108 Buddhist stotras · અધ્યાય 43

સૌવર્ણવર્ણં કલવિઙ્કઘોષં બ્રહ્મસ્વરં કારુણિકં સુસેવ્યમ્ ।
નરોત્તમં શીલવિશુદ્ધદેહં શ્રીમન્મહાબોધિમહં નમામિ ॥

શાક્યેન્દ્રવંશોદ્ભવદિવ્યદેહં તૃષ્ણાચ્છિદં મારભિદં જિનેશમ્ ।
જ્ઞાનાસ્પદં ક્લેશભિદં દિનેશં શ્રીમન્મહાબોધિમહં નમામિ ॥

સમન્તભદ્રં વરલક્ષણાઙ્ગં સત્ત્વાર્થસિદ્ધિં સુકૃતૈઃ પ્રણમ્યમ્ ।
શ્રેયસ્કરં સત્ત્વહિતૈકચિત્તં શ્રીમન્મહાબોધિમહં નમામિ ॥

ધર્મોદકં યઃ કૃપયોત્સસર્જ રાગાગ્નિસન્દીપિતપુદ્ગલાનામ્ ।
સુખાય સંબોધિપયોમુચં તં શ્રીમન્મહાબોધિમહં નમામિ ॥

ભવાબ્ધિનિસ્તારણસેતુભૂતં તથાગતં તત્ત્વવિદં નૃસિંહમ્ ।
ત્રૈલોક્યનાથં વરબોધિરત્નં શ્રીમન્મહાબોધિમહં નમામિ ॥

પદાર્થસમ્પાદનસુવ્રતસ્થં માયાસુતં મારભિદં જિતારિમ્ ।
શાસ્તારમગ્ર્યં વરબોધિસત્ત્વં શ્રીમન્મહાબોધિમહં નમામિ ॥

લોકેશનાથં હરિનાથનાથં ભૂતેશનાથં સુરનાથનાથમ્ ।
કૃતાન્તનાથં નરનાથનાથં શ્રીમન્મહાબોધિમહં નમામિ ॥

સ બુદ્ધરૂપઃ સ હિ ધર્મરૂપઃ સ એવ સંઘો ઽપિ વિનેયકાનામ્ ।
અભૂચ્છરણ્યઃ શરણાગતાનાં શ્રીમન્મહાબોધિમહં નમામિ ॥