાદદ્રાક્ષીત્ સુવિભક્તા અન્યોન્યાસંભિન્નાઃ । યથા ચ સમન્તભદ્રં બોધિસત્ત્વં ભગવતો વૈરોચનસ્ય તથાગતસ્ય પુરતો મહારત્નપદ્મગર્ભસિંહાસને નિષણ્ણમદ્રાક્ષીત્ એતદ્વિક્રીડિતં સંદર્શયમાનમ્, એવં પૂર્વસ્યાં દિશિ ભગવતો ભદ્રશ્રિયસ્તથાગતસ્ય પદ્મશ્રિયાં લોકધાતાવેતદેવ વિક્રીડિતં સંદર્શયમાનમદ્રાક્ષીત્ । યથા ચ પૂર્વસ્યાં દિશિ, એવં સમન્તાત્સર્વદિગ્વિદિક્ષુ સર્વલોકધાતુષુ સર્વતથાગતપાદમૂલેષુ સમન્તભદ્રં બોધિસત્ત્વં મહારત્નપદ્મગર્ભસિંહાસને નિષણ્ણમેતદેવ
વિક્રીડિતં સંદર્શયમાનમદ્રાક્ષીત્ । યથા ચ દશસુ દિક્ષુ, એવં સર્વલોકધાતુષુ તથાગતપાદમૂલેષુ મહારત્નપદ્મગર્ભસિંહાસને નિષણ્ણમેતદેવ વિક્રીડિતં સંદર્શયમાનમદ્રાક્ષીત્ । એવં સમન્તાદ્દશસુ દિક્ષુ સર્વબુદ્ધક્ષેત્રપરમાણુરજઃસમેષુ એકૈકસ્મિન્ પરમાણુરજસિ ધર્મધાતુવિપુલેષુ બુદ્ધધર્મપર્ષન્મણ્ડલેષુ સર્વતથાગતપાદમૂલેષુ સમન્તભદ્રં બોધિસત્ત્વમદ્રાક્ષીત્ । એકૈકતશ્ચ અસ્યાત્મભાવાત્ર્યધ્વપ્રાપ્તાનિ સર્વારમ્બણાનિ અભિવિજ્ઞપ્યમાનાનિ અપશ્યત્પ્રતિભાસયોગેન, સર્વક્ષેત્રાણ્યપિ સર્વસત્ત્વાનપિ સર્વબુદ્ધોત્પાદાનપિ સર્વબોધિસત્ત્વપર્ષન્મણ્ડલાન્યભિવિજ્ઞપ્યમાનાનપશ્યત્ પ્રતિભાસયોગેન । સર્વસત્ત્વરુતાનિ ચ સર્વબુદ્ધાઘોષાંશ્ચ સર્વતથાગતધર્મચક્રપ્રવર્તનાનિ ચ સર્વાનુશાસન્યાદેશનપ્રાતિહાર્યાણિ ચ સર્વબોધિસત્ત્વસમુદાગમાંશ્ચ સર્વબુદ્ધવિક્રીડિતાનિ ચાશ્રૌષીત્ ॥

