બ્રહ્માંડ પુરાણ · અધ્યાય 3.30

ઇતિ શ્રીબ્રહ્માણ્ડપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને ભણ્ડાસુરવધો નામૈકોનત્રિંશો ઽધ્યાયઃ
અગસ્ત્ય ઉવાચ
અશ્વાનન મહાપ્રાજ્ઞ શ્રુતમાખ્યાનમુત્તમમ્ ।
વિક્રમો લલિતાદેવ્યા વિશિષ્ટો વર્ણિતસ્ત્વયા

ચરિતૈરનઘૈર્દેવ્યાઃ સુપ્રીતો ઽસ્મિ હયાનન ।
શ્રુતા સા મહતીશક્તિર્મન્ત્રિણીદણ્ડનાથયોઃ

પશ્ચાત્કિમકરોત્તત્ર યુદ્ધાનન્તરમંબિકા ।
ચતુર્થદિનશર્વર્યાં વિભાતાયાં હયાનન

હયગ્રીવ ઉવાચ
શૃણુ કુમ્ભજ તત્પ્રાજ્ઞ યત્તયા જગદંબયા ।
પશ્ચાદાચરિતં કર્મ નિહતે ભણ્ડદાનવે

શક્તીનામખિલં સૈન્યં દૈત્યયુધશતાર્દિતમ્ ।
મુહુરાહ્લાદયામાસ લોચનૈરમૃતાપ્લુતૈઃ

લલિતાપરમેશાન્યાઃ કટાક્ષામૃતધારયા ।
જહુર્યુદ્ધપરિશ્રાન્તિં શક્તયઃ પ્રીતિમાનસાઃ

અસ્મિન્નવસરે દેવા ભણ્ડમર્દનતોષિતાઃ ।
સર્વે ઽપિ સેવિતું પ્રાપ્તા બ્રહ્મવિષ્ણુપુરોગમાઃ

બ્રહ્મા વિષ્ણુશ્ચ રુદ્રશ્ચ શક્રાદ્યાસ્ત્રિદશાસ્તથા ।
આદિત્યા વસવો રુદ્રા મરુતઃ સાધ્યદેવતાઃ

સિદ્ધાઃ કિંપુરુષા યક્ષા નિરૃત્યાદ્યા નિશાચરાઃ ।
પ્રહ્લાદાદ્યા મહાદૈત્યાઃ સર્વે ઽપ્યણ્ડનિવાસિનઃ

આગત્ય તુષ્ટુવુઃ પ્રીત્યા સિંહાસનમહેશ્વરીમ્

બ્રહ્માદ્યા ઊચુઃ
નમોનમસ્તે જગદેકનાથે નમોનમઃ શ્રીત્રિપુરાભિધાને ।
નમોનમો ભણ્ડમહાસુરઘ્ને નમો ઽસ્તુ કામેશ્વરિ વામકેશિ

ચિન્તામણે ચિન્તિતદાનદક્ષે ઽચિન્તયે ચિરાકારતરઙ્ગમાલે ।
ચિત્રામ્બરે ચિત્રજગત્પ્રસૂતે ચિત્રાખ્યનિત્યે સુખદે નમસ્તે

મોક્ષપ્રદે મુગ્ધશશાઙ્કચૂડે મુગ્ધસ્મિતે મોહનભેદદક્ષે ।
મુદ્રેશ્વરીચર્ચિતરાજતન્ત્રે મુદ્રાપ્રિયે દેવિ નમોનમસ્તે

ક્રૂરાન્તકધ્વંસિનિ કોમલાઙ્ગે કોપેષુ કાલીં તનુમાદધાને ।
ક્રોડાનને પાલિતસૈન્યચક્રે ક્રોડીકૃતાશેષભયે નમસ્તે

ષડઙ્ગદેવીપરિવારકૃષ્ણે ષડઙ્ગયુક્તશ્રુતિવાક્યમૃગ્યે ।
ષટ્ચક્રસંસ્થે ચ ષડૂર્મિયુક્તે ષડ્ભાવરૂપે લલિતે નમસ્તે

