શ્રીત્રિપુરસુન્દરીમાનસપૂજાસ્ત૊ત્રમ્ · અધ્યાય 1

..શ્રીત્રિપુરસુન્દરીમાનસપૂજાસ્તોત્રમ્ ..
મમ ન ભજનશક્તિઃ પાદયોસ્તે ન ભક્તિ-
ર્ન ચ વિષયવિરક્તિર્ધ્યાનયોગે ન સક્તિઃ .
ઇતિ મનસિ સદાહં ચિન્તયન્નાદ્યશક્તે
રુચિરવચનપુષ્પૈરર્ચનં સંચિનોમિ .. ૧..
વ્યાપ્તં હાટકવિગ્રહૈર્જલચરૈરારૂઢદેવવ્રજૈઃ
પોતૈરાકુલિતાન્તરં મણિધરૈર્ભૂમીધરૈર્ભૂષિતમ્ .
આરક્તામૃતસિન્ધુમુદ્ધુરચલદ્વિચીચયવ્યાકુલ-
વ્યોમાનં પરિચિન્ત્ય સન્તતમહો ચેતઃ કૃતાર્થીભવ .. ૨..
તસ્મિન્નુજ્જ્વલરત્નજાલવિલસત્કાન્તિચ્છટાભિઃ સ્ફુટં
કુર્વાણં વિયદિન્દ્રચાપનિચયૈરાચ્છાદિતં સર્વતઃ .
ઉચ્ચૈઃશૃઙ્ગનિષણ્ણદિવ્યવનિતાબૃન્દાનનપ્રોલ્લસ-
દ્ગીતાકર્ણનનિશ્ચલાખિલમૃગં દ્વીપં નમસ્કુર્મહે .. ૩..
જાતીચમ્પકપાટલાદિસુમનઃસૌરભ્યસમ્ભાવિતં
હ્રીઙ્કારધ્વનિકણ્ઠકોકિલકુહૂપ્રોલ્લાસિચૂતદ્રુમમ્ .
આવિર્ભૂતસુગન્ધિચન્દનવનં દૃષ્ટિપ્રિયં નન્દનં
ચઞ્ચચ્ચઞ્ચલચઞ્ચરિકચટુલં ચેતશ્ચિરં ચિન્તય .. ૪..
પરિપતિતપરાગૈઃ પાટલક્ષોણિભાગો
વિકસિતકુસુમોચ્ચૈઃ પીતચન્દ્રાર્કરશ્મિઃ .
અલિશુકપિકરાજીકૂજિતૈઃ શ્રોત્રહારી
સ્ફુરતુ હૃદિ મદીયે નૂનમુદ્યાનરાજઃ .. ૫..
રમ્યદ્વારપુરપ્રચારતમસાં સંહારકારિપ્રભ
સ્ફૂર્જત્તોરણભારહારકમહાવિસ્તારહારદ્યુતે .
ક્ષોણીમણ્ડલહેમહારવિલસત્સંસારપારપ્રદ
પ્રોદ્યદ્ભક્તમનોવિહાર કનકપ્રાકાર તુભ્યં નમઃ .. ૬..
ઉદ્યત્કાન્તિકલાપકલ્પિતનભઃસ્ફૂર્જદ્વિતાનપ્રભ
સત્કૃષ્ણાગરુધૂપવાસિતવિયત્કાષ્ઠાન્તરે વિશ્રુતઃ .
સેવાયાતસમસ્તદૈવતગણૈરાસેવ્યમાનોઽનિશં
સોઽયં શ્રીમણિમણ્ડપોઽનવરતં મચ્ચેતસિ દ્યોતતામ્ .. ૭..
ક્વાપિ પ્રોદ્ભટપદ્મરાગકિરણવ્રાતેન સન્ધ્યાયિતં
કુત્રાપિ સ્ફુટવિસ્ફુરન્મરકતદ્યુત્યા તમિસ્રાયિતમ્ .
મધ્યાલમ્બિવિશાલમૌક્તિકરુચા જ્યોત્સ્નાયિતં કુત્રચિ-
ન્માતઃ શ્રીમણિમન્દિરં તવ સદા વન્દામહે સુન્દરમ્ .. ૮..
ઉત્તુઙ્ગાલયવિસ્ફુરન્મરકતપ્રોદ્યત્પ્રભામણ્ડલા-
ન્યાલોક્યાઙ્કુરિતોત્સવૈર્નવતૃણાકીર્ણસ્થલીશઙ્કયા .
નીતો વાજિભિરુત્પથં બત રથઃ સૂતેન તિગ્મદ્યુતે-
ર્વલ્ગાવલ્ગિગતહસ્તમસ્તશિખરં કષ્ટૈરિતઃ પ્રાપ્યતે .. ૯..
મણિસદનસમુદ્યત્કાન્તિધારાનુરક્તે
વિયતિ ચરમસન્ધ્યાશઙ્કિનો ભાનુરથ્યાઃ .
શિથિલિતગતકુપ્યત્સૂતહુઙ્કારનાદૈઃ
કથમપિ મણિગેહાદુચ્ચકૈરુચ્ચલન્તિ .. ૧૦..
ભક્ત્યા કિં નુ સમર્પિતાનિ બહુધા રત્નાનિ પાથોધિના
કિં વા રોહણપર્વતેન સદનં યૈર્વિશ્વકર્માકરોત્ .
આ જ્ઞાતં ગિરિજે કટાક્ષકલયા નૂનં ત્વયા તોષિતે
શમ્ભૌ નૃત્યતિ નાગરાજફણિના કીર્ણા મણિશ્રેણયઃ .. ૧૧.
.
વિદૂરમુક્તવાહનૈર્વિનમ્રમૌલિમણ્ડલૈ-
ર્નિબદ્ધહસ્તસંપુટૈઃ પ્રયત્નસંયતેન્દ્રિયૈઃ .
વિરિઞ્ચિવિષ્ણુશઙ્કરાદિભિર્મુદા તવામ્બિકે
પ્રતીક્ષ્યમાણનિર્ગમો વિભાતિ રત્નમણ્ડપઃ .. ૧૨..
ધ્વનન્મૃદઙ્ગકાહલઃ પ્રગીતકિંનરીગણઃ
પ્રનૃત્તદિવ્યકન્યકઃ પ્રવૃત્તમઙ્ગલક્રમઃ .
પ્રકૃષ્ટસેવકવ્રજઃ પ્રહૃષ્ટભક્તમણ્ડલો
મુદે મમાસ્તુ સન્તતં ત્વદીયરત્નમણ્ડપઃ .. ૧૩..
પ્રવેશનિર્ગમાકુલૈઃ સ્વકૃત્યરક્તમાનસૈ-
ર્બહિસ્થિતામરાવલીવિધીયમાનભક્તિભિઃ .
વિચિત્રવસ્ત્રભૂષણૈરુપેતમઙ્ગનાજનૈઃ
સદા કરોતુ મઙ્ગલં મમેહ રત્નમણ્ડપઃ .. ૧૪..