સ તદચિન્ત્યં સમન્તભદ્રમહાબોધિસત્ત્વવિક્રીડિતં દૃષ્ટ્વા શ્રુત્વા ચ દશ જ્ઞાનપારમિતાવિહારાન્ પ્રત્યલભત । કતમાન્ દશ? યદુત એકચિત્તક્ષણે સર્વબુદ્ધક્ષેત્રકાયસ્ફરણજ્ઞાનપારમિતાવિહારં પ્રત્યલભત । સર્વતથાગતપાદમૂલોપસંક્રમણાસંભિન્નજ્ઞાનપારમિતાવિહારં પ્રત્યલભત । ( ગ્વ્ 425 ) સર્વતથાગતપૂજોપસ્થાનજ્ઞાનપારમિતાવિહારં પ્રત્યલભત । સર્વતથાગતેભ્ય એકૈકસ્માત્તથાગતાત્સર્વબુદ્ધધર્મપ્રશ્નપરિપૃચ્છાસંપ્રતીચ્છનજ્ઞાનપારમિતાવિહારં પ્રત્યલભત । સર્વતથાગતધર્મચક્રપ્રવર્તનનિધ્યપ્તિજ્ઞાનપારમિતાવિહારં પ્રત્યલભત । અચિન્ત્યબુદ્ધવિકુર્વિતજ્ઞાનપારમિતાવિહારં પ્રત્યલભત । સર્વધર્માક્ષયપ્રતિસંવિદપરાન્તકોટીગતકલ્પાધિષ્ઠાનૈકધર્મપદનિર્દેશજ્ઞાનપારમિતાવિહારં પ્રત્યલભત । સર્વધર્મમુદ્રાપ્રત્યક્ષજ્ઞાનપારમિતાવિહારં પ્રત્યલભત । સર્વધર્મધાતુનયસાગરજ્ઞાનપારમિતાવિહારં પ્રત્યલભત । સર્વસત્ત્વસંજ્ઞાગતસંવસનજ્ઞાનપારમિતાવિહારં પ્રત્યલભત । એકક્ષણસમન્તભદ્રબોધિસત્ત્વચર્યાપ્રત્યક્ષજ્ઞાનપારમિતાવિહારં પ્રત્યલભત । તસ્યૈવં જ્ઞાનપારમિતાવિહારસમન્વાગતસ્ય સુધનસ્ય શ્રેષ્ઠિદારકસ્ય સમન્તભદ્રઓ બોધિસત્ત્વો દક્ષિણં પાણિં પ્રસાર્ય મૂર્ધ્નિ પ્રતિષ્ઠાપયામાસ । સમનન્તરપ્રતિષ્ઠાપિતશ્ચ સુધનસ્ય શ્રેષ્ઠિદારકસ્ય સમન્તભદ્રેણ બોધિસત્ત્વેન મૂર્ધ્નિ પાણિઃ, અથ તાવદેવાસ્ય સર્વબુદ્ધક્ષેત્રપરમાણુરજઃસમાનિ સમાધિમુખાન્યવક્રાન્તાનિ । એકૈકેન ચ સમાધિના સર્વબુદ્ધક્ષેત્રપરમાણુરજઃસમાંલ્લોકધાતુમુદ્રાનવતીર્ણો ઽભૂત્ । અદૃષ્ટપૂર્વા સર્વબુદ્ધક્ષેત્રપરમાણુરજઃસમાશ્ચાસ્ય સર્વજ્ઞતાસંભારા ઉપચયમગમન્ । સર્વબુદ્ધક્ષેત્રપરમાણુરજઃસમાશ્ચાસ્ય સર્વજ્ઞતાધર્મસંભવાઃ પ્રાદુરભવન્ । સર્વબુદ્ધક્ષેત્રપરમાણુરજઃસમૈશ્ચ સર્વજ્ઞતામહાપ્રસ્થાનૈરમ્યુત્થિતઃ । સર્વબુદ્ધક્ષેત્રપરમાણુરજઃસમાંશ્ચ પ્રણિધાનસાગરાનવતીર્ણઃ । સર્વબુદ્ધક્ષેત્રપરમાણુરજઃસમૈશ્ચ સર્વજ્ઞતાનિર્યાણપથૈર્નિર્યાતઃ । સર્વબુદ્ધક્ષેત્રપરમાણુરજઃસમાસુ ચ બોધિસત્ત્વચર્યાસુ પ્રસૃતઃ । સર્વબુદ્ધક્ષેત્રપરમાણુરજઃસમૈશ્ચ સર્વજ્ઞતાવેગૈર્વિવર્ધિતઃ । સર્વબુદ્ધક્ષેત્રપરમાણુરજઃસમૈશ્ચ સર્વબુદ્ધજ્ઞાનાવભાસૈઃ પ્રભાવભાસિતઃ । યથા ચેહ સહાયાં લોકધાતૌ ભગવતો વૈરોચનસ્ય પાદમૂલગતઃ સમન્તભદ્રો બોધિસત્ત્વો દક્ષિણં પાણિં પ્રસાર્ય સુધનસ્ય મુર્ધ્નિ પ્રતિષ્ઠાપયામાસ, તથા સર્વલોકધાતુષુ સર્વતથાગતપાદમૂલેષુ નિષણ્ણઃ સમન્તભદ્રો બોધિસત્ત્વો દક્ષિણં પાણિં પ્રસાર્ય સુધનસ્ય શ્રેષ્ઠિદારકસ્ય મૂર્ધ્નિ પ્રતિષ્ઠાપયામાસ । એવં સમન્તાત્ સર્વદિગ્વિદિક્ષુ સર્વલોકધાતુપરમાણુરજોન્તર્ગતેષ્વપિ સર્વલોકધાતુષુ સર્વતથાગતપાદમૂલેષુ નિષણ્ણઃ સમન્તભદ્રો બોધિસત્ત્વો દક્ષિણં પાણિં પ્રસાર્ય સુધનસ્ય શ્રેષ્ઠિદારકસ્ય મૂર્ધ્નિ પ્રતિષ્ઠાપયામાસ । યથા ભગવતો વૈરોચનસ્ય પાદમૂલગતેન સમન્તભદ્રેણ બોધિસત્ત્વેન પાણિના સ્પૃષ્ટસ્ય સુધનસ્ય શ્રેષ્ઠિદારકસ્ય