કામે શિવે મુખ્યસમસ્તનિત્યે કાન્તાસનાન્તે કમલાયતાક્ષિ ।
કામપ્રદે કામિનિ કામશંભોઃ કામ્યે કલાનામધિપે નમસ્તે

દિવ્યૌષધાદ્યે નગરૌઘરૂપે દિવ્યે દિનાધીશસહસ્રકાન્તે ।
દેદીપ્યમાને દયયા સનાથે દેવાધિદેવપ્રમદે નમસ્તે

સદાણિમાદ્યષ્ટકસેવનીયે સદાશિવાત્મોજ્જ્વલમઞ્ચવાસે ।
સભ્યે સદેકાલ યપાદપૂજ્યે સવિત્રિ લોકસ્ય નમોનમસ્તે

બ્રાહ્મીમુખૈર્માતૃગણૈર્નિષેવ્યે બ્રહ્મપ્રિયે બ્રાહ્મણબન્ધમેત્રિ ।
બ્રહ્મામૃતસ્રોતસિ રાજહંસિબ્રહ્મેશ્વરિ શ્રીલલિતે નમસ્તે

સંક્ષોભિણીમુખ્યસમસ્તમુદ્રાસંસેવિતે સંસરણપ્રહન્ત્રિ ।
સંસારલીલાકૃતિસારસાક્ષિ સદા નમસ્તે લલિતે ઽધિનાથે ।
નિત્યે કલાષોડશકેન નામાકર્ષિણ્યધીશિ પ્રમથેન સેવ્યે

નિત્યે નિરાતઙ્કદયાપ્રપઞ્ચે નીલાલકશ્રેણિ નમોનમસ્તે ।
અનઙ્ગપુષ્પાદિભિરુન્નદાભિરનઙ્ગદેવીભિરજસ્રસેવ્યે ।
અભવ્યહન્ત્ર્યક્ષરરાશિરૂપે હતારિવર્ગે લલિતે નમસ્તે

સંક્ષોભિણીમુખ્યચતુર્દશાર્ચિર્માલાવૃતોદારમહાપ્રદીપ્તે ।
આત્માનમાબિભ્રતિ વિભ્રમાઢ્યે શુભ્રાશ્રયે શુભ્રપદે નમસ્તે

સશર્વસિદ્ધાદિ કશક્તિવન્દ્યે સર્વજ્ઞવિજ્ઞાતપદારવિન્દે ।
સર્વાધિકે સર્વગતે સમસ્તસિદ્ધિપ્રદે શ્રીલલિતે નમસ્તે

સર્વજ્ઞજાતપ્રથમાભિરન્યદેવી ભિરપ્યાશ્રિતચક્રભૂમે ।
સર્વામરાકાઙ્ક્ષિતપૂરયિત્રિ સર્વસ્ય લોકસ્ય સવિત્રિ પાહિ

વન્દે વશિન્યાદિકવાગ્વિભૂતે વર્દ્ધિષ્ણુચક્ર દ્યુતિવાહવાહે ।
બલાહકશ્યામકચે વચો ઽબ્ધે વરપ્રદે સુંદરિ પાહિ વિશ્વમ્

બાણાદિદિવ્યાયુધસાર્વભૌમે ભણ્ડાસુરાનીકવનાન્તદાવે ।
અત્યુગ્રતેજોજ્જ્વલિતાંબુરાશે પ્રસેવ્યમાને પરિતો નમસ્તે

કામેશિ વજ્રેશિ ભગેશ્યરૂપે કન્યે કલે કાલવિલોપદક્ષે ।
કથાવિશેષીકૃતદૈત્યસૈન્યે કામેશયાન્તે કમલે નમસ્તે

