બ્રહ્માંડ પુરાણ · અધ્યાય 3.28

ઇતિ શ્રીબ્રહ્માણ્ડપુરાણે ઉત્તરભાગે હયગ્રીવાગસ્ત્યસંવાદે લલિતોપાખ્યાને ગણનાથપરાક્રમો નામ સપ્તવિંશો ઽધ્યાયઃ
રણેભગ્નં મહાદૈત્યં ભણ્ડદૈત્યઃ સહોદરમ્ ।
સેનાનાં કદનં શ્રુત્વા સન્તપ્તો બહુચિન્તયા

ઉભાવપિ સમેતૌ તૌ યુક્તૌ સર્વૈશ્ચસૈનિકૈઃ ।
પ્રેષયામાસ યુદ્ધાય ભણ્ડદૈત્યઃ સહોદરૌ

તાવુભૌ પરમક્રુદ્ધૌ ભણ્ડદૈત્યેન દેશિતૌ ।
વિષઙ્ગશ્ચ વિશુક્રશ્ચ મહોદ્યમ મવાપનુઃ

કનિષ્ઠસહિતં તત્ર યુવરાજં મહાબલમ્ ।
વિશુક્રમનુવવ્રાજ સેના ત્રૈલોક્યકમ્પિની

અક્ષૌહિણીચતુઃશત્યા સેનાનામાવૃતશ્ચ સઃ ।
યુવરાજઃ પ્રવવૃધે પ્રતાપેન મહીયસા

ઉલૂકજિત્પ્રભૃતયો ભાગિનેયા દશોદ્ધતાઃ ।
ભણ્ડસ્ય ચ ભગિન્યાન્તુ ધૂમિન્યાં જાતયોનયઃ

કૃતાસ્ત્રશિક્ષા ભણ્ડેન માતુલેન મહીયસા ।
વિક્રમેણ વલન્તસ્તે સેનાનાથાઃ પ્રતસ્થિરે

પ્રોદ્ગતૈશ્ચાપનિર્ઘોષૈર્ઘોષયન્તો દિશો દશ ।
દ્વયોર્માતુલયોઃ પ્રીતિં ભાગિનેયા વિતેનિરે

આરૂઢયાનાઃ પ્રત્યેકગાઢાહઙ્કારશાલિનઃ ।
આકૃષ્ટગુરુધન્વાનો વિશુક્રમનુવવ્રજુઃ

યૌવરાજ્યપ્રભાચિહ્નચ્છત્રચામરશોભિતઃ ।
આરૂઢવારણઃ પ્રાપ વિશુક્રો યુદ્ધમેદિનીમ્

તતઃ કલકલારાવકારિણ્યા સેનયા વૃતઃ ।
વિશુક્રઃ પટુ દધ્વાન સિંહનાદં ભયઙ્કરમ્

તત્ક્ષોભાત્ક્ષુભિતસ્વાન્તાઃ શક્તયઃ સંભ્રમોદ્ધતાઃ ।
અગ્નિપ્રાકારવલયાન્નિર્જગમુર્બદ્ધપઙ્કયઃ

તડિન્મયમિવાકાશં કુર્વન્ત્યઃ સ્વસ્વરોચિષા ।
રક્તામ્વુજાવૃતમિવ વ્યોમચક્રં રણોન્મુખાઃ

અથ ભણ્ડકનીયાંસાવાગતૌ યુદ્ધદુર્મદૌ ।
નિશમ્ય યુગપદ્યોદ્ધં મન્ત્રિણીદણ્ડનાયકે

કિરિચકં જ્ઞેયચક્રમારૂઢે રથશેખરમ્ ।
ધૃતાતપત્રવલયે ચામરાભ્યાં ચ વીજિતે

અપ્સરોભિઃ પ્રનૃત્તાભિર્ગીયમાનમહોદયે ।
નિર્જગમતૂ રણં કર્તુમુભાભ્યાં લલિતાજ્ઞયા

શ્રીચક્રરથરાજસ્ય રક્ષણાર્થં નિવેશિતે ।
શતાક્ષૌહિણિકાં સેનાં વર્જયિત્વાસ્ત્રભીષણમ્

