ગણ્ડવ્યૂહસૂત્ર · અધ્યાય 2

નિદાનપરિવર્તઃ ।
॥ ઓમ્ નમઃ સર્વબુદ્ધબોધિસત્ત્વેભ્યઃ ॥
એવં મયા શ્રુતમ્ । એકસ્મિન્ સમયે ભગવાન્ શ્રાવસ્ત્યાં વિહરતિ સ્મ જેતવને ઽનાથપિણ્ડદસ્યારામે મહાવ્યૂહે કૂટાગારે સાર્ધં પઞ્ચમાત્રૈર્બોધિસત્ત્વસહસ્રૈઃ સમન્તભદ્રમઞ્જુશ્રીબોધિસત્ત્વપૂર્વંગમૈઃ । યદુત જ્ઞાનોત્તરજ્ઞાનિના ચ બોધિસત્ત્વેન મહાસત્ત્વેન । સત્ત્વોત્તરજ્ઞાનિના ચ । અસઙ્ગોત્તરજ્ઞાનિના ચ । કુસુમોત્તરજ્ઞાનિના ચ । સૂર્યોત્તરજ્ઞાનિના ચ । ચન્દ્રોત્તરજ્ઞાનિના ચ । વિમલોત્તરજ્ઞાનિના ચ । વજ્રોત્તરજ્ઞાનિના ચ । વિરજોત્તરજ્ઞાનિના ચ । વૈરોચનોત્તરજ્ઞાનિના ( ગ્વ્ 2 ) ચ । બોધિસત્ત્વેન મહાસત્ત્વેન ॥ જ્યોતિર્ધ્વજેન ચ । મેરુધ્વજેન ચ । રત્નધ્વજેન ચ । અસઙ્ગધ્વજેન ચ । કુસુમધ્વજેન ચ । વિમલધ્વજેન ચ । સૂર્યધ્વજેન ચ । રુચિરધ્વજેન ચ । વિરજધ્વજેન ચ । વૈરોચનધ્વજ્રેન ચ બોધિસત્ત્વેન મહાસત્ત્વેન ॥ રત્નતેજસા ચ । મહાતેજસા ચ । જ્ઞાનવજ્રતેજસા ચ । વિમલતેજસા ચ । ધર્મસૂર્યતેજસા ચ । પુણ્યપર્વતતેજસા ચ । જ્ઞાનાવભાસતેજસા ચ । સમન્તશ્રીતેજસા ચ । સમન્તપ્રભતેજસા ચ । સમન્તપ્રભશ્રીતેજસા ચ બોધિસત્ત્વેન મહાસત્ત્વેન ॥ ધારણીગર્ભેણ ચ । ગગનગર્ભેણ ચ । પદ્મગર્ભેણ ચ । રત્નગર્ભેણ ચ । સૂર્યગર્ભેણ ચ । ગુણવિશુદ્ધિગર્ભેણ ચ । ધર્મસમુદ્રગર્ભેણ ચ । વૈરોચનગર્ભેણ ચ । નાભિગર્ભેણ ચ । પદ્મશ્રીગર્ભેણ ચ બોધિસત્ત્વેન મહાસત્ત્વેન ॥ સુનેત્રેણ ચ । વિશુદ્ધનેત્રેણ ચ । વિમલનેત્રેણ ચ । અસઙ્ગનેત્રેણ ચ । સમન્તદર્શનનેત્રેણ ચ । સુવિલોકિતનેત્રેણ ચ । અવલોકિતનેત્રેણ ચ । ઉત્પલનેત્રેણ ચ । વજ્રનેત્રેણ ચ । રત્નનેત્રેણ ચ । ગગનનેત્રેણ ચ । સમન્તનેત્રેણ ચ બોધિસત્ત્વેન મહાસત્ત્વેન ॥ દેવમુકુટેન ચ । ધર્મધાતુપ્રતિભાસમણિમુકુટેન ચ । બોધિમણ્ડમુકુટેન ચ । દિગ્વૈરોચનમુકુટેન ચ । સર્વબુદ્ધસંભૂતગર્ભમણિમુકુટેન ચ । સર્વલોકધાતૂદ્ગતમુકુટેન ચ । સમન્તવૈરોચનમુકુટેન ચ । અનભિભૂતમુકુટેન ચ । સર્વતથાગતસિંહાસનસંપ્રતિષ્ઠિતમણિમુકુટેન ચ । સમન્તધર્મધાતુગગનપ્રતિભાસમુકુટેન ચ બોધિસત્ત્વેન મહાસત્ત્વેન ॥ બ્રહ્મેન્દ્રચુડેન ચ । નાગેન્દ્રચૂડેન ચ । સર્વબુદ્ધનિર્માણપ્રતિભાસચૂડેન ચ । બોધિમણ્ડચૂડેન ચ । સર્વપ્રણિધાનસાગરનિર્ઘોષમણિરાજચૂડેન ચ । સર્વતથાગતપ્રભામણ્ડલપ્રમુઞ્ચનમણિરત્નનિગર્જિતચૂડેન ચ । સર્વાકાશતલાસંભેદવિજ્ઞપ્તિમણિરત્નવિભૂષિતચૂડેન ચ । સર્વતથાગતવિકુર્વિતપ્રતિભાસધ્વજમણિરાજજાલસંછાદિતચૂડેન ચ । સર્વતથાગતધર્મચક્રનિર્ઘોષચૂડેન ચ । સર્વત્ર્યધ્વનામચક્રનિર્ઘોષચૂડેન ચ બોધિસત્ત્વેન મહાસત્ત્વેન ॥ મહાપ્રભેણ ચ । વિમલપ્રભેણ ચ । વિમલતેજઃપ્રભેણ ચ । રત્નપ્રભેણ ચ । વિરજપ્રભેણ ચ । જોતિષ્પ્રભેણ ચ । ધર્મપ્રભેણ ચ । શાન્તિપ્રભેણ ચ । સૂર્યપ્રભેણ ચ । વિકુર્વિતપ્રભેણ ચ । દેવપ્રભેણ ચ બોધિસત્ત્વેન મહાસત્ત્વેન ॥ પુણ્યકેતુના ચ । જ્ઞાનકેતુના ચ । ધર્મકેતુના ચ । અભિજ્ઞાકેતુના ( ગ્વ્ 3 ) ચ । પ્રભાકેતુના । કુસુમકેતુના ચ । બોધિકેતુના ચ । બ્રહ્મકેતુના ચ । સમન્તાવભાસકેતુના ચ । મણિકેતુના ચ બોધિસત્ત્વેન મહાસત્ત્વેન ॥ બ્રહ્મઘોષેણ ચ । સાગરઘોષેણ ચ । ધરણીનિર્નાદઘોષેણ ચ । લોકેન્દ્રઘોષેણ ચ । શૈલેન્દ્રરાજસંઘટ્ટનઘોષેણ ચ । સર્વધર્મધાતુસ્ફરણઘોષેણ ચ । સર્વધર્મધાતુસાગરનિગર્જિતઘોષેણ ચ । સર્વમાઅરમણ્ડલપ્રમર્દનઘોષેણ ચ । મહાકરુણાનયમેઘનિગર્જિતઘોષેણ ચ । સર્વજગદ્દુઃખપ્રશાન્ત્યાશ્વાસનઘોષેણ ચ બોધિસત્ત્વેન મહાસત્ત્વેન । ધર્મોદ્ગતેન ચ । વિશેષોદ્ગતેન ચ । જ્ઞાનોદ્ગતેન
ચ । પુણ્યસુમેરૂદ્ગતેન ચ । ગુણપ્રભાવોદ્ગતેન ચ । યશોદ્ગતેન ચ । સમન્તાવભાસોદ્ગતેન ચ । મહામૈત્ર્યુદ્ગતેન ચ । જ્ઞાનસંભારોદ્ગતેન ચ । તથાગતકુલગોત્રોદ્ગતેન ચ બોધિસત્ત્વેન મહાસત્ત્વેન ॥ પ્રભાશ્રિયા ચ । પ્રવરશ્રિયા ચ । સમુદ્ગતશ્રિયા ચ । વૈરોચનશ્રિયા ચ । ધર્મશ્રિયા ચ । ચન્દ્રશ્રિયા ચ । ગગનશ્રિયા ચ । રત્નશ્રિયા ચ । કેતુશ્રિયા ચ । જ્ઞાનશ્રિયા ચ બોધિસત્ત્વેન મહાસત્ત્વેન ॥ શૈલેન્દ્રરાજેન ચ । ધર્મેન્દ્રરાજેન ચ । જગદિન્દ્રરાજેન ચ । બ્રહ્મેન્દ્રરાજેન ચ । ગણેન્દ્રરાજેન ચ । દેવેન્દ્રરાજેન ચ । શાન્તેન્દ્રરાજેન ચ । અચલેન્દ્રરાજેન ચ । ઋષભેન્દ્રરાજેન ચ । પ્રવરેન્દ્રરાજેન ચ બોધિસત્ત્વેન મહાસત્ત્વેન ॥ પ્રશાન્તસ્વરેણ ચ । અસઙ્ગસ્વરેણ ચ । ધરણીનિર્ઘોષસ્વરેણ ચ । સાગરનિગર્જિતસ્વરેણ ચ । મેઘનિર્ઘોષસ્વરેણ ચ । ધર્માવભાસસ્વરેણ ચ । ગગનનિર્ઘોષસ્વરેણ ચ । સર્વસત્ત્વકુશલમૂલનિગર્જિતસ્વરેણ ચ । પૂર્વપ્રણિધાનસંચોદનસ્વરેણ ચ । મારમણ્ડલનિર્ઘોષસ્વરેણ ચ બોધિસત્ત્વેન મહાસત્ત્વેન ॥ રત્નબુદ્ધિના ચ । જ્ઞાનબુદ્ધિના ચ । ગગનબુદ્ધિના ચ । અસઙ્ગબુદ્ધિના ચ । વિમલબુદ્ધિના ચ । વિશુદ્ધબુદ્ધિના ચ । ત્ર્યધ્વાવભાસબુદ્ધિના ચ । વિશાલબુદ્ધિના ચ । સમન્તાવલોકબુદ્ધિના ચ । ધર્મધાતુનયાવભાસબુદ્ધિના ચ બોધિસત્ત્વેન મહાસત્ત્વેન ॥ એવંપ્રમુખૈઃ પઞ્ચમાત્રૈર્બોધિસત્ત્વસહસ્રૈઃ સર્વૈઃ સમન્તભદ્રબોધિસત્ત્વચર્યાપ્રણિધાનાભિનિર્યાતૈરસઙ્ગગોચરૈઃ સર્વબુદ્ધક્ષેત્રસ્ફરણતયા । અનન્તકાયાધિષ્ઠાનૈઃ સર્વતથાગતોપસંક્રમણતયા । અનાવરણચક્ષુર્મણ્ડલવિશુદ્ધૈઃ સર્વબુદ્ધવિકુર્વિતદર્શનતયા । વિજ્ઞપ્તિષ્વપ્રમાણગતૈઃ સર્વતથાગતાભિસંબોધિમુખોપસંક્રમણાપ્રતિપ્રસ્રબ્ધતયા । અનન્તાલોકૈઃ સર્વબુદ્ધધર્મસમુદ્રનયજ્ઞાનાવભાસપ્રતિલબ્ધતયા । અનન્તકલ્પાક્ષીણગુણનિર્દેશૈઃ પ્રતિસંવિદ્વિશુદ્ધ્યા । આકાશધાતુપરમજ્ઞાનગોચરવિશુદ્ધ્યનિગૃહીતૈર્યથાશયજગદ્રૂપકાયસંદર્શનતયા । વિતિમિરૈર્નિઃસત્ત્વનિર્જીવસત્ત્વધાતુપરિજ્ઞયા । ગગનસમપ્રજ્ઞૈઃ સર્વધર્મધાતુરશ્મિજાલસ્ફરણતયા । પઞ્ચભિશ્ચ શ્રાવકમહર્દ્ધિકશતૈઃ સર્વૈઃ સત્યનયસ્વભાવાભિસંબુદ્ધૈર્ભૂતકોટિપ્રત્યક્ષગતૈર્ધર્મપ્રકૃત્યવતીર્ણૈર્ભવસમુદ્રોચ્ચલિતૈસ્તથાગતગગનગોચરૈઃ સંયોજનાનુશયવાસનાવિનિવર્તિતૈરસઙ્ગાલયનિલયૈર્ગગનશાન્તવિહારિભિર્બુદ્ધકાઙ્ક્ષાવિમતિવિચિકિત્સાસમુચ્છિન્નૈઃ બુદ્ધજ્ઞાનસમુદ્રાધિમુક્તિપથાવતીર્ણૈઃ ॥ લોકેન્દ્રૈશ્ચ પૂર્વજિનકૃતાધિકારૈઃ
સર્વજગદ્ધિતસુખપ્રતિપન્નૈરનધીષ્ટકલ્યાણમિત્રૈઃ ( ગ્વ્ 4 ) પરસત્ત્વરક્ષાપ્રતિપન્નૈઃ લોકવિશેષવર્તિજ્ઞાનસુખવતીર્ણૈઃ સર્વસત્ત્વાપરિત્યાગચિત્તૈર્બુદ્ધશાસનગોચરનિર્યાતૈસ્તથાગતશાસનરક્ષાપ્રતિપન્નૈર્બુદ્ધવંશસંધારણપ્રણિધિનિર્જાતૈસ્તથાગતકુલગોત્રસંભવાભિમુખૈઃ સર્વજ્ઞતાજ્ઞાનાભિલાષિભિઃ ॥

