bhairavastavam · અધ્યાય 1

ઓં વ્યાપ્તચરાચરભાવવિશેષં ચિન્મયમ્ એકમનન્તમ્ અનાદિમ્ ।
ભૈરવનાથમ્ અનાથશરણ્યં ત્વન્મયચિત્તતયા હૃદિ વન્દે

ત્વન્મયમ્ એતદ્ અશેષમ્ ઇદાનીં ભાતિ મમ ત્વદનુગ્રહશક્ત્યા ।
ત્વં ચ મહેશ ! સદૈવ મમાઽત્મા સ્વાત્મમયં મમ તેન સમસ્તમ્

સ્વાત્મનિ વિશ્વગતે ત્વયિ નાથે તેન ન સંસૃતિભીતેઃ કથાસ્તિ ।
સત્સ્વપિ દુર્ધરદુઃખવિમોહત્રાસવિધાયિષુ કર્મગણેષુ

અન્તક ! માં પ્રતિ મા દૃશમેનાં ક્રોધકરાલતમાં વિદધીહિ ।
શઙ્કરસેવનચિન્તનધીરો ભીષણભૈરવશક્તિમયોઽસ્મિ

ઇત્થમુપોઢભવન્મયસંવિદ્દિધિતિદારિતભૂરિતમિસ્રઃ ।
મૃત્યુયમાન્તકકર્મપિશાચૈર્નાથ ! નમોઽસ્તુ ન જાતુ બિભેમિ

પ્રોદિતસત્યવિબોધમરીચિપ્રેક્ષિતવિશ્વપદાર્થસતત્ત્વઃ ।
ભાવપરામૃતનિર્ભરપૂર્ણે ત્વયયહમાત્મનિ નિર્વૃતિમેમિ

માનસગોચરમેતિ યદૈવ ક્લેશદશાતનુતાપવિધાત્રી ।
નાથ ! તદૈવ મમ ત્વદભેદસ્તોત્રપરામૃતવૃષ્ટિરુદેતિ

શંકર ! સત્યમિદં વ્રતદાનસ્નાનતપો ભવતાપવિનાશિ ।
તાવકશાસ્ત્રપરામૃતચિન્તા સ્યન્દતિ ચેતસિ નિર્વૃતિધારામ્

નૃત્યતિ ગાયતિ હૃષ્યતિ ગાઢં સંવિદિયં મમ ભૈરવનાથ ।
ત્વાં પ્રિયમાપ્ય સુદર્શનમેકં દુર્લભમન્યજનૈઃ સમયજ્ઞમ્

વસુરસપૌષે કૃષ્ણદશમ્યામઽભિનવગુપ્તઃ સ્તવૈદમકરોત્ ।
યેન વિભુર્ભવમરુસન્તાપં શમયતિ ઝટિતિ જનસ્ય દયાલુઃ

સમાપ્તમ્ સ્તવમ્ ઇદમ્ અભિનવાખ્યમ્ પદ્યનવકમ્ ॥