તૈત્તિરીયોપનિષદ · અધ્યાય 2.2

અન્નાદ્વૈ પ્રજાઃ પ્રજાયન્તે । યાઃ કાશ્ચ પૃથિવીંશ્રિતાઃ । અથો અન્નેનૈવ જીવન્તિ । અથૈનદપિ યન્ત્યન્તતઃ । અન્નં હિ ભૂતાનાં જ્યેષ્ઠમ્ । તસ્માત્ સર્વૌષધમુચ્યતે । સર્વં વૈ તે ઽન્નમાપ્નુવન્તિ । યે ઽન્નં બ્રહ્મોપાસતે । અન્નં હિ ભૂતાનાં જ્યેષ્ઠમ્ । તસ્માત્ સર્વૌષધમુચ્યતે । અન્નાદ્ભૂતાનિ જાયન્તે । જાતાન્યન્નેન વર્ધન્તે । અદ્યતે ઽત્તિ ચ ભૂતાનિ । તસ્માદન્નં તદુચ્યત ઇતિ । તસ્માદ્વા એતસ્માદન્નરસમયાત્ । અન્યો ઽન્તર આત્મા પ્રાણમયઃ । તેનૈષ પૂર્ણઃ । સ વા એષ પુરુષવિધ એવ । તસ્ય પુરુષવિધતામ્ । અન્વયં પુરુષવિધઃ । તસ્ય પ્રાણ એવ શિરઃ । વ્યાનો દક્ષિણઃ પક્ષઃ । અપાન ઉત્તરઃ પક્ષઃ । આકાશ આત્મા । પૃથિવી પુચ્છં પ્રતિષ્ઠા । તદપ્યેષ શ્લોકો ભવતિ ॥