સુવર્ણરત્નભૂષિતૈર્વિચિત્રવસ્ત્રધારિભિ-
ર્ગૃહીતહેમયષ્ટિભિર્નિરુદ્ધસર્વદૈવતૈઃ .
અસંખ્યસુન્દરીજનૈઃ પુરસ્થિતૈરધિષ્ઠિતો
મદીયમેતુ માનસં ત્વદીયતુઙ્ગતોરણઃ .. ૧૫..
ઇન્દ્રાદીંશ્ચ દિગીશ્વરાન્સહપરિવારાનથો સાયુધા-
ન્યોષિદ્રૂપધરાન્સ્વદિક્ષુ નિહિતાન્સંચિન્ત્ય હૃત્પઙ્કજે .
શઙ્ખે શ્રીવસુધારયા વસુમતીયુક્તં ચ પદ્મં સ્મર-
ન્કામં નૌમિ રતિપ્રિયં સહચરં પ્રીત્યા વસન્તં ભજે .. ૧૬.
.
ગાયન્તીઃ કલવીણયાતિમધુરં હુઙ્કારમાતન્વતી-
ર્દ્વારાભ્યાસકૃતસ્થિતીરિહ સરસ્વત્યાદિકાઃ પૂજયન્ .
દ્વારે નૌમિ મદોન્મદં સુરગણાધીશં મદેનોન્મદાં
માતઙ્ગીમસિતામ્બરાં પરિલસન્મુક્તાવિભૂષાં ભજે .. ૧૭..
કસ્તૂરિકાશ્યામલકોમલાઙ્ગીં
કાદમ્બરીપાનમદાલસાઙ્ગીમ્ .
વામસ્તનાલિઙ્ગિતરત્નવીણાં
માતઙ્ગકન્યાં મનસા સ્મરામિ .. ૧૮..
વિકીર્ણચિકુરોત્કરે વિગલિતામ્બરાડમ્બરે
મદાકુલિતલોચને વિમલભૂષણોદ્ભાસિનિ .
તિરસ્કરિણિ તાવકં ચરણપઙ્કજં ચિન્તય-
ન્કરોમિ પશુમણ્ડલીમલિકમોહદુઘ્ધાશયામ્ .. ૧૯.
.
પ્રમત્તવારુણીરસૈર્વિઘૂર્ણમાનલોચનાઃ
પ્રચણ્ડદૈત્યસૂદનાઃ પ્રવિષ્ટભક્તમાનસાઃ .
ઉપોઢકજ્જલચ્છવિચ્છટાવિરાજિવિગ્રહઃ
કપાલશૂલધારિણીઃ સ્તુવે ત્વદીયદૂતિકાઃ .. ૨૦..
સ્ફૂર્જન્નવ્યયવાઙ્કુરોપલસિતાભોગૈઃ પુરઃ સ્થાપિતૈ-
ર્દીપોદ્ભાસિશરાવશોભિતમુખૈઃ કુમ્ભૈર્નવૈઃ શોભિના .
સ્વર્ણાબદ્ધવિચિત્રરત્નપટલીચઞ્ચત્કપાટશ્રિયા
યુક્તં દ્વારચતુષ્ટયેન ગિરિજે વન્દે મણી મન્દિરમ્ .. ૨૧.
.
આસ્તીર્ણારુણકમ્બલાસનયુતં પુષ્પોપહારાન્વિતં
દીપ્તાનેકમણિપ્રદીપસુભગં રાજદ્વિતાનોત્તમમ્ .
ધૂપોદ્ગારિસુગન્ધિસમ્ભ્રમમિલદ્ભૃઙ્ગાવલીગુઞ્જિતં
કલ્યાણં વિતનોતુ મેઽનવરતં શ્રીમણ્ડપાભ્યન્તરમ્ .. ૨૨..
કનકરચિતે પઞ્ચપ્રેતાસનેન વિરાજિતે
મણિગણચિતે રક્તશ્વેતામ્બરાસ્તરણોત્તમે .
કુસુમસુરભૌ તલ્પે દિવ્યોપધાનસુખાવહે
હૃદયકમલે પ્રાદુર્ભૂતાં ભજે પરદેવતામ્ .. ૨૩.
.
સર્વાઙ્ગસ્થિતિરમ્યરૂપરુચિરાં પ્રાતઃ સમભ્યુત્થિતાં
જૃમ્ભામઞ્જુમુખામ્બુજાં મધુમદવ્યાઘૂર્ણદક્ષિત્રયામ્ .
સેવાયાતસમસ્તસંનિધિસખીઃ સંમાનયન્તીં દૃશા
સંપશ્યન્પરદેવતાં પરમહો મન્યે કૃતાર્થં જનુઃ .. ૨૪..
ઉચ્ચૈસ્તોરણવર્તિવાદ્યનિવહધ્વાને સમુજ્જૃમ્ભિતે
ભક્તૈર્ભૂમિવિલગ્નમૌલિભિરલં દણ્ડપ્રણામે કૃતે .
નાનારત્નસમૂહનદ્ધકથનસ્થાલીસમુદ્ભાસિતાં
પ્રાતસ્તે પરિકલ્પયામિ ગિરિજે નીરાજનામુજ્જ્વલામ્ .. ૨૫..
પાદ્યં તે પરિકલ્પયામિ પદયોરર્ઘ્યં તથા હસ્તયોઃ
સૌધીભિર્મધુપર્કમમ્બ મધુરં ધારાભિરાસ્વાદય .
તોયેનાચમનં વિધેહિ શુચિના ગાઙ્ગેન મત્કલ્પિતં
સાષ્ટાઙ્ગં પ્રણિપાતમીશદયિતે દૃષ્ટ્યા કૃતાર્થી કુરુ .. ૨૬..
માતઃ પશ્ય મુખામ્બુજં સુવિમલે દત્તે મયા દર્પણે
દેવિ સ્વીકુરુ દન્તધાવનમિદં ગઙ્ગાજલેનાન્વિતમ્ .
સુપ્રક્ષાલિતમાનનં વિરચયન્સ્નિગ્ધામ્બરપ્રોઞ્છનં
દ્રાગઙ્ગીકુરુ તત્ત્વમમ્બ મધુરં તામ્બૂલમાસ્વાદય .. ૨૭.
.
નિધેહિ મણિપાદુકોપરિ પદામ્બુજં મજ્જના-
લયં વ્રજ શનૈઃ સખીકૃતકરામ્બુજાલમ્બનમ્ .
મહેશિ કરુણાનિધે તવ દૃગન્તપાતોત્સુકા-
ન્વિલોકય મનાગમૂનુભયસંસ્થિતાન્દૈવતાન્ .. ૨૮.
.
હેમરત્નવરણેન વેષ્ટિતં
વિસ્તૃતારુણવિતાનશોભિતમ્ .
સજ્જસર્વપરિચારિકાજનં
પશ્ય મજ્જનગૃહં મનો મમ .. ૨૯..
કનકકલશજાલસ્ફાટિકસ્નાનપીઠા-
દ્યુપકરણવિશાલં ગન્ધમત્તાલિમાલમ્ .