અન્યત્સર્વં ચમુજાલં નિર્જગામ રણોન્મુખી ।
પુરતઃ પ્રાચલદ્દણ્ડનાથા રથનિષેદુષી

એકયૈવ કરાઙ્ગુલ્યા ઘૂર્ણયન્તી હલાયુધમ્ ।
મુસલં ચાન્યહસ્તેન ભ્રામયન્તી મુહુર્મુહુઃ

તરલેન્દુકલાચૂડાસ્ફુરત્પોત્રમુખામ્બુજા ।
પુરઃ પ્રહર્ત્રી સમરે સર્વદા વિક્રમોદ્ધતા ।
અસ્યા અનુપ્રચલિતા ગેયચક્રરથસ્થિતા

ધનુષો ધ્વનિના વિશ્વં પૂરયન્તી મહોદ્ધતા ।
વેણીકૃતકચન્યસ્તવિલસચ્ચન્દ્રપલ્લવા

સ્ફુરત્ત્રિતયનેત્રેણ સિન્દૂરતિલકત્વિષા ।
પાણિના પદ્મરમ્યેણ મણિકઙ્કણચારુણા

તૂણીરમુખતઃ કૃષ્ટં ભ્રામયન્તી શિલીમુખમ્ ।
જય વર્ધસ્વવર્ધસ્વેત્યતિહર્ષસમાકુલે

નૃત્યદ્ભિર્દિવ્યમુનિભિર્વર્દ્ધિતાશીર્વચો ઽમૃતૈઃ ।
ગેયચક્રરથેન્દ્રસ્ય ચક્રનેમિવિઘટ્ટનૈઃ

દારયન્તી ક્ષિતિતલં દૈત્યાનાં હૃદયૈઃ સહ ।
લોકાતિશાયિતા વિશ્વમનોમોહનકારિણા ।
ગીતિબન્ધેનામરીભિર્બહ્વીભિર્ગીતવૈભવા

અક્ષૌહિણીસહસ્રાણામષ્ટકં સમરોદ્ધતમ્ ।
કર્ષતી કલ્પવિશ્લેષનિર્મર્યાદાબ્ધિસંનિભમ્

તસ્યાઃ શક્તિચમૂચક્રે કાશ્ચિત્કનકરોચિષઃ ।
કાશ્ચિદ્દાડિમસંકાશાઃ કાશ્ચિજ્જીમૂતરોચિષઃ

અન્યાઃ સિંદૂરરુચયઃ પરાઃ પાટલપાટલાઃ ।
કાચાદ્રિકામ્બરાઃ કાશ્ચિત્પરાઃ શ્યામલકોમલાઃ

અન્યાસ્તુ હીરકપ્રખ્યાઃ પરા ગારુત્મતોપમાઃ ।
વિરુદ્ધૈઃ પઞ્ચભિર્બાણૈર્મિશ્રિતૈઃ શતકોટિભિઃ

વ્યઞ્જયન્ત્યો દેહરુચં કતિચિદ્વિવિધાયુધાઃ ।
અસંખ્યાઃ શક્તયશ્ચેલુર્દણ્ડિન્યાસ્સૈનિકે તથા

તથૈવ સૈન્યસન્નાહો મન્ત્રિણ્યાઃ કુમ્ભસમ્ભવ ।
યથા ભૂષણવેષાદિ યથા પ્રભાવલક્ષણમ્

યથા સદ્ગુણશાલિત્વં યથા ચાશ્રિતલક્ષણમ્ ।
યથા દૈત્યૌઘસંહારો યથા સર્વૈશ્ચ પૂજિતા

યથા શક્તિર્મહારાજ્ઞ્યા દેડિન્યશ્ચ તથાખિલમ્ ।
વિશેષસ્તુ પરં તસ્યાઃ સાચિવ્યે તત્કરે સ્થિતમ્ ।
મહારાજ્ઞીવિતીર્ણં તદાજ્ઞામુદ્રાઙ્ગુલીયકમ્

ઇત્થં પ્રચલિતે સૈન્યે મન્ત્રિણીદણ્ડનાથયોઃ ।
તદ્ભારભઙ્ગુરા ભૂમિર્દેલાલીલામલંબત

તતઃ પ્રવવૃતે યુદ્ધં તુમુલં રોમહર્ષણમ્ ।
ઉદ્ધૂતધૂલિજંબાલીભૂતસપ્તાર્ણવીજલમ્

હયસ્થૈર્હયસાદિન્યો રથસ્થૈ રથસંસ્થિતાઃ ।
આધોરણૈર્હસ્તિપકાઃ ખડ્ગૈઃ પદ્ગાશ્ચ સઙ્ગતાઃ

