તૈત્તિરીયોપનિષદ · અધ્યાય 2.8
ભીષાસ્માદ્વાતઃ પવતે । ભીષોદેતિ સૂર્યઃ । ભીષાસ્માદગ્નિશ્ચેન્દ્રશ્ચ । મૃત્યુર્ધાવતિ પઞ્ચમ ઇતિ । સૈષાનન્દસ્ય મીમાંસા ભવતિ । યુવા સ્યાત્સાધુયુવાધ્યાયકઃ । આશિષ્ઠો દૃઢિષ્ઠો બલિષ્ઠઃ । તસ્યેયં પૃથિવી સર્વા વિત્તસ્ય પૂર્ણા સ્યાત્ । સ એકો માનુષ આનન્દઃ । તે યે શતં માનુષા આનન્દાઃ ॥
સ એકો મનુષ્યગન્ધર્વાણામાનન્દઃ । શ્રોત્રિયસ્ય ચાકામહતસ્ય । તે યે શતં મનુષ્યગન્ધર્વાણામાનન્દાઃ । સ એકો દેવગન્ધર્વાણામાનન્દઃ । શ્રોત્રિયસ્ય ચાકામહતસ્ય । તે યે શતં દેવગન્ધર્વાણામાનન્દાઃ । સ એકઃ પિતૄણાં ચિરલોકલોકાનામાનન્દઃ । શ્રોત્રિયસ્ય ચાકામહતસ્ય । તે યે શતં પિતૄણાં ચિરલોકલોકાનામાનન્દાઃ । સ એક આજાનજાનાં દેવાનામાનન્દઃ ॥
શ્રોત્રિયસ્ય ચાકામહતસ્ય । તે યે શતમ્ આજાનજાનાં દેવાનામાનન્દાઃ । સ એકઃ કર્મદેવાનાં દેવાનામાનન્દઃ । યે કર્મણા દેવાનપિયન્તિ । શ્રોત્રિયસ્ય ચાકામહતસ્ય । તે યે શતં કર્મદેવાનાં દેવાનામાનન્દાઃ । સ એકો દેવાનામાનન્દઃ । શ્રોત્રિયસ્ય ચાકામહતસ્ય । તે યે શતં દેવાનામાનન્દાઃ । સ એક ઇન્દ્રસ્યાનન્દઃ ॥
શ્રોત્રિયસ્ય ચાકામહતસ્ય । તે યે શતમિન્દ્રસ્યાનન્દાઃ । સ એકો બૃહસ્પતેરાનન્દઃ । શ્રોત્રિયસ્ય ચાકામહતસ્ય । તે યે શતં બૃહસ્પતેરાનન્દાઃ । સ એકઃ પ્રજાપતેરાનન્દઃ । શ્રોત્રિયસ્ય ચાકામહતસ્ય । તે યે શતં પ્રજાપતેરાનન્દાઃ । સ એકો બ્રહ્મણ આનન્દઃ । શ્રોત્રિયસ્ય ચાકામહતસ્ય ॥
સ યશ્ચાયં પુરુષે । યશ્ચાસાવાદિત્યે । સ એકઃ । સ ય એવંવિત્ । અસ્માલ્લોકાત્પ્રેત્ય । એતમન્નમયમાત્માનમુપસઙ્ક્રામતિ । એતં પ્રાણમયમાત્માનમુપસઙ્ક્રામતિ । એતં મનોમયમાત્માનમુપસઙ્ક્રામતિ । એતં વિજ્ઞાનમયમાત્માનમુપસઙ્ક્રામતિ । એતમાનન્દમયમાત્માનમુપસઙ્ક્રામતિ । તદપ્યેષ શ્લોકો ભવતિ ॥
મૂળ પાઠ: Taittirīya-Upaniṣad with Śaṃkarabhāṣya · Edition: Ten Principal Upaniṣads with Śaṅkarabhāṣya, Works of Śaṅkarācārya in original Sanskrit, vol. 1, Delhi: Motilal Banarsidass (first edition 1964, reprint 2007) Aitareya-Āraṇyaka Aitareya-Brāhmaṇa Aitareya-Upaniṣad Bṛhadāraṇyaka-Upaniṣad Bhagavad-Gītā Chāndogya-Upaniṣad Īśā-upaniśad Kaṭha-Upaniṣad Kauṣītaki-Upaniṣad Mānava-Dharma-Śastra Mahābhārata Muṇḍaka-Upaniṣad Praśna-Upaniśad Śatapatha-Brāhmaṇa · Data entry Ivan Andrijanić · GRETIL (Göttingen) · CC BY-NC-SA 4.0