स्कन्द पुराण · अध्याय 7.362

॥ ईश्वर उवाच ॥ ॥
ततो गच्छेन्महादेवि गोष्पदस्योत्तरे स्थितम् ॥
गव्यूतिद्वितयेनैव वलाय इति विश्रुतम्

तत्रैकादशरुद्राणां स्थानलिंगान्यपि प्रिये ॥
अजैकपादहिर्बुध्न्यः संतीत्यादीनि नामतः ॥
पूजयेत्तानि विधिवन्मुच्यते सर्वपातकैः

इति श्रीस्कांदे महापुराण एकाशीतिसाहस्र्यां संहितायां सप्तमे प्रभासखण्डे प्रथमे प्रभासक्षेत्रमाहात्म्य एकादशरुद्रलिंगमाहात्म्यवर्णनंनाम द्विषष्ट्युत्तरत्रिशततमोऽध्यायः