ભવિષ્ય પુરાણ · અધ્યાય 4.186

શ્રીકૃષ્ણ ઉવાચ ॥ ॥
પુણ્યા મહાનવમ્યસ્તિ તિથીનાં પ્રવરા તિથિઃ॥
સાનુષ્ઠેયા સુરૈઃ સર્વૈઃ પ્રજાપાલૈર્વિશેષતઃ

ભવાનુત્થાપયેત્પાર્થ સંવત્સરસુખાય વૈ ॥
ભૂતપ્રેતપિશાચાનાં પ્રીત્યર્થં ચોત્સવાય વા

॥ યુધિષ્ઠિર ઉવાચ ॥ ॥
કસ્માત્કાલાત્પ્રવૃત્તેયં નવમી મહશબ્દયુક્ ॥
કિમાદાવુપાન્નોઽસ્તિ ભગવન્નવમીવિધિઃ

યશોદાગર્ભસંભૂતેરુત યાત્રા પ્રવર્તતે ॥
ઉતાહો પૃર્વમેવાસીત્કૃતત્રેતાયુગાદિષુ

યદસ્યાં પ્રાણિનઃ કેચિન્મન્યંતે ઘાતયંતિ ચ ॥
હતાનાં પ્રાણિનાં તેષાં કા ગતિઃ પારલૌકિકી

સ્વયં ઘ્નતાં ઘાતયતામનુમોદયતાં તથા ॥
એતન્મે સંશયં પૂર્વં વક્તુમર્હસિ કેશવ

॥ શ્રીકૃષ્ણ ઉવાચ ॥ ॥
પાર્થ યા પરમા શક્તિરનંતા લોકવિશ્રુતા ॥
આદ્યા સર્વગતા શુદ્ધા ભાવ ગમ્યા મનોહરા

આદ્યાષ્ટમી કલાકાલી દ્વિતીયા સર્વમંગલા ॥
માયા કાત્યાયની દુર્ગા ચામુંડા શંકરપ્રિયા

ધ્યાયંતિ યાં યોગરતાં સા દેવી પરમેશ્વરી ॥
રૂપભેદૈર્નામભેદૈર્ભવાની પૂજ્યતે શિવા

અષ્ટમ્યાં તુ નવમ્યાં તુ દેવદાનવરાક્ષસૈઃ॥
ગંધર્વૈરુરગૈર્યજ્ઞૈઃ પૂજ્યતે કિન્નરૈર્નરૈઃ

અન્યેષ્વપિ યુગેષ્વાદૌ સૃષ્ટેઃ પૂર્વં પ્રદર્શિતા॥
પૂજ્યતેયં પુરા દેવી તેભ્યઃ પૂર્વતરૈઃ શુભૈઃ

આશ્વયુક્શુક્લપક્ષે ચ યાષ્ટમી મૂલ સંયુતા ॥
સા મહાનવમી નામ ત્રૈલોક્યેઽપિ સુદુર્લભા

કન્યાગતે સવિતરિ શુક્લપક્ષેઽષ્ટમી તુ યા ॥
મૂલનક્ષત્રસંયુક્તા સા મહાનવમી સ્મૃતા

અષ્ટમ્યાં ચ નવમ્યાં ચ જગન્માતરમમ્બિકામ્ ॥
પૂજયિત્વાઽઽશ્વિને માસિ વિશોકો જયતિ દ્વિષઃ

સંતર્જયંતી હુંકારૈઃ ખડ્ગાદિભિરહર્નિશમ્ ॥
નવમ્યાં પૂજિતા દેવી દદાતિ નવમં ફલમ્

સા પુણ્યા સા પવિત્રા ચ સા ધર્મસુખદાયિની ॥
તસ્માત્સદા પૂજનીયા ચામુંડા મુંડમાલિની

તસ્યાં યદ્યુપયુજ્યંતે પ્રાણિનો મહિષાદયઃ ॥
સર્વે તે સ્વર્ગતિં યાંતિ ઘ્નતાં પાપં ન વિદ્યતે

ન તથા બલિદાનેન પુષ્પધૂપવિલેપનૈઃ ॥
યથા સંતુષ્યતે લોકે મહિષૈર્વિંધ્યવાસિની

ઉદ્દિશ્ય દુર્ગાં હન્યંતે વિધાનાદ્યેઽત્ર જંતવઃ ॥
સ્વર્ગં તે યાંતિ કૌંતેય ઘાતયંતોઽપિ ભક્તિઃ