દણ્ડનાથાવિષઙ્ગેણ સમયુધ્યન્ત સઙ્ગરે ।
વિશુક્રેણ સમં શ્યામા વિકૃષ્ટમણિકાર્મુકા

અશ્વરૂઢા ચકારોચ્ચૈઃ સહોલૂકજિતા રણમ્ ।
સમ્પદીશાચ જગ્રાહ પુરુષેણ યુયુત્સયા

વિષેણ નકુલી દેવી સમાહ્વાસ્ત યુયુત્સયા ।
કુન્તિષેણેન સમરં મહામાયા તદાકરોત્

મલદેન સમં ચક્રે યુદ્ધમુન્મત્તભૈરવી ।
લઘુશ્યામા ચકારોચ્ચૈઃ કુશૂરેણ સમં રણમ્

સ્વપ્નેશી મઙ્ગલાખ્યેન દૈત્યેન્દ્રેણ રણંવ્યધાત્ ।
વાગ્વાદિની તુ જઘટે દ્રુઘણેન સમં રણે

કોલાટેન ચ દુષ્ટેન ચણ્ડકાલ્યકરોદ્રણમ્ ।
અક્ષૌહિણીભિર્દૈત્યાનાં શતાક્ષૌહિણિકાસ્તથા ।
મહાન્તં સમરે ચક્રુરન્યોન્યં ક્રોધમૂર્છિતાઃ

પ્રવર્તમાને સમરે વિશુક્રો દુષ્ટદાનવઃ ।
વર્ધમાનાં શક્તિચમૂં હીયમાનાં નિજાં ચમૂમ્

અવલોક્ય રુષાવિષ્ટઃ સ કૃષ્ટગુરુકાર્મુકઃ ।
શક્તિસૈન્યે સમસ્તે ઽપિ તૃષાસ્ત્રં પ્રમુમોચ હ

તેન દાવાનલજ્વાલાદીપ્તેન મથિતં બલમ્ ।
તૃતીયે યુદ્ધદિવસે યામમાત્રં ગતે રવૌ ।
વિશુક્રમુક્તતર્ષાસ્ત્રવ્યાકુલાઃ શક્તયો ઽવન્

ક્ષોભયન્નિન્દ્રિયગ્રામં તાલુમૂલં વિશોષયન્ ।
રૂક્ષયન્કર્ણકુહરમઙ્ગદૌર્વલ્યમાહવન્

પાતયન્પૃથિવીપૃષ્ઠે દેહં વિસ્રંસિતાયુધમ્ ।
આવિર્બભૂવ શક્તીનામતિતીવ્રસ્તૃષાજ્વરઃ

યુદ્ધેષ્વનુદ્યમકૃતા સર્વોત્સાહવિરોધિના ।
તર્ષેણ તેન ક્વથિતં શક્તિસૈન્યં વિલોક્યસા ।
મન્ત્રિણી સહ પોત્રિણ્યા ભૃશં ચિન્તામવાપ હ

ઉવાચ તાં દણ્ડનાથામત્યાહિતવિશઙ્કિનીમ્ ।
રથસ્થિતા રથગતા તત્પ્રતી કારકર્મણે ।
સખિ પોત્રિણિ દુષ્ટસ્ય તર્ષાસ્ત્રમિદમાગતમ્

શિથિલીકુરુતે સૈન્યમસ્માકં હા વિધેઃ ક્રમઃ ।
વિશુષ્કતાલુમૂલાનાં વિભ્રષ્ટાયુધતેજસામ્ ।
શક્તીનાં મણ્ડલેનાત્ર સમરે સમુપેક્ષિતમ્

ન કાપિ કુરુતે યુદ્ધં ન ધારયતિ ચાયુધમ્ ।
વિશુષ્કતાલુમૂલત્વા દ્વક્તુમપ્યાલિ ન ક્ષમાઃ

ઈદૃશીન્નો ગતિં શ્રુત્વા કિં વક્ષ્યતિ મહેશ્વરી ।
કૃતા ચાપકૃતિર્દૈત્યૈરુપાયઃ પ્રવિચિન્ત્યતામ્

સર્વત્ર દ્વ્યષ્ટસાહસ્રાક્ષૌહિણ્યમત્ર પોત્રિણિ ।
એકાપિ શક્તિર્નૈવાસ્તિ યા તર્ષેણ ન પીડિતા

અત્રૈવાવસરે દૃષ્ટ્વા મુક્તશસ્ત્રાં પતાકિનીમ્ ।
રન્ધ્રપ્રહારિણો હન્ત બાણૈર્નિઘ્નન્તિ દાનવાઃ