બિન્દુસ્થિતે બિન્દુકલૈકરૂપે બિન્દ્વાત્મિકે બૃંહિતચિત્પ્રકાશે ।
બૃહત્કુચંભોજવિલોલહારે બૃહત્પ્રભાવે લલિતે નમસ્તે

કામેશ્વરોત્સંગસદાનિવાસે કાલાત્મિકે દેવિ કૃતાનુકંપે ।
કલ્પાવસાનોત્થિત કાલિરૂપે કામપ્રદે કલ્પલતે નમસ્તે

સવારુણે સાંદ્રસુધાંશુશીતે સારઙ્ગશાવાક્ષિ સરોજવક્ત્રે ।
સારસ્ય સારસ્ય સદૈકભૂમે સમસ્તવિદ્યેશ્વરિ સંનતિસ્તે

તવ પ્રભાવેણ ચિદગ્નિજાયાં શ્રીશંભુનાથપ્રકડીકૃતાયાઃ ।
ભણ્ડાસુરાદ્યાઃ સમરે પ્રચણ્ડા હતા જગત્કણ્ટકતાં પ્રયાતાઃ

નવ્યાનિ સર્વાણિ વપૂંષિ કૃત્વા હિ સાંદ્રકારુણ્યસુધાપ્લવૈર્ન્નઃ ।
ત્વયા સમસ્તં ભુવનં સહર્ષં સુજીવિતં સુંદરિ સભ્યલભ્યે

શ્રીશંભુનાથસ્ય મહાશયસ્ય દ્વિતીયતેજઃ પ્રસરાત્મકે યઃ ।
સ્થાણ્વાશ્રમે કૢપ્તતયા વિરક્તઃ સતીવિયોગેન વિરસ્તભોગઃ

તેનાદ્રિવંશે ધૃતજન્મલાભાં કન્યામુમાં યોજયિતું પ્રવૃત્તાઃ ।
એવં સ્મરં પ્રેરિતવન્ત એવ તસ્યાન્તિકં ઘોર તપઃસ્થિતસ્ય

તેનાથ વૈરાગ્યતપોવિઘાતક્રોધેન લાલાટકૃશાનુદગ્ધઃ ।
ભસ્માવશેષો મદનસ્તતો ઽભૂત્તતો હિ ભણ્ડાસુર એષ જાતઃ

તતો વધસ્તસ્ય દુરાશયસ્ય કૃતો ભવત્યા રણદુર્મદસ્ય ।
અથાસ્મદર્થે ત્વતનુસ્સજાતસ્ત્વં કામસંજીવનમાશુકુર્યાઃ

ઇયં રતિર્ભર્તૃવિયોગખિન્ના વૈધવ્યમત્યન્તમભવ્યમાપ ।
પુનસ્ત્વદુત્પાદિતકામસંગાદ્ભવિષ્યતિ શ્રીલલિતે સનાથા

તયા તુ દૃષ્ટેન મનોભવેન સંમોહિતઃ પૂર્વવદિન્દુમૌલિઃ ।
ચિરં કૃતાત્યન્તમહાસપર્યા તાં પાર્વતીં દ્રાક્પરિણેષ્યતીશઃ

તયોશ્ચ સંગાદ્ભવિતા કુમારઃ સમસ્તગીર્વાણચમૂવિનેતા ।
તેનૈવ વીરેણ રણે નિરસ્ય સ તારકો નામ સુરારિરાજઃ

યો ભણ્ડદૈત્યસ્ય દુરાશયસ્ય મિત્રં સ લોકત્રયધૂમકેતુઃ ।
શ્રીકણ્ઠપુત્રૈણ રણે હતશ્ચેત્પ્રાણપ્રતિષ્ઠૈવ તદા ભવેન્નઃ

તસ્માત્ત્વમંબત્રિપુરે જનાનાં માનાપહં મન્મથવીરવર્યમ્ ।
ઉત્પાદ્યરત્યા વિધવાત્વદુઃખમપાકુરુ વ્યાકુલકુન્તલાયાઃ