ધર્મમુખાન્યવક્રાન્તાનિ, એવં સર્વસમન્તભદ્રાત્મભાવપ્રસૃતૈઃ પાણિમેઘૈઃ સ્પૃષ્ટસ્ય સુધનસ્ય શ્રેષ્ઠિદારકસ્ય ધર્મમુખાન્યવક્રાન્તાન્યભૂવન્ નાનાનયૈઃ ॥
અથ ખલુ સમન્તભદ્રો બોધિસત્ત્વો મહાસત્ત્વઃ સુધનં શ્રેષ્ઠિદારકમેતદવોચત્ - દૃષ્ટં તે કુલપુત્ર મમ વિકુર્વિતમ્? આહ - દૃષ્ટમાર્ય । અપિ તુ તથાગતઃ પ્રજાનન્ પ્રજાનીયાત્તાવદચિન્ત્યમિદં વિકુર્વિતમ્ । સો ઽવોચત્ - અહં કુલપુત્ર અનભિલાપ્યાનભિલાપ્યબુદ્ધક્ષેત્રપરમાણુરજઃસમાન્ કલ્પાન્ વિચરિતઃ સર્વજ્ઞતાચિત્તમભિલષમાણઃ । એકૈકસ્મિંશ્ચ મહાકલ્પે ઽનભિલાપ્યાનભિલાપ્યબુદ્ધક્ષેત્રપરમાણુરજઃસમાસ્તથાગતા આરાગિતા બોધિચિત્તં પરિશોધયતા । એકૈકસ્મિંશ્ચ મહાકલ્પે સર્વત્યાગસમાયુક્તાઃ સર્વલોકવિઘુષ્ટા મહાયજ્ઞા યષ્ટાઃ । સર્વસત્ત્વપ્રતિપાદના સર્વજ્ઞતાપુણ્યસંભારતા । એકૈકસ્મિંશ્ચ મહાકલ્પે અનભિલાપ્યાનભિલાપ્યબુદ્ધક્ષેત્રપરમાણુરજઃસમાસ્ત્યાગા ( ગ્વ્ 426 ) મહાત્યાગાઃ કૃતાઃ, અત્યર્થત્યાગાઃ કૃતાઃ સર્વજ્ઞતાધર્માનભિપ્રાર્થયતા । એકૈકસ્મિંશ્ચ મહાકલ્પે ઽનભિલાપ્યાનભિલાપ્યાનત્મભાવાઃ પરિત્યક્તાઃ, મહારાજ્યાનિ ચ પરિત્યક્તાનિ, ગ્રામનગરનિગમજનપદરાષ્ટ્રરાજધાન્યઃ પરિત્યક્તાઃ, પ્રિયમનાપા દુસ્ત્યજાઃ પરિવારસંઘાઃ પરિત્યક્તાઃ, પુત્રદુહિતૃભાર્યાઃ પરિત્યક્તાઃ । સ્વશરીરમાંસાનિ પરિત્યક્તાનિ, સ્વકાયેભ્યો રુધિરં યાચનકેભ્યઃ પરિત્યક્તમ્, અસ્થિમજ્જાઃ પરિત્યક્તાઃ । અઙ્ગપ્રત્યઙ્ગાનિ પરિત્યક્તાનિ । કર્ણનાસાઃ પરિત્યક્તાઃ । ચક્ષૂંષિ પરિત્યક્તાનિ । સ્વમુખેભ્યો જિહ્વેન્દ્રિયાણિ પરિત્યક્તાનિ બુદ્ધજ્ઞાનાવેક્ષયા કાયજીવિતનિરપેક્ષેણ । એકૈકસ્મિંશ્ચ મહાકલ્પે ઽનભિલાપ્યાનભિલાપ્યબુદ્ધક્ષેત્રપરમાણુરજઃસમાનિ સ્વશિરાંસિ પરિત્યક્તાનિ સ્વકાયેભ્યઃ સર્વલોકાભ્યુદ્ગતમનુત્તરસર્વજ્ઞતાશીર્ષમભિપ્રાર્થયતા । યથા ચ એકૈકસ્મિન્ મહાકલ્પે, તથા અનભિલાપ્યાનભિલાપ્યબુદ્ધક્ષેત્રપરમાણુરજઃસમેષુ મહાકલ્પસાગરેષુ । એકૈકસ્મિંશ્ચ મહાકલ્પે ઽનભિલાપ્યાનભિલાપ્યબુદ્ધક્ષેત્રપરમાણુરજઃસમાસ્તથાગતાઃ પરમેશ્વરભૂતેન સત્કૃતા ગુરુકૃતા માનિતાઃ પૂજિતાઃ, ચીવરપિણ્ડપાતશયનાસનગ્લાનપ્રત્યયભૈષજ્યપરિષ્કારૈઃ પ્રતિપાદિતાઃ । તેષાં ચ અસ્મિંસ્તથાગતાનાં શાસને પ્રવ્રજિતા સર્વબુદ્ધાનુશાસનીષુ પ્રતિપન્નઃ શાસનં ચ મે તેષાં સંધારિતમ્ ॥