અત્રોપાયસ્ત્વયા કાર્યો મયા ચ સમરોદ્યમે ।
ત્વદીયરથપર્વસ્થો યો ઽસ્તિ શીતમહાર્ણવઃ

તમાદિશ સમસ્તાનાં શક્તીનાં તર્ષનુત્તયે ।
નાલ્પૈઃ પાનીયપાનાદ્યૈરેતાસાં તર્ષસંક્ષયઃ

સ એવ મદિરાસિંધુઃ શક્ત્યૌઘં તર્પયિષ્યતિ ।
તમાદિશ મહાત્માનં સમરોત્સાહકારિણમ્ ।
સર્વતર્ષપ્રશમનં મહાબલવિવર્ધનમ્

ઇત્યુક્તે દણ્ડનાથા સા સદુપાયેન હર્ષિતા ।
આજુહાવ સુધાસિંધુમાજ્ઞાં ચક્રેશ્વરી રણે

સ મદાલસરક્તાક્ષો હેમાભઃ સ્રગ્વિભૂષિતઃ

પ્રણમ્ય દણ્ડનાથાં તાં તદાજ્ઞાપરિપારકઃ

આત્માનં બહુધા કૃત્વા તરુણાદિત્યપાટલમ્ ।
ક્વચિત્તાપિચ્છવચ્છ્યામં ક્વચિચ્ચ ધવલદ્યુતિમ્

કોટિશો મધુરાધારા કરિહસ્તસમાકૃતીઃ ।
વવર્ષ સિંધુરાજો ઽયં વાયુના બહુલીકૃતઃ

પુષ્કલાવર્તકાદ્યૈસ્તુ કલપક્ષયબલાહકૈઃ ।
નિષિચ્યમાનો મધ્યે ઽબ્ધિઃ શક્તિસૈન્યે પપાત હ

યદ્ગન્ધાઘ્રામમાત્રેણ મૃત ઉત્તિષ્ઠતે સ્ફુટમ્ ।
દુર્બલઃ પ્રબલશ્ચ સ્યાત્તદ્વવર્ષ સુરાંબુધિઃ

પરાર્દ્ધસંખ્યાતીતાસ્તા મધુધારાપરંપરાઃ ।
પ્રપિબન્ત્યઃ પિપાસાર્તૈર્મુખૈઃ શક્તય ઉત્થિતાઃ

યથા સા મદિરાસિંધુવૃષ્ટિર્દૈત્યેષુ નો પતેત્ ।
તથા સૈન્યસ્ય પરિતો મહાપ્રાકારમણ્ડલમ્

લઘુહસ્તતયા મુક્તૈઃ શરજાતૈઃ સહસ્રશઃ ।
ચકાર વિસ્મયકરી કદંબવનવાસિની

કર્મણા તેન સર્વે ઽપિ વિસ્મિતા મરુતો ઽભવન્ ।
અથ તાઃ શક્તયો ભૂરિ પિબન્તિ સ્મ રણાન્તરે

વિવિધા મદિરાધારા બલોત્સાહવિવર્ધનીઃ ।
યસ્યા યસ્યા મનઃપ્રીતી રુચિઃ સ્વાદો યથાયથા

તૃતીયે યુદ્ધદિવસે પ્રહરદ્વિતયાવધિ ।
સંતતં મધ્યધારાભિઃ પ્રવવર્ષ સુરાંબુધિઃ

ગૌડી પૈષ્ટી ચ માધ્વી ચ વરા કાદંબરી તથા ।
હૈતાલી લાઙ્ગલેયા ચ તાલજાતાસ્તથા સુરાઃ

કલ્પવૃક્ષોદ્ભવા દિવ્યા નાનાદેશસમુદ્ભવાઃ ।
સુસ્વાદુસૌરભાદ્યાશ્ચ શુભગન્ધસુખપ્રદાઃ

બકુલપ્રસવામોદા ધ્વનન્ત્યો બુદ્બુદોજ્જ્વલાઃ ।
કટુકાશ્ચ કષાયાશ્ચ મધુરાસ્તિક્તતાસ્પૃશઃ