અથ ખલુ તેષાં બોધિસત્ત્વાનાં સપરિવારાણાં તેષાં ચ શ્રાવકમહર્દ્ધિકાનાં તેષાં ચ લોકેન્દ્રાણાં સપરિવારાણામેતદભવત્ન શક્યં સદેવકેનાપિ લોકેન તથાગતવિષયં તથાગતજ્ઞાનગોચરં તથાગતાધિષ્ઠાનં તથાગતબલં તથાગતવૈશારદ્યં તથાગતસમાધિં તથાગતવિહારં તથાગતાધિપત્યં તથાગતકાયં તથાગતજ્ઞાનમવગન્તું વા અવગાહિતું વા અધિમોક્તું વા પ્રજ્ઞાતું વા વિજ્ઞાતું વા વિચારયિતું વા વિભાવયિતું વા વિભાજિતું વા પ્રભાવયિતું વા પરસત્ત્વસંતાનેષુ વા પ્રતિષ્ઠાપયિતુમ્, અન્યત્ર તથાગતાધિષ્ઠાનેન તથાગતવિકુર્વિતેન તથાગતાનુભાવેન તથાગતપૂર્વપ્રાણિધાનેન પૂર્વબુદ્ધસુકૃતકુશલમૂલતયા કલ્યાણમિત્રપરિગ્રહેણ શ્રદ્ધાનયનજ્ઞાનપરિશુદ્ધ્યા ઉદારાધિમુક્ત્યવભાસપ્રતિલમ્ભેન બોધિસત્ત્વાધ્યાશયપરિશુદ્ધ્યા અધ્યાશયસર્વજ્ઞતાપ્રણિધાનપ્રસ્થાનેન । અપ્યેવ નામ ભગવાનસ્માકં યથાશયાનાં બોધિસત્ત્વાનાં સર્વેષાં ચ સત્ત્વાનામાશય વિમાત્રતયા અધિમુક્તિનાનાત્વતયા પ્રતિબોધનાનાત્વતયા વચનસંકેતનાનાત્વપ્રાપ્તાનાં નાનાધિપતેયભૂમિપ્રતિષ્ઠિતાનાં નાનેન્દ્રિયવિશુદ્ધાનાં નાનાશયપ્રયોગાનાં નાનાચેતનાવિષયાણાં નાનાતથાગતગુણનિશ્રિતાનાં નાનાધર્મનિર્દેશદિગભિમુખાનાં પૂર્વસર્વજ્ઞતાપ્રસ્થાનં ચ સંદર્શયેત્ । પૂર્વબોધિસત્ત્વપ્રણિધાનાભિનિર્હારં ચ સંદર્શયેત્ । પૂર્વબોધિસત્ત્વપારમિતામણ્ડલવિશુદ્ધિં ચ સંદર્શયેત્ । પૂર્વબોધિસત્ત્વભૂમ્યાક્રમણવિકુર્વિતં ચ સંદર્શયેત્ । પૂર્વબોધિસત્ત્વચર્યામણ્ડલાભિનિર્હારપરિપૂરિં ચ સંદર્શયેત્ । પૂર્વબોધિસત્ત્વયાનાભિનિર્હારવ્યૂહાવભાસં ચ સંદર્શયેત્ । પૂર્વબોધિસત્ત્વમાર્ગવ્યૂહપરિશુદ્ધિં ચ સંદર્શયેત્ । પૂર્વબોધિસત્ત્વનિર્યાણનયસાગરાભિનિર્હારવ્યૂહાનપિ સંદર્શયેત્ । પૂર્વબોધિસત્ત્વસમુદાગમવિકુર્વિતસાગરવ્યૂહાનપિ સંદર્શયેત્ । બોધિસત્ત્વપૂર્વયોગસમુદ્રાનપિ સંદર્શયેત્ । અભિસંબોધિમુખવિકુર્વિતસાગરાનપિ સંદર્શયેત્ । તથાગતધર્મચક્રપ્રવર્તનવિકુર્વિતવૃષભિતામપિ સંદર્શયેત્ । તથાગતબુદ્ધક્ષેત્રપરિશુદ્ધિવિકુર્વિતસાગરાનપિ સંદર્શયેત્ । તથાગતસત્ત્વધાતુવિનયોપાયમુખાન્યપિ સંદર્શયેત્ । તથાગતસર્વજ્ઞતાધર્મનગરાધિપતેયતામપિ સંદર્શયેત્ । તથાગતસર્વસત્ત્વમાર્ગાવભાસાનપિ સંદર્શયેત્ । તથાગતસત્ત્વભવનપ્રવેશવિકુર્વિતાન્યપિ સંદર્શયેત્ । તથાગતસત્ત્વદક્ષિણાપ્રતિગ્રહાંશ્ચ સંદર્શયેત્ । તથાગતસર્વસત્ત્વપુણ્યદક્ષિણાદેશનાપ્રાતિહાર્યાણ્યપિ સંદર્શયેત્ । તથાગતસર્વસત્ત્વચિત્તગતિષુ બુદ્ધપ્રતિભાસવિજ્ઞપ્તીરપિ સંદર્શયેત્ । તથાગતસત્ત્વવિકુર્વિતપ્રાતિહાર્યાણ્યપિ સંદર્શયેત્ । તથાગતસર્વસત્ત્વદેશનાનુશાસનીપ્રાતિહાર્યાણ્યપિ સંદર્શયેત્ ।
તથાગતસર્વસત્ત્વાચિન્ત્યબુદ્ધસમાધિગોચરવિકુર્વિતાન્યપિ સંદર્શયેદિતિ ॥
અથ ખલુ ભગવાંસ્તેષાં બોધિસત્ત્વાનાં ચેતસૈવ ચેતઃપરિવિતર્કમાજ્ઞાય મહાકરુણાશરીરં મહાકરુણામુખં મહાકરુણાપૂર્વંગમં મહાકરુણાધર્મગગનયાનુગમં સિંહવિજૃમ્ભિતં નામ ( ગ્વ્ 5 ) સમાધિં સમાપદ્યતે સ્મ જગદ્વિરોચનવ્યૂહમ્ । સમનન્તરસમાપન્નસ્ય ચ ભગવતો મહાવ્યૂહઃ કૂટાગારો ઽનન્તમધ્યવિપુલઃ સંસ્થિતો ઽભૂત્ । અપરાજિતવજ્રધરણીતલવ્યૂહઃ સર્વમણિરત્નરાજજાલસંસ્થિતભૂમિતલમનેકરત્નપુષ્પાભિકીર્ણો મહામણિરત્નસુવિકીર્ણો વૈડૂર્યસ્તમ્ભોપશોભિતો જગદ્વિરોચનમણિરાજસુવિભક્તાલંકારઃ સર્વરત્નયમકસંઘાતો જામ્બૂનદમણિરત્નકૂટોપશોભિતઃ સર્વરત્નનિર્યૂહતોરણહર્મ્યગવાક્ષાસંખ્યેયવેદિકાવિશુદ્ધવ્યૂહઃ સર્વલોકેન્દ્રસદૃશમણિરત્નવ્યૂહો જગત્સાગરમણિરત્નવ્યૂહઃ સર્વમણિરત્નસંછાદિતઃ સમુચ્છ્રિતચ્છત્રધ્વજપતાકઃ સર્વદ્વારતોરણવ્યૂહમુખૈર્ધર્મધાતુરશ્મિજાલપ્રમુક્તસ્ફરણવ્યૂહો બહિરનભિલાપ્યપર્ષન્મણ્ડલભૂમિતલવેદિકાવ્યૂહઃ સમન્તદિક્સોપાનમણિરત્નકૂટઃ પરમસુવિભક્તોપશોભિતઃ । સર્વં ચ જેતવનં વિપુલાયામવિસ્તારં સંસ્થિતમભૂત્ । તાન્યપિ ચ બુદ્ધાનુભાવેન અનભિલાપ્યબુદ્ધક્ષેત્રપરમાણુરજઃસમાનિબુદ્ધક્ષેત્રાણિ વિપુલાયામવિસ્તારાણિ સંસ્થિતાન્યભૂવન્ । સર્વરત્નવિચિત્રવ્યૂહાનિ અનભિલાપ્યરત્નચિત્રસંસ્થિતભૂમિતલાનિ અસંખ્યેયમણિરત્નપ્રાકારપરિક્ષિપ્તાનિ વિવિધરત્નતાલપઙ્ક્તિવ્યૂહાનિ સંસ્થિતાન્યભૂવન્ । તેષુ ચ અપરિમાણગન્ધોદકનદ્યો ઽનન્તાવર્તગન્ધોદકપરિપૂર્ણાઃ સર્વરત્નપુષ્પૌઘકલુષાઃ પ્રદક્ષિણવાહિન્યઃ સર્વબુદ્ધનિર્ઘોષનિગર્જિતવ્યૂહાઃ સમવતિષ્ઠન્તે સ્મ । અચિન્ત્યાશ્ચ રત્નપુણ્ડરીકપઙ્ક્તયઃ સર્વરત્નોદ્ગતપ્રફુલ્લપદ્મવ્યૂહોપશોભિતતલાશ્ચ રત્નવૃક્ષાઃ, અચિન્ત્યાશ્ચ વિચિત્રરત્નકૂટાગારપઙ્ક્તયઃ સર્વમણિરત્નજાલસંછન્ના અસંખ્યેયમણિરત્નરશ્મિજાલાવભાસવ્યૂહા અસંખ્યેયમણિરત્નવિમાનસર્વમણિરત્નવ્યૂહાઃ સર્વગન્ધકોશપ્રમુક્તાઃ સર્વધૂપપટલવ્યૂહાઃ સંસ્થિતા અભૂવન્ । અપરિમાણાશ્ચ રત્નધ્વજાઃ, એવમ્ વસ્ત્રધ્વજાઃ પતાકાધ્વજા રત્નપટ્ટધ્વજાઃ પુષ્પધ્વજા આભરણધ્વજા માલ્યધ્વજાઃ સર્વરત્નકિઙ્કિણીજાલધ્વજા મણિરાજચ્છત્રધ્વજાઃ સમન્તાવભાસસ્ફરણમણિરત્નધ્વજાઃ સર્વતથાગતનામચક્રનિર્ઘોષમણિરત્નરાજધ્વજાઃ સિંહકાન્તમણિરત્નરાજધ્વજાઃ સર્વતથાગતપૂર્વયોગનિગર્જનમણિરત્નરાજધ્વજાઃ સર્વધર્મધાતુપ્રતિભાસધ્વજા મણિરત્નરાજધ્વજવ્યૂહાઃ સર્વધ્વજાલંકારસમન્તદિક્સુવિભક્તવ્યૂહાઃ સંતિષ્ઠન્તે