એષા ત્વનાથા ભવતીં પ્રપન્ના ભર્તૃપ્રણાશેન કૃશાઙ્ગયષ્ટિઃ ।
નમસ્કરોતિ ત્રિપુરાભિધાને તદત્ર કારુણ્યકલાં વિધેહિ

હયગ્રીવ ઉવાચ
ઇતિ સ્તુત્વા મહેશાની બ્રહ્માદ્યા વિબુધોત્તમાઃ ।
તાં રતિં દર્શયમાસુર્મલિનાં શોકકર્શિતમ્

સા પર્યશ્રુમુખી કીર્ણકુન્તલા ધૂલિધૂસરા ।
નનામ જગદંબાં વૈ વૈધવ્યત્યક્તભૂષણા

અથ તદ્દર્શનોત્પન્નકારુણ્યા પરમેશ્વરી ।
તતઃ કટાક્ષાદુત્પન્નઃ સ્મયમાનસુખાંબુજઃ

પૂર્વદેહાધિકરુચિર્મન્મથો મદમેદુરઃ ।
દ્વિભુજઃ સર્વભૂષાઢ્યઃ પુષ્પેષુઃ પુષ્પકાર્મુકઃ

આનન્દયન્કટાક્ષેણ પૂર્વજન્મપ્રિયાં રતિમ્ ।
અથ સાપિ રતિર્દેવી મહત્યાનન્દસાગરે ।
મજ્જન્તી નિજભર્તારમવરોક્ય મુદં ગતા

આનન્દયન્કટાક્ષેણ પૂર્વજન્મપ્રિયાં રતિમ્ ।
અથ સાપિ રતિર્દેવી મહત્યાનન્દસાગરે ।
મજ્જન્તી નિજભર્તારમવલોક્ય મુદં ગતા

શ્યામલે સ્નાપયિત્વૈનાં વસ્ત્રકાઞ્ચ્યાદિભૂષણૈઃ ।
અલઙ્કૃત્ય યથાપૂર્વં શીઘ્રમાનીયતામિહ

તદાજ્ઞાં શિરસા ધૃત્વા શ્યામા સર્વં તથાકરોત ।
બ્રહ્મર્ષિભિર્વસિષ્ઠાદ્યૈર્વૈવાહિ કવિધાનતઃ

કારયામાસ દંપત્યોઃ પાણિગ્રહણમઙ્ગલમ્ ।
અપ્સરોભિશ્ચ સર્વાભિર્નૃત્યગીતાદિસંયુતમ્

એતદ્દૃષ્ટ્વા મહેન્દ્રાદ્યા ઋષયશ્ચ તપોધનાઃ ।
સાધુસાધ્વિતિ શંસંતસ્તુષ્ટુવુર્લલિતાંબિકામ્

પુષ્પવૃષ્ટિં વિમુઞ્ચન્તઃ સર્વે સન્તુષ્ટમાનસાઃ ।
બભૂવુસ્તૌ મહાભક્ત્યા પ્રણમ્ય લલિતેશ્વરીમ્

તત્પાર્શ્વે તુ સમાગત્ય બદ્ધાઞ્જલિપુટૌ સ્થિતૌ ।
અથ કન્દર્પવીરો ઽપિ નમસ્કૃત્ય મહેશ્વરીમ્ ।
વ્યજ્ઞાપયદિદં વાક્યં ભક્તિનિર્ભરમાનસઃ

યદ્દગ્ધમીશનેત્રેણ વપુર્મે લલિતાંબિકે ।
તત્ત્વદીયકટાક્ષસ્ય પ્રસાદાત્પુનરાગતમ્

તવ પુત્રો ઽસ્મિ દાસો ઽસ્મિ ક્વાપિ કૃત્યે નિયુઙ્ક્ષ્વ મામ્ ।
ઇત્યુક્તા પરમેશાની તમાહ મકરધ્વજમ્