સ્ફુરદરુણવિતાં મઞ્જુગન્ધર્વગાનં
પરમશિવમહેલે મજ્જનાગારમેહિ .. ૩૦..
પીનોત્તુઙ્ગપયોધરાઃ પરિલસત્સંપૂર્ણચન્દ્રાનના
રત્નસ્વર્ણવિનિર્મિતાઃ પરિલસત્સૂક્ષ્મામ્બરપ્રાવૃતાઃ .
હેમસ્નાનઘટીસ્તથા મૃદુપટિરુદ્વર્તનં કૌસુમં
તૈલં કઙ્કતિકં કરેષુ દધતીર્વન્દેઽમ્બ તે દાસિકાઃ .. ૩૧.
.
તત્ર સ્ફાટિકપીઠમેત્ય શનકૈરુત્તારિતાલઙ્કૃતિ-
ર્નીચૈરુજ્ઝિતકઞ્ચુકોપરિહિતારક્તોત્તરીયામ્બરા .
વેણીબન્ધમપાસ્ય કઙ્કતિકયા કેશપ્રસાદં મના-
ક્કુર્વાણા પરદેવતા ભગવતી ચિત્તે મમ દ્યોતતામ્ .. ૩૨.
.
અભ્યઙ્ગં ગિરિજે ગૃહાણ મૃદુના તૈલેન સંપાદિતં
કાશ્મીરૈરગરુદ્રવૈર્મલયજૈરુદ્વર્તનં કારય .
ગીતે કિંનરકામિનીભિરભિતો વાદ્યે મુદા વાદિતે
નૃત્યન્તીમિહ પશ્ય દેવિ પુરતો દિવ્યાઙ્ગનામણ્ડલીમ્ .. ૩૩..
કૃતપરિકરબન્ધાસ્તુઙ્ગપીનસ્તનાઢ્યા
મણિનિવહનિબદ્ધા હેમકુમ્ભીર્દધાનાઃ .
સુરભિસલિલનિર્યદ્ગન્ધલુબ્ધાલિમાલાઃ
સવિનયમુપતસ્થુઃ સર્વતઃ સ્નાનદાસ્યઃ .. ૩૪..
ઉદ્ગન્ધૈરગરુદ્રવૈઃ સુરભિણા કસ્તૂરિકાવારિણા
સ્ફૂર્જત્સૌરભયક્ષકર્દમજલૈઃ કાશ્મીરનીરૈરપિ .
પુષ્પામ્ભોભિરશેષતીર્થસલિલૈઃ કર્પૂરપાથોભરૈઃ
સ્નાનં તે પરિકલ્પયામિ ગિરિજે ભક્ત્યા તદઙ્ગીકુરુ .. ૩૫..

પ્રત્યઙ્ગં પરિમાર્જયામિ શુચિના વસ્ત્રેણ સંપ્રોઞ્છનં
કુર્વે કેશકલાપમાયતતરં ધૂપોત્તમૈર્ધૂપિતમ્ .
આલીબૃન્દવિનિર્મિતાં યવનિકામાસ્થાપ્યરત્નપ્રભં
ભક્તત્રાણપરે મહેશગૃહિણિ સ્નાનામ્બરં મુચ્યતામ્ .. ૩૬.
.
પીતં તે પરિકલ્પયામિ નિબિડં ચણ્ડાતકં ચણ્ડિકે
સૂક્ષ્મં સ્નિગ્ધમુરીકુરુષ્વ વસનં સિન્દૂરપૂરપ્રભમ્ .
મુક્તારત્નવિચિત્રહેમરચનાચારુપ્રભાભાસ્વરં
નીલં કઞ્ચુકમર્પયામિ ગિરિશપ્રાણપ્રિયે સુન્દરિ .. ૩૭.
.
વિલુલિતચિકુરેણ ચ્છાદિતાંસપ્રદેશે
મણિનિકરવિરાજત્પાદુકાન્યસ્તપાદે .
સુલલિતમવલમ્બ્ય દ્રાક્સખીમંસદેશે
ગિરિશગૃહિણિ ભૂષામણ્ટપાય પ્રયાહિ .. ૩૮..
લસત્કનકકુટ્ટિમસ્ફુરદમન્દમુક્તાવલી-
સમુલ્લસિતકાન્તિભિઃ કલિતશક્રચાપવ્રજે .
મહાભરણમણ્ડપે નિહિતહેમસિંહાસનં
સખીજનસમાવૃતં સમધિતિષ્ઠ કાત્યાયનિ .. ૩૯..
સ્નિગ્ધં કઙ્કતિકામુખેન શનકૈઃ સંશોધ્ય કેશોત્કરં
સીમન્તં વિરચય્ય ચારુ વિમલં સિન્દૂરરેખાન્વિતમ્ .
મુક્તાભિર્ગ્રથિતાલકાં મણિચિતૈઃ સૌવર્ણસૂત્રૈઃ સ્ફુટં
પ્રાન્તે મૌક્તિકગુચ્છકોપલતિકાં ગ્રથ્નામિ વેણીમિમામ્ .. ૪૦.
.
વિલમ્બિવેણીભુજગોત્તમાઙ્ગ-
સ્ફુરન્મણિભ્રાન્તિમુપાનયન્તમ્ .
સ્વરોચિષોલ્લાસિતકેશપાશં
મહેશિ ચૂડામણિમર્પયામિ .. ૪૧.
.
ત્વામાશ્રયદ્ભિઃ કબરીતમિસ્રૈ-
ર્બન્દીકૃતં દ્રાગિવ ભાનુબિમ્બમ્ .
મૃડાનિ ચૂડામણિમાદધાનં
વન્દામહે તાવતમુત્તમાઙ્ગમ્ .. ૪૨..
સ્વમધ્યનદ્ધહાટકસ્ફુરન્મણિપ્રભાકુલં
વિલમ્બિમૌક્તિકચ્છટાવિરાજિતં સમન્તતઃ .
નિબદ્ધલક્ષચક્ષુષા ભવેન ભૂરિ ભાવિતં
સમર્પયામિ ભાસ્વરં ભવાનિ ફાલભૂષણમ્ .. ૪૩..
મીનામ્ભોરુહખઞ્જરીટસુષમાવિસ્તારવિસ્મારકે
કુર્વાણે કિલ કામવૈરિમનસઃ કન્દર્પબાણપ્રભામ્ .
માધ્વીપાનમદારુણેઽતિચપલે દીર્ઘે દૃગમ્ભોરુહે
દેવિ સ્વર્ણશલાકયોર્જિતમિદં દિવ્યાઞ્જનં દીયતામ્ .. ૪૪..
મધ્યસ્થારુણરત્નકાન્તિરુચિરાં મુક્તામુગોદ્ભાસિતાં
દૈવાદ્ભાર્ગવજીવમધ્યગરવેર્લક્ષ્મીમધઃ કુર્વતીમ્ .