સ્મ । સર્વાવચ્ચ જેતવનમચિન્ત્યદિવ્યવિમાનમેઘગગનતલાલંકારં સંસ્થિતમભૂત્ । અસંખ્યેયસર્વગન્ધવૃક્ષમેઘસંછન્નાલંકારમ્, અનભિલાપ્યસર્વવ્યૂહસુમેરુસંછન્નાલંકારમ્, અનભિલાપ્યવાદ્યતૂર્યમેઘસર્વતથાગતસ્તુતિસંગીતિમધુરનિર્ઘોષાલંકારમ્, અનભિલાપ્યરત્નપદ્મમેઘસંછન્નાલંકારમ્, અનભિલાપ્યરત્નસિંહાસનદિવ્યમણિરત્નવસ્ત્રપ્રજ્ઞપ્તબોધિસત્ત્વનિષણ્ણતથાગતસ્તુતિમેઘમધુરનિર્ઘોષાલંકારમ્, અનભિલાપ્યદેવેન્દ્રબિમ્બસદૃશાભિમુખમણિવિગ્રહમેઘાલંકારમ્, અનભિલાપ્યશ્વેતમુક્તિજાલમેઘાલંકારમ્, અનભિલાપ્યલોહિતમુક્તાકૂટાગારમેઘસંછન્નાલંકારમ્, અનભિલાપ્યવજ્રસારમુક્તામેઘપ્રવર્ષણાલંકારં સંસ્થિતમભૂત્ । તત્કસ્ય હેતોઃ? તથા હિ તદચિન્ત્યં તથાગતકુશલમૂલમ્, અચિન્ત્યસ્તથાગતશુક્લધર્મોપચયઃ, અચિન્ત્યં તથાગતબુદ્ધવૃષભિતાધિષ્ઠાનમ્, અચિન્ત્યં તથાગતસર્વલોકધાત્વેકકાયસ્ફરણવિકુર્વિતમ્, અચિન્ત્યં સર્વતથાગતૈકકાયપ્રવેશસર્વબુદ્ધક્ષેત્રવ્યૂહસમવસરણાધિષ્ઠાનસંદર્શનમ્ અચિન્ત્યં તથાગતાનામેકપરમાઅણુરજસિ સર્વધર્મધાતુપ્રતિભાસવિજ્ઞપ્તિસંદર્શનમ્, અચિન્ત્યં તથાગતાનામેકરોમકૂપે ( ગ્વ્ 6 ) પૂર્વાન્તકોટીગતસર્વતથાગતપરંપરાસંદર્શન્, અચિન્ત્યં તથાગતામેકરશ્મિમુખસર્વલોકધાતુપરમાણુરજઃપ્રસરાવભાસનમ્, અચિન્ત્યં તથાગતાનામેકરોમમુખસર્વલોકધાતુપરમાણુરજઃસમં નિર્મિતમેઘસર્વબુદ્ધક્ષેત્રસ્ફરણમ્, અચિન્ત્યં તથાગતાનામેકરોમમુખસર્વલોકધાતુસંવર્તવિવર્તકલ્પસંદર્શનં ચ । યથા ચ જેતવનમેવંરૂપયા બુદ્ધક્ષેત્રપરિશુદ્ધ્યા પરિશુદ્ધં સંસ્થિતમ્, એવં દશસુ દિક્ષુ ધર્મધાતુપરમાકાશધાતુપર્યવસાનાઃ સર્વલોકધાતવઃ પરિશુદ્ધાઃ સંસ્થિતા અલંકૃતાઃ પ્રતિમણ્ડિતાઃ તથાગતકાયપરિસ્ફુટા જેતવનસમવસરણા બોધિસત્ત્વપરિપૂર્ણાઃ તથાગતપર્ષન્મણ્ડલસમુદ્રસુવ્યવસ્થિતાઃ સર્વવ્યૂહમેઘભિપ્રવર્ષણાઃ, સર્વરત્નપ્રભાવભાસિતાઃ સર્વમણિરત્નમેઘપ્રવર્ષિતાલંકારાઃ, સર્વક્ષેત્રવ્યૂહમેઘસંછન્નાલંકારાઃ, સર્વદિવ્યાત્મભાવમેઘપ્રવર્ષિતાલંકારાઃ સર્વપુષ્પમેઘપ્રવર્ષિતાલંકારાઃ, સુપુષ્પિતકોશસ્ફરણાલંકારાઃ, સર્વવસ્ત્રમેઘનાનારઙ્ગરુચિરચીવરવર્ષપ્રમુક્તકોશાઃ, સર્વમાલ્યદામહારવ્યૂહમેઘાચ્છન્નધારાભિપ્રવર્ષણાલંકારાઃ
સર્વદિક્સમુત્થિતનાનાગન્ધધૂપમેઘપટલસર્વજગચ્છરીરસદૃશસંસ્થાનપ્રવર્ષાણાલંકારાઃ સર્વરત્નકુસુમજાલમેઘાચ્છન્નરત્નજાલસૂક્ષ્મચૂર્ણપ્રવર્ષણાલંકારાઃ સર્વરત્નધ્વજપતાકામેઘદિવ્યકન્યાપાણિપરિગૃહીતગગનતલાવર્તનપરિવર્તનાલંકારાઃ સર્વરત્નપદ્મવિચિત્રરત્નપત્રમણ્ડલોર્ધ્વદણ્ડાધઃકેસરનિબદ્ધતૂર્યસંઘટ્ટિતમધુરનિર્ઘોષાલંકારાઃ સર્વરત્નબિમ્બજાલસિંહપઞ્જરનાનારત્નચિત્રહારમાલ્યાલંકારાઃ સંસ્થિતાઃ સંદૃશ્યન્તે સ્મ ॥
સમનન્તરસમાપન્નસ્ય ભગવત એવં સિંહવિજૃમ્ભિતં તથાગતસમાધિમ્, અથ તાવદેવ પૂર્વસ્યાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ કનકમેઘપ્રદીપધ્વજાયા લોકધાતોર્વૈરોચનશ્રીતેજોરાજસ્ય તથાગતસ્ય બુદ્ધક્ષેત્રાદ્વૈરોચનપ્રણિધાનનાભિરશ્મિપ્રભો નામ બોધિસત્ત્વો મહાસત્ત્વઃ સાર્ધમનભિલાપ્યબુદ્ધક્ષેત્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તો નાનાવ્યૂહમેઘૈર્ગગનતલમલંકુર્વન્ । યદુત દિવ્યપુષ્પમેઘવર્ષમભિપ્રવર્ષન્, દિવ્યગન્ધમેઘવર્ષં પ્રમુઞ્ચન્, દિવ્યરત્નપદ્મમેઘવર્ષમભિપ્રકિરન્, દિવ્યમાલ્યમેઘવર્ષમવર્સૃજન્, દિવ્યરત્નમેઘવર્ષમભિપ્રવર્ષન્, દિવ્યાભરણમેઘવર્ષમભિપ્રવર્ષન્, દિવ્યરત્નચ્છત્રમેઘાનભિનિર્હરન્, વિચિત્રનાનારઙ્ગસૂક્ષ્મદિવ્યવસ્ત્રમેઘવર્ષમભિપ્રવર્ષન્, દિવ્યરત્નધ્વજપતાકામેઘાન્ ગગનતલે ઽધિતિષ્ઠન્, રુચિરૈઃ સર્વરત્નમેઘવ્યૂહૈર્ગગનતલં સ્ફરન્, યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય પૂર્વાં દિશમુપનિશ્રિત્ય સમન્તવ્યૂહમણિરત્નજાલસંછન્નાનિ કૂટાગારાણિ દિક્પ્રભાસમણિરાજપદ્મગર્ભાણિ ચ સિંહાસનાન્યભિનિર્માય ન્યષિદત્પર્યઙ્કમાભુજ્ય ચિન્તારાજમણિરત્નજાલાલંકારસંછન્નાનિ બોધિસત્ત્વશરીરાણ્યધિષ્ઠાય ॥
દક્ષિણાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ વજ્રસાગરગર્ભાયા લોકધાતોઃ સમન્તાવભાસશ્રીગર્ભરાજસ્ય તથાગતસ્ય બુદ્ધક્ષેત્રાદ્ દુર્યોધનવીર્યવેગરાજો નામ બોધિસત્ત્વો મહાસત્ત્વઃ સાર્ધમનભિલાપ્યબુદ્ધક્ષેત્રપરમાણુરજઃસમૈર્બોધિસત્ત્વૈઃ તેન ચ ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ ( ગ્વ્ 7 ) સર્વગન્ધદામજાલાવનદ્ધાન્ સર્વલોકસમુદ્રાનધિતિષ્ઠન્, સર્વરત્નહારદામજાલાવનદ્ધાન્ સર્વબુદ્ધક્ષેત્રપ્રસરાનધિતિષ્ઠન્, સર્વપુષ્પદામહારજાલાવનદ્ધાન્ સર્વબુદ્ધક્ષેત્રવંશાનધિતિષ્ઠન્, સર્વમાલ્યદામહારજાલાવનદ્ધાન્ સર્વબુદ્ધક્ષેત્રપરિવર્તાનધિતિષ્ઠન્, સર્વવજ્રહારાધસ્તલપ્રતિષ્ઠાનસંગૃહીતાનિ સર્વબુદ્ધક્ષેત્રપર્ષન્મણ્ડલાન્યધિતિષ્ઠન્, સર્વમણિરત્નજાલાવનદ્ધાન્ સર્વબુદ્ધક્ષેત્રનયાનધિતિષ્ઠન્, સર્વવસ્ત્રદામસમન્તપરિગ્રહપરિગૃહીતાન્ સર્વલોકધાતૂનધિતિષ્ઠન્ સર્વરત્નબિમ્બહારદામકલાપજાલાવનદ્ધાનિ સર્વબુદ્ધક્ષેત્રાણ્યભિનિર્હરન્, શ્રીરશ્મિમણિરત્નહારદામજાલાવનદ્ધાનિ સર્વક્ષેત્રાણ્યધિતિષ્ઠન્, સર્વવ્યૂહરશ્મ્યવભાસવૈરોચનમણિરાજદામજાલાવનદ્ધાનિ સર્વબુદ્ધક્ષેત્રાણ્યધિતિષ્ઠન્, સિંહકાન્તમણિરત્નહારદામજાલપ્રતિષ્ઠાનસંગૃહીતાન્ સર્વલોકધાતૂનધિતિષ્ઠન્ યેન ભગવાસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય દક્ષિણાં દિશમુપનિશ્રિત્ય જગદ્વિરોચનમણિકૂટાગારાણિ સમન્તદિગ્વિરોચનમણિરત્નપદ્મગર્ભાણિ ચ સિંહાસનાન્યભિનિર્માય ન્યષીદત્ પર્યઙ્કમાભુજ્ય સર્વરત્નકુસુમજાલાલંકારસંછન્નાનિ બોધિસત્ત્વશરીરાણ્યધિષ્ઠાય ॥

પશ્ચિમાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ મણિસુમેરૂવિરોચનધ્વજપ્રદીપાયા લોકધાતોર્ધર્મધાતુજ્ઞાનપ્રદીપસ્ય તથાગતસ્ય બુદ્ધક્ષેત્રાત્સમન્તશ્રીસમુદ્ગતરાજો નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલાદુચ્ચલિત્વા યેન સહાલોકધાતુસ્તેનોપસંક્રાન્તો ઽનભિલાપ્યબુદ્ધક્ષેત્રપરમાણુરજઃસમૈર્નાનાવર્ણગન્ધધ્વજસુમેરુમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈર્વિવિધગન્ધકુસુમમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈરનેકવર્ણગન્ધસુમેરુધૂપમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈર્વિચિત્રવર્ણગન્ધમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈઃ સર્વપરિષ્કારસદૃશવર્ણૈઃ રોમતેજઃસંભવમણિરાજસુમેરુમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈર્નાનાપ્રભામણ્ડલવ્યૂહજ્યોતિર્ધ્વજમણિરત્નસુમેરુમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈર્નાનાવર્ણવજ્રગર્ભમણિરાજનાનાવ્યૂહવિષયસુમેરુમેઘૈઃ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈઃ સર્વલોકધાતુપ્રતિભાસવિષયૈર્જામ્બૂનદમણિરત્નસુમેરુમેઘૈ સર્વધર્મધાતું સ્ફરન્, અનભિલાપ્યબુદ્ધક્ષેત્રપરમાણુરજઃસમૈઃ સર્વપર્વતધર્મધાતુપ્રતિભાસમણિરાજસુમેરુમેઘૈઃ સંછન્નં ગગનતલમધિતિષ્ઠન્, અનભિલાપ્યબુદ્ધક્ષેત્રપરમાણુરજઃસમૈઃ સર્વતથાગતલક્ષણપ્રતિભાસમણિરાજસુમેરુમેઘૈઃ સર્વધર્મધાતુવિષયં સ્ફરન્, અનભિલાપ્યબુદ્ધક્ષેત્રપરમાણુરજઃસમૈઃ સર્વતથાગતપૂર્વયોગપ્રતિભાસસંદર્શનબોધિસત્ત્વચર્યાનિર્ઘોષસ્વરમણિરાજસુમેરુમેઘૈઃ સર્વધર્મધાતુગગનં સ્ફરન્, અનભિલાપ્યબુદ્ધક્ષેત્રપરમાણુરજઃસમૈઃ સર્વતથાગતબોધિમણ્ડપ્રતિભાસમણિરાજસુમેરુમેઘૈર્દશ દિશઃ સ્ફરન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય પશ્ચિમાં દિશમુપનિશ્રિત્ય ( ગ્વ્ 8 ) સર્વગન્ધરાજશરીરમુક્તાજાલસંછાદિતાન્ કૂટાગારાન્ દેવેન્દ્રપ્રતિભાસધ્વજમણિરત્નપદ્મગર્ભાણિ ચ સિંહાસનાન્યભિનિર્માય ન્યષીદત્ પર્યઙ્કમાભુજ્ય સુવર્ણમણિરાજસંછાદિતાનિ ચિન્તારાજમકુટાવબદ્ધાનિ બોધિસત્ત્વશરીરાણ્યધિષ્ઠાય ॥
ઉત્તરાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ રત્નવસ્ત્રાવભાસધ્વજાયાં લોકધાતૌ ધર્મધાતુગગનશ્રીવૈરોચનસ્ય તથાગતસ્ય બુદ્ધક્ષેત્રાદસઙ્ગશ્રીરાજો નામ બોધિસત્ત્વો મહાસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ । સર્વરત્નપટ્ટમેઘાલંકારમ્ ગગનતલમધિતિષ્ઠન્, પીતવર્ણપીતનિર્ભાસરત્નવસ્ત્રમેઘાલંકારં ગગનતલમધિતિષ્ઠન્, નાનાગન્ધપરિવાસિતમણિવસ્ત્રમેઘપ્રવર્ષિતાલંકારં ગનનતલમધિતિષ્ઠન્, આદિત્યધ્વજમણિરાજવસ્ત્રમેઘાલંકારં ગગનતલમધિતિષ્ઠન્, કનકશ્રીજ્વલનમણિરત્નવસ્ત્રમેઘાલંકારં ગગનતલમધિતિષ્ઠન્, રત્નજ્વલનમણિરાજવસ્ત્રમેઘાલંકારં ગગનતલમધિતિષ્ઠન્, સર્વજ્યોતિઃપ્રતિબિમ્બવિચિત્રમણિવસ્ત્રમેઘાલંકારં ગગનતલમધિતિષ્ઠન્, પાણ્ડુકમ્બલશિલાવભાસમણિરત્નવસ્ત્રમેઘદશદિક્પરિસ્ફુટં ગગનતલમધિતિષ્ઠન્, વૈરોચનશ્રીજ્વલનાવભાસમણિરાજવસ્ત્રમેઘદશદિક્પરિસ્ફુટં ગગનતલમધિતિષ્ઠન્, અવભાસોત્તપ્તવદ્દિક્કુલવૈરોચનમણિરાજવસ્ત્રમેઘદશદિક્પરિસ્ફુટં ગગનતલમધિતિષ્ઠન્, સાગરવ્યૂહમણિરાજવસ્ત્રમેઘસંછન્નં ગગનતલમધિતિષ્ઠન્ યેન્ ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય ઉત્તરાં દિશમુપનિશ્રિત્ય સાગરસંભવમણિરાજકૂટાગારવૈડૂર્યપદ્મગર્ભસિંહાસનાનિ ચ અભિનિર્માય ન્યષીદત્ પર્યઙ્કમાભુજ્ય સિંહક્રાન્તમણિરાજજાલસંછાદિતાનિ જ્યોતિર્ધ્વજમણિચૂડાવબદ્ધાનિ બોધિસત્ત્વશરીરાણ્યધિષ્ઠાય ॥
ઉત્તરપૂર્વસ્યાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ સર્વમહાપૃથિવીરાજમણિરશ્મિજાલપ્રમુક્તાયા લોકધાતોરનિલમ્ભચક્ષુષસ્તથાગતસ્ય બુદ્ધક્ષેત્રાદ્ધર્મધાતુસુનિર્મિતપ્રણિધિચન્દ્રો નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ । રત્નકૂટાગારે મેઘસંછન્નાન્ સર્વલોકધાતુપ્રસરાનધિતિષ્ઠન્, ગન્ધકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, ધૂપકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, ચન્દનકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, કુસુમકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, મણિકૂટાગારમેધસંછન્નાન્ સર્વલોકધાતુપ્રસરાનધિતિષ્ઠન્, વજ્રકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, કનકકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, વસ્ત્રકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્, પદ્મકૂટાગારમેઘસંછન્નાન્ સર્વલોકધાતુપ્રસરાનધિતિષ્ઠન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય ઉત્તરપૂર્વાં દિશમુપનિશ્રિત્ય સર્વરત્નધર્મધાત્વભિમુખદ્વારશિખરમહામણિરત્નકૂટાગારાન્ ( ગ્વ્ 9 ) અતુલ્યગન્ધરાજમણિપદ્મગર્ભસિંહાસનાનિ ચ અભિનિર્માય ન્યસીદત્ પર્યઙ્કમાભુજ્ય કુસુમરાજજાલસંછાદિતાનિ વિચિત્રકોશજાલમણિમકુટાવબદ્ધાનિ બોધિસત્ત્વશરીરાણ્યધિષ્ઠાય ॥