શ્રીદેવ્યુવાચ
વત્સાગચ્છ મનોજન્મન્ન ભયં તવ વિદ્યતે ।
મત્પ્રસાદાજ્જગત્સર્વં મોહયાવ્યાહતાશુગ

તદ્બાણપાતનાજ્જાતધૈર્યવિપ્લવ ઈશ્વરઃ ।
પર્વતસ્ય સુતાં ગૌરીં પરિણેષ્યતિ સત્વરમ્

સહસ્રકોટયઃ કામા મત્પ્રસાદાત્ત્વદુદ્ભવાઃ ।
સર્વેષાં દેહમાવિશ્ય દાસ્યન્તિ રતિમુત્તમામ્

મત્પ્રસાદેન વૈરાગ્યાત્સંક્રુદ્ધો ઽપિ સ ઈશ્વરઃ ।
દેહદાહં વિધાતું તે ન સમર્થો ભવિષ્યતિ

અદૃશ્યમૂર્તિઃ સર્વેષાં પ્રાણિનાં ભવમોહનઃ ।
સ્વભાર્યાવિરહાશઙ્કી દેહસ્યાર્ધં પ્રદાસ્યતિ ।
પ્રયાતો ઽસૌ કાતરાત્મા ત્વદ્બાણાહતમાનસઃ

અદ્ય પ્રભૃતિ કન્દર્પ મત્પ્રસાદાન્મહીયસઃ ।
ત્વન્નિન્દાં યે કરિષ્યન્તિ ત્વયિ વા વિમુખાશયાઃ ।
અવશ્યં ક્લીબતૈવ સ્યાત્તેષાં જન્મનિજન્મનિ

યે પાપિષ્ઠા દુરાત્માનો મદ્ભક્તદ્રોહિણશ્ચ હિ ।
તાનગમ્યાસુ નારીષુ પાતયિત્વા વિનાશય

યેષાં મદીય પૂજાસુ મદ્ભક્તેષ્વાદૃતં મનઃ ।
તેષાં કામસુખં સર્વં સંપાદય સમીપ્સિતમ્

ઇતિ શ્રીલલિતાદેવ્યા કૃતાજ્ઞાવચનં સ્મરઃ ।
તથેતિ શિરસા બિભ્રત્સાંજલિર્નિર્યયૌ તતઃ

તસ્યાનઙ્ગસ્ય સર્વેભ્યો રોમકૂપેભ્ય ઉત્થિતાઃ ।
બહવઃ શોભનાકારા મદના વિશ્વમોહનાઃ

તૈર્વિમોહ્ય સમસ્તં ચ જગચ્ચક્રં મનોભવઃ ।
પુનઃ સ્થાણ્વાશ્રમં પ્રાપ ચન્દ્રમૌલેર્જિગીષયા

વસંતેન ચ મિત્રેણ સેનાન્યા શીતરોચિષા ।
રાગેણ પીઠમર્દેન મન્દાનિલરયેણ ચ

પુંસ્કોકિલગલત્સ્વાનકાહલીભિશ્ચ સંયુતઃ ।
શૃઙ્ગારવીરસંપન્નો રત્યાલિઙ્ગિતવિગ્રહઃ

જૈત્ર શરાસનં ધુન્વન્પ્રવીરાણાં પુરોગમઃ ।
મદનારેરભિમુખં પ્રાપ્ય નિભય આસ્થિતઃ

તપોનિષ્ઠં ચન્દ્રચૂડં તાડયામાસ સાયકૈઃ ।
અથ કન્દર્પબાણૌધૈસ્તાડિતશ્ચન્દ્રશેખરઃ ।
દૂરીચકાર વૈરાગ્યં તપસ્તત્ત્યાજ દુષ્કરમ્

નિયમાનખિલાંસ્ત્યક્ત્વા ત્યક્તધૈર્યઃ શિવઃ કૃતઃ ।
તામેવ પાર્વતીં ધ્યાત્વા ભૂયોભૂયઃ સ્મરાતુરઃ