ભવાનીપ્રાઙ્ગણે પ્રાણા યેષાં યાતા યુધિષ્ઠિર ॥
તેષાં સ્વર્ગે ધ્રુવં વાસો વરાસ્તેઽપ્યરસાં પ્રિયાઃ

મન્વન્તરેષુ સર્વેષુ કલ્પેષુ કુરુનદન ॥
તેષુ સર્વેષુ ચૈવાસન્નવમીયં પુરાર્ચિતા

પ્રસિદ્ધાનાદિનિધના વર્ષેવર્ષે યુધિષ્ઠિર ॥
ભૂયોભૂયોઽવતારૈશ્ચ ભવાનીપૂજ્ય તેસુરૈઃ

અવતીર્ણા ભુવિ સદા નિત્યં દૈત્યનિબર્હિણી ॥
સ્વર્ગપાતાલમર્ત્યેષુ કરોતિ સ્થિતિપાલનમ્

પુનશ્ચૈષા મહાદેવી યશોદા ગર્ભસંભવા ॥
કંસાસુરસ્યોત્તમાઙ્ગે પાદં દત્ત્વા ગતાયુષઃ

તતઃ પ્રભૃતિ લોકેષુ યશોદાનંદદાયિનીમ્ ॥
વિંધ્યાચલે સ્થાપયિત્વા પુનઃ પૂજા પ્રવર્તિતા

પૂર્વપ્રવૃદ્ધોઽપિ પુનર્ભગિન્યા મહિમા કૃતઃ ॥
ભુવિ સર્વોપકારાય સર્વોપદ્રવશાંતયે

એવં વિંધ્યોપવાસિન્યા નવરાત્રોપવાસિનઃ ॥
એકરાત્રેણ નક્તેન સ્વશક્ત્યાઽયાચિતેન વા

યજનૈર્યાજનૈર્દેવાઃ સ્થાનેસ્થાને પુરેપુરે ॥
ગૃહેગૃહે ભક્તિપરે ર્ગ્રામેગ્રામે વનેવને

સ્નાતૈઃ પ્રમુદિતૈર્હૃષ્ટૈર્બ્રાહ્મણૈઃ ક્ષત્રિયૈર્નૃપૈઃ ॥
વૈશ્યૈઃ શૂદ્રૈર્ભક્તિચિત્રૈર્મ્લેચ્છૈરન્યૈશ્ચ માનવૈઃ

સ્ત્રીભિશ્ચ કુરુશાર્દૂલ તદ્વિધાનમિદં શૃણુ ॥
જયાભિલાષી નૃપતિઃ પ્રતિપત્પ્રભૃતિક્રમાત્

લોહાભિહારિકં કર્મ કારયેદ્યાવદષ્ટમિ ॥
પ્રાગુદક્પ્રવણે દેશે પતાકાભિરલંકૃતમ્

મણ્ડપં કારયેદ્દિવ્યં નવસપ્તકરં વરમ્ ॥
આગ્નેય્યાં કારયેત્કુણ્ડં હસ્તમાત્રં સુશોભનમ્

મેખલાત્રયસં યુક્તં યોન્યશ્વત્થદલાભયા ॥
રાજચિહ્નાનિ સર્વાણિ શસ્ત્રાણ્યસ્ત્રાણિ યાનિ ચ

આનીય મણ્ડપે તાનિ સર્વાણ્યેવાધિવાસયેત્ ॥
તતસ્તુ બ્રાહ્મણઃ સ્નાતઃ શુક્લાંબરધરઃ શુચિઃ

ૐકારપૂર્વકૈર્મન્ત્રૈસ્તલ્લિંગૈર્જુહુયાદ્ઘૃતમ્॥
લોહનામાભવત્પૂર્વં દાનવસ્તુ મહાબલઃ

સ દેવૈઃ સમરે ક્રુદ્ધૈર્બહુધા શકલીકૃતઃ ॥
તદંગસમ્ભવં લોહં યત્સર્વંદૃશ્યતે ક્ષિતૌ

શસ્ત્રાસ્ત્રમન્ત્રૈર્હોતવ્યં પાયસં ઘૃતસંયુતમ્ ॥
હુતશેષં તુરંગાણાં ગજાનામુપહારયેત્