ઉત્સિક્તાધરબિમ્બકાન્તિવિસરૈર્ભૌમીભવન્મૌક્તિકાં
મદ્દત્તમુરરીકુરુષ્વ ગિરિજે નાસાવિભૂષામિમામ્ .. ૪૫..
ઉડુકૃતપરિવેષસ્પર્ધયા શીતભાનો-
રિવ વિરચિતદેહદ્વન્દ્વમાદિત્યબિમ્બમ્ .
અરુણમણિસમુદ્યત્પ્રાન્તવિભ્રાજિમુક્તં
શરવસિ પરિનિધેહિ સ્વર્ણતાટઙ્કયુગ્મમ્ .. ૪૬
.
મરકતવરપદ્મરાગહીરો-
ત્થિતગુલિકાત્રિતયાવનદ્ધમધ્યમ્ .
વિતતવિમલમૌક્તિકં ચ
કણ્ઠાભરણમિદં ગિરિજે સમર્પયામિ .. ૪૭.
.
નાનાદેશસમુત્ત્થિતૈર્મણિગણપ્રોદ્યત્પ્રભામણ્ડલ-
વ્યાપ્તૈરાભરણૈર્વિરાજિતગલાં મુક્તાચ્છટાલઙ્કૃતામ્ .
મધ્યસ્થારુણરત્નકાન્તિરુચિરાં પ્રાન્તસ્થમુક્તાફલ-
વ્રાતામમ્બ ચતુષ્કિકાં પરશિવે વક્ષઃસ્થલે સ્થાપય .. ૪૮..
અન્યોન્યં પ્લાવયન્તી સતતપરિચલત્કાન્તિકલ્લોલજાલૈઃ
કુર્વાણા મજ્જદન્તઃકરણવિમલતાં શોભિતેવ ત્રિવેણી .
મુક્તાભિઃ પદ્મરાગૈર્મરકતમણિભિર્નિર્મિતા દીપ્યમાનૈ-
ર્નિત્યં હારત્રયી તે પરશિવરસિકે ચેતસિ દ્યોતતાં નઃ .. ૪૯.
.
કરસરસિજનાલે વિસ્ફુરત્કાન્તિજાલે
વિલસદમલશોભે ચઞ્ચદીશાક્ષિલોભે .
વિવિધમણિમયૂખોદ્ભાસિતં દેવિ દુર્ગે
કનકકટકયુગ્મં બાહુયુગ્મે નિધેહિ .. ૫૦..
વ્યાલમ્બમાનસિતપટ્ટકગુચ્છશોભિ
સ્ફૂર્જન્મણીઘટિતહારવિરોચમાનમ્ .
માતર્મહેશમહિલે તવ બાહુમૂલે
કેયૂરકદ્વયમિદં વિનિવેશયામિ .. ૫૧..
વિતતનિજમયૂખૈર્નિર્મિતામિન્દ્રનીલૈ-
ર્વિજિતકમલનાલાલીનમત્તાલિમાલામ્ .
મણિગણખચિતાભ્યાં કઙ્કણાભ્યામુપેતાં
કલય વલયરાજીં હસ્તમૂલે મહેશિ .. ૫૨..
નીલપટ્ટમૃદુગુચ્છશોભિતા-
બદ્ધનૈકમણિજાલમઞ્જુલામ્ .
અર્પયામિ વલયાત્પુરઃસરે
વિસ્ફુરત્કનકતૈતૃપાલિકામ્ .. ૫૩..
આલવાલમિવ પુષ્પધન્વના
બાલવિદ્રુમલતાસુ નિર્મિતમ્ .
અઙ્ગુલીશુ વિનિધીયતાં શનૈ-
રઙ્ગુલીયકમિદં મદર્પિતમ્ .. ૫૪.
.
વિજિતહરમનોભૂમત્તમાતઙ્ગકુમ્ભ-
સ્થલવિલુલિતકૂજત્કિઙ્કિણીજાલતુલ્યામ્ .
અવિરતકલનદૈરીશચેતો હરન્તીં
વિવિધમણિનિબદ્ધાં મેખલામર્પયામિ .. ૫૫.
.
વ્યાલમ્બમાનવરમૌક્તિકગુચ્છશોભિ
વિભ્રાજિહાટકપુટદ્વયરોચમાનમ્ .
હેમ્ના વિનિર્મિતમનેકમણિપ્રબન્ધં
નીવીનિબન્ધનગુણં વિનિવેદયામિ .. ૫૬.
.
વિનિહતનવલાક્ષાપઙ્કબાલાતપૌઘે
મરકતમણિરાજીમઞ્જુમઞ્જીરઘોષે .
અરુણમણિસમુદ્યત્કાન્તિધારાવિચિત્ર-
સ્તવ ચરણસરોજે હંસકઃ પ્રીતિમેતુ .. ૫૭.
.
નિબદ્ધશિતિપટ્ટકપ્રવરગુચ્છસંશોભિતાં
કલક્વણિતમઞ્જુલાં ગિરિશચિત્તસંમોહનીમ્ .
અમન્દમણિમણ્ડલીવિમલકાન્તિકિમ્મીરિતાં
નિધેહિ પદપઙ્કજે કનકઘુઙ્ઘુરૂમમ્બિકે .. ૫૮..
વિસ્ફુરત્સહજરાગરઞ્જિતે
શિઞ્જિતેન કલિતાં સખીજનૈઃ .
પદ્મરાગમણિનૂપુરદ્વયી-
મર્પયામિ તવ પાદપઙ્કજે .. ૫૯.
.
પદામ્બુજમુપાસિતું પરિગતેન શીતાંશુના
કૃતાં તનુપરમ્પરામિવ દિનાન્તરાગારુણામ્ .
મહેશિ નવયાવકદ્રવભરેણ શોણીકૃતાં
નમામિ નખમણ્ડલીં ચરણપઙ્કજસ્થાં તવ .. ૬૦..
આરક્તશ્વેતપીતસ્ફુરદુરુકસુમૈશ્ચિત્રિતાં પટ્ટસૂત્રૈ-
ર્દેવસ્ત્રીભિઃ પ્રયત્નાદગરુસમુદિતૈર્ધૂપિતાં દિવ્યધૂપૈઃ .
ઉદ્યદ્ગન્ધાન્ધપુષ્પંધયનિવહસમારબ્ધઝાઙ્કારગીતાં
ચઞ્ચત્કહ્લારમાલાં પરશિવરસિકે કણ્ઠપીઠેઽર્પયામિ .. ૬૧..
ગૃહાણ પરમામૃતં કનકપાત્રસંસ્થાપિતં
સમર્પય મુખામ્બુજે વિમલવીટિકામમ્બિકે .
વિલોકય મુખામ્બુજં મુકુરમણ્ડલે નિર્મલે
નિધેહિ મણિપાદુકોપરિ પદામ્બુજં સુન્દરિ .. ૬૨..
આલમ્બ્ય સ્વસખીં કરેણ શનકૈઃ સિંહાસનાદુત્થિતા
કૂજન્મન્દમરાલમઞ્જુલગતિપ્રોલ્લાસિભૂષામ્બર .
