સ્કંદ પુરાણ · શ્લોક 5.184-2

શ્રીમાર્કણ્ડેય ઉવાચ -
ધૌતપાપં તતો ગચ્છેદ્ભૃગુતીર્થસમીપતઃ ।
વૃષેણ તુ ભૃગુસ્તત્ર ભૂયોભૂયો ધુતસ્તતઃ

ધૌતપાપં તુ તત્તેન નામ્ના લોકેષુ વિશ્રુતમ્ ।
તત્ર સ્થિતો મહાદેવસ્તુષ્ટ્યર્થં ભૃગુસત્તમે

તત્ર તીર્થે તુ યઃ સ્નાત્વા શાઠ્યેનાપિ નરેશ્વર ।
મુચ્યતે સર્વપાપેભ્યો નાત્ર કાર્યા વિચારણા

યસ્તુ સમ્યગ્વિધાનેન તત્ર સ્નાત્વાર્ચયેચ્છિવમ્ ।
દેવાન્પિતૄન્સમભ્યર્ચ્ય મુચ્યતે સર્વપાતકૈઃ

બ્રહ્મહત્યા ગવાં વધ્યા તત્ર તીર્થે યુધિષ્ઠિર ।
પ્રવિશેન્ન સદા ભીતા પ્રવિષ્ટાપિ ક્ષયં વ્રજેત્

યુધિષ્ઠિર ઉવાચ -
આશ્ચર્યભૂતં લોકેઽસ્મિન્કથયસ્વ દ્વિજોત્તમ ।
પ્રવિશેન્ન બ્રહ્મહત્યા યથા વૈ ધૌતપાપ્મનિ

બ્રહ્મહત્યાસમં પાપં ભવિતા નેહ કિંચન ।
કથં વા ધૌતપાપે તુ પ્રવિષ્ટં નશ્યતે દ્વિજ ।
એતદ્વિસ્તરતઃ સર્વં પૃચ્છામિ વદ કૌતુકાત્

માર્કણ્ડેય ઉવાચ -
આદિસર્ગે પુરા શમ્ભુર્બ્રહ્મણઃ પરમેષ્ઠિનઃ ।
વિકારં પઞ્ચમં દૃષ્ટ્વા શિરોઽશ્વમુખસન્નિભમ્

અઙ્ગુષ્ઠાઙ્ગુલિયોગેન તચ્છિરસ્તેન કૃન્તિતમ્ ।
કૃત્તમાત્રે તુ શિરસિ બ્રહ્મહત્યાઽભવત્તદા

બ્રહ્મહત્યાયુતશ્ચાસીદુત્તરે નર્મદાતટે ।
ધુનિતં તુ યતો રાજન્વૃષેણ ધર્મમૂર્તિના

તત્ર ધૌતેશ્વરીં દેવીં સ્થાપિતાં વૃષભેણ તુ ।
દદર્શ ભગવાઞ્છમ્ભુઃ સર્વદૈવતપૂજિતામ્

દૃષ્ટ્વા ધૌતેશ્વરીં દુર્ગાં બ્રહ્મહત્યાવિનાશિનીમ્ ।
તત્ર વિશ્રમમાણશ્ચ શઙ્કરસ્ત્રિપુરાન્તકઃ

સ શઙ્કરો બ્રહ્મહત્યાવિહીનં મેને ત્માનં તસ્ય તીર્થસ્ય ભાવાત્ ।
સુવિસ્મિતો દેવદેવો વરેણ્યો દૃષ્ટ્વા દૂરે બ્રહ્મહત્યાં ચ તીર્થાત્

વિધૌતપાપં મહિતં ધર્મશક્ત્યા વિશેન્ન હત્યા દેવીભયાત્પ્રભીતા ।
રક્તામ્બરા રક્તમાલ્યોપયુક્તા કૃષ્ણા નારી રક્તદામપ્રસક્તા