લોહાભિહારિકં કર્મ તેનૈતદૃષિભિઃ સ્મૃતમ્ ॥
બદ્ધપ્રતિશરવ્યં ચ ગજાશ્વસમલંકૃતમ્

ભ્રામયેન્નગરે નિત્યં નંદિ ઘોષપુરસ્સરમ્॥
પ્રત્યહં નૃપતિઃ સ્નાત્વા સંપૂજ્ય પિતૃદેવતાઃ

પૂજયેદ્રાજચિહ્નાનિ ફલમાલ્યાનુલેપનૈઃ ॥
હુતશેષં પ્રદાતવ્યમૌપનાયનિકે દ્વિજે

તસ્યાભિહરણાદ્રાજ્ઞો વિજયઃ સમુદાહૃતઃ ॥
પૂજામંત્રાન્પ્રવક્ષ્યામિ પુરાણોક્તાનહં તવ

યૈઃ પૂજિતાઃ પ્રયચ્છન્તિ કીર્તિમાયુ ર્યશોબલમ॥
યથાંબુદશ્છાદયતિ શિવાયેમાં વસુન્ધરામ્

તથાચ્છાદય રાજાનં વિજયારોગ્યવૃદ્ધયે ॥ ( ઇતિ છત્રમન્ત્રઃ) ॥
ગન્ધર્વ કુલજાતસ્ત્વં માભૂયાઃ કુલદૂષકઃ

બ્રહ્મણઃ સત્યવાક્યેન સોમસ્ય વરુણસ્ય ચ ॥
પ્રભાવાઞ્ચ હુતાશસ્ય વર્દ્ધસ્વ ત્વં તુરંગમ

તેજસા ચૈવ સૂર્યસ્ય મુનીનાં તપસા યથા ॥
રુદ્રસ્ય બ્રહ્મચર્યેણ પવનસ્ય વલેન ચ॥ સ્મૃ ॥
સ્મર ત્વં રાજપુત્રોઽસિ કૌસ્તુભં ચ મણિં સ્મર ॥
યાં ગતિં બ્રહ્મહા ગચ્છેત્પિતૃહા માતૃહા તથા

ભૂમ્યર્થેનૃતવાદી ચ ક્ષત્રિયશ્ચ પરાઙ્મુખઃ ॥
સૂર્યાચન્દ્રમસૌ વાયુઃ પાવકશ્ચ ન યત્ર વૈ

વ્રજેચ્ચ તાં ગતિં ક્ષિપ્રં તચ્ચ પાપં ભવેત્કિલ ॥
વિકૃતિં યદિ ગચ્છેસ્ત્વં યુદ્ધેધ્વનિ તુરંગમ ॥
રિપૂન્વિજિત્ય સમરે સહ ભર્ત્રા સુખી ભવ

॥ ॥ ( ઇત્યશ્વમંત્રઃ) ॥ ॥
શક્રકેતો મહાવીર્ય સુપર્ણસ્ત્વય્યુપસ્થિતઃ ॥
પતત્રિરાડ્વૈનતેયસ્તથા નારાયણધ્વજઃ

કાશ્યપેયોઽમૃતો જ્ઞેયો નાગારિર્વિષ્ણુવાહનઃ ॥
અપ્રમેયો દુરાધર્ષો દેવશત્રુનિષૂદનઃ

ગરુત્માન્મારુતગતિસ્ત્વયિ સન્નિહિતઃ સ્થિતઃ ॥
શસ્ત્રવર્માયુધાન્યોધાન્રક્ષાસ્માંશ્ચ રિપૂન્દહ

॥ (ઇતિ ધ્વજમંત્રઃ) ॥ ॥
કુમુદૈરાવણૌ પદ્મઃ પુષ્પદંતોઽથ વામનઃ ॥
સુપ્રતીકોઞ્જનો નીલ એતેઽષ્ટૌ દેવયોનયઃ ॥

