અગસ્ત્યાષ્ટકમ્ · અધ્યાય 1

અદ્ય મે સફલં જન્મ ચાદ્ય મે સફલં તપઃ ।
અદ્ય મે સફલં જ્ઞાનં શમ્ભો ત્વત્પાદદર્શનાત્

કૃતાર્થોઽહં કૃતાર્થોઽહં કૃતાર્થોઽહં મહેશ્વર ।
અદ્ય તે પાદપદ્મસ્ય દર્શનાત્ભક્તવત્સલ

શિવશ્શમ્ભુઃ શિવશ્શમ્ભુઃ શિવશ્શમ્ભુઃ શિવશ્શિવઃ ।
ઇતિ વ્યાહરતો નિત્યં દિનાન્યાયાન્તુ યાન્તુ મે

શિવે ભક્તિશ્શિવે ભક્તિશ્શિવે ભક્તિર્ભવેભવે ।
સદા ભૂયાત્ સદા ભૂયાત્સદા ભૂયાત્સુનિશ્ચલા

આજન્મ મરણં યસ્ય મહાદેવાન્યદૈવતમ્ ।
માજનિષ્યત મદ્વંશે જાતો વા દ્રાગ્વિપદ્યતામ્

જાતસ્ય જાયમાનસ્ય ગર્ભસ્થસ્યાઽપિ દેહિનઃ ।
માભૂન્મમ કુલે જન્મ યસ્ય શમ્ભુર્ન-દૈવતમ્

વયં ધન્યા વયં ધન્યા વયં ધન્યા જગત્ત્રયે ।
આદિદેવો મહાદેવો યદસ્મત્કુલદૈવતમ્

હર શમ્ભો મહાદેવ વિશ્વેશામરવલ્લભ ।
શિવશઙ્કર સર્વાત્મન્નીલકણ્ઠ નમોઽસ્તુ તે

અગસ્ત્યાષ્ટકમેતત્તુ યઃ પઠેચ્છિવસન્નિધૌ ।
શિવલોકમવાપ્નોતિ શિવેન સહ મોદતે