નાભિજાનામિ કુલપુત્ર તાવદ્ભિઃ કલ્પસમુદ્રેરેકચિત્તોત્પાદમપિ તથાગશાસને વિલોપમુત્પાદયિતું નાભિજાનામિ । તાવદ્ભિઃ કલ્પસમુદ્રૈરેકચિત્તોત્પાદમપિ પ્રતિઘસહગતમુત્પાદયિતુમાત્મગ્રહચિત્તં વા આત્મગ્રહપરિગ્રહચિત્તં વા આત્મપરનાનાત્વચિત્તં વા બોધિમાર્ગવિપ્રવાસચિત્તં વા સંસારસંવાસપરિખેદચિત્તં વા અવલીનચિત્તં વા આવરણસંમોહચિત્તં વા ઉત્પાદયિતુમન્યત્ર અપરાજિતજ્ઞાનદુર્યોધનગર્ભબોધિચિત્તાત્ સર્વજ્ઞતાસંભારેષુ । ઇતિ હિ કુલપુત્ર સર્વકલ્પસાગરાઃ ક્ષયં વ્રજેયુઃ તાન્નિર્દિશતો યે મમ પૂર્વયોગસંબુદ્ધક્ષેત્રપરિશુદ્ધિપ્રયોગાઃ, યે મમ મહાકરુણાપ્રતિલબ્ધચિત્તસ્ય સર્વપરિત્રાણપરિપાચનપરિશોધનપ્રયોગાઃ । એવં યે બુદ્ધપૂજોપસ્થાનપ્રયોગાઃ, યે સદ્ધર્મપર્યેષ્ટિહેતોર્ગુરુશુશ્રૂષાપ્રયોગાઃ, યે સદ્ધર્મપરિગ્રહહેતોરાત્મભાવપરિત્યાગપ્રયોગાઃ, યે સદ્ધર્મારક્ષણનિદાનાઃ સ્વજીવિતપરિત્યાગપ્રયોગાઃ, તાવદ્ભ્યો મે કુલપુત્ર ધર્મસમુદ્રેભ્યો ન કિંચિદેકપદવ્યઞ્જનમપિ યન્ન ચક્રવર્તિરાજ્યપરિત્યાગેન ક્રીતમ્, યન્નાસ્તિ સર્વાસ્તિપરિત્યાગેન ક્રીતં સર્વસત્ત્વપરિત્રાણપ્રયુક્તેન સ્વસંતતિચિત્તનિધ્યપ્તિપ્રયુક્તેન અભિમુખપરધર્મસંપ્રાપણપ્રયુક્તેન સર્વલૌકિકજ્ઞાનાલોકપ્રભાવનાપ્રયુક્તેન સર્વલોકોત્તરજ્ઞાનપ્રભાવનાપ્રયુક્તેન સર્વસત્ત્વસંસારસુખસંજનનપ્રયુક્તેન સર્વતથાગતગુણસંવર્ણનગુણપ્રયુક્તેન । એવમનભિલાપ્યાનભિલાપ્યબુદ્ધક્ષેત્રપરમાણુરજઃસમાઃ કલ્પસાગરાઃ ક્ષયં વ્રજેયુર્મમ સ્વપૂર્વયોગસંપદં નિર્દિશતઃ ॥
તેન મયા કુલપુત્ર અનેન એવંરૂપેણ સંભારબલેન મૂલહેતૂપચયબલેન ઉદારાધિમુક્તિબલેન ગુણપ્રતિપત્તિબલેન સર્વધર્મયથાવન્નિધ્યપ્તિબલેન પ્રજ્ઞાચક્ષુર્બલેન તથાગતાધિષ્ઠાનબલેન મહાપ્રણિધાનબલેન મહાકરુણાબલેન સુપરિશોધિતાભિજ્ઞાબલેન કલ્યાણમિત્રપરિગ્રહબલેન અત્યન્તપરિશુદ્ધો ધર્મકાયઃ પ્રતિલબ્ધઃ સર્વત્ર્યધ્વાસંભિન્નઃ । અનુત્તરશ્ચ રૂપકાયઃ પરિશોધિતઃ ( ગ્વ્ 427 ) સર્વલોકાભુદ્ગતઃ સર્વજગદ્યથાશયવિજ્ઞપનઃ સર્વત્રાનુગતઃ સર્વબુદ્ધક્ષેત્રપ્રસૃતઃ સમન્તપ્રતિષ્ઠાનઃ સર્વતઃ સર્વવિકુર્વિતસંદર્શનઃ સર્વજગદભિલક્ષણીયઃ । પ્રેક્ષસ્વ કુલપુત્ર ઇમામાત્મભાવપ્રતિલાભસંપદમનન્તકલ્પસાગરસંભૂતાં બહુકલ્પકોટીનિયુતશતસહસ્રદુર્લભપ્રાદુર્ભાવાં દુર્લભસંદર્શનામ્ । નાહં કુલપુત્ર અનવરોપિતકુશલમૂલાનાં સત્ત્વાનાં શ્રવણપથમપ્યાગચ્છામિ પ્રાગેવ દર્શનમ્ । સન્તિ કુલપુત્ર સત્ત્વાઃ, યે મમ નામધેયશ્રવણમાત્રેણ અવૈવર્તિકા ભવન્ત્યનુત્તરાયાં સમ્યક્સંબોધૌ । સન્તિ દર્શનમાત્રેણ, સન્તિ સ્પર્શનમાત્રેણ, સન્ત્યનુવ્રજનમાત્રેણ, સન્ત્યનુબન્ધનમાત્રેણ, સન્તિ સ્વપ્નદર્શનેન, સન્તિ સ્વપ્ને નામધેયશ્રવણેન અવૈવર્તિકા ભવન્ત્યનુત્તરાયાં સમ્યક્સંબોધૌ । કેચિત્સત્ત્વા મામેકરાત્રિંદિવસમનુસ્મરમાણાઃ પરિપાકં ગચ્છન્તિ । કેચિદર્ધમાસં કેચિન્માસં કેચિદ્વર્ષં કેચિદ્વર્ષશતં કેચિત્કલ્પં કેચિત્કલ્પશતં કેચિદ્યાવદનભિલાપ્યાનભિલાપ્યબુદ્ધક્ષેત્રપરમાણુરજઃસમાન્ કલ્પાન્ મામનુસ્મરમાણાઃ પરિપાકં ગચ્છન્તિ । કેચિદેકજાત્યા પરિપાકં ગચ્છન્તિ મામનુસ્મરમાણાઃ । કેચિજ્જાતિશતેન, કેચિદ્યાવદનભિલાપ્યાનભિલાપ્યબુદ્ધક્ષેત્રપરમાણુરજઃસમૈર્જાતિપરિવર્તૈઃ । કેચિત્સત્ત્વા મમ પ્રભાદર્શનેન પરિપાકં ગચ્છન્તિ । કેચિદ્રશ્મિપ્રમોક્ષસંદર્શનેન, કેચિત્ક્ષેત્રપ્રકમ્પનેન, કેચિદ્રૂપકાયસંદર્શનેન, કેચિત્સંપ્રહર્ષણેન પરિપાકં ગચ્છન્તિ । ઇતિ હિ કુલપુત્ર બુદ્ધાક્ષેત્રપરમાણુરજઃસમૈરુપાયૈઃ સત્ત્વા અવૈવર્તિકા ભવન્ત્યનુત્તરાયાં સમ્યક્સંબોધૌ । યે ખલુ પુનઃ કુલપુત્ર સત્ત્વા મમ બુદ્ધક્ષેત્રપરિશુદ્ધિં શૃણ્વન્તિ, તે પરિશુદ્ધેષુ બુદ્ધાક્ષેત્રેષૂપપદ્યન્તે । યે મમાત્મભાવપરિશુદ્ધિં પશ્યન્તિ, તે મમાત્મભાવે ઉપપદ્યન્તે । પશ્ય કુલપુત્ર ઇમાં મમાત્મભાવપરિશુદ્ધિમ્
॥
અથ ખલુ સુધનઃ શ્રેષ્ઠિદારકઃ સમન્તભદ્રસ્ય બોધિસત્ત્વસ્ય કાયમુપનિધ્યાયન્નદ્રાક્ષીત્ એકૈકસ્મિન્ રોમવિવરે ઽનભિલાપ્યબુદ્ધક્ષેત્રસાગરાન્ બુદ્ધોત્પાદપરિપૂર્ણાન્ । એકૈકસ્મિંશ્ચ બુદ્ધક્ષેત્રસાગરે તથાગતાન્ બોધિસત્ત્વપર્ષત્સાગરપરિવૃતાનદ્રાક્ષીત્ । સર્વાંશ્ચ તાન્ ક્ષેત્રસાગરાન્ નાનાપ્રતિષ્ઠાનાન્ નાનાસંસ્થાનાન્ નાનાવ્યૂહાન્ નાનાચક્રવાલાન્ નાનામેઘગગનસંછન્નાન્ નાનાબુદ્ધોત્પાદાન્ નાનાધર્મચક્રનિર્ઘોષાનપશ્યત્ । યથા ચ એકૈકસ્મિન્ રોમવિવરે, તથા અનવશેષતઃ સર્વરોમવિવરેષુ સર્વલક્ષણેષુ સર્વાનુવ્યઞ્જનેષુ સર્વાઙ્ગપ્રત્યઙ્ગેષુ । એકૈકસ્મિંશ્ચ ક્ષેત્રસાગરાન્ સર્વબુદ્ધક્ષેત્રપરમાણુરજઃસમાન્ બુદ્ધકાયનિર્મિતમેઘાન્નિર્ગમ્ય દશસુ દિક્ષુ સર્વલોકધાતૂન્ સ્ફરિત્વા અનુત્તરાયાં સમ્યકંબોધૌ સત્ત્વાન્ પરિપાચયમાનાનપશ્યત્ ॥