એતેષાં પુત્રપૌત્રાશ્ચ બલાન્યષ્ટૌ સમાશ્રિતાઃ ॥
ભદ્રો મન્દ્રો મૃગશ્ચૈવ ગજઃ સંકીર્ણ એવ ચ ॥
વનેવને પ્રસૂતાસ્તે કરિયોનિં મહાગજાઃ

પાતુ ત્વાં વસવો રુદ્રા આદિત્યાઃ સમરુદ્ગણાઃ ॥
ભર્તારં રક્ષ નાગેન્દ્ર સમયં પ્રતિપાલયન્

અવાપુર્હિ જયં યુદ્ધે ગમને સ્વસ્તિ નો વ્રજ ॥
શ્રીસ્તે સોમાદ્બલં વિષ્ણોસ્તેજઃ સૂર્યાજ્જવોનિલાત્ ॥
સ્થૈર્યં મેરોર્જયં રુદ્રાદ્યશો દેવાત્પુરંદરાત્

યુદ્ધે રક્ષંતુ નાગાસ્ત્વાં દિશશ્ચ સહ દૈવતૈઃ ॥
અશ્વિનૌ સહ ગંધર્વૈઃ પાંતુ ત્વાં સર્વતઃ સદા

( ઇતિ હસ્તિમંત્રઃ ॥)
હુતભુગ્વસવો રુદ્રા વાયુઃ સોમો મહર્ષયઃ ॥
નાગકિન્નરગન્ધર્વયક્ષ ભૂતગણાગ્રહાઃ

પ્રમથાશ્ચ સહાદિત્યૈર્ભૂતેશો માતૃભિઃ સહ ॥
શક્રસેનાપતિઃ સ્કન્દો વરુણશ્ચાશ્રિતાસ્ત્વયિ

પ્રદહંતુ રિપૂન્સર્વાન્રાજા વિજયમૃચ્છતુ ॥
યાનિ પ્રયુક્તાન્યરિભિર્દૂષણાનિ સમંતતઃ

એતાનિ પરશત્રૂણાં હતાનિ તવ તેજસા ॥
કાલનેમિવધે યુદ્ધે યુદ્ધે ત્રિપુરઘાતને

હિરણ્યકશિપોર્યુદ્ધે યુદ્ધે દેવાસુરે તથા ॥
શોભિતાસિ તથૈવાદ્ય શોભમાનાસ્તુ ભૂપતેઃ

નીલાં શ્વેતામિમાં દૃષ્ટ્વા નશ્યંત્વદ્ય નૃપારયઃ ॥
વ્યાધિભિર્વિવિધૈર્ઘોરૈઃ શસ્ત્રૈશ્ચ યુધિ નિર્જિતાઃ

સદ્યઃ સ્વસ્થા ભવંતિ સ્મ ત્વદ્વાતેનાપમાર્જિતાઃ

પૂતના રેવતી નામ્ના કાલરાત્રીતિ યા સ્મૃતા ॥
દહંત્વાશુ રિપૂન્સર્વાન્પતાકે ત્વામુપાગતાઃ

(ઇતિ પતાકામન્ત્રઃ ॥)
અસિશ્ચ રિપુહા ખડ્ગસ્તીક્ષ્ણકર્મા દુરાસદઃ ॥
શ્રીગર્ભો વિજયશ્ચૈવ ધર્મધારસ્તથૈવ ચ

ઇત્યષ્ટૌ તવ નામાનિ સ્વયમુક્તાનિ વેધસા ॥
નક્ષત્રં કૃત્તિકા તુભ્યં ગુરુર્દેવો મહેશ્વરઃ

હિરણ્યં ચ શરીરંતે ધાતા દેવોજનાર્દનઃ ॥
પિતા પિતામહો દેવસ્ત્વં માં પાલય સર્વદા

(ઇતિ ખડ્ગમન્ત્રઃ ॥)
શર્મપ્રદસ્ત્વં સમરે વર્મ સર્વાયસો હ્યસિ ॥
રક્ષ માં રક્ષણીયોઽહં તવ વર્મન્નમોઽસ્તુ તે

( ઇતિ વર્મમન્ત્રઃ ॥) ॥
દુન્દુભે ત્વં સપત્નાનાં .ઘોષાદ્ધૃદયકમ્પન્ ॥
ભવ ભૂમિપ સૈન્યાનાં તથા વિજયવર્દ્ધનઃ