પૂર્વદક્ષિણાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ ગન્ધમેઘવ્યૂહધ્વજાયા લોકધાતોર્નાગેશ્વરરાજસ્ય તથાગતસ્ય બુદ્ધક્ષેત્રાદ્ધર્માર્ચિષ્મત્તેજોરાજો નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલનયસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ । કનકવર્ણપ્રભામણ્ડલમેઘૈઃ સર્વગગનતલં સંછાદયન્, અનન્તવર્ણરત્નપ્રભામણ્ડલમેઘૈઃ સર્વગગનતલં સંછાદયન્, તથાગતોર્ણવર્ણપ્રભામણ્ડલમેઘૈઃ સર્વગગનતલં સંછાદયન્, વિચિત્રરત્નવર્ણપ્રભામણ્ડલમેઘૈઃ સર્વગગનતલં સંછાદયન્, પદ્મગર્ભપ્રભામણ્ડલમેઘૈઃ સર્વગગનતલં સંછાદયન્, રત્નદ્રુમશાખામણ્ડલમણિરાજવર્ણપ્રભામણ્ડલમેઘૈઃ સર્વગગનતલં સંછાદયન્, તથાગતોષ્ણીષવર્ણપ્રભામણ્ડલમેઘૈઃ સર્વં ગગનતલં સંછાદયન્, જામ્બૂનદકનકવર્ણપ્રભામણ્ડલમેઘૈઃ સર્વગગનતલં સંછાદયન્, આદિત્યવર્ણપ્રભામણ્ડલમેઘૈઃ સર્વં ગગનતલં સંછાદયન્, ચન્દ્રજ્યોતિશ્ચક્રમણ્ડલવર્ણમેઘૈઃ સર્વગગનતલં સંછાદયન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય પુર્વદક્ષિણાં દિશમુપનિશ્રિત્ય વિરજોવૈરોચનમણિશ્રીકુસુમકૂટાગારન્ સિંહવજ્રમણિપદ્મગર્ભસિંહાસનાનિ ચ અભિનિર્માય ન્યષીદત્ પર્યઙ્કમાભુજ્ય રત્નાર્ચિજ્વલનમણિરાજસંછાદિતાનિ બોધિસત્ત્વશરીરાણ્યધિષ્ઠાય ॥
દક્ષિણપશ્ચિમાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ મણિસૂર્યપ્રતિભાસગર્ભાયા લોકધાતોર્ધર્મચન્દ્રસમન્તજ્ઞાનાવભાસરાજસ્ય તથાગતસ્ય બુદ્ધક્ષેત્રાત્ સર્વમારમણ્ડલવિકિરણજ્ઞાનધ્વજો નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ । સર્વરોમવિવરેભ્ય આકાશધાતુવિપુલાન્ કુસુમાર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાન્ સર્વવાદ્યાર્ચિમેઘાન્ પ્રમુઞ્ચન્, સર્વરોમવિવરેભ્ય અકાશધાતુવિપુલાન્ મણિરત્નાર્ચિમેઘાન્ પ્રમુઞ્ચન્, સર્વરોમકૂપેભ્ય આકાશધાતુવિપુલાન્ નાનાગન્ધધૂપધૂપિતરત્નવસ્ત્રાર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાન્ નાગવિકુર્વિતવિદ્યુદર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાન્ વૈરોચનમણિરત્નાર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાન્ સુવર્ણજ્વલનરત્નાર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાન્ શ્રીગર્ભમણિરાજજ્વલનાર્ચિમેઘાન્ પ્રમુઞ્ચન્, સર્વરોમવિવરેભ્ય આકાશધાતુવિપુલાંસ્તથાગતસ્મૃતિસમુદ્રસદૃશત્ર્યધ્વતલાવભાસનયનરત્નાર્ચિમેઘાન્ પ્રમુઞ્ચન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય દક્ષિણપશ્ચિમાં દિશમુપનિશ્રિત્ય સમન્તદિગભિમુખરશ્મિજાલબિન્દુસદ્ધર્મધાતુપ્રભાસમહામણિરત્નકૂટાગારાન્ ( ગ્વ્ 10 ) ગન્ધપ્રદીપાર્ચિમણિપદ્મગર્ભસિંહાસનાનિ ચ અભિનિર્માય વ્યષીદત્ પર્યઙ્કમાભુજ્ય વિમલગર્ભમણિરાજજાલસંછાદિતાનિ સર્વસત્ત્વપ્રસ્થાનનિર્ઘોષમણિરાજમકુટાવબદ્ધનિ બોધિસત્ત્વશરીરાણ્યધિષ્ઠાય ॥
પશ્ચિમોત્તરાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ વૈરોચનશ્રીપ્રણિધિગર્ભાયા લોકધાતોઃ સમન્તવૈરોચનશ્રીમેરુરાજસ્ય તથાગતસ્ય બુદ્ધક્ષેત્રાદ્વૈરોચનપ્રણિધિજ્ઞાનકેતુર્નામ્ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલાદુચ્ચલિત્વા યેન સહાલોકધાતુસ્તેનોપસંક્રાન્તઃ । સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તાંસ્તથાગતકાયપ્રતિબિમ્બમેઘાન્ નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તબોધિસત્ત્વકાયપ્રતિબિમ્બમેઘાન્ નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તતથાગતપર્ષન્મણ્ડલકાયપ્રતિબિમ્બમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તબુદ્ધનિર્માણચક્રપ્રતિબિમ્બકાયમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તતથાગતપૂર્વયોગપ્રતિબિમ્બકાયમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તશ્રાવકપ્રત્યેકબુદ્ધકાયપ્રતિબિમ્બમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરત્ સર્વત્ર્યધ્વપ્રાપ્તતથાગતકાયબોધિમણ્ડવૃક્ષરૂપપ્રતિબિમ્બમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તબુદ્ધવિકુર્વિતપ્રતિબિમ્બકાયમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તલોકેન્દ્રકાયપ્રતિબિમ્બમેઘાન્નિશ્ચારયન્, સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વશરીરાત્ સર્વત્ર્યધ્વપ્રાપ્તપરિશુદ્ધબુદ્ધક્ષેત્રમેઘાન્નિશ્ચારયન્, ક્ષણે ક્ષણે સર્વમાકાશધાતું સ્ફરન્ યેન્ ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય પશ્ચિમોત્તરાં દિશમુપનિશ્રિત્ય સમન્તદિગ્વૈરોચનમણિરાજગર્ભકૂટાગારાન્ જગદ્વિરોચનમણિપદ્મગર્ભસિંહાસનાનિ ચ અભિનિર્માય ન્યષીદત્ પર્યઙ્કમાભુજ્ય અજિતપ્રભમુક્તાજાલસંછાન્નાનિ સમન્તાવભાસપ્રભામણિમકુટાવબદ્ધાનિ બોધિસત્ત્વશરીરાણ્યધિષ્ઠાય ॥

અધોદિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ સર્વતથાગતપ્રભામણ્ડલવૈરોચનાયા લોકધાતોરસઙ્ગજ્ઞાનકેતુધ્વજરાજસ્ય તથાગતસ્ય બુદ્ધક્ષેત્રાત્ સર્વાવરણવિકિરણજ્ઞાનવિક્રામી નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદભ્યુદ્ગમ્ય યેન સહાલોકધાતુસ્તેનોપસંક્રાન્તઃ । સર્વરોમવિવરેભ્યઃ સર્વજગન્મન્ત્રસાગરસ્વરનિરુક્તિનિર્હારનિર્ઘોષાન્નિશ્ચારયન્, સર્વત્ર્યધ્વબોધિસત્ત્વપ્રસૂતિનયસાગરમેઘનિર્ઘોષાન્નિગર્જન્, સર્વબોધિસત્ત્વપ્રણિધાનાભિનિર્હારનયસાગરનિર્ઘોષાન્ પ્રમુઞ્ચન્, સર્વબોધિસત્ત્વપારમિતાપરિશુદ્ધિપરિપુરિનયસાગરમેઘનિર્ઘોષાન્ ( ગ્વ્ 11 ) પ્રમુઞ્ચન્, સર્વબોધિસત્ત્વચર્યામણ્ડલસર્વક્ષેત્રસ્ફરણનયસાગરનિર્ઘોષાન્ પ્રમુઞ્ચન્, સર્વબોધિસત્ત્વસમુદાગમવિકુર્વિતનયસાગરનિર્ઘોષાન્ પ્રમુઞ્ચન્, સર્વતથાગતબોધિમણ્ડોપસંક્રમણમારકલિવિકિરણબોધિવિબુધ્યનયવિકુર્વણનિર્ઘોષસાગરાન્ પ્રમુઞ્ચન્, સર્વતથાગતધર્મચક્રપ્રવર્તનસૂત્રાન્તનયનામસાગરનિર્ઘોષમેઘાન્નિગર્જન્, સર્વજગદ્વિનયકાલચક્રવિનયધર્મનયોપાયનિર્ઘોષાન્ પ્રમુઞ્ચન્, સર્વજ્ઞાનાધિગમયથાપ્રણિધિકુશલમૂલવિશેષકાલોપાયધર્મનયસાગરનિર્ઘોષાન્ પ્રમુઞ્ચન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય અધોદિશમુપનિશ્રિત્ય સર્વતથાગતવિમાનપ્રતિભાસગર્ભસર્વરત્નવિચિત્રકોશકૂટાગારાન્ સર્વરત્નવિદ્ધપદ્મસંધારિતગર્ભસિંહાસનાનિ ચ અભિનિર્માય ન્યષીદત્ પર્યઙ્કમાભુજ્ય સર્વબોધિમણ્ડપ્રતિભાસધ્વજમણિમકુટચૂડાવબદ્ધાનિ સર્વક્ષેત્રાવભાસમણિરાજજાલસંછાદિતાનિ બોધિસત્ત્વશરીરાણ્યધિષ્ઠાય ॥
ઉર્ધ્વાયાં દિશિ અનભિલાપ્યબુદ્ધક્ષેત્રપરમાણુરજઃસમાનાં લોકધાતુસમુદ્રાણાં પરેણ અક્ષયબુદ્ધવંશનિર્દેશાયા લોકધાતોઃ સમન્તજ્ઞાનમણ્ડલપ્રતિભાસનિર્ઘોષસ્ય તથાગતસ્ય બુદ્ધક્ષેત્રાદ્ધર્મધાતુપ્રણિધિતલનિર્ભેદો નામ બોધિસત્ત્વઃ સાર્ધમનભિલાપ્યલોકધાતુસમુદ્રપરમાણુરજઃસમૈર્બોધિસત્ત્વૈસ્તેન ભગવતા અનુજ્ઞાતઃ તતઃ પર્ષન્મણ્ડલસમુદ્રાદુચ્ચલિત્વા યેન સહાલોકધાતુસ્તેનોપસંક્રાન્તઃ । સર્વલક્ષણાનુવ્યઞ્જનેભ્યઃ સર્વરોમમુખેભ્યઃ સર્વકાયાત્ સર્વાઙ્ગપ્રત્યઙ્ગેભ્યઃ સર્વવચનપથેભ્યઃ સર્વચીવરપરિવારેભ્યઃ સર્વબોધિસત્ત્વપરિવારસ્ય આત્મનો ભગવતશ્ચ વૈરોચનસ્ય પૂર્વાન્તકોટીગતાનાં ચ અતીતાનાગતાનાં સર્વતથાગતાનામપરાન્તકોટીગતાનાં ચ અનાગતાનાં વ્યાકૃતાવ્યાકૃતાનાં સર્વતથાગતાનાં પ્રત્યુત્પન્નાનાં ચ દશસુ દિક્ષુ સર્વક્ષેત્રપ્રસરપ્રતિષ્ઠિતાનાં સર્વદાનપારમિતાપ્રતિસંયુક્તાન્ પૂર્વયોગસમુદ્રાન્ સર્વપ્રતિગ્રાહકદેયવસ્ત્રપ્રતિબિમ્બાનિ ચ લક્ષણાનુવ્યઞ્જનરોમમુખસર્વશરીરાઙ્ગપ્રત્યઙ્ગવચનપથસર્વશરીરપરિવારેષુ પ્રતિભાસપ્રાપ્તાનિ વિજ્ઞાપયન્, સર્વશીલપારમિતાપ્રતિસંયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વક્ષાન્તિપારમિતાસંપ્રયુક્તાનાં ચ અઙ્ગપ્રત્યઙ્ગચ્છેદેન નિદર્શનસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વબોધિસત્ત્વવીર્યવેગવિક્રમસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વતથાગતધ્યાનસાગરપર્યેષ્ટિનિષ્પત્તિસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વતથાગતધર્મચક્રગતિપરિનિષ્પત્તિધર્મપર્યેષ્ટિસંપ્રયુક્તાનપિ સર્વાસ્તિપરિત્યાગમહાવ્યવસાયશરીરમુખબિમ્બવિજ્ઞાપનાન્ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વતથાગતદર્શનપ્રીતિસર્વબોધિસત્ત્વમાર્ગસર્વજગદભિરોચનસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વબોધિસત્ત્વપ્રણિધાનસાગરાભિનિર્હારમુખપરિશુદ્ધિવ્યૂહસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, સર્વબોધિસત્ત્વબલપારમિતાનિષ્પત્તિવિક્રમવિશુદ્ધિસંપ્રયુક્તાનપિ પૂર્વયોગસમુદ્રાન્ પ્રતિભાસપ્રાપ્તાન્ સંદર્શયન્, વિપુલવિપુલં ધર્મધાતું સર્વવિકુર્વિતમેઘૈઃ સ્ફરિત્વા સર્વબોધિસત્ત્વજ્ઞાનમણ્ડલસંપ્રયુક્તાનપિ પૂર્વયોગસમુદ્રાન્ ( ગ્વ્ 12 ) પ્રતિભાસપ્રાપ્તાન્ સંદર્શયન્ યેન ભગવાંસ્તેનોપસંક્રમ્ય સાર્ધં પરિવારેણ ભગવન્તં નમસ્કૃત્ય ઊર્ધ્વાં દિશમુપનિશ્રિત્ય સર્વવજ્રેન્દ્રવિચિત્રવ્યૂહકૂટાગારન્ વજ્રેન્દ્રધારાસમન્તભદ્રબોધિસત્ત્વનીલપદ્મગર્ભસિંહાસનાનિ ચ અભિનિર્માય ન્યષીદત્ પર્યઙ્કમાભુજ્ય સર્વરત્નજ્વલનમણિરાજજાલસંછન્નાનિ
ત્ર્યધ્વતથાગતનામનિર્ઘોષમણિરાજહારપ્રલમ્બચૂડામણિરત્નમકુટાવબદ્ધાનિ બોધિસત્ત્વશરીરાણ્યધિષ્ઠાય ॥