અથ ખલુ સુધનઃ શ્રેષ્ઠિદારકઃ સમન્તભદ્રબોધિસત્ત્વાવવાદાનુશાસન્યનુશિષ્ટઃ સમન્તભદ્રબોધિસત્ત્વકાયાન્તર્ગતેષુ સર્વલોકધાતુષ્વવતીર્ય સત્ત્વાન્ પરિપાચયામાસ । યે ચ ખલુ પુનઃ સુધનસ્ય શ્રેષ્ઠિદારકસ્ય બુદ્ધક્ષેત્રપરમાણુરજઃસમકલ્યાણમિત્રોપસંક્રમદર્શનપર્યુપાસનજ્ઞાનાલોકકુશલમૂલોપચયાઃ, તે સમન્તભદ્રબોધિસત્ત્વસહદર્શનેન કુશલમૂલોપચયસ્ય શતતમીમપિ કલાં નોપયાન્તિ, સહસ્રતમીમપિ શતસહસ્રતમીમપિ કોટીશતસહસ્રતમીમપિ । સંખ્યામપિ કલામપિ ગણનામપિ ઉપમામપિ ઉપનિસામપિ ન ક્ષમન્તે સપ્રથમચિત્તોત્પાદાય યાવત્સમન્તભદ્રસ્ય બોધિસત્ત્વસ્ય દર્શનમ્ । અસ્મિન્નન્તરે યાવતીર્બુદ્ધક્ષેત્રસાગરપરંપરા અવતીર્ણસ્તતો ઽનભિલાપ્યાનભિલાપ્યબુદ્ધક્ષેત્રપરમાણુરજઃસમગુણાઃ ( ગ્વ્ 428 ) સમન્તભદ્રબોધિસત્ત્વસ્યૈકસ્મિન્ રોમવિવરે બુદ્ધક્ષેત્રસાગરપરંપરાઃ પ્રતિચિત્તક્ષણમવતરન્તિ સ્મ । યથા ચૈકસ્મિન્ રોમવિવરે, તથૈવ સર્વરોમવિવરેષુ પ્રતિચિત્તક્ષણમનભિલાપ્યાનભિલાપ્યબુદ્ધક્ષેત્રપરમાણુરજઃસમલોકધાતું પરેણ અપરાન્તકોટીગતકલ્પાધિષ્ઠાનલોકધાતું પરેણ વિક્રમેણ પર્યન્તં નોપજગામ । ક્ષેત્રસાગરપરંપરાણાં ક્ષેત્રસાગરગર્ભાણાં ક્ષેત્રસાગરસંભેદાનાં ક્ષેત્રસાગરસમવસરણાનામનભિલાપ્યાનભિલાપ્યબુદ્ધક્ષેત્રસાગરસંભવાનાં ક્ષેત્રસાગરવિભવાનાં ક્ષેત્રસાગરવ્યૂહાનાં બુદ્ધોત્પાદસાગરગર્ભાણાં બુદ્ધોત્પાદસાગરસમવસરણાનાં બુદ્ધોત્પાદસાગરસંભવાનાં બુદ્ધોત્પાદસાગરવિભવાનાં બોધિસત્ત્વસાગરપર્ષન્મણ્ડલસાગરાણાં બોધિસત્ત્વપર્ષન્મણ્ડલસાગરપરંપરાણાં બોધિસત્ત્વપર્ષમણ્ડલસાગરગર્ભાણાં બોધિસત્ત્વપર્ષન્મણ્ડલસાગરસંભેદાનાં બોધિસત્ત્વપર્ષન્મણ્ડલસાગરસમવસરણાનાં બોધિસત્ત્વપર્ષન્મણ્ડલસાગરસંભવાનાં બોધિસત્ત્વપર્ષન્મણ્ડલસાગરવિભવાનાં સત્ત્વધાતુપ્રવેશાનાં સત્ત્વેન્દ્રિયપ્રતિક્ષણજ્ઞાનપ્રવેશાનાં સત્ત્વેઇન્દ્રિયજ્ઞાનપ્રતિવેધાનાં સત્ત્વપરિપાકવિનયાનાં ગમ્ભીરબોધિસત્ત્વવિકુર્વિતવિહારાણાં બોધિસત્ત્વભૂમ્યવક્રમણવિક્રમસાગરાણાં પર્યન્તં નોપજગામ । સ ક્વચિત્ક્ષેત્રે કલ્પં વિચરતિ સ્મ । સ ક્વચિત્ક્ષેત્રે યાવદનભિલાપ્યાનભિલાપ્યબુદ્ધક્ષેત્રપરમાણુરજઃસમાન્ કલ્પાન્ વિચરતિ સ્મ । તતશ્ચ ક્ષેત્રાન્ન ચલતિ સ્મ । ચિત્તક્ષણે ચિત્તક્ષણે ચ અનન્તમધ્યાન્ ક્ષેત્રસાગરાનવતરતિ સ્મ, સત્ત્વાંશ્ચ પરિપાચયતિ સ્મ અનુત્તરાયાં સમ્યક્સંબોધૌ । સો ઽનુપૂર્વેણ યાવત્સમન્તભદ્રબોધિસત્ત્વચર્યાપ્રણિધાનસાગરસમતામનુપ્રાપ્તઃ સર્વતથાગતસમતાં સર્વક્ષેત્રકાયપારણસમતાં ચર્યાપરિપૂરણસમતામભિસંબોધિવિકુર્વિતસંદર્શનપારણસમતાં ધર્મચક્રપ્રવર્તનસમતાં પ્રતિસંવિદ્વિશુદ્ધિસમતાં ઘોષોદાહારસમતાં સર્વસ્વરાઙ્ગસાગરસંપ્રયોગસમતાં બલવૈશારદ્યસમતાં
બુદ્ધવિહારસમતાં મહામૈત્રીમહાકરુણાસમતામચિન્ત્યબોધિસત્ત્વવિમોક્ષવિકુર્વિતસમતામનુપ્રાપ્તઃ ઇતિ ॥
અથ ખલુ સમન્તભદ્રો બોધિસત્ત્વો મહાસત્ત્વઃ એવમેવ લોકધાતુપરંપરાનભિલાપ્યાનભિલાપ્યબુદ્ધક્ષેત્રપરમાણુરજઃસમાન્ કલ્પાન્ કલ્પપ્રસરાનભિદ્યોતયમાનો ભૂયસ્યા માત્રયા ગાથાભિગીતેન પ્રણિધાનમકાર્ષીત્ -
યાવત કેચિ દશદ્દિશિ લોકે સર્વત્રિયધ્વગતા નરસિંહાઃ ।
તાનહુ વન્દમિ સર્વિ અશેષાન્ કાયતુ વાચ મનેન પ્રસન્નઃ

