શ્રીગણેશકવચમ્ · અધ્યાય 1

શ્રીગણેશાય નમઃ ..
ગૌર્યુવાચ .
એષોઽતિચપલો દૈત્યાન્બાલ્યેઽપિ નાશયત્યહો .
અગ્રે કિં કર્મ કર્તેતિ ન જાને મુનિસત્તમ .. ૧..
દૈત્યા નાનાવિધા દુષ્ટાઃ સાધુદેવદ્રુહઃ ખલાઃ .
અતોઽસ્ય કણ્ઠે કિંચિત્ત્વં રક્ષાર્થં બદ્ધુમર્હસિ .. ૨..
મુનિરુવાચ .
ધ્યાયેત્સિંહહતં વિનાયકમમું દિગ્બાહુમાદ્યે યુગે
ત્રેતાયાં તુ મયૂરવાહનમમું પઙ્બાહુકં સિદ્ધિદમ્ .
દ્વાપારે તુ ગજાનનં યુગભુજં રક્તાઙ્ગરાગં વિભુમ્
તુર્યે તુ દ્વિભુજં સિતાઙ્ગરુચિરં સર્વાર્થદં સર્વદા .. ૩..
વિનાયકઃ શિખાં પાતુ પરમાત્મા પરાત્પરઃ .
અતિસુન્દરકાયસ્તુ મસ્તકં સુમહોત્કટઃ .. ૪..
લલાટં કશ્યપઃ પાતુ ભૃયુગં તુ મહોદર .
નયને ભાલચન્દ્રસ્તુ ગજાસ્યસ્ત્વોષ્ઠપલ્લવૌ .. ૫..
જિહ્વાં પાતુ ગણક્રીડશ્ચિબુકં ગિરિજાસુતઃ .
વાચં વિનાયકઃ પાતુ દન્તાન્ રક્ષતુ વિઘ્નહા .. ૬..
શ્રવણૌ પાશપાણિસ્તુ નાસિકાં ચિન્તિતાર્થદઃ .
ગણેશસ્તુ મુખં કણ્ઠં પાતુ દેવો ગણઞ્જજયઃ .. ૭..
સ્કન્ધૌ પાતુ ગજસ્કન્ધઃ સ્તનૌ વિઘ્નવિનાશનઃ .
હૃદયં ગણનાથસ્તુ હેરંબો જઠરં મહાન્ .. ૮..
ધરાધરઃ પાતુ પાર્શ્વૌ પૃષ્ઠં વિઘ્નહરઃ શુભઃ .
લિઙ્ગં ગુહ્યં સદા પાતુ વક્રતુણ્ડો મહાબલઃ .. ૯..
ગણક્રીડો જાનુસઙ્ઘે ઉરૂ મઙ્ગલમૂર્તિમાન્ .
એકદન્તો મહાબુદ્ધિઃ પાદૌ ગુલ્ફૌ સદાઽવતુ .. ૧૦..
ક્ષિપ્રપ્રસાદનો બાહૂ પાણી આશાપ્રપૂરકઃ .
અઙ્ગુલીશ્ચ નખાન્પાતુ પદ્મહસોઽરિનાશનઃ .. ૧૧..
સર્વાઙ્ગાનિ મયૂરેશો વિશ્વવ્યાપી સદાઽવતુ .
અનુક્તમપિ યત્સ્થાનં ધૂમ્રકેતુઃ સદાઽવતુ .. ૧૨..
આમોદસ્ત્વગ્રતઃ પાતુ પ્રમોદઃ પૃષ્ઠતોઽવતુ .
પ્રાચ્યાં રક્ષતુ બુદ્ધીશ આગ્નેયાં સિદ્ધિદાયકઃ ..૧૩..
દક્ષિણાસ્યામુમાપુત્રો નૈરૃત્યાં તુ ગણેશ્વરઃ .
પ્રતીચ્યાં વિઘ્નહર્તાઽવ્યાદ્વાયવ્યાં ગજકર્ણકઃ .. ૧૪..
કૌબેર્યાં નિધિપઃ પાયાદીશાન્યામીશનન્દનઃ .
દિવાઽવ્યાદેકદન્તસ્તુ રાત્રૌ સન્ધ્યાસુ વિઘ્નહૃત્ .. ૧૫..
રાક્ષસાસુરવેતાલગ્રહભૂતપિશાચતઃ .
પાશાઙ્કુશધરઃ પાતુ રજઃસત્ત્વતમઃ સ્મૃતિઃ .. ૧૬..
જ્ઞાનં ધર્મં ચ લક્ષ્મીં ચ લજ્જાં કીર્તિ તથા કુલમ્ .
વપુર્ધનં ચ ધાન્યં ચ ગૃહાન્દારાન્સુતાન્સખીન્ .. ૧૭..
સર્વાયુધધરઃ પૌત્રાન્ મયૂરેશોઽવતાત્સદા .
કપિલોઽજાદિકં પાતુ ગજાશ્વાન્વિકટોઽવતુ .. ૧૮..
ભૂર્જપત્રે લિખિત્વેદં યઃ કણ્ઠે ધારયેત્સુધીઃ .
ન ભયં જાયતે તસ્ય યક્ષરક્ષઃપિશાચતઃ .. ૧૮..
ત્રિસન્ધ્યં જપતે યસ્તુ વજ્રસારતનુર્ભવેત્ .
યાત્રાકાલે પઠેદ્યસ્તુ નિર્વિઘ્નેન ફલં લભેત્ .. ૨૦..
યુદ્ધકાલે પઠેદ્યસ્તુ વિજયં ચાપ્નુયાદ્દ્રુતમ્ .
મારણોચ્ચાટકર્ષસ્તમ્ભમોહનકર્મણિ .. ૨૧..
સપ્તવારં જપેદેતદ્દિનાનામેકવિંશતિમ્ .
તત્તત્ફલવાપ્નોતિ સાધકો નાત્રસંશયઃ ..૨૨..
એકવિંશતિવારં ચ પઠેત્તાવદ્દિનાનિ યઃ .
કારાગૃહગતં સદ્યોરાજ્ઞા વધ્યં ચ મોચયેત્ .. ૨૩..
રાજદર્શનવેલાયાં પઠેદેતત્ત્રિવારતઃ .
સ રાજસં વશં નીત્વા પ્રકૃતીશ્ચ સભાં જયેત્ .. ૨૪..
ઇદં ગણેશકવચં કશ્યપેન સમીરિતમ્ .
મુદ્ગલાય ચ તેનાથ માણ્ડવ્યાય મહર્ષયે .. ૨૫..
મહ્યં સ પ્રાહ કૃપયા કવચં સર્વસિદ્ધિદમ્ .
ન દેયં ભક્તિહીનાય દેયં શ્રદ્ધાવતે શુભમ્ .. ૨૬..
યસ્યાનેન કૃતા રક્ષા ન બાધાસ્ય ભવેત્ક્વચિત્ .
રાક્ષસાસુરવેતાલદૈત્યદાનવસમ્ભવા .. ૨૭..
ઇતિ શ્રીગણેશપુરાણે ઉત્તરખણ્ડે બાલક્રીડાયાં
ષડશીતિતમેઽધ્યાયે ગણેશકવચં સમ્પૂર્ણમ્