108 Buddhist stotras · અધ્યાય 58

તથાગતાદ્યાસ્તથતાં તત્ત્વમાપુર્મહત્તરમ્ ।
ધારણીધારણાદ્યસ્યાઃ પ્રતિસરાં નમામિ તામ્ ॥

રણે શક્રો ઽજયદ્દૈત્યાન્ ધારણીધ્વજધૃગ્ બહૂન્ ।
સંગ્રામજયદાં ભીમાં પ્રતિસરાં નમામિ તામ્ ॥

યત્પ્રભાવાદ્ બ્રહ્મદત્તો ઽલભદ્ રાજ્યમકણ્ટકમ્ ।
સાર્વભૌમપ્રદાં દેવીં પ્રતિસરાં નમામિ તામ્ ॥

બહ્વપરાધો ઽપિ યદ્ભક્તો રાજ્યાધિકારમાપ્તવાન્ ।
શસ્ત્રાદિભીતિસંહત્રીં પ્રતિસરાં નમામિ તામ્ ॥

રત્નાન્યવાપુર્વણિજો યાં સ્મૃત્વોદધિનિર્ગતાઃ ।
સર્વબાધાપ્રશમનીં પ્રતિસરાં નમામિ તામ્ ॥

બુદ્ધાધિષ્ઠાનતો બુદ્ધાભયદાં ભયનાશિનીમ્ ।
ભવામ્બુધિનિમગ્નાનાં નમો મન્ત્રાનુસારિણીમ્ ॥

યન્મન્ત્રોચ્ચારણાદેવ ષડીતયઃ સુદારુણાઃ ।
નાશં પ્રયાન્તિ વરદાં નમો મન્ત્રામુસારિણીમ્ ॥

મન્ત્રાનુસારિણો લોકાન્ નાન્યે મન્ત્રાદયો ગ્રહાઃ ।
પીડયન્તિ પ્રિયાંશ્ચાપિ નમો મન્ત્રાનુસારિણીમ્ ॥

બુદ્ધો ઽભ્યભાષદ્ ગાથાસ્તા યન્મન્ત્રકથનાન્તરમ્ ।
યાભિઃ સર્વત્ર સ્વસ્તિ સ્યાન્નમો મન્ત્રાનુસારિણીમ્ ॥

કલૌ બુદ્ધવિહીને ઽસ્મિન્ લોકાનાં હિતમાચરેત્ ।
પાપોત્પાતપ્રશમનીં નમો મન્ત્રાનુસારિણીમ્ ॥

દુષ્ટં કૃષ્ણભુજઙ્ગં ચ નરઃ સ્વાન્તિકં પાલયેત્ ।
યસ્યા મન્ત્રાનુભાવેન માયૂરીં પ્રણમામિ તામ્ ॥

બ્રહ્માદયો લોકપાલા યદ્ધારણ્યા સમાપ્નુવન્ ।
સ્વાનિ સ્વાન્યધિકારાણિ માયૂરીં પ્રણમામિ તામ્ ॥

સ્વર્ણાવભાસં શિખિનં નાલભજ્જપિનં કુધીઃ ।
અમોઘેનાપિ પાશેન માયૂરીં પ્રણમામિ તામ્ ॥

યન્મન્ત્રજપતો જીવાઃ પ્રાજીવઞ્છુષ્કપાદપાઃ ।
મૃતસંજીવિનીં દેવીં માયૂરીં પ્રણમામિ તામ્ ॥

યન્મન્ત્રિસઙ્ગાત્ પવનો મહોપદ્રવશાન્તિકૃત્ ।
બુદ્ધાનાં બોધિદાં નિત્યં માયૂરીં પ્રણમામિ તામ્ ॥

યદ્ધારણીમનુજપન્ રાહુલો ભદ્રમાપ્તવાન્ ।
વિહેઠિતો ગ્રહૈઃ સર્વૈઃ શીતવતીં નમામ્યહમ્ ॥

પાપતાપે શીતકરીં શીતલાદ્યુપસર્ગતઃ ।
શીતોષ્ણદુઃખશમનીં શીતવતીં નમામ્યહમ્ ॥

મન્ત્રગ્રન્થિતસૂત્રાણાં ધારણાલ્લક્ષયોજનમ્ ।
પથિકાનાં પાલયિત્રીં શીતવતીં નમામ્યહમ્ ॥

શ્મશાનસ્થેન મુનિના યા સમુચ્ચારિતા પુરા ।
ગ્રહોપદ્રવશાન્ત્યર્થં શીતવતીં નમામ્યહમ્ ॥

ગ્રહાભિભૂતવાતાનાં ગ્રન્થિપદવિધારિણામ્ ।
ગ્રહભીતિપ્રશમનીં શીતવતીં નમામ્યહમ્ ॥

મહાસાહસ્રિકે લોકે સાહસ્રહિતકારિણામ્ ।
સહસ્રસત્ત્વજનનીં નૌમિ સાહસ્રમર્દિનીમ્ ॥

સોપદ્રવાયાં વૈશાલ્યાં મહોત્સવો યતઃ સદા ।
મહોપસર્ગશમનીં નૌમિ સાહસ્રમર્દિનીમ્ ॥

યક્ષરાક્ષસભૂતાનાં દમનીં દુષ્ટચેતસામ્ ।
દુરિતોપદ્રવહતાં નૌમિ સાહસ્રમર્દિનીમ્ ॥

યદ્ધારણીપઠનતો રક્ષિતઃ શાક્યકેશરી ।
વિષતો વિષદિગ્ધાં તાં નૌમિ સાહસ્રમર્દિનીમ્ ॥

મધુમિશ્રિતભૈષજ્યં સર્વરોગનિવારણમ્ ।
મૃતસઞ્જીવનં લોકે નૌમિ સાહસ્રમર્દિનીમ્ ॥