માં વાઞ્છન્તી સ્કન્ધદેશં રહસ્યે દૂરે સ્થિતા તીર્થવર્યપ્રભાવાત્ ।
સંચિન્ત્ય દેવો મનસા સ્મરારિર્વાસાય બુદ્ધિં તત્ર તીર્થે ચકાર

વિમૃશ્ય દેવો બહુશઃ સ્થિતઃ સ્વયં વિધૌતપાપઃ પ્રથિતઃ પૃથિવ્યામ્ ।
બભૂવ તત્રૈવ નિવાસકારી વિધૂતપાપનિકટપ્રદેશે

તદાપ્રભૃતિ રાજેન્દ્ર બ્રહ્મહત્યાવિનાશનમ્ ।
વિધૌતપાપં તત્તીર્થં નર્મદાયાં વ્યવસ્થિતમ્

આશ્વયુક્શુક્લનવમી તત્ર તીર્થે વિશિષ્યતે ।
દિનત્રયં તુ રાજેન્દ્ર સપ્તમ્યાદિવિશેષતઃ

સમુપોષ્યાષ્ટમીં ભક્ત્યા સાઙ્ગં વેદં પઠેત્તુ યઃ ।
અહોરાત્રેણ ચૈકેન ઋગ્યજુઃસામસંજ્ઞકમ્

અભ્યસન્બ્રહ્મહત્યાયા મુચ્યતે નાત્ર સંશયઃ ।
વૃષલીગમનં ચૈવ યશ્ચ ગુર્વઙ્ગનાગમઃ

સ્નાત્વા બ્રહ્મરસોત્કૃષ્ટે કુમ્ભેનૈવ પ્રમુચ્યતે ।
વન્ધ્યા સ્ત્રીજનની યા તુ કાકવન્ધ્યા મૃતપ્રજા

સાપિ કુમ્ભોદકૈઃ સ્નાતા જીવત્પુત્રા પ્રજાવતી ।
અપઠસ્તુ નરોપોષ્ય ઋગ્યજુઃસામસમ્ભવામ્

ઋચમેકાં જપન્વિપ્રસ્તથા પર્વણિ યો નૃપ ।
અનૃચોપોષ્ય ગાયત્રીં જપેદ્વૈ વેદમાતરમ્

જપન્નવમ્યાં વિપ્રેન્દ્રો મુચ્યતે પાપસઞ્ચયાત્ ।
એવં તુ કથિતં તાત પુરાણોક્તં મહર્ષિભિઃ

ધૌતપાપં મહાપુણ્યં શિવેન કથિતં મમ ।
પ્રાણત્યાગં તુ યઃ કુર્યાજ્જલે વાગ્નૌ સ્થલેઽપિ વા

સ ગચ્છતિ વિમાનેન જ્વલનાર્કસમપ્રભઃ ।
હંસબર્હિપ્રયુક્તેન સેવ્યમાનોઽપ્સરોગણૈઃ

શિવસ્ય પરમં સ્થાનં યત્સુરૈરપિ દુર્લભમ્ ।
ક્રીડતે સ્વેચ્છયા તત્ર યાવચ્ચન્દ્રાર્કતારકમ્

ધૌતપાપે તુ યા નારી કુરુતે પ્રાણસંક્ષયમ્ ।
તત્ક્ષણાદેવ સા પાર્થ પુરુષત્વમવાપ્નુયાત્

અથ કિં બહુનોક્તેન શુભં વા યદિ વાશુભમ્ ।
તદક્ષયફલં સર્વં ધૌતપાપે કૃતં નૃપ

સંન્યસેન્નિયમેનાન્નં સંન્યસેદ્વિષયાદિકમ્ ।
ફલમૂલાદિકં ચૈવ જલમેકં ન સંત્યજેત્

એવં યઃ કુરુતે પાર્થ રુદ્રલોકં સ ગચ્છતિ ।
તત્ર ભુક્ત્વાખિલાન્ભોગાઞ્જાયતે ભુવિ ભૂપતિઃ

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે ધૌતપાપતીર્થમાહાત્મ્યવર્ણનં નામ ચતુરશીત્યુત્તરશતતમોઽધ્યાયઃ ॥