યથા જીમૂતઘોષેણ હૃષ્યંતિ વરવારણાઃ ॥
તથાસ્તુ તવ શબ્દેન હર્ષોઽસ્માકં મુદાવહઃ

યથા જીમૂતશબ્દેન સ્ત્રીણાં ત્રાસોઽભિજાયતે ॥
તથા ચ તવ શબ્દેન ત્રસ્યંત્વસ્મદ્દ્વિષો રણે

( ઇતિ દુંદુભિમંત્રઃ ॥)
સર્વાયુધ મહામાત્ર સર્વદેવારિસૂદન ॥
ચાપ માં સર્વદા રક્ષ સાકં સાયકસત્તમૈઃ

( ઇતિ ચાપમન્ત્રઃ॥)
પુણ્યસ્ત્વં શઙ્ખ પુષ્પાણાં મઙ્ગલાનાં ચ મઙ્ગલમ્ ॥
વિષ્ણુના વિધૃતો નિત્યં મનઃશાંતિપ્રદો ભવ

( ઇતિ શઙ્ખમન્ત્રઃ ॥)
શશાંકકરસંકાશ હિમ ડિંડીરપાંડુર ॥
પ્રોત્સારયાશુ દુરિતં ચામરામરવલ્લભ

( ઇતિ ચામરમંત્રઃ ॥)
સર્વાયુધાનાં પ્રથમા નિર્મિતાઽસિ પિનાકિના ॥
શૂલાયુધાદ્વિનિષ્કૃષ્ય કૃત્વા મુષ્ટિપરિગ્રહમ્

ચંડિકાયાઃ પ્રદત્તાસિ સર્વદુષ્ટનિબર્હિણિ ॥
તથા વિસ્તારિતા ચાસિ દેવાનાં પ્રતિપાદિતા

સર્વ સત્ત્વાંગભૂતાસિ
સર્વાશુભનિવારિણિ ॥
છુરિકે રક્ષ માં નિત્યં શાન્તિં યચ્છ નમોઽસ્તુ તે

( ઇતિચ્છૂરિકામંત્રઃ ॥)
પ્રોત્સારણાય દુષ્ટાનાં સાધુસંગ્રહણાય ચ ॥
બ્રહ્મણા નિર્મિતશ્ચાસિ વ્યવહારપ્રસિદ્ધયે

યશો દેહિ સુખં દેહિ જગદો ભવ ભૂપતેઃ ॥
તાડયાશુ રિપૂન્સર્વાન્હેમદંડ નમોસ્તુ તે

( ઇતિ કનકદણ્ડમન્ત્રઃ ॥)
વિજયો જયદો જેતા રિપુઘાતી પ્રિયંકરઃ ॥
દુઃખહા ધર્મદઃ શાંતઃ સર્વારિષ્ટવિનાશનઃ

એતેઽષ્ટૌસંનિધૌ યસ્માત્તવ સિંહા મહાબલાઃ॥।
તેન સિંહાસનેતિ ત્વં વિપ્રૈર્વેદેષુ ગીયસે

ત્વયિ સ્થિતઃ શિવઃ સાક્ષાત્ત્વયિ શક્રઃ સુરેશ્વરઃ॥
ત્વયિ સ્થિતો હરિર્દેવસ્ત્વદર્થં તપ્યતે તપઃ

નમસ્તે સર્વતો ભદ્ર ભદ્રદો ભવ ભૂપતેઃ ॥
ત્રૈલોક્યજયસર્વસ્વ સિંહાસન નમોઽસ્તુ તે

( ઇતિ સિંહાસનમંત્રઃ ॥)
લોહાભિહારિકં કર્મ કૃત્વેદં મંત્રપૂર્વકમ્॥
ફલનૈવેદ્યકુસુમૈર્ધૂપદીપવિલેપનૈઃ

