Bhairavastava · ભાગ 11

વ્યાપ્તચરાચરભાવવિશેષં ચિન્મયમ્ એકમ્ અનન્તમ્ અનાદિમ્ ।
ભૈરવનાથમ્ અનાથશરણ્યં ત્વન્મયચિત્તતયા હૃદિ વન્દે ॥
ત્વન્મયમ્ એતદ્ અશેષમ્ ઇદાનીં ભાતિ મમ ત્વદનુગ્રહશક્ત્યા ।
ત્વં ચ મહેશ સદૈવ મમાત્મા સ્વાત્મમયં મમ તેન સમસ્તમ્ ॥
સ્વાત્મનિ વિશ્વગયે ત્વયિ નાથે તેન ન સંસૃતિભીતિકથાસ્તિ ।
સત્સ્વ્ અપિ દુર્ધરદુઃખવિમોહત્રાસવિધાયિષુ કર્મગણેષુ ॥
અન્તક માં પ્રતિ મા દૃશમ્ એનાં ક્રોધકરાલતમાં વિનિધેહિ ।
શઙ્કરસેવનચિન્તનધીરો ભીષણભૈરવશક્તિમયો ઽસ્મિ ॥
ઇત્થં ઉપોઢભવન્મયસંવિદ્દીધિતિદારિતભૂરિતમિસ્રઃ ।
મૃત્યુયમાન્તકકર્મપિશાચૈર્ નાથ નમો ઽસ્તુ ન જાતુ બિભેમિ ॥
પ્રોદિતસત્યવિબોધમરીચિપ્રેક્ષિતવિશ્વપદાર્થસતત્ત્વઃ ।
ભાવપરામૃતનિર્ભરપૂર્ણે ત્વય્ય્ અહમ્ આત્મનિ નિર્વૃતિમ્ એમિ ॥
માનસગોચરમ્ એતિ યદૈવ ક્લેશદશા ઽતનુતાપવિધાત્રી [1] ।
નાથ તદૈવ મમ ત્વદભેદસ્તોત્રપરામૃતવૃષ્ટિર્ ઉદેતિ ॥
શઙ્કર સત્યમ્ ઇદં વ્રતદાનસ્નાનતપો ભવતાપવિદારિ ।
તાવકશાસ્ત્રપરામૃતચિન્તા સ્યન્દતિ ચેતસિ નિર્વૃતિધારામ્ ॥
નૃત્યતિ ગાયતિ હૃષ્યતિ ગાઢં સંવિદ્ ઇયં મમ ભૈરવનાથ ।
ત્વાં પ્રિયમ્ આપ્ય સુદર્શનમ્ એકં દુર્લભમ્ અન્યજનૈઃ સમયજ્ઞમ્ ॥
વસુરસપૌષે કૃષ્ણદશમ્યામ્ અભિનવગુપ્તઃ સ્તવમ્ ઇમમ્ અકરોત્ ।
યેન વિભુર્ ભવમરુસન્તાપં શમયતિ જનસ્ય ઝટિતિ દયાલુઃ ॥
સમાપ્તમ્ સ્તવમ્ ઇદમ્ અભિનવાખ્યમ્ પદ્યનવકમ્ ॥