બહુવર્મસમાવિષ્ટાશ્છેદિનીઃ પિચ્છલાસ્તથા ।
ઈષદમ્લાશ્ચ કટ્વમ્લા મધુરામ્લાસ્તથા પરાઃ

શસ્ત્રક્ષતરુગાહન્ત્રી ચાસ્થિસંધાનદાયિની ।
રણભ્રમહરા શીતા લઘ્વ્યસ્તદ્વત્કવોષ્ઠકાઃ

સંતાપહારિણીશ્ચૈવ વારુણીસ્તા જયપ્રદાઃ ।
નાનાવિધાઃ સુરાધારા વવર્ષ મદિરાર્ણવઃ

અવિચ્છિન્નં યામમાત્રમેકૈકા તત્ર યોગિની ।
ઐરાવતકર પ્રખ્યાં સુરાધારાં મુદા પપૌ

ઉત્તાનં વદનં કૃત્વા વિલોલરસનાશ્ચલમ્ ।
શક્તયઃ પ્રપપુઃ સીધુ મુદા મીલિતલોચનાઃ

ઇત્થં બહુવિધં માધ્વીધારાપાતૈઃ સુધાંબુધિઃ ।
આગતસ્તર્પયિત્વા તુ દિવ્યરૂપં સમાસ્થિતઃ

પુનર્ગત્વા દણ્ડનાથાં પ્રણમ્ય સ સુરાંબુધિઃ ।
સ્નિગ્ધગંભીરઘોષેણ વાક્યં ચેદમુવાચ તામ્

દેવિ પશ્ય મહારાજ્ઞિ દણ્ડમણ્ડલનાયિકે ।
મયા સંતર્પિતા મુગ્ધરૂપા શક્તિવરૂથિની

કાશ્ચિન્નૃત્યન્તિ ગાયન્ત્યો કલક્વણિતમેખલાઃ ।
નૃત્યન્તીનાં પુરઃ કાશ્ચિત્કરતાલં વિતન્વતે

કાશ્ચિદ્ધસંતિ વ્યાવલ્ગદ્વલ્ગુવક્ષોજમણ્ડલાઃ ।
પતન્ત્યન્યોન્યમઙ્ગેષુ કાશ્ચિદાનન્દમન્થરાઃ

કાશ્ચિદ્વલ્ગન્તિ ચ શ્રોણિવિગલન્મેખલાંબરાઃ ।
કાશ્ચિદુત્થાય સંનદ્ધા ઘૂર્ણયન્તિ નિરાયુધાઃ

ઇત્થં નિર્દિશ્યમાનાસ્તાઃ શક્તી મૈરેય સિંધુનાં ।
અવલોક્ય ભૃશં તુષ્ટા દણ્ડિની તમુવાચ હ

પરિતુષ્ટાસ્મિ મદ્યાબ્ધે ત્વયા સાહ્યમનુષ્ઠિતમ્ ।
દેવકાર્યમિદ કિઞ્ચ નિર્વિઘ્નિતમિદં કૃતમ્

અતઃ પરં મત્પ્રસાદાદ્દ્વાપરે યાજ્ઞિકૈર્મખે ।
સોમપાનવદત્યન્તમુપયોજ્યો ભવિષ્યસિ

મન્ત્રેણ પૂતં ત્વાં યાગે પાસ્યન્ત્યખિલદેવતાઃ ।
યાગેષુ મન્ત્રપૂતેન પીતેન ભવતા જનાઃ

સિદ્ધિમૃદ્ધિં બલં સ્વર્ગમપવર્ગં ચ બિભ્રતુ ।
મહેશ્વરી મહાદેવો બલદેવશ્ચ ભાર્ગવઃ ।
દત્તાત્રેયો વિધિર્વિષ્ણુસ્ત્વાં પાસ્યન્તિ મહાજનાઃ

યાગે સમર્ચિતસ્ત્વં તુ સર્વસિદ્ધિં પ્રદાસ્યસિ

ઇત્થં વરપ્રદાનેન તોષયિત્વા સુરાંબુધિમ્

મન્ત્રિણીં ત્વરયામાસ પુનર્યુદ્ધાય દણ્ડિની ।
પુનઃ પ્રવવૃતે યુદ્ધં શક્તીનાં દાનવૈઃ સહ

મુદાટ્ટહાસનિર્ભિન્નદિગષ્ટકધરા ધરમ્ ।
પ્રત્યગ્રમદિરામત્તાઃ પાટલીકૃતલોચનાઃ ।
શક્તયો દૈત્યચક્રેષુ ન્યપતન્નેકહેલયા

દ્વયેન દ્વયમારેજે શક્તીનાં સમદશ્રિયામ્ ।
મદરાગેણ ચક્ષૂંષિ દૈત્યરક્તેન શસ્ત્રિકા

તથા બભૂવ તુમુલં યુદ્ધં શક્તિસુરદ્વિષામ્ ।
યથા મૃત્યુરવિત્રસ્તઃ પ્રજાઃ સંહરતે સ્વયમ્

