બોધસાર · અધ્યાય 31

[પ્. 583-]
સ્તનપાનલીલાષ્ટકમ્
શ્રીગુરુરુવાચ ।
ઉપમાતા ચ માતા ચ બાલ માતૃદ્વયં હિ તે ।
ઉપમાતુઃ સ્તનરસઃ કટ્વમ્લમધુતિક્તકઃ

જરામરણસંસર્ગી ચિત્રદ્વૈતરસાત્મકઃ ।
નિજમાતા તવ તુ યા તન્માહાત્મ્યં વદામ્યહમ્

સૈવ માતા પિતા સૈવ જગતામીશ્વરી ચ સા ।
સા ગતિઃ સા પરં તત્ત્વં તત્પરં નાસ્તિ કિઞ્ચન

ઉપમાતા કુજાતિસ્તે માતા તવ સુજાતિકા ।
તાં કુજાતિં પરિત્યજ્ય સુજાતિં માતરં શ્રય

નિજમાતુસ્સ્તનરસસ્ત્વદ્વૈતામૃતવર્ષણઃ ।
જન્મરોગજરાધ્વંસી સકૃત્પીતોઽપિ મૃત્યુજિત્

ન જ્ઞાતં મૂઢભાવેન પૂર્વમન્તરમેતયોઃ ।
ઇદાનીમન્તરં જ્ઞાત્વા નિજમાતુસ્સ્તનં પિબ

ત્વયા સ્તને પરિત્યક્તે સા વિદીર્ય મ્રિયેત ચેત્ ।
નશ્યેત્કુજાતિસંસર્ગો હિતમેવ તદા ભવેત્

માયાબ્રહ્મમયસ્તાત કિમર્થં વર્ણસંકરઃ ।
માયામેવ પરિત્યજ્ય શુદ્ધબ્રહ્મમયો ભવ