ક્ષેત્રરજોપમકાયપ્રમાણૈઃ સર્વજિનાન કરોમિ પ્રણામમ્ ।
સર્વજિનાભિમુખેન મનેન ભદ્રચરીપ્રણિધાનબલેન

એકરજાગ્રિ રજોપમબુદ્ધા બુદ્ધસુતાન નિષણ્ણકુ મધ્યે ।
એવમશેષત ધર્મતધાતું સર્વાધિમુચ્યમિ પૂર્ણ જિનેભિઃ

તેષુ ચ અક્ષયવર્ણસમુદ્રાન્ સર્વસ્વરાઙ્ગસમુદ્રરુતેભિઃ ।
સર્વજિનાન ગુણાન્ ભણમાનસ્તાન્ સુગતાન્ સ્તવમી અહુ સર્વાન્

પુષ્પવરેભિ ચ માલ્યવરેભિર્વાદ્યવિલેપનછત્રવરેભિઃ ।
દીપવરેભિ ચ ધૂપવરેભિઃ પૂજન તેષ જિનાન કરોમિ

વસ્ત્રવરેભિ ચ ગન્ધવરેભિશ્ચૂર્ણપુટેભિ ચ મેરુસમેભિઃ ।
સર્વવિશિષ્ટવિયૂહવરેભિઃ પૂજન તેષ જિનાન કરોમિ

યા ચ અનુત્તર પૂજ ઉદારા તાનધિમુચ્યમિ સર્વજિનાનામ્ ।
ભદ્રચરીઅધિમુક્તિબલેન વન્દમિ પૂજયમી જિન સર્વાન્

યચ્ચ કૃતં મયિ પાપુ ભવેય્યા રાગતુ દ્વેષતુ મોહવશેન ।
કાયતુ વાચ મનેન તથૈવ તં પ્રતિદેશયમી અહુ સર્વમ્

યચ્ચ દશદ્દિશિ પુણ્ય જગસ્ય શૈક્ષ અશૈક્ષપ્રત્યેકજિનાનામ્ ।
બુદ્ધસુતાનથ સર્વજિનાનાં તં અનુમોદયમી અહુ સર્વમ્

યે ચ દશદ્દિશિ લોકપ્રદીપા બોધિવિબુદ્ધ અસઙ્ગતપ્રાપ્તાઃ ।
તાનહુ સર્વિ અધ્યેષમિ નાથાં ચક્રુ અનુત્તરુ વર્તનતાયૈ

યે ઽપિ ચ નિર્વૃતિ દર્શિતુકામાસ્તાનભિયાચમિ પ્રાઞ્જલિભૂતઃ ।
ક્ષેત્રરજોપમકલ્પ સ્થિહન્તુ સર્વજગસ્ય હિતાય સુખાય

વન્દનપૂજનદેશનતાય મોદનધ્યેષણયાચનતાય ।
યચ્ચ શુભં મયિ સંચિતુ કિંચિદ્બોધયિ નામયમી અહુ સર્વમ્

પૂજિત ભોન્તુ અતીતક બુદ્ધા યે ચ ઘ્રિયન્તિ દશદ્દિશિ લોકે ।
યે ચ અનાગત તે લઘુ ભોન્તુ પૂર્ણમનોરથ બોધિવિબુદ્ધાઃ

યાવત્ કેચિ દશદ્દિશિ ક્ષેત્રાસ્તે પરિશુદ્ધ ભવન્તુ ઉદારાઃ ।
બોધિદ્રુમેન્દ્રગતેભિ જિનેભિર્બુદ્ધસુતેભિ ચ ભોન્તુ પ્રપૂર્ણાઃ

યાવત્ કેચિ દશદ્દિશિ સત્ત્વાસ્તે સુખિતાઃ સદ ભોન્તુ અરોગાઃ ।
સર્વજગસ્ય ચ ધર્મિકુ અર્થો ભોન્તુ પ્રદક્ષિણુ ઋધ્યતુ આશા

બોધિચરિં ચ અહં ચરમાણો ભવિ જાતિસ્મરુ સર્વગતીષુ ।
સર્વસુ જન્મસુ ચ્યુત્યુપપત્તી પ્રવ્રજિતો અહુ નિત્યુ ભવેય્યા

સર્વજિનાનનુશિક્ષયમાણો ભદ્રચરિં પરિપૂરયમાણઃ ।
શીલચરિં વિમલાં પરિશુદ્ધાં નિત્યમખણ્ડમચ્છિદ્ર ચરેયમ્

દેવરુતેભિ ચ નાગરુતેભિર્યક્ષકુમ્ભાણ્ડમનુષ્યરુતેભિઃ ।
યાનિ ચ સર્વરુતાનિ જગસ્ય સર્વરુતેષ્વહુ દેશયિ ધર્મમ્

