અમ્બાસ્તોત્રમ્ · અધ્યાય 1

. અમ્બાસ્તોત્રમ્ - સ્વામી વિવેકાનન્દ..
.. અમ્બાસ્તોત્રમ્ ..
કા ત્વં શુભકરે સુખદુઃખહસ્તે
આઘૂર્ણિતં ભવજલં પ્રબલોર્મિભઙ્ગૈઃ .
શાંતિં વિધાતુમિહ કિં બહુધા વિભગ્નામ્
મતઃ પ્રયત્નપરમાસિ સદૈવ વિશ્વે ..
સંપાદયત્યવિરતં ત્વવિરામવૃતા
યા વૈ સ્થિતા કૃતફલં ત્વકૃતસ્ય નેત્રી .
સા મે ભવત્વનિદિનં વરદા ભવાની
જાનામ્યહં ધ્રુવમિદં ધૃતકર્મપાશા ..
કો વા ધર્મઃ કિમકૃતં ક્વઃ કપાલલેખઃ
કિંવાદૃષ્ટં ફલમિહાસ્તિ હિ યાં વિના ભોઃ .
ઇચ્છાપાશૈર્નિયમિતા નિયમાઃ સ્વતંત્રૈઃ
યસ્યા નેત્રી ભવતિ સા શરણં મમાદ્યા ..
સન્તાનયન્તિ જલધિં જનિમૃત્યુજાલમ્
સંભાવયન્ત્યવિકૃતં વિકૃતં વિભગ્નમ્ .
યસ્યા વિભૂતય ઇહામિતશક્તિપાલાઃ
નાશ્રિત્ય તાં વદ કુત શરણં વ્રજામઃ ..
મિત્રે રિપૌ ત્વવિષમં તવ પદ્મનેત્રમ્
સ્વસ્થે દુઃસ્થે ત્વવિતથં તવ હસ્તપાતઃ .
મૃત્યુચ્છાયા તવ દયા ત્વમૃતઞ્ચ માતઃ
મા માં મુઞ્ચન્તુ પરમે શુભદૃષ્ટયસ્તે ..
ક્વાંબા સર્વા ક્વ ગણનં મમ હીનબુદ્ધેઃ
ધત્તું દોર્ભ્યામિવ મતિર્જગદેકધાત્રીમ્ .
શ્રીસઞ્ચિન્ત્યં સુચરણમભયપતિષ્ઠમ્
સેવાસારૈરભિનુતં શરણં પ્રપદ્યે ..
યા મામા જન્મ વિનયત્યતિદુઃખમાર્ગૈઃ
આસંસિદ્ધેઃ સ્વકલિતૈર્લ્લલિતૈર્વિલાસૈઃ .
યા મે બુદ્ધિં સુવિદધે સતતં ધરણ્યમ્
સાંબા સર્વા મમ ગતિઃ સફલે ફલે વા ..