पैप्पलाद-संहिता · अध्याय 18.67

प्रेमां मात्रां मिमीमहे
यथापरं न मासातै ।
शते शरत्सु नो पुरा ॥

उद् इमाम् (…) ॥

अपेमम् (…) ॥

निर् इमां मात्रां मिमीमहे
यथा (…) ॥

अमासि मात्रां स्वर् अगाम्
आयुष्मान् भूयासम् ।
यथापरं न मासातै ।
शते शरत्सु नो पुरा ॥

प्राणो अपान उत वा व्यान
आयुश् चक्षुर् दृशे सूर्याय ।
अपरिपरेण पथा
यमराज्ञः पितॄन् गच्छ ॥

ये नः पितुः पितरो ये पितामहा
य आविविशुर् उर्व् अन्तरिक्षम् ।
य आक्षीयन्ति पृथिवीम् उत द्यां
तेभ्यः पितृभ्यो नमसा विधेम ॥

ये अग्रवः शशमानाः परेषु
हित्वा द्वेषांस्य् अनपत्यवन्तः ।
ते द्याम् उदित्याविदन्त लोकं
नाकस पृष्ठे अदि दीध्यानाः ॥

उदन्वती द्यौर् अवमा
पीलूमतीति मध्यमा ।
तृतीया ह प्रद्यौर् इति
यस्यां पितर आसते ॥

इदम् इद् वा उत्तमं
दिवि पश्यति सूर्यम् ।
मात्रा पुत्रं यथा सिचा-
-अभ्य् एनं भूम ऊर्णुहि ॥ भत्त्. एमं]