યે ખલુ પારમિતાસ્વભિયુક્તો બોધિયિ ચિત્તુ મ જાતુ વિમુહ્યેત્ ।
યે ઽપિ ચ પાપક આવરણીયાસ્તેષુ પરિક્ષયુ ભોતુ અશેષમ્

કર્મતુ ક્લેશતુ મારપથાતો લોકગતીષુ વિમુક્તુ ચરેયમ્ ।
પદ્મ યથા સલિલેન અલિપ્તઃ સૂર્ય શશી ગગનેવ અસક્તઃ

સર્વિ અપાયદુખાં પ્રશમન્તો સર્વજગત્ સુખિ સ્થાપયમાનઃ ।
સર્વજગસ્ય હિતાય ચરેયં યાવત ક્ષેત્રપથા દિશતાસુ

સત્ત્વચરિં અનુવર્તયમાનો બોધિચરિં પરિપુરયમાણઃ ।
ભદ્રચરિં ચ પ્રભાવયમાનઃ સર્વિ અનાગતકલ્પ ચરેયમ્

યે ચ સભાગત મમ ચર્યાયે તેભિ સમાગમુ નિત્યુ ભવેય્યા ।
કાયતુ વાચતુ ચેતનતો વા એકચરિ પ્રણિધાન ચરેયમ્

યે ઽપિ ચ મિત્રા મમ હિતકામા ભદ્રચરીય નિદર્શયિતારઃ ।
તેભિ સમાગમુ નિત્યુ ભવેય્યા તાંશ્ચ અહં ન વિરાગયિ જાતુ

સંમુખ નિત્યમહં જિન પશ્યે બુદ્ધસુતેભિ પરીવૃતુ નાથાન્ ।
તેષુ ચ પૂજ કરેય ઉદારાં સર્વિ અનાગતકલ્પમખિન્નઃ

ધારયમાણુ જિનાન સદ્ધર્મં બોધિચરિં પરિદીપયમાનઃ ।
ભદ્રચરિં ચ વિશોધયમાનઃ સર્વિ અનાગતકલ્પ ચરેયમ્

સર્વભવેષુ ચ સંસરમાણઃ પુણ્યતુ જ્ઞાનતુ અક્ષયપ્રાપ્તઃ ।
પ્રજ્ઞૌપાયસમાધિવિમોક્ષૈઃ સર્વગુણૈર્ભવિ અક્ષયકોશઃ

એકરજાગ્રિ રજોપમક્ષેત્રા તત્ર ચ ક્ષેત્રિ અચિન્તિય બુદ્ધાન્ ।
બુદ્ધસુતાન નિષણ્ણકુ મધ્યે પશ્યિય બોધિચરિં ચરમાણઃ

એવમશેષત સર્વદિશાસુ બાલપથેષુ ત્રિયધ્વપ્રમાણાન્ ।
બુદ્ધસમુદ્ર થ ક્ષેત્રસમુદ્રાનોતરિ ચારિકકલ્પસમુદ્રાન્

એકસ્વરાઙ્ગસમુદ્રરુતેભિઃ સર્વજિનાન સ્વરાઙ્ગવિશુદ્ધિમ્ ।
સર્વજિનાન યથાશયઘોષાન્ બુદ્ધસરસ્વતિમોતરિ નિત્યમ્

તેષુ ચ અક્ષયઘોષરુતેષુ સર્વત્રિયધ્વગતાન જિનાનામ્ ।
ચક્રનયં પરિવર્તયમાનો બુદ્ધિબલેન અહં પ્રવિશેયમ્

એકક્ષણેન અનાગત સર્વાન્ કલ્પપ્રવેશ અહં પ્રવિશેયમ્ ।
યે ઽપિ ચ કલ્પ ત્રિયધ્વપ્રમાણાસ્તાન્ ક્ષણકોટિપ્રવિષ્ટ ચરેયમ્

યે ચ ત્રિયધ્વગતા નરસિંહાસ્તાનહુ પશ્યિય એકક્ષણેન ।
તેષુ ચ ગોચરિમોતરિ નિત્યં માયગતેન વિમોક્ષબલેન

યે ચ ત્રિયધ્વસુક્ષેત્રવિયૂહાસ્તાનભિનિર્હરિ એકરજાગ્રે ।
એવમશેષત સર્વદિશાસુ ઓતરિ ક્ષેત્રવિયૂહ જિનાનામ્

યે ચ આનાગત લોકપ્રદીપાસ્તેષુ વિબુધ્યન ચક્રપ્રવૃત્તિમ્ ।
નિર્વૃતિદર્શનનિષ્ઠ પ્રશાન્તિં સર્વિ અહં ઉપસંક્રમિ નાથાન્

ઋદ્ધિબલેન સમન્તજવેન જ્ઞાનબલેન સમન્તમુખેન ।
ચર્યબલેન સમન્તગુણેન મૈત્રબલેન સમન્તગતેન

પુણ્યબલેન સમન્તશુભેન જ્ઞાનબલેન અસઙ્ગગતેન ।
પ્રજ્ઞૌપાયસમાધિબલેન બોધિબલં સમુદાનયમાનઃ

કર્મબલં પરિશોધયમાનઃ ક્લેશબલં પરિમર્દયમાનઃ ।
મારબલં અબલંકરમાણઃ પૂરયિ ભદ્રચરીબલ સર્વાન્

ક્ષેત્રસમુદ્ર વિશોધયમાનઃ સત્ત્વસમુદ્ર વિમોચયમાનઃ ।
ધર્મસમુદ્ર વિપશ્યયમાનો જ્ઞાનસમુદ્ર વિગાહયમાનઃ

ચર્યસમુદ્ર વિશોધયમાનઃ પ્રણિધિસમુદ્ર પ્રપૂરયમાણઃ ।
બુદ્ધસમુદ્ર પ્રપૂજયમાનઃ કલ્પસમુદ્ર ચરેયમખિન્નઃ

યે ચ ત્રિયધ્વગતાન જિનાનાં બોધિચરિપ્રણિધાનવિશેષાઃ ।
તાનહુ પૂરયિ સર્વિ અશેષાન્ ભદ્રચરીય વિબુધ્યિય બોધિમ્