અષ્ટમ્યાં ધાવનં કૃત્વા પૂર્વાહ્ણે સ્નાનમાચરેત્॥

( અથ ગદ્યમ્)
દુર્ગાં કાંચનમૂર્તિં રૌપ્યાં વા પૈત્તલીં વાર્ક્ષી ચૈત્રીં તામ્રીં વાધિભવતઃ કૃત્વા
દારુવિચિત્રતોરણવિન્યસ્તાં શોભને સ્થાને પુરતો વિન્યસ્તદૃષ્ટાં વિચિત્રગૃહમધ્યગાં
સ્નાતાં કુંકુમચંદનગંધૈશ્ચતુઃસમૈશ્ચીરપટ્ટૈશ્ચર્ચિતગાત્રાં દેવીં કુસુમૈરભ્યર્ચ્ય
તાં બહુભિઃ પુષ્યમાણકીર્તિસ્તૈર્દ્વિજનનૈર્જનિતપરિતોષૈર્દિવાન્વિતો નરેંદ્રઃ સ્વયં
પ્રયચ્છેત્પુરોહિતૈઃ સાર્ધં બિલ્વપત્રેણાર્ચનેન મંત્રેણાનેન ભગવત્યૈ ॥
( ઇતિ ગદ્યં સમ્પૂર્ણં) ॥
જયંતી મંગલા કાલી ભદ્રકાલી કપાલિની ॥
દુર્ગા શિવા ક્ષમા ધાત્રી સ્વાહા સ્વધા નમોસ્તુ તે

અમૃતોદ્ભવઃ શ્રીવૃક્ષો મહાદેવીપ્રિયઃ સદા ॥
બિલ્વપત્રં પ્રયચ્છામિ પવિત્રં તે સુરેશ્વરિ

દુર્ગા સંપૂજનીયા ચ તદ્દિનાદ્દ્રોણપુષ્પયા ॥
સા ચાભીષ્ટા સુરેશાન્યાસ્તથા રૂઢવ્રણાયુતઃ ।

।
તતઃ ખડ્ગં નમસ્કૃત્ય શત્રૂણાં માનમર્દ્દનમ્ ॥
ઇચ્છેત્સ્વવિજયં રાજ્યં સુભિક્ષં ચાત્મનો નૃપ

પુનઃ પુનઃ પ્રણમ્યાથ ધ્યાયેચ્ચ હૃદયે શિવામ્॥
મહિષઘ્રીં બહુભુજાં કુમારીં સિંહવાહિનીમ્

દાનવાંસ્તર્જયંતીં ચ ખડ્ગોદ્ધતકરાં શુભામ્ ॥
ઘંટાક્ષસ્રગ્ધરાં દુર્ગાં રણારંભે વ્યવસ્થિતામ્

તતો જયજયાકારૈઃ સ્તવં કુર્યાદિમં તતઃ

સર્વમઙ્ગલમાઙ્ગલ્યે શિવે સર્વાર્થસાધિકે ॥
શરણ્યે ત્ર્યંબકે ગૌરિ નારાયણિ નમોઽસ્તુ તે

કુંકુમેન સમાલબ્ધે ચન્દનેન વિલેપિતે ॥
બિલ્વપત્રકૃતામાલે દુર્ગેઽહં શરણં ગતઃ

કૃત્વૈવમર્ચ્ચાં કૌરવ્ય અષ્ટમ્યાં જાગરં નિશિ ॥
નટનર્તનગીતૈશ્ચ કારયેત્તુ મહોત્સવમ્

એવં હૃષ્ટૈર્નિશાં નીત્વા પ્રભાતે ચારુણોદયે ॥
પાતયેન્મહિષાન્મેષાનગ્રતો નતકન્ધરાન્

શતં ચાપિ શતાર્ધં વા તદર્દ્ધં વા યથેચ્છયા ॥
સુરાસવભૃતૈઃ કુંભૈસ્તર્પયેત્પરમેશ્વરીમ્

કાપાલિકેભ્યસ્તદ્દેયં દાસીદાસજનૈસ્તથા ॥
વિભજ્ય સર્વં કૌંતેય સુહૃત્સંબંધિબંધુષુ

તતોપરાહ્ણસમયે નવમ્યાં સ્યંદને સ્થિતામ્ ॥
ભવાનીં ભ્રામયેદ્રાષ્ટ્રે સ્વયં રાજા સસૈન્યવાન્

સહસ્રૈઃ પુરુષૈર્વાપિ રથયુક્તૈઃ સુશિક્ષિતૈઃ ॥
શનૈઃ શનૈરધિકયા દીપ્ત્યા પ્રજ્વલદીપકૈઃ