સંસ્ખલત્પદવિન્યાસા મદેનારક્તદૃષ્ટયઃ ।
સ્ખલદક્ષરસંદર્ભવીરભાષા રણોદ્ધતાઃ

કદંબગોલકાકારા દૃષ્ટસર્વાઙ્ગદૃષ્ટયઃ ।
યુવરાજસ્ય સૈન્યાનિ શક્ત્યઃ સમાનાશયન્

અક્ષૌહિણીશતં તત્ર દણ્ડિની સા વ્યદારયત્ ।
અક્ષૌહિણીસાર્દ્ધશત નાશયામાસ મન્ત્રિણી

અશ્વારૂઢાપ્રભૃતયો મદારુણવિલોચનાઃ ।
અક્ષૌહિણીસાર્ધશતં નિત્યુરન્તકમન્દિરમ્

અઙ્કુશેનાતિતીક્ષ્ણેન તુરગા રોહિણી રણે ।
ઉલૂકજિતમુન્મથ્ય પરલોકાતિથિં વ્યધાત્

સમ્પત્કરીપ્રભૃતયઃ શક્તિદણ્ડાધિનાયિકાઃ ।
પરુષેણ મુખાન્યન્યાન્યવરુદ્ધાવ્યદારયન્

અસ્તં ગતે સવિતરિ ધ્વસ્તસર્વબલં તતઃ ।
વિશુક્રં યોધયામાસ શ્યામલા કોપશાલિની

અસ્ત્રપ્રત્ય સ્ત્રમોક્ષેણ ભીષણેન દિવૌકસામ્ ।
મહતા રણકૃત્યેન યોધયામાસ મન્ત્રિણી

આયુધાનિ સુતીક્ષ્ણાનિ વિશુક્રસ્ય મહૌજસઃ ।
ક્રમશઃ ખણ્ડયન્તી સા કેતનં રથસારથિમ્

ધનુર્ગુણં ધનુર્દણ્ડં ખણ્ડયન્તી શિલીમુખૈઃ ।
અસ્ત્રેણ બ્રહ્મશિરસા જ્વલત્પાવકરોચિષા

વિશુક્રં મર્દયામાસ સો ઽપતચ્છૂર્ણવિગ્રહઃ ।
વિષઙ્ગં ચ મહાદૈત્યં દણ્ડનાથા મદોદ્ધતા

યોધયામાસ ચણ્ડન મુસલેન વિનિઘ્નતી ।
સચાપિ દુષ્ટો દનુજઃ કાલદણ્ડનિભાં ગદામ્ ।
ઉદ્યમ્ય બાહુના યુદ્ધં ચકારાશેષભીષણમ્

અન્યોન્યમઙ્ગં મૃદ્નન્તૌ ગદાયુદ્ધપ્રવર્તિનૌ ।
ચણ્ડાટ્ટહાસમુખરૌ પરિભ્રમણકારિણૌ

કુર્વાણૌ વિવિધાંશ્ચારાન્ઘૂર્ણન્તૌ તૂર્મવેષ્ટિનૌ ।
અન્યોન્યદણ્ડહનનૈર્મોહયન્તૌ મુહુર્મુહુઃ

અન્યોન્યપ્રહૃતૌ રન્ધ્રમીક્ષમાણૌ મહોદ્ધતૌ ।
મહામુસલદણ્ડાગ્રઘટ્ટનક્ષોભિતાંબરૌ ।
અયુધ્યેતાં દુરાધર્ષૌં દણ્ડિનીદૈત્યશેખરૌ

અથાર્દ્ધરાત્રિસમયપર્યન્તં કૃતસંગરા ।
સંક્રુદ્ધા હન્તુમારેભે વિષઙ્ગં દણ્ડનાયિકા

તં મૂર્ધનિ નિમગ્નેન હલેનાકૃષ્ય વૈરિણમ્ ।
કઠોરં તાડનં ચક્રે મુસલેનાથ પોત્રિણી

તતો મુસલઘાતેન ત્યક્તપ્રાણો મહાસુરઃ ।
ચૂર્ણિતેન શતાઙ્ગેન સમં ભૂતલમાશ્રયત્

ઇતિ કૃત્વા મહત્કર્મ મન્ત્રિણીદણ્ડનાયિકે ।
તત્રૈવ તં નિશા શેષં નિન્યતુઃ શિબિરં પ્રતિ