આનન્દપ્રતિપાદકૈરુપનિષદ્વાક્યૈઃ સ્તુતા વેધસા
મચ્ચિત્તે સ્થિરતામુપૈતુ ગિરિજા યાન્તી સભામણ્ડપમ્ .. ૬૩..
ચલન્ત્યામમ્બાયાં પ્રચલતિ સમસ્તે પરિજને
સવેગં સંયાતે કનકલતિકાલઙ્કૃતિભરે .
સમતાદુત્તાલસ્ફુરિતપદસંપાતજનિતૈ-
ર્ઝણત્કારૈસ્તારૈર્ઝણઝણિતમાસીન્મણિગૃહમ્ .. ૬૪..
ચઞ્ચદ્વેત્રકરાભિરઙ્ગવિલસદ્ભૂષામ્બરાભિઃ પુરો-
યન્તીભિઃ પરિચારિકાભિરમરવ્રાતે સમુત્સારિતે .
રુદ્ધે નિર્જરસુન્દરીભિરભિતઃ કક્ષાન્તરે નિર્ગતં
વન્દે નન્દિતશમ્ભુ નિર્મલચિદાનન્દૈકરૂપં મહઃ .. ૬૫..
વેધાઃ પાદતલે પતત્યયમસૌ વિષ્ણુર્નમત્યગ્રતઃ
શમ્ભુર્દેહિ દૃગઞ્ચલં સુરપતિં દૂરસ્થમાલોકય .
ઇત્યેવં પરિચારિકાભિરુદિતે સંમાનનાં કુર્વતી
દૃગ્દ્વન્દ્વેન યથોચિતં ભગવતી ભૂયાદ્વિભૂત્યૈ મમ .. ૬૬.
મન્દં ચારણસુન્દરીભિરભિતો યાન્તીભિરુત્કણ્ઠયા
નામોચ્ચારણપૂર્વકં પ્રતિદિશં પ્રત્યેકમાવેદિતાત્ .
વેગાદક્ષિપથં ગતાન્સુરગણાનાલોકયન્તી શનૈ-
ર્દિત્સન્તી ચરણામ્બુજં પથિ જગત્પાયાન્મહેશપ્રિયા .. ૬૭.
અગ્રે કેચન પાર્શ્વયોઃ કતિપયે પૃષ્ઠે પરે પ્રસ્થિતા
આકાશે સમવસ્થિતાઃ કતિપયે દિક્ષુ સ્થિતાશ્ચાપરે .
સંમર્દં શનકૈરપાસ્ય પુરતો દણ્ડપ્રણામાન્મુહુઃ
કુર્વાણાઃ કતિચિત્સુરા ગિરિસુતે દૃક્પાતમિચ્છન્તિ તે .. ૬૮..
અગ્રે ગાયતિ કિંનરી કલપદં ગન્ધર્વકાન્તાઃ શનૈ-
રાતોદ્યાનિ ચ વાદયન્તિ મધુરં સવ્યાપસવ્યસ્થિતાઃ .
કૂજન્નૂપુરનાદ મઞ્જુ પુરતો નૃત્યન્તિ દિવ્યાઙ્ગના
ગચ્છન્તઃ પરિતઃ સ્તુવન્તિ નિગમસ્તુત્યા વિરિઞ્ચ્યાદયઃ .. ૬૯.
.
કસ્મૈચિત્સુચિરાદુપાસિતમહામન્ત્રૌઘસિદ્ધિં ક્રમા-
દેકસ્મૈ ભવનિઃસ્પૃહાય પરમાનન્દસ્વરૂપાં ગતિમ્ .
અન્યસ્મૈ વિષયાનુરક્તમનસે દીનાય દુઃખાપહં
દ્રવ્યં દ્વારસમાશ્રિતાય દદતીં વન્દામહે સુન્દરીમ્ .. ૭૦..
નમ્રીભૂય કૃતાઞ્જલિપ્રકટિતપ્રેમપ્રસન્નાનને
મન્દં ગચ્છતિ સંનિધૌ સવિનયાત્સોત્કણ્ઠમોઘત્રયે .
નાનામન્ત્રગણં તદર્થમખિલં તત્સાધનં તત્ફલં
વ્યાચક્ષાણમુદગ્રકાન્તિ કલયે યત્કિઞ્ચિદાદ્યં મહઃ .. ૭૧..
તવ દહનસદૃક્ષૈરીક્ષણૈરેવ ચક્ષુ-
ર્નિખિલપશુજનાનાં ભીષયદ્ભીષણાસ્યમ્ .
કૃતવસતિ પરેશપ્રેયસિ દ્વારિ નિત્યં
શરભમિથુનમુચ્ચૈર્ભક્તિયુક્તો નતોઽસ્મિ .. ૭૨..
કલ્પાન્તે સરસૈકદાસમુદિતાનેકાર્કતુલ્યપ્રભાં
રત્નસ્તમ્ભનિબદ્ધકાઞ્ચનગુણસ્ફૂર્જદ્વિતાનોત્તમામ્ .

કર્પૂરાગરુગર્ભવર્તિકલિકાપ્રાપ્તપ્રદીપાવલીં
શ્રીચક્રાકૃતિમુલ્લસન્મણિગણાં વન્દામહે વેદિકામ્ .. ૭૩..
સ્વસ્થાનસ્થિતદેવતાગણવૃતે બિન્દૌ મુદા સ્થાપિતં
નાનારત્નવિરાજિહેમવિલસત્કાન્તિચ્છટાદુર્દિનમ્ .
ચઞ્ચત્કૌસુમતૂલિકાસનયુતં કામેશ્વરાધિષ્ઠિતં
નિત્યાનન્દનિદાનમમ્બ સતતં વન્દે ચ સિંહાસનમ્ .. ૭૪.
.
વદદ્ભિરભિતો મુદા જય જયેતિ બૃન્દારકૈઃ
કૃતાઞ્જલિપરમ્પરા વિદધતિ કૃતાર્થા દૃશા .
અમન્દમણિમણ્ડલીખચિતહેમસિંહાસનં
સખીજનસમાવૃતં સમધિતિષ્ઠ દાક્ષાયણિ .. ૭૫.
.
કર્પૂરાદિકવસ્તુજાતમખિલં સૌવર્ણભૃઙ્ગારકં
તામ્બૂલસ્ય કરણ્ડકં મણિમયં ચૈલાઞ્ચલં દર્પણમ્ .
વિસ્ફૂર્જન્મણિપાદુકે ચ દધતીઃ સિંહાસનસ્યાભિત-
સ્તિષ્ઠન્તીઃ પરિચારિકાસ્તવ સદા વન્દામહે સુન્દરિ .. ૭૬..
ત્વદમલવપુરુદ્યત્કાન્તિકલ્લોલજાલૈઃ
સ્ફુટમિવ દધતીભિર્બાહુવિક્ષેપલીલામ્ .
