બ્રહ્મવૈવર્ત પુરાણ · અધ્યાય 4.71

અથૈકસપ્તતિતમોઽધ્યાયઃ
નારાયણ ઉવાચ
રાધિકાયાં ચ સુપ્તાયાં સુપ્તાસુ ગોપિકાસુ ।
પુષ્પચન્દનતલ્પે ચ વાયુના સુરભીકૃતે

તૃતીયપ્રહરેઽતીતે નિશાયાં ચ શુભે ક્ષણે ।
શુભચન્દ્રર્ક્ષયોગે ચામૃતયોગસમન્વિતે

સૌમ્યસ્વામિયુતે લગ્ને સૌમ્યગ્રહવિલોકિતે ।
પાપગ્રહસમાસક્તદુષ્ટદોષાદિવર્જિતે

યશોદાં બોધયામાસ કારયામાસ મઙ્ગલમ્ ।
વન્ધૂનાશ્વાસયામાસ સમુત્થાય હરિઃ સ્વયમ્

વાદ્યં નિષેધયામાસ રાધિકાભયભીતવત્ ।
સ્વતન્ત્રો વિશ્વકર્તા ચ પાતા ભર્તા સ્વતન્ત્રવત્

પ્રક્ષાલ્ય પાદયુગલં ધૃતવા ધૌતે ચ વાસસી ।
ઉવાસ સંસ્કૃતે સ્થાને વિલિપ્તે ચન્દનાદિના

ફલપલ્લવસંયુક્તં સંસ્કૃતં ચન્દનાદિભિઃ ।
વામે કૃત્વા પૂર્ણકુમ્ભં વહ્નિં વિપ્રં સ્વદક્ષિણે

પતિપુત્રવતીં દીપં દર્પણં પુરતસ્તથા ।
દૂર્વાકાણ્ડં ચ સુસ્નિગ્ધં પુષ્પં ધાન્યં સિતં શુભમ્

ગુરુદત્તં ગુહીત્વા ચ પ્રદધૌ મસ્તકોપરિ ।
ધૃતં દદર્શ માધ્વીકં રજતં કાઞ્ચનં દધિ

ચન્દનં લેપનં કૃત્વા પુષ્પમાલાં ગલે દદૌ ।
ગુરુવર્ગં બ્રાહ્મણં ચ વન્દયામાસ ભક્તિતઃ

શઙ્ખધ્વનિં વેદપાઠં સંગીતં મઙ્ગલાષ્ટકમ્ ।
વિપ્રશીર્વચનં રમ્યં શુશ્રાવ પરમાદરમ્

ધ્યાત્વા મઙ્ગલરૂપં ચ સર્વત્ર મઙ્ગલપ્રદમ્ ।
ચિક્ષેપ દક્ષિણાં પાદં સુન્દરં સ્વાત્મવિગ્રહમ્

વિધૃત્ય નાસિકાવામભાગં મધ્યમયા વિભુઃ ।
વિસૃજ્ય વાયું સંપૂર્ણં નાસાદક્ષિણરન્ધ્રતઃ

તતો યયૌ નન્દનન્દો નન્દસ્ય પ્રાઙ્ગણં વરમ્ ।
સાનન્દઃ પરમાનન્દો નિત્યાનન્દઃ સનાતનઃ

નિત્યોઽનિત્યો નિત્યબીચસ્વરૂપો નિત્યવિગ્રહઃ ।
નિત્યાઙ્ગભૂતો નિત્યેશો નિત્યકૃત્યવિશારદઃ

નિત્યનૂતનરૂપશ્ચ નિત્યનૂતનયૌવનઃ ।
નિત્યનૂતનવેષશ્ચ વયસા નિત્યનૂતનઃ

નિત્યનૂતનસંભાષો યત્પ્રેમ નિત્યનૂતનમ્ ।
નિત્યનૂતનસંપ્રાપ્તિઃ સૌભાગ્યં નિત્યનૂતનમ્

સુધારસપરં મિષ્ટં યત્વાક્યં નિત્યનૂતનમ્ ।
નિત્યનૂતનભક્તં ચ યત્પદં નિત્યનૂતનમ્

સ્થાયં સ્થાયં પ્રાઙ્ગણેઽસ્મિનમાયેશો માયયા યુતઃ ।
અતીવ રમ્યે સુસ્નિગ્ધો બભૂવ ગમનોન્મુખઃ

રમ્ભાસ્તમ્ભસમૂહૈશ્ચ રસાલપલ્લવાન્વિતૈઃ ।
પટ્ટસૂત્રનિબદ્ધૈશ્ચ સુન્દરૈશ્ચ સુસંસ્કૃતૈઃ

પદ્મરાગેણ ખચિતે રચિતે વિશ્વકર્મણા ।
કસ્તૂરીકુઙ્કુમાક્તૈશ્ચ ચન્દનૈશ્ચ સુસંસ્કૃતે

તત્ર તસ્થૌ સ્વયં કૃષ્ણઃ સહાક્રૂરઃ સબાન્ધવઃ ।
યશોદયા સમાશ્લિષ્ટો વામપાર્શ્વેન માયયા

નન્દેનાઽઽનન્દયુક્તેનાઽઽશ્લિષ્ટો દક્ષિણપાર્શ્વતઃ ।
સંભાષિતો બાન્ધવૈશ્ચ પિત્રા માત્રા ચ ચુમ્બિતઃ

ઇતિ શીબ્રહ્મઓ મહાઓ શ્રીકૃષ્ણજન્મખઓ ઉત્તઓ નારદનાઓ યાત્રામઙ્ગલં
નામૈકસપ્તતિતમોઽધ્યાયઃ