આકૃષ્ટખડ્ગૈર્વીરૈશ્ચ ધાતુરક્તૈર્ગજૈસ્તથા ॥
નદદ્ભિઃ શંખપટહૈર્નૃત્યદ્ભિર્વારયૌવતૈઃ ॥
અલંકૃતાભિર્નારીભિર્બાલકૈઃ સુવિભૂષિતૈઃ

ભૂતેભ્યસ્તુ બલિં દદ્યાન્મંત્રેણાનેન સામિષમ્ ॥
સરક્તં સજલં સાન્નં ગન્ધપુષ્પાક્ષતૈર્યુતમ્ ॥૧ ૦૨॥
ત્રીંસ્ત્રીન્વારાંસ્ત્રિશૂલેન દિગ્વિદિક્ષુ ક્ષિપેદ્બલિમ્ ॥
બલિં ગૃહ્ણન્ત્વિમં દેવા આદિત્યા વસવસ્તથા

મરુતોઽથાશ્વિનૌ રુદ્રાઃ સુપર્ણાઃ પન્નગા ગ્રહાઃ ॥
અસુરા યાતુધાનાશ્ચ માતરશ્ચ પિશાચકાઃ ॥ ૧૦૪
શાકિન્યો યક્ષવેતાલા યોગિન્યઃ પૂતનાઃ શિવાઃ ॥
જૃંભકાઃ સિદ્ધગન્ધર્વા વ્યાલા વિદ્યાધરા ધરાઃ

દિક્પાલા લોકપાલાશ્ચ યે ચ વિઘ્નવિનાયકાઃ ॥
જગતાં શાંતિકર્તારો બ્રહ્માદ્યાશ્ચ મહર્ષયઃ

સવિઘ્નં મમ પાપં તે શામ્યંતુ પરિપન્થિનઃ॥
સૌમ્યા ભવંતુ તૃપ્તાશ્ચ ભૂતાઃ પ્રેતાઃ સુખાવહાઃ

ઇત્યેવં ભ્રામયેદ્રાષ્ટ્રે દુર્ગાં દેવીં રથે સ્થિતામ્॥
નરયાનેન વા પાર્થ તતોઽવિઘ્નં સમાપયેત્ ॥૧ ૦૮॥
અથોત્પન્નેષુ વિઘ્નેષુ ભૂતશાંતિં સમાચરેત્ ॥
યેન વિઘ્ના ન જાયંતે યાત્રાસંપૂર્ણતાં વ્રજેત્॥૧ ૦૯॥
એવં યે કુર્વતે યાત્રાં રાજાનોઽન્યેઽપિ માનવાઃ॥
મહાનવમ્યાં નંદાયાં પુત્રકા હૃષ્ટમાનસાઃ ॥૧૧ ૦॥
તે સર્વે પાપનિર્મુક્તા યાંતિ ભાગવતીં પુરીમ્ ॥૧ ૧૧॥
ન તેષાં શાવકોનાગ્નિર્ન ચૌરા ન વિનાયકાઃ ॥
વિઘ્નં કુર્વન્તિ રાજેન્દ્ર યેષાં તુષ્ટા મહેશ્વરી

નીરુજઃ સુખિનો ભોગભોક્તારો ભયવર્જિતાઃ॥
ભવંતિ ભક્તાઃ પુરુષાઃ ભગવત્યાઃ કિમુચ્યતે

ઇત્યેષ તે સમાખ્યાતો દુર્ગાદેવ્યા મહોત્સવઃ ॥
પઠતાં શૃણ્વતાં ચૈવ સર્વાશુભવિનાશનઃ

શૂલાગ્રભિન્નમહિષાસુરપૃષ્ઠવિષ્ટામૃતખાતખડ્ગરુચિરાંગદબાહુદણ્ડામ્ ॥
અભ્યર્ચ્ય પંચવદનાનુગતાં નવમ્યાં દુર્ગાં સુદુર્ગગહનાનિ તરંતિ મર્ત્યાઃ

ઇતિ શ્રીભવિષ્યે મહાપુરાણ ઉત્તરપર્વણિ શ્રીકૃષ્ણયુધિષ્ઠિરસંવાદે મહાનવમીવ્રતવર્ણનં
નામાષ્ટત્રિંશદુત્તરશતતમોઽધ્યાયઃ