મુહુરપિ ચ વિધૂતે ચામરગ્રાહિણીભિઃ
સિતકરકરશુભ્રે ચામરે ચાલયામિ .. ૭૭..
પ્રાન્તસ્ફુરદ્વિમલમૌક્તિકગુચ્છજાલં
ચઞ્ચન્મહામણિવિચિત્રિતહેમદણ્ડમ્ .
ઉદ્યત્સહસ્રકરમણ્ડલચારુ હેમ-
ચ્છત્રં મહેશમહિલે વિનિવેશયામિ .. ૭૮..
ઉદ્યત્તાવકદેહકાન્તિપટલીસિન્દૂરપૂરપ્રભા-
શોણીભૂતમુદગ્રલોહિતમણિચ્છેદાનુકારિચ્છવિ .
દૂરાદાદરનિર્મિતાઞ્જલિપુટૈરાલોકમાનં સુર-
વ્યૂહૈઃ કાઞ્ચનમાતપત્રમતુલં વન્દામહે સુન્દરમ્ .. ૭૯..
સન્તુષ્ટાં પરમામૃતેન વિલસત્કામેશ્વરાઙ્કસ્થિતાં
પુષ્પૌઘૈરભિપૂજિતાં ભગવતીં ત્વાં વન્દમાના મુદા .
સ્ફૂર્જત્તાવકદેહરશ્મિકલનાપ્રાપ્તસ્વરૂપાભિદાઃ
શ્રીચક્રાવરણસ્થિતાઃ સવિનયં વન્દામહે દેવતાઃ .. ૮૦..
આધારશક્ત્યાદિકમાકલય્ય
મધ્યે સમસ્તાધિકયોગિનીં ચ .
મિત્રેશનાથાદિકમત્ર નાથ-
ચતુષ્ટયં શૈલસુતે નતોઽસ્મિ .. ૮૧..
ત્રિપુરાસુધાર્ણવાસન-
મારભ્ય ત્રિપુરમાલિની યાવત્ .
આવરણાષ્ટકસંસ્થિત-
માસનષટ્કં નમામિ પરમેશિ .. ૮૨..
ઈશાને ગણપં સ્મરામિ વિચરદ્વિઘ્નાન્ધકારચ્છિદં
વાયવ્યે વટુકં ચ કજ્જલરુચિં વ્યાલોપવીતાન્વિતમ્ .
નૈરૃત્યે મહિષાસુરપ્રમથિનીં દુર્ગાં ચ સંપૂજય-
ન્નાગ્નેયેઽખિલભક્તરક્ષણપરં ક્ષેત્રાધિ નાથં ભજે .. ૮૩..
ઉડ્યાનજાલન્ધરકામરૂપ-
પીઠાનિમાન્પૂર્ણગિરિપ્રસક્તાન્ .
ત્રિકોણદક્ષાગ્રિમસવ્યભાગ-
મધ્યસ્થિતાન્સિદ્ધિકરાન્નમામિ .. ૮૪..
લોકેશઃ પૃથિવીપતિર્નિગદિતો વિષ્ણુર્જલાનાં પ્રભુ-
સ્તેજોનાથ ઉમાપતિશ્ચ મરુતામીશસ્તથા ચેશ્વરઃ .
આકાશાધિપતિઃ સદાશિવ ઇતિ પ્રેતાભિધામાગતા-
નેતાંશ્ચક્રબહિઃસ્થિતાન્સુરગણાન્વન્દામહે સાદરમ્ .. ૮૫..
તારાનાથકલાપ્રવેશનિગમવ્યાજાદ્ગતાસુપ્રથં
ત્રૈલોક્યે તિથિષુ પ્રવર્તિતકલાકાષ્ઠાદિકાલક્રમમ્ .
રત્નાલઙ્કૃતિચિત્રવસ્ત્રલલિતં કામેશ્વરીપૂર્વકં
નિત્યાષોડશકં નમામિ લસિતં ચક્રાત્મનોરન્તરે .. ૮૬..
હૃદિ ભાવિતદૈવતં પ્રયત્ના-
ભ્યુપદેશાનુગૃહીતભક્તસઙ્ઘમ્ .
સ્વગુરુક્રમસંજ્ઞચક્રરાજ-
સ્થિતમોઘત્રયમાનતોઽસ્મિ મૂર્ધ્ના .. ૮૭..
હૃદયમથ શિરઃ શિખાખિલાદ્યે
કવચમથો નયનત્રયં ચ દેવિ .
મુનિજનપરિચિન્તિત તથાસ્ત્રં
સ્ફુરતુ સદા હૃદયે ષડઙ્ગમેતત્ .. ૮૮..
ત્રૈલોક્યમોહનમિતિ પ્રથિતે તુ ચક્રે
ચઞ્ચદ્વિભૂષણગણત્રિપુરાધિવાસે .
રેખાત્રયે સ્થિતવતીરણિમાદિસિદ્ધી-
ર્મુદ્રા નમામિ સતતં પ્રકટાભિધાસ્તાઃ .. ૮૯.
.
સર્વાશાપરિપૂરકે વસુદલદ્વન્દ્વેન વિભ્રાજિતે
વિસ્ફૂર્જન્ત્રિપુરેશ્વરીનિવસતૌ ચક્રે સ્થિતા નિત્યશઃ .
કામાકર્ષણિકાદયો મણિગણભ્રાજિષ્ણુદિવ્યામ્બરા
યોગિન્યઃ પ્રદિશન્તુ કાઙ્ક્ષિતફલં વિખ્યાતગુપ્તાભિધાઃ .. ૯૦..
મહેશિ વસુભિર્દલૈર્લસતિ સર્વસંક્ષોભણે
વિભૂષણગણસ્ફુરન્ત્રિપુરસુન્દરીસદ્મનિ .
અનઙ્ગકુસુમાદયો વિવિધભૂષણોદ્ભાસિતા
દિશન્તુ મમ કાઙ્ક્ષિતં તનુતરાશ્ચ ગુપ્તાભિધાઃ .. ૯૧..
લસદ્યુગદૃશારકે સ્ફુરતિ સર્વસૌભાગ્યદે
શુભાભરણભૂષિતત્રિપુરવાસિનીમન્દિરે .
સ્થિતા દધતુ મઙ્ગલં સુભગસર્વસંક્ષોભિણી-
મુખાઃ સકલસિદ્ધયો વિદિતસંપ્રદાયાભિધાઃ .. ૯૨.
.
બહિર્દશારે સર્વાર્થસાધકે ત્રિપુરાશ્રયાઃ .
કુલકૌલાભિધાઃ પાન્તુ સર્વસિદ્ધિપ્રદાયિકાઃ .. ૯૩.
અન્તઃશોભિદશારકેઽતિલલિતે સર્વાદિરક્ષાકરે
માલિન્યા ત્રિપુરાદ્યયા વિરચિતાવાસે સ્થિતં નિત્યશઃ .
નાનારત્નવિભૂષણં મણિગણભ્રાજિષ્ણુ દિવ્યામ્બરં
સર્વજ્ઞાદિકશક્તિબૃન્દમનિશં વન્દે નિગર્ભાભિધમ્ .. ૯૪.