નિશશ્વાસ વહઞ્શર્વઃ પાણ્ડુરં ગણ્ડમણ્ડલમ્ ।
બાષ્પાયમાણો વિરહી સંતપ્તો ધૈર્યવિપ્લવાત્ ।
ભૂયોભૂયો ગિરિસુતાં પૂર્વદૃષ્ટામનુસ્મરન્

અનઙ્ગબાણદહનૈસ્તપ્યમાનસ્ય શૂલિનઃ ।
ન ચન્દ્રરેખા નો ગઙ્ગા દેહતાપચ્છિદે ઽભવત્

નન્દિભૃઙ્ગિમહાકાલપ્રમુખૈર્ગણમણ્ડલૈઃ ।
આહૃતે પુષ્પશયને વિલુલોઠ મુહુર્મુહુઃ

નન્દિનો હસ્તમાલંબ્ય પુષ્પતલ્પાન્તરાત્પુનઃ ।
પુષ્પતલ્પાન્તરં ગત્વા વ્યચેષ્ટત મુહુર્મુહુઃ

ન પુષ્પશયનેનેન્દુખણ્ડનિર્ગલિતામૃતે ।
ન હિમાનીપયસિ વા નિવૃત્તસ્તદ્વપુર્જ્વરઃ

સ તનેરતનુજ્વાલાં શમયિષ્યન્મુહુર્મુહુઃ ।
શિલીભૂતાન્હિમપયઃ પટ્ટાનધ્યવસચ્છિવઃ ।
ભૂયઃ શૈલસુતારૂપં ચિત્રપટ્ટે નખૈર્લિખત્

તદાલોકનતો ઽદૂરમનઙ્ગાર્તિમવર્ધયત્ ।
તામાલિખ્ય હ્રિયા નમ્રાં વીક્ષમાણાં કટાક્ષતઃ

તચ્ચિત્રપટ્ટમઙ્ગેષુ રોમહર્ષેષુ ચાક્ષિપત્ ।
ચિન્તાસંગેન મહતા મહાત્યા રતિસંપદા ।
ભૂયસા સ્મરતાપેન વિવ્યથે વિષમેક્ષણઃ

તામેવ સર્વતઃ પશ્યંસ્તસ્યામેવ મનો દિશન્ ।
તથૈવ સંલ્લપન્સાર્ધમુન્માદેનોપપન્નયા

તન્માત્રભૂતહૃદયસ્તચ્ચિત્તસ્તત્પરાયણઃ ।
તત્કથાસુધયા નીતસમસ્તરજનીદિનઃ

તચ્છીલવર્ણન રતસ્તદ્રૂપાલોકનોત્સુકઃ ।
તચ્ચારુભોગસંકલ્પમાલાકરસુમાલિકઃ ।
તન્મયત્વમનુપ્રાપ્તસ્તતાપાતિતરાં શિવઃ

ઇમાં મનોભવ રુજમચિકિત્સ્યાં સ ધૂર્જટિઃ ।
અવલોક્ય વિવાહાય ભૃશમુદ્યમવાનભૂત્

ઇત્થં વિમોહ્ય તં દેવં કન્દર્પો લલિતાજ્ઞયા ।
અથ તાં પર્વતસુતામાશુગૈરભ્યતાપયત્

પ્રભૂતવિરહજ્વાલામલિનૈઃ શ્વસિતાનલૈઃ ।
શુષ્યમાણાધરદલો ભૃશં પાણ્ડુકપોલભૂઃ

નાહારે વા ન શયને ન સ્વાપે ધૃતિમિચ્છતિ ।
મખીસહસ્રૈઃ સિષિચે નિત્યં શીતોપચારકૈઃ

પુનઃ પુનસ્તપ્યમાના પુનરેવ ચ વિહ્વલા ।
ન જગામ રુજાશાન્તિ મન્મથાગ્નેર્મહીયસઃ

ન નિદ્રાં પાર્વતી ભેજે વિરહેણોપતાપિતા ।
સ્વતનોસ્તાપનેનાસૌ પિતુઃ ખેદમવર્ધયત્

અપ્રતીકારપુરુષં વિરહં તુહિતુઃ શિવે ।
અવલોક્ય સ શૈલેન્દ્રો મહાદુઃખમવાપ્તવાન્

ભદ્રે ત્વં તપસા દેવં તોષયિત્વા મહેશ્વરમ્ ।
ભાર્તારં તં સમૃચ્છેતિ પિત્રા સમ્પ્રેરિતાથ સા