સર્વે ચ તે બોધિસત્ત્વાઃ સપરિવારાઃ સમન્તભદ્રબોધિસત્ત્વચર્યાપ્રણિધાનનિર્યાતાઃ સર્વતથાગતપાદમૂલમુખોદ્દર્શનાય પરિશુદ્ધજ્ઞાનચક્ષુષઃ સર્વતથાગતધર્મચક્રસૂત્રાન્તનયનિર્ઘોષસમુદ્રસુશ્રોત્રસમવસરણાઃ સર્વબોધિસત્ત્વવશિતાપ્રતિલમ્ભપરમપારમિપ્રાપ્તાઃ સર્વતથાગતોપસંક્રમણક્ષણક્ષણસંદર્શનવિકુર્વિતનિર્યાતાઃ સર્વલોકધાત્વેકકાયસ્ફરણવિષયાઃ સર્વતથાગતપર્ષન્મણ્ડલાભ્યુદ્ગતવિરોચનકાયાઃ એકપરમાણુરજસિ સર્વલોકધાત્વેકલોકધાતુપ્રતિભાસસમવસરણસંદર્શનવિષયાઃ સર્વજગત્પરિપાચનવિનયકાલાગમનપ્રવણાઃ સર્વતથાગતધર્મચક્રમેધસર્વરોમમુખનિગર્જનવિષયાઃ માયોપમસર્વસત્ત્વધાતુપરિજ્ઞાપ્રતિલબ્ધાઃ પ્રતિભાસોપમસર્વતથાગતાવતીર્ણાઃ સ્વપ્નોપમસર્વભવગત્યુપપત્તિજ્ઞાનનિર્યાતાઃ પ્રતિબિમ્બોપમસર્વકર્મવિપાકજ્ઞાનવિશુદ્ધાઃ મરીચ્યુપમસર્વાભિનિર્વૃત્તિજ્ઞાનાભિજ્ઞાઃ નિર્મિતોપમસર્વલોકધાતુપ્રસરાવતીર્ણાઃ દશતથાગતબલજ્ઞાનાવભાસપ્રતિલબ્ધાઃ વૈશારદ્યર્ષભસિંહનાદપરાક્રમાઃ અક્ષયપ્રતિસંવિત્સમુદ્રાવતીર્ણાઃ સર્વજગન્મન્ત્રસાગરધર્મનિરુક્તિજ્ઞાનપ્રતિલબ્ધાઃ અસઙ્ગધર્મધાતુગગનજ્ઞાનગોચરાઃ સર્વધર્માનાવરણજ્ઞાનપ્રતિલબ્ધાઃ સર્વબોધિસત્ત્વાભિજ્ઞાજ્ઞાનમણ્ડલવિશુદ્ધાઃ સર્વમારમણ્ડલવિક્ષોભણવીર્યાઃ સર્વત્ર્યધ્વજ્ઞાનબલપ્રતિષ્ઠાનાઃ અનાવરણસર્વજ્ઞાનપ્રતિલબ્ધાઃ અનાલયગગનગોચરાઃ અનાયૂહસર્વજ્ઞતાભૂમિગગનવીર્યાઃ સર્વભવાનિલમ્ભજ્ઞાનગોચરાઃ સર્વધર્મધાતુનયસાગરજ્ઞાનપ્રસરિતાઃ સર્વલોકધાત્વસંભેદજ્ઞાનમુખપ્રવિષ્ટાઃ સર્વલોકધાત્વન્યોન્યસમવસરણવિકુર્વિતનિર્યાતાઃ સર્વલોકધાતુ કુલોપપત્યુપપન્નકાયસંદર્શકાઃ સર્વલોકધાતુસૂક્ષ્મોદારવિપુલસંક્ષિપ્તનાનાસંસ્થાનપ્રતિવિદ્ધાઃ સૂક્ષ્મારમ્બણવિઓપુલક્ષેત્રસમવસરણજ્ઞાનાધિગતાઃ વિપુલાલમ્બનસૂક્ષ્મજ્ઞાનાનુગતાઃ સર્વબુદ્ધૈકચિત્તક્ષણવિહારપ્રતિલબ્ધાઃ સર્વતથાગતજ્ઞાનશરીરાઃ સર્વદિક્સાગરાસંમોહજ્ઞાનપ્રતિલબ્ધાસર્વદિક્સમુદ્રૈકચિત્તક્ષણવિકુર્વિતસ્ફરણાઃ । એવંરૂપાપ્રમાણસમન્વાગતૈર્બોધિસત્ત્વૈઃ સર્વં જેતવનં પરિપૂર્ણમભૂત્ યદુત્ તથાગતાનામધિષ્ઠાનેન ॥
ન ચ તે મહાશ્રાવકાઃ શારિપુત્રમૌદ્ગલ્યાયનમહાકાશ્યપરેવતસુભૂત્યનિરુદ્ધનન્દિકકપ્ફિણકાત્યાયનપૂર્ણમૈત્રાયણીપુત્રપ્રમુખા જેતવને તથાગતવિકુર્વિતમદ્રાક્ષુઃ । ન ચ તાન્ બુદ્ધવ્યૂહાન્ બુદ્ધવૃષભિતાં બુદ્ધવિક્રીડિતં બુદ્ધપ્રાતિહાર્યં બુદ્ધાધિપતેયતાં બુદ્ધચરિતવિકુર્વિતં બુદ્ધપ્રભાવં બુદ્ધાધિષ્ઠાનં બુદ્ધક્ષેત્રપરિશુદ્ધિમદ્રાક્ષુઃ । નાપિ તમચિન્ત્યં બોધિસત્ત્વવિષયં બોધિસત્ત્વસમાગમં બોધિસત્ત્વસમવસરણં બોધિસત્ત્વસંનિપાતં બોધિસત્ત્વોપસંક્રમણં બોધિસત્ત્વવિકુર્વિતં ( ગ્વ્ 13 ) બોધિસત્ત્વપ્રાતિહાર્યં બોધિસત્ત્વપર્ષન્મણ્ડલં બોધિસત્ત્વદિગવસ્થાનં બોધિસત્ત્વસિંહાસનવ્યૂહં બોધિસત્ત્વભવનં બોધિસત્ત્વવિહારં બોધિસત્ત્વસમાધિવિક્રીડિતં બોધિસત્ત્વવ્યવલોકિત બોધિસત્ત્વવિજૃમ્ભિતં બોધિસત્ત્વવિક્રમં બોધિસત્ત્વતથાગતપૂજાં બોધિસત્ત્વવ્યાકરણં બોધિસત્ત્વવિપાકં બોધિસત્ત્વપરાક્રમં બોધિસત્ત્વધર્મકાયપરિશુદ્ધિં બોધિસત્ત્વજ્ઞાનકાયપરિપૂરિં બોધિસત્ત્વપ્રણિધિકાયવિજ્ઞપ્તિં બોધિસત્ત્વરૂપકાયપરિનિષ્પત્તિં બોધિસત્ત્વલક્ષણસંપત્પરિશુદ્ધિં બોધિસત્ત્વાનન્તબલપ્રભામણ્ડલવ્યૂહં બોધિસત્ત્વરશ્મિજાલપ્રમુઞ્ચનં બોધિસત્ત્વનિર્મિતમેઘાવસૃજનં બોધિસત્ત્વદિગ્જાલસ્ફરણં બોધિસત્ત્વચર્યામણ્ડલવિકુર્વિતમદ્રાક્ષુઃ । તત્કસ્ય હેતોઃ? કુશલમૂલાસભાગતયા । ન હિ તૈઃ સર્વબુદ્ધવિકુર્વિતદર્શનસંવર્તનીયાનિ કુશલમૂલાન્યુપચિતાનિ । ન ચ તેષાં પૂર્વં દશદિગ્લોકધાતુપર્યાપન્નાઃ સર્વબુદ્ધક્ષેત્રગુણવ્યૂહપરિશુદ્ધયઃ સંવર્ણિતાઃ । ન ચ તેષાં બુદ્ધૈર્ભગવદ્ભિર્નાનાબુદ્ધવિકુર્વિતાનિ સંવર્ણિતાનિ । ન ચ તૈઃ પૂર્વં સંસારે સંસરદ્ભિરનુત્તરાયાં સંયક્સંબોધૌ સત્ત્વાઃ પારમિતાસુ સમાદાપિતાઃ । ન ચ તૈર્બોધિચિત્તોત્પાદઃ પરસંતાનેષુ પ્રતિષ્ઠાપિતઃ । ન ચ તે તથાગતવંશસ્યાનુપચ્છેદાય પ્રતિપન્નાઃ । ન ચ સર્વસત્ત્વસંગ્રહાય પ્રયુક્તાઃ । ન ચ તૈર્બોધિસત્ત્વાઃ પારમિતાસુ સમાદાપિતાઃ । ન ચ તૈઃ પૂર્વં સંસારે સંસરદ્ભિઃ સર્વજગદ્વિશેષવતીજ્ઞાનભૂમિરધ્યાલમ્બિતા । ન ચ તૈઃ
સર્વજ્ઞતાસંવર્તનીયં કુશલમૂલમુપચિતમ્ । ન ચ તૈસ્તથાગતલોકોત્તરકુશલમૂલપરિનિષ્પન્નાઃ સર્વબુદ્ધક્ષેત્રપરિશુદ્ધિવિકુર્વિતાભિજ્ઞા જ્ઞાતાઃ । ન ચ બોધિસત્ત્વચક્ષુષ્પથવિજ્ઞપ્તિરસાધારણલોકોત્તરબોધ્યાલમ્બનકુશલમૂલમહાબોધિસત્ત્વપ્રણિધાનસંભવાજ્ઞાતાઃ । ન ચ તથાગતાધિષ્ઠાનનિર્યાતમાયાગતધર્મતા નિર્વૃત્તાઃ । સ્વપ્નોપમબોધિસત્ત્વનાનાસંજ્ઞાગ્રહાધિષ્ઠાના મહાબોધિસત્ત્વપ્રીતિવેગવિવર્ધનાઃ સમન્તભદ્રબોધિસત્ત્વજ્ઞાનચક્ષુષ્પથવિજ્ઞપ્તયો ઽસાધારણાઃ સર્વશ્રાવકપ્રત્યેકબુદ્ધૈર્જ્ઞાતાઃ । તેન તે મહાશ્રાવકાઃ અગ્રયુગભદ્રયુગપ્રમુખાસ્તં તથાગતવિકુર્વિતં ન પશ્યન્તિ, ન શૃણ્વન્તિ, ન જાનન્તિ, ન બુધ્યન્તિ, નાવતરન્તિ, નાધિમુચ્યન્તે નાધિગચ્છન્તિ, ન સમન્વાહરન્તિ, ન વિલોકયન્તિ, ન નિરીક્ષન્તે, ન નિધ્યાયન્તિ, નોપ્નિધ્યાયન્તિ । તત્કસ્ય હેતોઃ? બુદ્ધજ્ઞાનગોચરો ઽસૌ, ન શ્રાવકગોચરઃ । તેન તે મહાશ્રાવકાસ્તત્રૈવ જેતવને સ્થિતાસ્તાનિ બુદ્ધવિકુર્વિતાનિ ન પશ્યન્તિ । ન હિ તેષાં તદ્ભાગાય કુશલમૂલમસ્તિ, ન ચ તેષાં તજ્જ્ઞાનચક્ષુર્વિશુદ્ધમ્, યેન તાનિ બુદ્ધવિકુર્વિતાનિ પશ્યેયુઃ । ન ચ સમાધિઃ સંવિદ્યતે, યેન પરીત્તાલમ્બને વિપુલવિકુર્વિતાધિષ્ઠાનાન્યવતરેયુઃ । નાષ્ટૌ વિમોક્ષાઃ સંવિદ્યતે, ન સા ઋદ્ધિઃ, ન સા વૃષભિતા, ન તદ્બલમ્, ન તદાધિપતેયમ્, ન તત્સ્થાનમ્, ન સંજ્ઞા, ન ચક્ષુર્વિક્રમઃ સંવિદ્યતે, યેન તત્સંજાનીયુર્વા પશ્યેયુર્વા અવતરેયુર્વા અધિગચ્છેયુર્વા સ્ફરેયુર્વા વ્યવલોકયેયુર્વા અનુભવેયુર્વા આક્રમેયુર્વા પરેષાં પ્રભાવયેયુર્વા દેશયેયુર્વા સૂચયેયુર્વા સંવર્ણયેયુર્વા સંદર્શયેયુર્વા ઉપનામયેયુર્વા ઉપસંહરેયુર્વા, તત્ર વા સત્ત્વાનિ સમાદાપયેયુઃ, નિર્યોજયેયુઃ પ્રતિષ્ઠાપયેયુઃ, તસ્યાં બુદ્ધવિકુર્વિતધર્મતાયાં ( ગ્વ્ 14 ) સત્ત્વાન્નિયોજયેયુઃ । તત્તેષાં જ્ઞાનં ન સંવિદ્યતે । તત્કસ્ય હેતોઃ? તથા હિ તે શ્રાવકયાનેન નિર્યાતાઃ, શ્રાવકમાર્ગેણ સમુદાગતાઃ, શ્રાવકચર્યામણ્ડલપરિપૂર્ણાઃ શ્રવાકફલપ્રતિષ્ઠિતાઃ, સત્યાવભાસજ્ઞાનનિશ્રિતાઃ ભૂતકોટીપ્રતિષ્ઠિતાઃ । અત્યન્તશાન્તનિષ્ઠાં ગતાઃ મહાકરૂણાવિરહિતચેતસઃ સર્વલોકનિરપેક્ષઃ આત્મકાર્યપરિપ્રાપ્તાઃ । તે તત્રૈવ જેતવને સંનિપતિતાઃ