.
સર્વરોગહરેઽષ્ટારે ત્રિપુરાસિદ્ધયાન્વિતે .
રહસ્યયોગિનીર્નિત્યં વશિન્યાદ્યા નમામ્યહમ્ .. ૯૫.
.
ચૂતાશોકવિકાસિકેતકરજઃપ્રોદ્ભાસિનીલામ્બુજ-
પ્રસ્ફૂર્જન્નવમલ્લિકાસમુદિતૈઃ પુષ્પૈઃ શરાન્નિર્મિતાન્ .
રમ્યં પુષ્પશરાસનં સુલલિતં પાશં તથા ચાઙ્કુશં
વન્દે તાવકમાયુધં પરશિવે ચક્રાન્તરાલેસ્થિતમ્ .. ૯૬..
ત્રિકોણ ઉદિતપ્રભે જગતિ સર્વસિદ્ધિપ્રદે
યુતે ત્રિપુરયામ્બયા સ્થિતવતી ચ કામેશ્વરી .
તનોતુ મમ મઙ્ગલં સકલશર્મ વજ્રેશ્વરી
કરોતુ ભગમાલિની સ્ફુરતુ મામકે ચેતસિ .. ૯૭..
સર્વાનન્દમયે સમસ્તજગતામાકાઙ્ક્ષિતે બૈન્દવે
ભૈરવ્યા ત્રિપુરાદ્યયા વિરચિતાવાસે સ્થિતા સુન્દરી .
આનન્દોલ્લસિતેક્ષણા મણિગણભ્રાજિષ્ણુભૂષામ્બરા
વિસ્ફૂર્જદ્વદના પરાપરરહઃ સ માં પાતુ યોગિની .. ૯૮.
.
ઉલ્લસત્કનકકાન્તિભાસુરં
સૌરભસ્ફુરણવાસિતામ્બરમ્ .
દૂરતઃ પરિહૃતં મધુવ્રતૈ-
રર્પયામિ તવ દેવિ ચમ્પકમ્ .. ૯૯..
વૈરમુદ્ધતમપાસ્ય શમ્ભુના
મસ્તકે વિનિહિતં કલાચ્છલાત્ .
ગન્ધલુબ્ધમધુપાશ્રિતં સદા
કેતકીકુસુમમર્પયામિ તે .. ૧૦૦..
ચૂર્ણીકૃતં દ્રાગિવ પદ્મજેન
ત્વદાનનસ્પર્ધિસુધાંશુબિમ્બમ્ .
સમર્પયામિ સ્ફુટમઞ્જલિસ્થં
વિકાસિજાતીકુસુમોત્કરં તે .. ૧૦૧..
અગરુબહલધૂપાજસ્રસૌરભ્યરમ્યાં
મરકતમણિરાજીરાજિહારિસ્રગાભામ્ .
દિશિ વિદિશિ વિસરદ્ગન્ધલુબ્ધાલિમાલાં
વકુલકુસુમમાલાં કણ્ઠપીઠેઽર્પયામિ .. ૧૦૨.
.
ઈઙ્કારોર્ધ્વગબિન્દુરાનનમધોબિન્દુદ્વયં ચ સ્તનૌ
ત્રૈલોક્યે ગુરુગમ્યમેતદખિલં હાર્દં ચ રેખાત્મકમ્ .
ઇત્થં કામકલાત્મિકાં ભગવતીમન્તઃ સમારાધય-
ન્નાનન્દામ્બુધિમજ્જને પ્રલભતામાનન્દથું સજ્જનઃ .. ૧૦૩..
ધૂપં તેઽગરુસંભવં ભગવતિ પ્રોલ્લાસિગન્ધોદ્ધુરં
દીપં ચૈવ નિવેદયામિ મહસા હાર્દાન્ધકારચ્છિદમ્ .
રજસ્વર્ણવિનિર્મિતેષુ પરિતઃ પાત્રેષુ સંસ્થાપિતં
નૈવેદ્યં વિનિવેદયામિ પરમાનન્દાત્મિકે સુન્દરિ .. ૧૦૪..
જાતીકોરકતુલ્યમોદનમિદં સૌવર્ણપાત્રે સ્થિતં
શુદ્ધાન્નં શુચિ મુદ્ગમાષચણકોદ્ભૂતાતથા સૂપકાઃ .
પ્રાજ્યં માહિષમાજ્યમુત્તમમિદં હૈવંગવીનં પૃથ-
ક્પાત્રેષુ પ્રતિપાદિતં પરશિવે તત્સર્વમઙ્ગીકુરુ .. ૧૦૫..
શિમ્બીસૂરણશાકબિમ્બબૃહતીકૂશ્માણ્ડકોશાતકી-
વૃન્તાકાનિ પટોલકાનિ મૃદુના સંસાધિતાન્યગ્નિના .
સંપન્નાનિ ચ વેસવારવિસરૈર્દિવ્યાનિ ભક્ત્યા કૃતા-
ન્યગ્રે તે વિનિવેદયામિ ગિરિજે સૌવર્ણપાત્રવ્રજે .. ૧૦૬..
નિમ્બૂકાર્દ્રકચૂતકન્દકદલીકૌશાતકીકર્કટી-
ધાત્રીબિલ્વકરીરકૈર્વિરચિતાન્યાનન્દચિદ્વિગ્રહે .
રાજીભિઃ કટુતૈલસૈન્ધવહરિદ્રાભિઃ સ્થિતાન્પાતયે
સંધાનાનિ નિવેદયામિ ગિરિજે ભૂરિપ્રકારાણિ તે .. ૧૦૭..
સિતયાઞ્ચિતલડ્ડુકવ્રજા-
ન્મૃદુપૂપાન્મૃદુલાશ્ચ પૂરિકાઃ .
પરમાન્નમિદં ચ પાર્વતિ
પ્રણયેન પ્રતિપાદયામિ તે .. ૧૦૮..
દિગ્ધમેતદનલે સુસાધિતં
ચન્દ્રમણ્ડલનિભં તથા દધિ .
ફાણિતં શિખરિણીં સિતાસિતાં
સર્વમમ્બ વિનિવેદયામિ તે .. ૧૦૯..
અગ્રે તે વિનિવેદ્ય સર્વમમિતં નૈવેદ્યમઙ્ગીકૃતં
જ્ઞાત્વા તત્ત્વચતુષ્ટયં પ્રથમતો મન્યે સુતૃપ્તાં તતઃ .
દેવીં ત્વાં પરિશિષ્ટમમ્બ કનકામત્રેષુ સંસ્થાપિતં
શક્તિભ્યઃ સમુપાહારામિ સકલં દેવેશિ શમ્ભુપ્રિયે .. ૧૧૦..
વામેન સ્વર્ણપાત્રીમનુપમપરમાન્નેન પૂર્ણાં દધાના-
મન્યેન સ્વર્ણદર્વીં નિજજનહૃદયાભીષ્ટદાં ધારયન્તીમ્ .