હિમવચ્છૈલશિખરે ગૌરીશિખરનામનિ ।
વકાર પતિલાભાય પાર્વતી દુષ્કરં તપઃ

શિશિરેષુ જલાવાસા ગ્રીષ્મે દહનમધ્યગા ।
અર્કે નિવિષ્ટદૃષ્ટિશ્ચ સુઘોરં તપ આસ્થિતા

તેનૈવ તપસા તુષ્ટઃ સાન્નિધ્યં દત્તવાઞ્છિવઃ ।
અઙ્ગીચકાર તાં ભાર્યાં વૈવાહિકવિધાનતઃ

અથાદ્રિપતિના દત્તાં તનયાં નલિનેક્ષણામ્ ।
સપ્તર્ષિદ્વારતઃ પૂર્વં પ્રાર્થિતામુદવોઢ સઃ

તયા ચ રમમાણો ઽસૌ બહુકાલં મહેશ્વરઃ ।
ઓષધીપ્રસ્થનગરે શ્વશુરસ્ય ગૃહે ઽવસત્

પુનઃ કૈલાસમાગત્ય સમસ્તૈઃ પ્રમથૈઃ સહ ।
પાર્વતીમાનિનાયાદ્રિનાથસ્ય પ્રીતિમાવહત્

રમમાણસ્તયા સાર્થં કૈલાસે મન્દરે તથા ।
વિન્ધ્યાદ્રૌ હેમશૈલે ચ મલયે પારિયાત્રકે

નાનાવિધેષુ સ્થાનેષુ રતિં પ્રાપ મહેશ્વરઃ ।
અથ તસ્યાં સસર્જોગ્રં વીર્યં સા સોઢુમક્ષમા

ભુવ્યત્યજત્સાપિ વહ્નૌ કૃત્તિકાસુ સ ચાક્ષિપત્ ।
તાશ્ચ ગઙ્ગાજલે ઽમુઞ્ચન્સા ચૈવ શરકાનને

તત્રોદ્ભૂતો મહાવીરો મહાસેનઃ ષડાનનઃ ।
ગઙ્ગાયાશ્ચાન્તિકં નીતો ધૂર્જટિર્વૃદ્ધિ માગમત્

સ વર્ધમાનો દિવસેદિવસે તીવ્રવિક્રમઃ ।
શિક્ષિતો નિજતાતેન સર્વા વિદ્યા અવાપ્તવાન્

અથ તાતકૃતાનુજ્ઞઃ સુરસૈન્યપતિર્ભવન્ ।
તારકં મારયામાસ સમસ્તૈઃ સહ દાનવૈઃ

તતસ્તારકદૈત્યેન્દ્રવધસન્તોષશાલિના ।
શક્રેણ દત્તાં સ ગુહો દેવસેનામુપાનયત્

સા શક્રતનયા દેવસેના નામ યશસ્વિની ।
આસાદ્યરમણં સ્કન્દમાનન્દં મૃશમાદધૌ

ઇત્થં સંમોહિતાશેષવિશ્વચક્રો મનોભવઃ ।
દેવકાર્યં સુસમ્પાદ્ય જગામ શ્રીપુરં પુનઃ

યત્ર શ્રીનગરે પુણ્યે લલિતા પરમેશ્વરી ।
વર્તતે જગતામૃદ્ધ્યૈ તત્ર તાં સેવિતું યયૌ