સંનિષણ્ણાઃ । ભગવતઃ પુરતો વામદક્ષિણપૃષ્ઠતો ભગવતો ઽભિમુખં સંનિષણ્ણઃ । ન ચ તાનિ જેતવને બુદ્ધવિકુર્વિતાન્યદ્રાક્ષુઃ । તત્કસ્ય હેતોઃ? ન હિ શક્યમસમાર્જિતસર્વજ્ઞતાજ્ઞાનૈરસમુદાનીતસર્વજ્ઞતાજ્ઞાનૈઃ અસંપ્રસ્થિતસર્વજ્ઞતાજ્ઞાનૈઃ અપ્રણિહિતસર્વજ્ઞતાજ્ઞાનૈઃ અનભિનિર્હૃતસર્વજ્ઞતાજ્ઞાનૈઃ અપરિભાવિતસર્વજ્ઞતાજ્ઞાનૈઃ અપરિશોધિતસર્વજ્ઞતાજ્ઞાનૈઃ તત્તથાગતસમાધિવિકુર્વિતમવતર્તું વા પ્રતિપત્તું વા દ્રષ્ટુમધિગન્તું વા । તત્કસ્ય હેતોઃ? અભિજાતબોધિસત્ત્વચક્ષુષ્પથવિજ્ઞેયં હિ તત્, ન શ્રાવકચક્ષુષ્પથવિજ્ઞેયમ્ । તેન તે મહાશ્રાવકાસ્તત્રૈવ જેતવને સ્થિતાસ્તાનિ તથાગતવિકુર્વિતાનિ બુદ્ધાધિષ્ઠાનાનિ બુદ્ધક્ષેત્રપરિશુદ્ધિં બોધિસત્ત્વસંનિપાતં ન પશ્યન્તિ ॥
તદ્યથાપિ નામ ગઙ્ગાયા મહાનદ્યા ઉભયતસ્તીરે બહૂનિ પ્રેતશતસહસ્રાણિ સમાગતાનિ ક્ષુત્પિપાસાપ્રપીડિતાનિ નગ્નાનિ નિર્વસનાનિ વિદગ્ધગાત્રચ્છવિવર્ણાનિ વાતાતપપરિશુષ્કાણિ કાકસંઘોપદ્રુતાનિ વૃકશૃગાલૈર્વિત્રાસ્યમાનાનિ તાં ગઙ્ગાં મહાનદીં ન પશ્યન્તિ । કેચિત્પુનઃ શુષ્કાં પશ્યન્તિ નિરુદકાં ભસ્મપરિપૂર્ણામ્, આવરણીયકર્માવૃતત્વાત્ । એવમેવ તે સ્થવિરા મહાશ્રાવકાસ્તત્રૈવ જેતવને સ્થિતાઃ તાનિ તથાગતવિકુર્વિતાનિ ન પશ્યન્તિ, નાવતરન્તિ, સર્વજ્ઞતાવિપક્ષિકાવિદ્યાપટલનેત્રપર્યવનદ્ધત્વાત્, સર્વજ્ઞતાભૂમિકુશલમૂલાપરિગૃહીતત્વાત્ ॥
તદ્યથાપિ નામ પુરુષો મહત્યહ્નિ વર્તમાને મહતો જનકાયસ્ય મધ્યે સ્ત્યાનમિદ્ધમવક્રામેત્ । સ સુપ્તઃ સ્વપ્નાન્તરગતસ્તત્રૈવ પ્રદેશે દેવનગરં પશ્યેત્ । સુદર્શનચક્રનિલયં સર્વં ચ સુમેરુતલં સવૃક્ષં સોદ્યાનમણ્ડલમપ્સરઃકોટીનિયુતશતસહસ્રાકીર્ણં દેવપુત્રકોટીનિયુતશતસહસ્રાધ્યુષિતં વિચિત્રદિવ્યપુષ્પાભિકીર્ણમ્ । વિવિધદિવ્યવસ્ત્રમુક્તાહારરત્નાભરણસ્રક્પ્રમુક્તકોશાંશ્ચ કલ્પવૃક્ષાન્ પશ્યેત્ । નાનાવિધદિવ્યવાદ્યસમીરિતમનોજ્ઞમધુરનિર્ઘોષાંશ્ચ વાદ્યવૃક્ષાન્ પશ્યેત્ । અનેકવિધાંશ્ચ રતિક્રીડાવ્યૂહાન્ પશ્યેત્ । મધુરાંશ્ચ દિવ્યાપ્સરોગણસંગીતિવાદ્યશબ્દાન્ શૃણુયાત્ । તત્રસ્થં ચાત્માનં સંજાનીયાત્ । સર્વાવન્તં ચ તત્પ્રદેશં દિવ્યવ્યૂહવિભૂષિતં પશ્યેત્ । સ ચ સર્વો જનકાયો ન પશ્યેત્, ન જાનીયાત્, ન વિલોકયેત્, તત્રૈવ પ્રદેશે સ્થિતઃ સન્ । તત્કસ્ય હેતોઃ? તસ્યૈવ હિ પુરુષસ્ય સ્વપ્નાન્તરગતસ્ય તદ્દર્શનમ્, તત્રૈવ ચ પ્રદેશે સ્થિતસ્ય તસ્ય મહાજનકાયસ્યાદર્શનમ્ । એવમેવ તે બોધિસત્ત્વાસ્તે ચ લોકેન્દ્રા બોધ્યભિમુખા વિપુલેન બુદ્ધાધિષ્ઠાનેન સ્વકુશલમૂલસુસમાર્જિતતયા ચ સર્વજ્ઞતાપ્રણિધાનસ્વભિનિર્હૃતતયા ચ સર્વતથાગતગુણસુપ્રતિપન્નતયા ચ મહાવ્યૂહબોધિસત્ત્વમાર્ગસુપ્રતિષ્ઠિતતયા ચ સર્વજ્ઞતાજ્ઞાનસર્વાકારધર્મોદ્ગતસુપરિનિષ્પન્નતયા ચ સમન્તભદ્રબોધિસત્ત્વચર્યાવિશેષપ્રણિધાનપરિપૂરિવિશુદ્ધ્યા ( ગ્વ્ 15 ) ચ સર્વબોધિસત્ત્વભૂમિજ્ઞાનમણ્ડલાક્રમણતયા ચ સર્વબોધિસત્ત્વસમાધિવિહારવિક્રીડનતયા ચ સર્વબોધિસત્ત્વજ્ઞાનગોચરાસઙ્ગવિચારણતયા ચ તામચિન્ત્યાં બુદ્ધવૃષભિતાં બુદ્ધવિક્રીડિતં પશ્યન્તિ, અવતરન્તિ, અનુભવન્તિ । તે ચ મહાશ્રાવકા અગ્રયુગભદ્રયુગપ્રમુખા ન પશ્યન્તિ ન જાનન્તિ બોધિસત્ત્વચક્ષુર્વિરહિતત્વાત્ ॥
તદ્યથાપિ નામ હિમવતિ પર્વતરાજે ઔષધ્યાકરાકીર્ણે મન્ત્રવિદ્યૌષધિજ્ઞાનગ્રહણસિદ્ધવિદ્યઃ પુરુષઃ સર્વૌષધિવિધીન્ પ્રજાનન્ ઔષધિગ્રહણકર્મ કુર્યાત્ । તત્રૈવ ચ શૈલેન્દ્રાભિરૂઢાઃ પશુગવેડકઋક્ષમૃગલુબ્ધકાસ્તદન્યે વા પુનરૌષધ્યવિધિજ્ઞાઃ પુરુષાસ્તમૌષધિરસવીર્યવિપાકપ્રભાવોપાયયોગં ન પ્રજાનન્તિ । એવેમેવ તે બોધિસત્ત્વાસ્તથાગતજ્ઞાનવિષયમવતીર્ણા બોધિસત્ત્વવિકુર્વિતવિષયનનિર્યાતાસ્તં તથાગતસમાધિવિકુર્વિતવિષયં પ્રજાનન્તિ, તે ચ મહાશ્રાવકાઅગ્રયુગભદ્રયુગપ્રમુખાસ્તત્રૈવ જેતવને વિહરન્તઃ સ્વકાર્યસંતુષ્ટાઃ પરકાર્યનિરુત્સુકા ઉપેક્ષકા દૃષ્ટધર્મસુખવિહારેણ સુખસ્પર્શં વિહરન્તિ, તં ચ તથાગતસમાધિવિષયવિકુર્વિતવિષયં ન પ્રજાનન્તિ ॥
તદ્યથાપિ નામ ઇયં મહાપૃથિવી સર્વરત્નાકરસમૃદ્ધા નિધિશતસહસ્રનિચિતા નાનાવિધાનન્તરત્નપરિપૂર્ણા । તત્ર રત્નગોત્રવિધિજ્ઞાનકૃતવિદ્યઃ પુરુષો રન્તપરીક્ષસ્તત્ર પર્યવદાતમતિર્વિધાનતન્ત્રજ્ઞાનશિલ્પસુશિક્ષિતો વિપુલપુણ્યબલોપસ્તબ્ધઃ તતો યથેષ્ટં રત્નાન્યાદાઅય આત્માનં સમ્યક્ પ્રીણયેત્, માતાપિતરં સમ્યક્પરિચરેત્, પુત્રદારં ચ પોષયેત્ । તદન્યેષામપિ સત્ત્વાનાં વૃદ્ધાનામાતુરાણાં દરિદ્રાણાં વિનિપતિતાનામશનવસનવિપ્રહીણાનાં સંવિભાગં કુર્યાત્ । વિવિધાં ચ અર્થરતિમનુભવેત્ । યે તુ પુનસ્તે રત્નાકરનિધાનાવિધિજ્ઞાઃ સત્ત્વાઃ, અકૃતપુણ્યા અપરિશુદ્ધરત્નજ્ઞાનચક્ષુષસ્તેષાં રત્નાકરાન્ રત્નનિધીન્ન પ્રજાનન્તિ, તત્રૈવ ચ વિચરન્તિ । ન ચ રત્નાનિ ગૃહ્ણન્તિ । ન રત્નકાર્યાણિ કુર્વન્તિ । એવં તે બોધિસત્ત્વા જેતવને તત્ર અચિન્ત્યે તથાગતવિષયે સુપરિશુદ્ધજ્ઞાનચક્ષુષો ઽચિન્ત્યતથાગતજ્ઞાનવિષયાવતીર્ણાસ્તાનિ બુદ્ધવિકુર્વિતાનિ પશ્યન્તિ । ધર્મનયસાગરાંશ્ચાવતરન્તિ । સમાધિસમુદ્રાંશ્ચ નિષ્પાદયન્તિ । તથાગતપૂજોપસ્થાને ચ પ્રયુજ્યન્તે । સર્વધર્મપરિગ્રહાય ચોદ્યુજ્યન્તે । સર્વસત્ત્વાંશ્ચ સંગૃહ્ણન્તિ ચતુર્ભિઃ સંગ્રહવસ્તુભિઃ । તે ચ મહાશ્રાવકાસ્તાનિ તથાગતવિકુર્વિતાનિ તં ચ મહાન્તં બોધિસત્ત્વગણસંનિપાતં ન પશ્યન્તિ ન જાનન્તિ ॥
તદ્યથાપિ નામ પુરુષો દૂષ્યવસ્ત્રાબદ્ધાભ્યાં નેત્રાભ્યાં રત્નદ્વીપમનુપ્રાપ્તઃ સ્યાત્ । સ તત્ર રત્નદ્વીપે ચંક્રમેત્, તિષ્ઠેત્, નિષીદેત્, શય્યાં વા કલ્પયેત્, ન ચ તં રત્નાકરં પશ્યેત્ । ન રત્નવૃક્ષાન્, ન વસ્ત્રરત્નાનિ, ન ગન્ધરત્નાનિ, ન સર્વરત્નાનિ પશ્યેત્ । નાપિ તાનિ રત્નાનિ પરિજાનીયાદ્વિષયતો વા મૂલ્યતો વા પરિભોગતો વ । સ તાનિ રત્નાનિ ન પરિગૃહ્ણીયાત્, ન ચ રત્નકાર્યમનુભવેત્ । અનાવૃતચક્ષુષઃ એતત્સર્વં પશ્યેયુર્વિજાનીયુઃ । એવમેવ તે બોધિસત્ત્વા ધર્મરત્નદ્વીપમનુપ્રાપ્તા અનુત્તરં તથાગતરત્નં સર્વલોકાલંકારં સંમુખીભૂતં જેતવને સ્થિતમચિન્ત્યાનિ ( ગ્વ્ 16 ) બુદ્ધવિકુર્વિતાનિ સંદર્શયમાનં પશ્યન્તિ । તે ચ મહાશ્રાવકાસ્તત્રૈવ ભગવતઃ પાદમૂલે તિષ્ઠન્તિ યાપયન્તિ, ન ચ તં તથાગતસમાધિવિષયવિકુર્વિતપ્રાતિહાર્યં પશ્યન્તિ, ન ચ તં મહાન્તં બોધિસત્ત્વસંનિપાતં મહારત્નાકરમ્ । તત્કસ્ય હેતોઃ? તથા હિ તેષાં સર્વજ્ઞતાવિપક્ષાવિદ્યાદૂષ્યાવબદ્ધજ્ઞાનચક્ષુષાં તદસઙ્ગબોધિસત્ત્વજ્ઞાનચક્ષુર્ન પરિશુદ્ધમ્, ન ચ તૈર્ધર્મધાતુપરંપરાપ્રવેશો ઽનુબુદ્ધઃ, યેન તદચિન્ત્યતથાગતસમાધિવૃષભિતાવિકુર્વિતપ્રાતિહાર્યં પશ્યેયુઃ ॥