જ્યેષ્ઠકુ યઃ સુતુ સર્વજિનાનાં યસ્ય ચ નામ સમન્તતભદ્રઃ ।
તસ્ય વિદુસ્ય સભાગચરીયે નામયમી કુશલં ઇમુ સર્વમ્

કાયતુ વાચ મનસ્ય વિશુદ્ધિશ્ચર્યવિશુદ્ધ્યથ ક્ષેત્રવિશુદ્ધિઃ ।
યાદૃશ નામન ભદ્ર વિદુસ્ય તાદૃશ ભોતુ સમં મમ તેન

ભદ્રચરીય સમન્તશુભાયે મઞ્જુશિરિપ્રણિધાન ચરેયમ્ ।
સર્વિ અનાગત કલ્પમખિન્નઃ પૂરયિ તાં ક્રિય સર્વિ અશેષામ્

નો ચ પ્રમાણુ ભવેય્ય ચરીયે નો ચ પ્રમાણુ ભવેય્ય ગુણાનામ્ ।
અપ્રમાણ ચરિયાય સ્થિહિત્વા જાનમિ સર્વિ વિકુર્વિતુ તેષામ્

યાવત નિષ્ઠ નભસ્ય ભવેય્યા સત્ત્વ અશેષત નિષ્ઠ તથૈવ ।
કર્મતુ ક્લેશતુ યાવત નિષ્ઠા તાવતનિષ્ઠ મમ પ્રણિધાનમ્

યે ચ દશદ્દિશિ ક્ષેત્ર અનન્તા રથઅલંકૃતુ દદ્યુ જિનાનામ્ ।
દિવ્ય ચ માનુષ સૌખ્યવિશિષ્ટાં ક્ષેત્રરજોપમ કલ્પ દદેયમ્

યશ્ચ ઇમં પરિણામનરાજં શ્રુત્વ સકૃજ્જનયેદધિમુક્તિમ્ ।
બોધિવરામનુપ્રાર્થયમાનો અગ્રુ વિશિષ્ટ ભવેદિમુ પુણ્યમ્

વર્જિત તેન ભવન્તિ અપાયા વર્જિત તેન ભવન્તિ કુમિત્રાઃ ।
ક્ષિપ્રુ સ પશ્યતિ તં અમિતાભં યસ્યિમુ ભદ્રચરિપ્રણિધાનમ્

લાભ સુલબ્ધ સુજીવિતુ તેષાં સ્વાગત તે ઇમુ માનુષ જન્મ ।
યાદૃશ સો હિ સમન્તતભદ્રસ્તે ઽપિ તથા નચિરેણ ભવન્તિ

પાપક પઞ્ચ અનન્તરિયાણિ યેન અજ્ઞાનવશેન કૃતાનિ ।
સો ઇમુ ભદ્રચરિં ભણમાનઃ ક્ષિપ્રુ પરિક્ષયુ નેતિ અશેષમ્

જ્ઞાનતુ રૂપતુ લક્ષણતશ્ચ વર્ણતુ ગોત્રતુ ભોતિરુપેતઃ ।
તીર્થિકમારગણેભિરઘૃષ્યઃ પૂજિતુ ભોતિ સ સર્વત્રિલોકે

ક્ષિપ્રુ સ ગચ્છતિ બોધિદ્રુમેન્દ્રં ગત્વ નિષીદતિ સત્ત્વહિતાય ।
બુધ્યતિ બોધિ પ્રવર્તયિ ચક્રં ધર્ષતિ મારુ સસૈન્યકુ સર્વમ્

યો ઇમુ ભદ્રચરિપ્રણિધાનં ધારયિ વાચયિ દેશયિતો વા ।
બુદ્ધ વિજાનતિ યો ઽત્ર વિપાકો બોધિ વિશિષ્ટ મ કાઙ્ક્ષ જનેથ

મઞ્જુશિરી યથ જાનતિ શૂરઃ સો ચ સમન્તતભદ્ર તથૈવ ।
તેષુ અહં અનુશિક્ષયમાણો નામયમી કુશલં ઇમુ સર્વમ્

સર્વત્રિયધ્વગતેભિ જિનેભિર્યા પરિણામન વર્ણિત અગ્રા ।
તાય અહં કુશલં ઇમુ સર્વં નામયમી વરભદ્રચરીયે

કાલક્રિયાં ચ અહં કરમાણો આવરણાન્ વિનિવર્તિય સર્વાન્ ।
સંમુખ પશ્યિય તં અમિતાભં તં ચ સુખાવતિક્ષેત્ર વ્રજેયમ્

તત્ર ગતસ્ય ઇમિ પ્રણિધાના આમુખિ સર્વિ ભવેય્યુ સમગ્રા ।
તાંશ્ચ અહં પરિપૂર્ય અશેષાન્ સત્ત્વહિતં કરિ યાવત લોકે

તહિ જિનમણ્ડલિ શોભનિ રમ્યે પદ્મવરે રુચિરે ઉપપન્નઃ ।
વ્યાકરણં અહુ તત્ર લભેય્યા સંમુખતો અભિતાભજિનસ્ય

વ્યાકરણં પ્રતિલભ્ય ત તસ્મિન્ નિર્મિતકોટિશતેભિરનેકૈઃ ।
સત્ત્વહિતાનિ બહૂન્યહુ કુર્યાં દિક્ષુ દશસ્વપિ બુદ્ધિબલેન

ભદ્રચરિપ્રણિધાન પઠિત્વા યત્કુશલં મયિ સંચિતુ કિંચિત્ ।
એકક્ષણેન સમૃધ્યતુ સર્વં તેન જગસ્ય શુભં પ્રણિધાનમ્

ભદ્રચરિં પરિણામ્ય યદાપ્તં પુણ્યમનન્તમતીવ વિશિષ્ટમ્ ।
તેન જગદ્વ્યસનૌઘનિમગ્નં યાત્વમિતાભપુરિં વરમેવ