દ્વયસંપત્તિવાર્ત્તિક · શ્લોક 1-20

નમઃ પરમનાથાય ગણનાથાય શૂલિને ।
ચિદ્પદ્માસનસંસ્થાય ચતુર્ધાભિન્નમૂર્તયે ॥

અવર્ણમ્ અસ્વરં ધ્યાત્વા વ્યાપકં પરમેશ્વરમ્ ।
વ્યુત્થાને યોગિનામ્ ઇત્થં શિવત્વં જાયતે સ્ફુટમ્ ॥

તતઃ શક્તિમયો યોગી નાદબિન્દ્વાત્મવિગ્રહઃ ।
દ્વયસમ્પત્તિમ્ આપ્નોતિ નિરાધારપદે સ્થિતઃ ॥

શ્લોકદ્વયમ્ ઇદં યસ્માચ્ છિવવક્ત્રાગમોદિતમ્ ।
શુદ્ધૈષા યોગિકોષસ્ય વિવૃત્યેહ પ્રવર્તતે ॥

અહંકારમયી ભૂમિર્ બુદ્ધિભૂમેઃ પરા હિ સા ।
તયા વ્યાપ્તમ્ ઇદં સર્વં સૈવ જ્ઞાતા વિમુક્તિદા ॥

સંવિદ્રૂપા પરા શક્તિર્ અભિન્ના પારમેશ્વરી ।
જ્ઞાનશક્તિઃ પુનઃ સૈવ મન્ત્રરૂપા પ્રકાશતે ॥

અહંકારઃ સ્મૃતો મન્ત્રઃ શિવશક્ત્યાત્મરૂપકઃ ।
યદ્ અત્રાદ્યમ્ અવર્ણાક્યં સ શિવઃ પરમેશ્વરઃ ॥

નાદબિન્દ્વાત્મકં યત્ તુ દ્વિતીયા શક્તિર્ ઐશ્વરી ।
દ્વયમ્ એતત્ સમાખ્યાતં બીજભૂતં ચરાચરે ॥

અનેન મુદ્રિતાઃ સર્વે વર્ણા અઙ્ગારરૂપિણા ।
શબ્દબ્રહ્મ તતઃ પ્રાહુર્ યોગિનસ્ તત્ત્વચિન્તકાઃ ॥

અપ્રાણમ્ અસ્વરં ધ્યાત્વા પશ્યન્ત્યા નિર્વિભાગયા ।
ચિન્માત્રામર્શયોગેન વિલીનઃ સ્યાત્ પરે પદે ॥

તથા હિ સિદ્ધૈર્ આદિષ્ટં ક્વચિત્ સિદ્ધાન્તસંગ્રહે ।
નાભેર્ ઊર્ધ્વં વિતસ્તિસ્ તુ કણ્ઠાધસ્તાત્ ષડઙ્ગુલમ્ ॥

હૃદયં મધ્યદેશે તુ પદ્મં તુ હૃદિ મધ્યતઃ ।
તત્ર મધ્યે સ્થિતા સૂક્ષ્મા કર્ણિકા ત્રિપથોપગા ॥

તત્ર મધ્યે હ્ય્ અકારં તુ સ્વાત્મતત્ત્વં વ્યવસ્થિતમ્ ।
અકારાન્તઃ પરં સૂક્ષ્મં ચિન્માત્રતત્ત્વલક્ષણમ્ ॥

તસ્યાપ્ય્ ઉપાસા કથિતા વિજ્ઞાને ભૈરવેન તુ ।
અબિન્દુમ્ અવિસર્ગં ચ અકારં જપતો મહાન્ ॥

ઉદેતિ દેવિ સહસાજ્ જ્ઞાનૌઘઃ પરમેશ્વરઃ ।
કર્ણસ્થાને નિરાધારા દ્વિતિયા શક્તિર્ ઐશ્વરી ॥

બીજભૂતા કુણ્ડલિની નાદબિન્દુસ્વરૂપિણી ।
પ્રાણશક્તિર્ ઇયં દેહે હકારાખ્યા નદત્ય્ અલમ્ ॥

કર્ણાન્તરવિવરે યોગી સ્થગિત્વા લક્ષયેત્ સ્ફુટમ્ ।
બિન્દુરૂપા ભ્રુવોર્ મધ્યે વિશ્વસ્ય જનની ધ્રુવા ॥

લક્ષ્યતે યોગિભિર્ નિત્યં ભ્રાજમાન સ્વતેજસા ।
તસ્ય બિમ્બૌ તુ ચન્દ્રાર્કૌ વામદક્ષિનનેત્રયોઃ ॥

નિરાશ્રયૌ તુ તૌ કૃત્વા વિષેદ્ બ્રહ્મ સનાતનમ્ ।
વિજ્ઞાનભૈરવે ઽપ્ય્ ઉક્તં શસ્ત્રે સિદ્ધનિષેવિતે ॥

સમ્પ્રદાયમ્ ઇમં સમ્યક્ શૃણુ દેવિ વદામ્ય્ અહમ્ ।
કૈવલ્યં જાયતે સદ્યો નેત્રયોઃ સ્તબ્ધમાત્રયોઃ ॥