તદ્યથાપિ નામ અસ્તિ વિરજઃપ્રભાસવતી નામ ચક્ષુઃપરિશુદ્ધિઃ, યા સર્વતમોન્ધકારેણ સાર્ધં ન સંવસતિ । તાં કશ્ચિત્પુરુષઃ પ્રતિલભેત । સ વિરજઃપ્રભાસવત્યા ચક્ષુઃપરિશુદ્ધ્યા સમન્વાગતસ્તમોન્ધકારપર્યવનદ્ધાયાં રાત્ર્યામનેકેષાં પ્રાણકોટીનિયુતશતસહસ્રાણાં સંનિપતીતાનાં વિવિધાકલ્પેર્યાપથાનાં નિમિરાન્ધકારપર્યાકુલનેત્રાણાં મનુષ્યાણાં મધ્યે ઽનુવિચરેત્, અનુચંક્રમેત્, તિષ્ઠેત્, નિષીદેત્, નાનેર્યાપથાન્, વા કલ્પયેત્ । ન ચ તે મનુષ્યાસ્તં પુરુષં પશ્યેયુઃ, ન સંજાનીયુઃ વિવિધાનીર્યાપથાન્ કલ્પયમાનમ્ । સ ચ પુરુષસ્તં મહાન્તં જનકાયં પશ્યેત્ નાનેર્યાપથાકલ્પવિહારિણં નાનાદિગભિમુખં નાનાસંસ્થાનં નાનાવર્ણં નાનાપ્રાવરણમ્ । એવેમેવ તથાગતઃ સબોધિસત્ત્વગણપરિવારો વિશુદ્ધાસઙ્ગજ્ઞાનચક્ષુઃ સર્વલોકં જાનાતિ પશ્યતિ । મહાબુદ્ધસમાધિવિકુર્વિતપ્રાતિહાર્યં સંદર્શયતિ । ન ચ તે મહાશ્રાવકાસ્તં તથાગતમહાજ્ઞાનસમાધિવિકુર્વિતપ્રાતિહાર્યં પશ્યન્તિ, ન ચ તં મહાબોધિસત્ત્વસંનિપાતપરિવારમ્ ॥
તદ્યથાપિ નામ ભિક્ષુર્મહતો જનકાયસ્ય મધ્યે પૃથિવીકૃત્સ્નં સમાધિં સમાપદ્યેત, અપ્કૃત્સ્નં વા, તેજઃકૃસ્ત્નં વા, વાયુકૃત્સ્નં વા, નીલકૃત્ન્રં વા, પીતકૃત્સ્નં વા, લોહિતકૃત્સ્નં વા, અવદાતકૃત્સ્નં વા, દેવકૃત્સ્નં વા, વિવિધસત્ત્વકાર્યકૃત્સ્નં વા, સર્વરુતરવિતકૃત્સ્નં વા, સર્વાલમ્બનકૃત્સ્નં વા સમાધિં સમાપદ્યેત । ન ચ સ મહાજનકાયસ્તમપ્સ્કન્ધં પશ્યેત્, ન ચ તં જ્વલનાલોકં ન ચ તદ્વિવિધકાયકૃત્સ્નમ્ યાવત્ તં સર્વાલમ્બનકૃત્સ્નં ન પશ્યેત્, અન્યત્ર તત્સમાધિસમાપત્તિવિહારપ્રાપ્તેભ્યઃ । એવમેવ તથાગતસ્ય તદચિન્ત્યબુદ્ધસમાધિવિષયવિકુર્વિતં સંદર્શયતઃ યે મહાશ્રાવકા ન પશ્યન્તિ, તે ચ બોધિસત્ત્વસ્તથાગતમાર્ગપ્રતિપન્નાસ્તં તથાગતવિષયમવતરન્તિ ॥
તદ્યથાપિ નામ અઞ્જનસિદ્ધઃ પુરુષો નેત્રયોરઞ્જિતમાત્રયોઃ સર્વજનકાયેનાદૃશ્યશરીરો ભવતિ । સ ગચ્છન્ વા સ્થિતો વા નિષણ્ણો વા સર્વજનકાયં પશ્યતિ । એવેમેવ તથાગતો લોકોત્તરસર્વજગદ્વિષયસમતિક્રાન્તઃ સર્વજ્ઞજ્ઞાનવિષયાવક્રાન્તો બોધિસત્ત્વજ્ઞાનચક્ષુર્વિજ્ઞેયઃ । સ સર્વજગત્ પશ્યતિ । તે ચ મહાશ્રાવકાસ્તાનિ તથાગતવિકુર્વિતાનિ ન પશ્યન્તિ ॥
તદ્યથાપિ નામ પુરુષસ્ય સહજાતા દેવતા નિત્યાનુબદ્ધા । સા તં પુરુષં પશ્યતિ, સ ચ પુરુષસ્તાં દેવતાં ન પશ્યતિ । એવમેવ તથાગતઃ સર્વજ્ઞજ્ઞાનવિષયાવસ્થિતો મહાન્તિ બુદ્ધવિકુર્વિતાનિ સંદર્શયતિ મહતો બોધિસત્ત્વગણસંનિપાતસ્ય મધ્યે । તે ચ મહાશ્રાવકાસ્તં તથાગતવિકુર્વિતપ્રાતિહાર્યં તચ્ચ બોધિસત્ત્વપર્ષન્મણ્ડલવિકુર્વિતં ન પશ્યન્તિ ન જાનન્તિ ॥
તદ્યથાપિ નામ ભિક્ષુઃ સર્વચેતોવશિપરમપારમિતાપ્રાપ્તઃ સંજ્ઞાવેદયિતનિરોધં સમાપન્નો ન સંજાનાતિ ન વેદયતિ, ન ચ ષડિન્દ્રિયેણ કિંચિત્કાર્યમનુભવતિ, ન ચ પરિનિર્વૃતઃ સઃ । સર્વલોકવ્યવહારશ્ચ તસ્મિન્ પ્રદેશે પ્રવર્તન્તે । ન ચ તાન્ સંજાનાતિ, ન વેદયતિ યદુત તસ્યા એવ સમાપત્તેરધિષ્ઠાનાધિપત્યેન । એવેમેવ તે મહાશ્રાવકાસ્તત્રૈવ જેતવને વિહરન્તિ, ષડિન્દ્રિયં ચૈષામસ્તિ, ન ચ તં તથાગતસમાધિવિકુર્વિતવૃષભિતાપ્રાતિહાર્યં પશ્યન્તિ, નાવતરન્તિ, ન સંજાનન્તિ, ન વિજાનન્તિ, ન ચ તં મહાબોધિસત્ત્વસંનિપાતમ્ બોધિસત્ત્વપ્રાતિહાર્યં બોધિસત્ત્વવિકુર્વિતમવતરન્તિ, ન પશ્યન્તિ ન જાનન્તિ । તત્કસ્ય હેતોઃ? ગમ્ભીરો હિ બુદ્ધવિષયો વિપુલો ઽપ્રમેયો દુર્દૃશો દુષ્પ્રતિબોધો દુરવગાહઃ સર્વલોકસમતિક્રાન્તઃ । અચિન્ત્યો બુદ્ધવિષયો ઽસંહાર્યઃ સર્વશ્રાવકપ્રત્યેકબુદ્ધૈઃ । તેન તે મહાશ્રાવકાસ્તત્રૈવ જેતવને ભગવતઃ પાદમૂલગતાસ્તાનિ બુદ્ધવિકુર્વિતાનિ ન પશ્યન્તિ । તં ચ મહાબોધિસત્ત્વસંનિપાતમ્ તચ્ચ જેતવનમચિન્ત્યાસંખ્યેયવિશુદ્ધલોકધાતુગુણવ્યૂહસમવસરણં ન પશ્યન્તિ ન જાનન્તિ યથાપિ તદભાજનીભૂતત્વાત્ ॥
અથ ખલુ વૈરોચનપ્રણિધાનાભિરશ્ચિમપ્રભો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
પશ્યધ્વં સત્ત્વસારસ્ય બુદ્ધબોધિરચિન્તિયા ।
જેતધ્વજે નિદર્શેતિ જિનો બુદ્ધવિકુર્વિતમ્

સ્વયંભુવામધિષ્ઠાનમસંખ્યેયં પ્રવર્તતે ।
યત્ર સ મુહ્યતે લોકો બુદ્ધધર્માણજાનકઃ

ગમ્ભીરં ધર્મરાજાનામપ્રમેયમચિન્તિયમ્ ।
પ્રવર્તતે પ્રાતિહાર્યં યત્ર લોકો ન ગાહતે

અનન્તવર્ણાઃ સંબુદ્ધા લક્ષણૈઃ સુવિભૂષિતાઃ ।
અલક્ષણા હિ તે ધર્મા યે સંબુદ્ધૈઃ પ્રભાવિતાઃ

વિકુર્વિતાનિ દર્શેતિ જિનો જેતાહ્વયે વને ।
અનન્તમધ્યગમ્ભીરાન્ વાક્પથૈશ્ચ સુદુષ્કરાન્

મહાત્મનાં સંનિપાતં બોધિસત્ત્વા ન પશ્યતિ ।
અચિન્ત્યક્ષેત્રકોટિભ્યો જિનં દ્રષ્ટુમુપાગતાઃ

પ્રણિધાનેન સંપન્ના અસઙ્ગાચારગોચરાઃ ।
ન શક્યં સર્વલોકેન તેષાં વિજ્ઞાતુમાશયમ્

સર્વપ્રત્યેકસંબુદ્ધાઃ શ્રાવકા યે ચ સર્વશઃ ।
ન પ્રજાનન્તિ તે ચર્યાં ન ચૈષાં ચિત્તગોચરમ્

બોધિસત્ત્વા મહાપ્રજ્ઞા દુર્ધર્ષા અપરાજિતાઃ ।
શૂરધ્વજા અસંકીર્ણા જ્ઞાનભૂમિપરાયણાઃ

અપ્રમેયાઃ સમાપન્નાસ્તે સમાધિં મહાયશાઃ ।
સ્ફરિત્વા ધર્મધાતું હિ દર્શયન્તિ વિકુર્વિતમ્

અથ ખલુ દુર્યોધનવીર્યવેગરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
પુણ્યગર્ભાન્ મહાપ્રજ્ઞાન્ બોધિચર્યાગતિંગતાન્ ।
ક્ષેમંકરાન્ સર્વલોકે પશ્યધ્વં સુગતાત્મજાન્

મેધવિનો ઽનન્તમતીન્ સુસમાહિતચેતસઃ ।
અનન્તમધ્યગમ્ભીરવિપુલજ્ઞાનગોચરાન્

જેતાહ્વયે મહારણ્યે મહાવ્યૂહોપશોભિતે ।
બોધિસત્ત્વસમાકીર્ણે સમ્યક્સંબુદ્ધઆશ્રમે

અનિકેતાપ્રતિષ્ઠાનાન્ પશ્યધ્વં સાગરાન્ બહૂન્ ।
દશભ્યો દિગ્ભ્ય આગત્ય નિષણ્ણાન્ પદ્મઆસને

અપ્રતિષ્ઠાનનાયૂહાન્નિષ્પ્રપઞ્ચાનનાલયાન્ ।
અસઙ્ગચિત્તાન્ વિરજાન્ ધર્મધાતુપરાયણાન્

જ્ઞાનધ્વજાન્ મહાવીરાન્ વજ્રચિત્તાનકમ્પિયાન્ ।
અનિર્વૃતેષુ ધર્મેષુ નિર્વાણં દર્શયન્તિ તે

દશદિક્ક્ષેત્રકોટીભ્યો ઽસંખ્યેભ્યઃ સમુપાગતાન્ ।
સંબુદ્ધમુપસંક્રાન્તાન્ દ્વયસંજ્ઞાવિવર્જિતાન્

સ્વયંભોઃ શાક્યસિંહસ્ય પશ્યન્તીદં વિકુર્વિતમ્ ।
અધિષ્ઠાનેન યસ્યેમે બોધિસત્ત્વાઃ સમાગતાઃ

બુદ્ધધર્મેષ્વસંભેદા ધર્મધાતુતલેષુ ચ ।
વ્યવહારમાત્રસંભેદપારપ્રાપ્તા જિનાત્મજાઃ

ધર્મધાતોરસંભેદકોટ્યન્તે મુનયઃ સ્થિતાઃ ।
અક્ષયૈશ્ચ પ્રકુર્વન્તિ પદૈર્ધર્મપ્રભેદનમ્

અથ ખલુ સમન્તશ્રીસમુદ્ગતતેજોરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
પશ્યધ્વં સત્ત્વસારસ્ય વિપુલં જ્ઞાનમણ્ડલમ્ ।
કાલાકાલમભિજ્ઞાય ધર્મં દેશેતિ પ્રાણિનામ્

નાનાતીર્થ્યસમાકીર્ણપરવાદિપ્રમર્દનઃ ।
યથાશયાનાં સત્ત્વાનાં સંદર્શેતિ વિકુર્વિતમ્

ન ચ પ્રદેશ સંબુદ્ધો ન ચ બુદ્ધો દિશાનુગઃ ।
અપ્રમાણપ્રમાણાનિ નાતિક્રાન્તો મહામુનિઃ

દિનસંખ્યો યથાદિત્યઃ પ્રભાવયતિ ખે વ્રજન્ ।
એવં જ્ઞાનવિદુઃ શાસ્તા ત્ર્યધ્વાસઙ્ગપ્રભાવિતઃ

પૂર્ણમાસ્યાં યથા રાત્રૌ ભાસતે ચન્દ્રમણ્ડલમ્ ।
પરિપૂર્ણં તથા શુક્લધર્મૈઃ પશ્યતિ નાયકમ્

અન્તરીક્ષે યથૈવેહ વ્રજત્યાદિત્યમણ્ડલમ્ ।
વિતિષ્ઠતે નૈવેહ તં તથા બુદ્ધવિકુર્વિતમ્

યથાપિ ગગનં દિક્ષુ સર્વક્ષેત્રષ્વનિશ્રિતમ્ ।
એવં લોકપ્રદીપસ્ય જ્ઞેયં બુદ્ધવિકુર્વિતમ્

યથા હિ પૃથિવી લોકે પ્રતિષ્ઠા સર્વદેહિનામ્ ।
લોકે લોકપ્રદીપસ્ય ધર્મચક્રં તથા સ્થિતમ્

યથાપિ મારુતો ઽસજ્જન્ ક્ષિપ્રં વ્યોમ્નિ પ્રવાયતિ ।
બુદ્ધસ્ય ધર્મતા તદ્વલ્લોકધાતુષુ વર્તતે

અપ્સ્કન્ધે હિ યથા સર્વક્ષેત્રસંખ્યાઃ પ્રતિષ્ઠિતાઃ ।
એવં ત્ર્યધ્વગતા બુદ્ધા જ્ઞાનસ્કન્ધે પ્રતિષ્ઠિતાઃ

અથ ખલુ અસઙ્ગશ્રીગર્ભરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
યથાપિ પર્વતઃ શૈલ ઉદ્વિદ્ધો વજ્રસંભવઃ ।
સર્વલોકપરિત્રાતા બુદ્ધો લોકે તથોદ્ગતઃ

યથૈવ સાગરે તોયમપ્રમેયમનાવિલમ્ ।
બુદ્ધદર્શનમેવં હિ લોકતૃષ્ણાં છિનત્તિ ચ

પર્વતો હિ યથા મેરુઃ સાગરામ્ભઃસમુદ્ગતઃ ।
તથૈવ લોકપ્રદ્યોત ઉદ્ગતો ધર્મસાગરાત્

યથૈવ સાગરઃ પૂર્ણઃ સર્વરત્નમહાકરઃ ।
સ્વયંભુવસ્તથા જ્ઞાનમક્ષયં ક્ષણબોધનમ્

ગમ્ભીરં નાયકે જ્ઞાનમસંખ્યેયમથામિતમ્ ।
દર્શયત્યમિતાચિન્ત્યં યેન બુદ્ધો વિકુર્વિતમ્

માયાકારો યથા વિદ્વાન્ માયાલક્ષણદર્શકઃ ।
એવં જ્ઞાનવશી બુદ્ધો વિકુર્વિતાનિદર્શકઃ

ચિન્તામણિર્યથા શુદ્ધો ઽભીપ્સિતાર્થપ્રપૂરણઃ ।
એવમાશયશુદ્ધાનાં જિનઃ પ્રણીધિપૂરણઃ

બૈરોચનં યથા રત્નં પ્રભાસયતિ ભાસ્કરમ્ ।
સર્વજ્ઞતા વિશુદ્ધૈવં જગદાશયભાસની

તથૈવ દિગ્મુખં રત્નમષ્ટાઙ્ગં સુપ્રતિષ્ઠિતમ્ ।
તથાપ્યસઙ્ગપ્રદ્યોતો ધર્મધાત્વવભાસનઃ

દકપ્રભાસં શુદ્ધાભં આવિલામ્બુપ્રસાદનમ્ ।
બુદ્ધસ્ય દર્શનં તદ્વજ્જગદિન્દ્રિયશોધનમ્

અથ ખલુ ધર્મધાતુપ્રણિધિસુનિર્મિતચન્દ્રરાજો બોધિસત્ત્વો બુદ્ધધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
યથાપીહેન્દ્રનીલેન એકવર્ણા દિશઃ કૃતાઃ ।
બોધિવર્ણઃ પ્રજામેવં કુરુતે બુદ્ધદર્શનમ્