સિન્દૂરારક્તવસ્ત્રાં વિવિધમણિલસદ્ભૂષણાં મેચકાઙ્ગીં

તિષ્ઠન્તીમગ્રતસ્તે મધુમદમુદિતામન્નપૂર્ણાં નમામિ .. ૧૧૧.
.
પઙ્ક્ત્યોપવિષ્ટાન્પરિતસ્તુ ચક્રં
શક્ત્યા સ્વયાલિઙ્ગિતવામભાગાન્ .
સર્વોપચારૈઃ પરિપૂજ્ય ભક્ત્યા
તવામ્બિકે પારિષદાન્નમામિ .. ૧૧૨.
.
પરમામૃતમત્તસુન્દરી-
ગણમધ્યસ્થિતમર્કભાસુરમ્ .
પરમામૃતઘૂર્ણિતેક્ષણં
કિમપિ જ્યોતિરુપાસ્મહે પરમ્ .. ૧૧૩..
દૃશ્યતે તવ મુખામ્બુજં શિવે
શ્રૂયતે સ્ફુટમનાહતધ્વનિઃ .
અર્ચને તવ ગિરામગોચરે
ન પ્રયાતિ વિષયાન્તરં મનઃ .. ૧૧૪..
ત્વન્મુખામ્બુજવિલોકનોલ્લસ-
ત્પ્રેમનિશ્ચલવિલોચનદ્વયીમ્ .
ઉન્મનીમુપગતાં સભામિમાં
ભાવયામિ પરમેશિ તાવકીમ્ .. ૧૧૫..
ચક્ષુઃ પશ્યતુ નેહ કિંચન પરં ઘ્રાણં ન વા જિઘ્રતુ
શ્રોત્રં હન્ત શ્રુણોતુ ન ત્વગપિ ન સ્પર્શં સમાલમ્બતામ્ .
જિહ્વા વેત્તુ ન વા રસં મમ પરં યુષ્મત્સ્વરૂપામૃતે
નિત્યાનન્દવિઘૂર્ણમાનનયને નિત્યં મનો મજ્જતુ .. ૧૧૬..
યસ્ત્વાં પશ્યતિ પાર્વતિ પ્રતિદિનં ધ્યાનેન તેજોમયીં
મન્યે સુન્દરિ તત્ત્વમેતદખિલં વેદેષુ નિષ્ઠાં ગતમ્ .
યસ્તસ્મિન્સમયે તવાર્ચનવિધાવાનન્દસાન્દ્રાશયો
યાતોઽહં તદભિન્નતાં પરશિવે સોઽયં પ્રસાદસ્તવ .. ૧૧૭..
ગણાધિનાથં વટુકં ચ યોગિનીઃ
ક્ષેત્રાધિનાથં ચ વિદિક્ચતુષ્ટયે .
સર્વોપચારૈઃ પરિપૂજ્ય ભક્તિતો
નિવેદયામો બલિમુક્તયુક્તિભિઃ .. ૧૧૮.
.
વીણામુપાન્તે ખલુ વાદયન્ત્યૈ
નિવેદ્ય શેષં ખલુ શેષિકાયૈ .
સૌવર્ણભૃઙ્ગારવિનિર્ગતેન
જલેન શુદ્ધાચમનં વિધેહિ .. ૧૧૯.
.
તામ્બૂલં વિનિવેદયામિ વિલસત્કર્પૂરકસ્તૂરિકા-
જાતીપૂગલવઙ્ગચૂર્ણખદિરૈર્ભક્ત્યા સમુલ્લાસિતમ્ .
સ્ફૂર્જદ્રત્નસમુદ્ગકપ્રણિહિતં સૌવર્ણપાત્રે સ્થિતૈ-
ર્દીપૈરુજ્જ્વલમાન્નચૂર્ણરચિતૈરારાર્તિકં ગૃહ્યતામ્ .. ૧૨૦.
.
કાચિદ્ગાયતિ કિંનરી કલપદં વાદ્યં દધાનોર્વશી
રમ્ભા નૃત્યતિ કેલિમઞ્જુલપદં માતઃ પુરસ્તાત્તવ .
કૃત્યં પ્રોજ્ઝ્ય સુરસ્ત્રિયો મધુમદવ્યાઘૂર્ણમાનેક્ષણં
નિત્યાનન્દસુધામ્બુધિં તવ મુખં પશ્યન્તિ દૃશ્યન્તિ ચ .. ૧૨૧..
તામ્બૂલોદ્ભાસિવક્ત્રૈસ્ત્વદમલવદનાલોકનોલ્લાસિનેત્રૈ-
શ્ચક્રસ્થૈઃ શક્તિસઙ્ઘૈઃ પરિહૃતવિષયાસઙ્ગમાકર્ણ્યમાનમ્ .. ૧૨૨.
.
અર્ચાવિધૌ જ્ઞાનલવોઽપિ દૂરે
દૂરે તદાપાદકવસ્તુજાતમ્ .
પ્રદક્ષિણીકૃત્ય તતોઽર્ચનં તે
પઞ્ચોપચારાત્મકમર્પયામિ .. ૧૨૩..
યથેપ્સિતમનોગતપ્રકટિતોપચારાર્ચિતં
નિજાવરણદેવતાગણવૃતાં સુરેશસ્થિતામ્ .
કૃતાઞ્જલિપુટો મુહુઃ કલિતભૂમિરષ્ટાઙ્ગકૈ-
ર્નમામિ ભગવત્યહં ત્રિપુરસુન્દરિ ત્રાહિ મામ્ .. ૧૨૪..
વિજ્ઞપ્તીરવધેહિ મે સુમહતા યત્નેન તે સંનિધિં
પ્રાપ્તં મામિહ કાન્દિશીકમધુના માતર્ન દૂરીકુરુ .
ચિત્તં ત્વત્પદભાવને વ્યભિચરેદ્દૃગ્વાક્ચ મે જાતુ ચે-
ત્તત્સૌમ્યે સ્વગુણૈર્બધાન ન યથા ભૂયો વિનિર્ગચ્છતિ .. ૧૨૫..
ક્વાહં મન્દમતિઃ ક્વ ચેદમખિલૈરેકાન્તભક્તૈઃ સ્તુતં
ધ્યાતં દેવિ તથાપિ તે સ્વમનસા શ્રીપાદુકાપૂજનમ્ .
કાદાચિત્કમદીયચિન્તનવિધૌ સન્તુષ્ટયા શર્મદં
સ્તોત્રં દેવતયા તયા પ્રકટિતં મન્યે મદીયાનને .. ૧૨૬.
.
નિત્યાર્ચમિદં ચિત્તે ભાવ્યમાનં સદા મયા .
નિબદ્ધં વિવિધૈઃ પદ્યૈરનુગૃહ્ણાતુ સુન્દરી .. ૧૨૭.
.
ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છઙ્કરભગવતઃ કૃતૌ ત્રિપુરસુન્દરીમાનસપૂજાસ્તોત્રં સંપૂર્ણમ્ ..