શ્રીવેંકટેશકરાવલમ્બસ્તોત્રમ્ · અધ્યાય 1

.. શ્રી વેઙ્કટેશ કરાવલમ્બ સ્તોત્રમ્ ..
શ્રી શેષશૈલ સુનિકેતન દિવ્યમૂર્તે
નારાયણાચ્યુત હરે નલિનાયતાક્ષ .
લીલાકટાક્ષ પરિરક્ષિત સર્વલોક
શ્રી વેઙ્કટેશ મમ દેહિ કરાવલમ્બમ્ .. ૧..
બ્રહ્માદિવન્દિતપદામ્બુજ શઙ્ખપાણે
શ્રીમત્સુદર્શન સુશોભિત દિવ્યહસ્ત .
કારુણ્યસાગર શરણ્ય સુપુણ્યમૂર્તે
શ્રી વેઙ્કટેશ મમ દેહિ કરાવલમ્બમ્ .. ૨..
વેદાન્ત- વેદ્ય ભવસાગર- કર્ણધાર
શ્રીપદ્મનાભ કમલાર્ચિતપાદપદ્મ .
લોકૈક- પાવન પરાત્પર પાપહારિન્
શ્રી વેઙ્કટેશ મમ દેહિ કરાવલમ્બમ્ .. ૩..
લક્ષ્મીપતે નિગમલક્ષ્ય નિજસ્વરૂપ
કામાદિદોષ પરિહારક બોધદાયિન્ .
દૈત્યાદિમર્દન જનાર્દન વાસુદેવ
શ્રી વેઙ્કટેશ મમ દેહિ કરાવલમ્બમ્ .. ૪..
તાપત્રયં હર વિભો રભસા મુરારે
સંરક્ષ માં કરુણયા સરસીરુહાક્ષ .
મચ્છિષ્યમિત્યનુદિનં પરિરક્ષ વિષ્ણો
શ્રી વેઙ્કટેશ મમ દેહિ કરાવલમ્બમ્ .. ૫..
શ્રી જાતરૂપનવરત્ન લસત્કિરીટ-
કસ્તૂરિકાતિલકશોભિલલાટદેશ .
રાકેન્દુબિમ્બ વદનામ્બુજ વારિજાક્ષ
શ્રી વેઙ્કટેશ મમ દેહિ કરાવલમ્બમ્ .. ૬..
વન્દારુલોક- વરદાન- વચોવિલાસ
રત્નાઢ્યહાર પરિશોભિત કમ્બુકણ્ઠ .
કેયૂરરત્ન સુવિભાસિ- દિગન્તરાલ
શ્રી વેઙ્કટેશ મમ દેહિ કરાવલમ્બમ્ .. ૭..
દિવ્યાઙ્ગદાઙ્કિત ભુજદ્વય મઙ્ગલાત્મન્
કેયૂરભૂષણ સુશોભિત દીર્ઘબાહો .
નાગેન્દ્ર- કઙ્કણ કરદ્વય કામદાયિન્
શ્રી વેઙ્કટેશ મમ દેહિ કરાવલમ્બમ્ .. ૮..
સ્વામિન્ જગદ્ધરણવારિધિમધ્યમગ્ન
મામુદ્ધારય કૃપયા કરુણાપયોધે .
લક્ષ્મીંશ્ચ દેહિ મમ ધર્મ સમૃદ્ધિહેતું
શ્રી વેઙ્કટેશ મમ દેહિ કરાવલમ્બમ્ .. ૯..
દિવ્યાઙ્ગરાગપરિચર્ચિત કોમલાઙ્ગ
પીતામ્બરાવૃતતનો તરુણાર્ક ભાસ
સત્યાંચ નાભ પરિધાન સુપત્તુ બન્ધ
શ્રી વેઙ્કટેશ મમ દેહિ કરાવલમ્બમ્ .. ૧૦..
રત્નાઢ્યદામ સુનિબદ્ધ- કટિ- પ્રદેશ
માણિક્યદર્પણ સુસન્નિભ જાનુદેશ .
જઙ્ઘાદ્વયેન પરિમોહિત સર્વલોક
શ્રી વેઙ્કટેશ મમ દેહિ કરાવલમ્બમ્ .. ૧૧..
લોકૈકપાવન- સરિત્પરિશોભિતાઙ્ઘ્રે
ત્વત્પાદદર્શન દિને ચ મમાઘમીશ .
હાર્દં તમશ્ચ સકલં લયમાપ ભૂમન્
શ્રી વેઙ્કટેશ મમ દેહિ કરાવલમ્બમ્ .. ૧૨..
કામાદિ- વૈરિ- નિવહોચ્યુત મે પ્રયાતઃ
દારિદ્ર્યમપ્યપગતં સકલં દયાલો .
દીનં ચ માં સમવલોક્ય દયાર્દ્ર દૃષ્ટ્યા
શ્રી વેઙ્કટેશ મમ દેહિ કરાવલમ્બમ્ .. ૧૩..
શ્રી વેઙ્કટેશ પદપઙ્કજ ષટ્પદેન
શ્રીમન્નૃસિંહયતિના રચિતં જગત્યામ્ .
યે તત્પઠન્તિ મનુજાઃ પુરુષોત્તમસ્ય
તે પ્રાપ્નુવન્તિ પરમાં પદવીં મુરારેઃ .. ૧૪..
.. ઇતિ શ્રી શૃઙ્ગેરિ જગદ્ગુરુણા શ્રી નૃસિંહ ભારતિ
સ્વામિના રચિતં શ્રી વેઙ્કટેશ કરાવલમ્બ સ્તોત્રં સંપૂર્ણમ્ ..