એકૈકસ્મિન્નસૌ બુદ્ધો નાનાવિધવિકુર્વિતમ્ ।
વિદર્શયત્યપ્રમેયં બોધિસત્ત્વવિશોધનમ્

તચ્ચાતિચિત્રગમ્ભીરમપર્યન્તં દુરાસદમ્ ।
યસ્મિન્ન ગાહતે લોકો ધીમતાં જ્ઞાનગોચરે

વ્યૂહાનપિ ચ સંપન્નાન્ બુદ્ધકારવિશોધિતાન્ ।
નિષ્પત્તેર્બોધિસત્ત્વાનાં ધર્મધાતુપ્રવેશનાત્

બુદ્ધક્ષેત્રાણ્યચિન્ત્યાનિ યત્ર દર્શયતે જિનઃ ।
ધીમતાં પરિવૃતૈર્બુદ્ધૈરાકીર્ણાનિ સમન્તતઃ

સર્વધર્મવશી શાસ્તા ઉત્પન્નઃ શાક્યપુંગવઃ ।
પ્રાતિહાર્યં હિ યસ્યેદમપ્રમેયં પ્રવર્તતે

નાનાત્વચર્યાં ધીરાણામપ્રમેયાં વિપશ્યથ ।
વિકુર્વિતાન્યનન્તાનિ દર્શયત્યમિતદ્યુતિઃ

ધર્મધાતૌ શિક્ષયતિ લોકનાથો જિનૌરસાન્ ।
ભવન્તિ સર્વધર્મેષુ તે ઽસઙ્ગજ્ઞાનગોચરાઃ

અધિષ્ઠાનાન્નરેન્દ્રસ્ય ધર્મચક્રં પ્રવર્તતે ।
પ્રાતિહાર્યશતાકીર્ણં સર્વલોકવિશોધનમ્

વિષયે સત્ત્વસારસ્ય જ્ઞાનમણ્ડલશોધિતાઃ ।
ભૂરિપ્રજ્ઞા મહાનાગાઃ સર્વલોકપ્રમોચનાઃ

અથ ખલુ ધર્માર્ચિષ્મત્તેજોરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
યે ઽધ્વત્રયે વિનીયન્તે શ્રાવકાઃ પરમર્ષિણા ।
ન ક્રમોત્ક્ષેપનિક્ષેપં સંબુદ્ધસ્ય વિદન્તિ તે

યે ઽપિ પ્રત્યેકસંબુદ્ધાઃ ત્રિષ્વપ્યધ્વેષ્વશેષતઃ ।
ન ક્રમોત્ક્ષેપનિક્ષેપં તે ઽપિ જાનન્તિ તાયિનઃ

કિં પુનઃ સર્વસત્ત્વા હિ વિજ્ઞાસ્યન્તિ વિનાયકમ્ ।
શ્વેવ ગર્દુલબદ્ધ યે હ્યવિદ્યાતમસાવૃતાઃ

પ્રમાણૈરપ્રમેયો ઽસૌ ન શક્યં જાનિતું જિનઃ ।
અસઙ્ગજ્ઞાનવાન્ બુદ્ધઃ સમતિક્રાન્તવાક્પથઃ

પૂર્ણચન્દ્રપ્રભો ધીરો લક્ષણૈઃ સુવિચિત્રિતઃ ।
ક્ષપયત્યમિતાન્ કલ્પાનધિતિષ્ઠન્ વિકુર્વિતૈઃ

નયાદેકૈકતો બુદ્ધં ચિન્તયન્ સુસમાહિતઃ ।
અનભિલાપ્યઃ ક્ષપયેત્કલ્પકોટીરચિન્તિયાઃ

ગુણૈકદેશપર્યન્તં નાધિગચ્છેત્સ્વયંભુવઃ ।
નિરીક્ષમાણો બુદ્ધો ઽપિ બુદ્ધધર્મા હ્યચિન્તિયાઃ

યેષાં ચ પ્રણિધિસ્તત્ર યેષાં ચ મનસો રતિઃ ।
તે ઽપ્યેવંગોચરાઃ સર્વે ભવિષ્યન્તિ સુદુર્દૃશાઃ

પુણ્યજ્ઞાનમયાનન્તં મહાસંભારવિક્રમાઃ ।
નયં હ્યવતરન્ત્યેતં ધીમચ્ચિત્તે ઽમલે સ્થિતાઃ

વિપુલઃ પ્રણિધિસ્તેષાં વિપુલશ્ચિત્તસંવરઃ ।
લપ્સ્યન્તિ વિપુલાં બોધિમાક્રમ્ય જિનગોચરમ્

અથ ખલુ સર્વમારમણ્ડલવિકિરણજ્ઞાનધ્વજરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
અસઙ્ગજ્ઞાનકાયત્વાદશરીરાઃ સ્વયંભુવઃ ।
અચિન્ત્યજ્ઞાનવિષયાઃ શક્યં ચિન્ત્યયિતું ન તે

અચિન્ત્યૈઃ કર્મભિઃ શુક્લૈર્બુદ્ધકાયઃ સમાર્જિતઃ ।
ત્રૈલોક્યાનુપલિપ્તો ઽસૌ લક્ષણવ્યઞ્જનોજ્જ્વલઃ

સમન્તાવભાસો લોકે ધર્મધાતુવિશોધિતઃ ।
બુદ્ધબોધેરપિ દ્વારં સર્વજ્ઞાનમહાકરઃ

વિરજો નિષ્પ્રપઞ્ચશ્ચ સર્વસઙ્ગવિવર્જિતઃ ।
આદિત્યભૂતો લોકસ્ય જ્ઞાનરશ્મિપ્રમુઞ્ચનઃ

ભવસંત્રાસવિચ્છેત્તા ત્રૈધાતુકવિશોધનઃ ।
નિષ્પત્તિર્બોધિસત્ત્વાનાં બુદ્ધબોધ્યાકરસ્તથા

અનન્તવર્ણદર્શાવી સર્વવર્ણેષ્વનિશ્રિતઃ ।
દર્શયત્યપિ તાન્ વર્ણાનચિન્ત્યાન્ સર્વદેહિભિઃ

શક્યં ન જ્ઞાનપર્યન્તો ગન્તું બુદ્ધસ્ય કેનચિત્ ।
એકક્ષણે બુદ્ધબોધિરચિન્ત્યા યેન શોધિતા

અક્ષયો જ્ઞાનનિર્દેશો નિર્વિકારઃ સ્વભાવતઃ ।
એકક્ષણે પ્રભાવ્યન્તે યસ્મિંસ્ત્ર્યધ્વગતા જિનાઃ

અનન્તકર્મા સપ્રજ્ઞો બોધ્યર્થી ચિન્તયેત્સદા ।
ચિત્તમિત્યપિ યત્રાસ્ય ચિત્તે ચિત્તં ન જાયતે

સર્વાભિલાપાવિષયા ગમ્ભીરા વાક્પથોજ્ઝિતાઃ ।
અચિન્ત્યા બુદ્ધધર્માસ્તે યૈઃ સંબુદ્ધાઃ પ્રભાવિતાઃ

અથ ખલુ વૈરોચનપ્રણિધાનકેતુધ્વજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
અમૂઢસ્મૃતયઃ શુદ્ધા ધર્મોદ્ગતસુનિશ્ચિતાઃ ।
અચિન્ત્યમતિમન્તસ્તે અક્ષયા બોધિસાગરાઃ

મનો ઽત્ર નિશ્ચિતં તેષાં તચ્ચર્યાગોચરો હ્યયમ્ ।
તેષામત્રાચલં જ્ઞાનં તે ઽત્ર ચ્છિન્નકથંકથાઃ

ખેદો નોત્પદ્યતે તેષાં ન તેષાં સીદતે મનઃ ।
તેષાં પ્રવર્તતે ચિત્તં બુદ્ધધર્મપરાયણમ્

તેષાં પ્રજાયતે શ્રદ્ધા મૂલજાતા સમુદ્ગતા ।
જ્ઞાને ઽત્ર હિ રતિસ્તેષામનિલમ્ભે નિરાલયે

સંપૂર્ણાઃ કુશલૈર્ધર્મૈઃ કલ્પકોટીસમાર્જિતૈઃ ।
નામયન્તિ ચ તત્સર્વે એતે જ્ઞાનાર્થિનો ઽસમાઃ

વિચરન્તિ ચ સંસારે ન ચ સંસારનિશ્રિતાઃ ।
નિશ્ચિતા બુદ્ધધર્મેષુ રમન્તે બુદ્ધગોચરે

યાવતી લોકસંપત્તિઃ સત્ત્વધાતૌ પ્રવર્તતે ।
સર્વ પ્રહીણા ધીરાણાં બુદ્ધસંપસ્થિતા હિ તે

વૃથા સમાશ્રિતો લોકઃ સદા બદ્ધઃ પ્રવર્તતે ।
અસઙ્ગચારિણસ્તત્ર સદા સત્ત્વાર્થનિશ્રિતાઃ

અતુલ્યં ચરિતં તેષામચિન્ત્યં સર્વદેહિભિઃ ।
લોકસૌખ્યં ચિન્તયન્તિ યેન દુઃખં નિવર્તતે

બોધિજ્ઞાનવિશુદ્ધાસ્તે સર્વલોકાનુકમ્પકાઃ ।
આલોકભૂતા લોકસ્ય સર્વલોકપ્રમોચકાઃ

અથ ખલુ સર્વાવરણવિકિરણજ્ઞાનવિક્રાન્તરાજો બોધિસત્ત્વો બુદ્ધાધિષ્ઠાનેન દશ દિશો વ્યવલોક્ય તસ્યાં વેલાયામિમા ગાથા અભાષત -
સુદુર્લભો બુદ્ધશબ્દઃ કલ્પકોટીશતૈરપિ ।
કિં પુનર્દર્શનં સર્વકાઙ્ક્ષાછેદનમુત્તમમ્

સ દૃષ્ટો લોકપ્રદ્યોતઃ સર્વધર્મગતિં ગતઃ ।
પુણ્યતીર્થં ત્રિલોકસ્ય સર્વસત્ત્વવિશોધનમ્

પશ્યતાં રૂપકાયેન સત્ત્વસારમનિન્દિતમ્ ।
ન સમુત્પદ્યતે તૃપ્તિઃ કલ્પકોટ્યયુતૈરપિ

રૂપકાયં નરેન્દ્રસ્ય પ્રેક્ષમાણા જિનૌરસાઃ ।
અસઙ્ગાઃ સ્વં શુભં બોધૌ નામયન્તિ પરાર્થિનઃ

બુદ્ધબોધેર્મુખમિદમ્ રૂપકાયો મહામુનેઃ ।
નિશ્ચરન્તિ યતો ઽસઙ્ગા અક્ષયાઃ પ્રતિસંવિદઃ

અચિન્ત્યાનમિતાન્ સત્ત્વાનવભાસ્ય મહામુનિઃ ।
અવતાર્ય મહાયાને વ્યાકરોત્યગ્રબોધયે

મહત્પુણ્યમયં ક્ષેત્રમુદિતં જ્ઞાનમણ્ડલમ્ ।
ભાસયત્યમિતં લોકં પુણ્યસ્કન્ધવિવર્ધનમ્

છેદનો દુઃખજાલસ્ય જ્ઞાનસ્કન્ધવિશોધનઃ ।
ન દુર્ગતિભયં તેષાં યૈરિહારાગિતો જિનઃ

વિપુલં જાયતે ચિત્તં પશ્યતાં દ્વિપદોત્તમમ્ ।
પ્રજ્ઞાબલમસંખ્યેયં જાયતે ચન્દ્રભાસ્વરમ્

ભવન્તિ નિયતા બોધૌ દૃષ્ટ્વા બુદ્ધં નરોત્તમમ્ ।
નિશ્ચિતં ચ ભવત્યેષાં ભવિષ્યામિ તથાગતઃ

અથ ખલુ ધર્મધાતુતલભેદજ્ઞાનાભિજ્ઞારાજો બોધિસત્ત્વો બુદ્ધાધિષ્ઠાનેન
દશ દિશો વ્યવલોક્ય તસ્યાં વેલાયામિમા ગાથા અભાષત -
અનન્તગુણસંપન્નં દૃષ્ટ્વા શાક્યર્ષભં મુનિમ્ ।
પરિણામયતાં ચિત્તં મહાયાને વિશુધ્યતિ

અર્થાય સર્વસત્ત્વાનામુત્પદ્યન્તે તથાગતાઃ ।
મહાકારુણિકા ધીરા ધર્મચક્રપ્રવર્તકાઃ

પ્રતિકર્તું કથં શક્યં બુદ્ધાનાં સર્વદેહિભિઃ ।
સત્ત્વાર્થેષ્વભિયુક્તાનાં કલ્પકોટિશતૈરપિ

કલ્પકોટ્યો વરં પક્વસ્ત્ર્યપાયે ભૃશદારુણે ।
ન ત્વેવાદર્શનં શાસ્તુઃ સર્વસઙ્ગવિવર્તિનઃ

સર્વસત્ત્વગતૌ યાવાન્ દુઃખસ્કન્ધઃ પ્રવર્તતે ।
ઉત્સોઢવ્યઃ સ નિખિલો બુદ્ધાનાં ન ત્વદર્શનમ્

યાવન્ત્યઃ સર્વલોકે ઽસ્મિન્નપાયગતયઃ પૃથક્ ।
વરં તત્ર ચિરં વાસો બુદ્ધાનામશ્રુતિર્ન ચ

એકૈકત્ર વરં કલ્પાન્ નિવાસો નરકે ઽપિ તાન્ ।
ન ત્વન્યત્ર જિનાપ્તાયાઃ સ્થિતો બોધેર્વિદૂરતઃ

કિં કારણમપાયેષુ નિવાસશ્ચિરમિષ્યતે ।
યત્કારણં જિનેન્દ્રસ્ય દર્શનં જ્ઞાનવર્ધનમ્

છિદ્યન્તે સર્વદુઃખાનિ દૃષ્ટ્વા લોકેશ્વરં જિનમ્ ।
સંભવત્યવતારશ્ચ જ્ઞાને સંબુદ્ધગોચરે

ક્ષપયત્યાવૃતીઃ સર્વા દૃષ્ટ્વા બુદ્ધં નરોત્તમમ્ ।
વર્ધયત્યમિતમ્ પુણ્યં યેન બોધિરવાપ્યતે

છિનત્તિ કાઙ્ક્ષા વિમતીઃ સત્ત્વાનાં બુદ્ધદર્શનમ્ ।
પ્રપૂરયતિ સંકલ્પાંલ્લૌકિકાંલ્લોકોત્તરાનપિ