સ્કંદ પુરાણ · અધ્યાય 5.109

શ્રીમાર્કણ્ડેય ઉવાચ -
તતો ગચ્છેન્મહીપાલ ચક્રતીર્થમનુત્તમમ્ ।
સેનાપુરમિતિખ્યાતં સર્વપાપક્ષયંકરમ્

સૈનાપત્યાભિષેકાય દેવદેવેન ચક્રિણા ।
આનીતશ્ચ મહાસેનો દેવૈઃ સેન્દ્રપુરોગમૈઃ

દાનવાનાં વધાર્થાય જયાય ચ દિવૌકસામ્ ।
ભૂમિદાનેન વિપ્રેન્દ્રાંસ્તર્પયિત્વા યથાવિધિ

શઙ્ખભેરીનિનાદૈશ્ચ પટહાનાં ચ નિસ્વનૈઃ ।
વીણાવેણુમૃદઙ્ગૈશ્ચ ઝલ્લરીસ્વરમઙ્ગલૈઃ

તતઃ કૃત્વા સ્વનં ઘોરં દાનવો બલદર્પિતઃ ।
રુરુર્નામ વિઘાતાર્થમભિષેકસ્ય ચાગતઃ

હસ્ત્યશ્વરથપત્ત્યોઘૈઃ પૂરયન્વૈ દિશો દશ ।
તત્ર તેન મહદ્યુદ્ધં પ્રવૃત્તં કિલ ભારત

શક્ત્યૃષ્ટિપાશમુશલૈઃ ખડ્ગૈસ્તોમરટઙ્કનૈઃ ।
ભલ્લૈઃ કર્ણિકનારાચૈઃ કબન્ધપટસંકુલૈઃ

તતસ્તુ તાં શત્રુબલસ્ય સેનાં ક્ષણેન ચાપન્ચ્યુતબાણઘાતૈઃ ।
વિધ્વસ્તહસ્ત્યશ્વરથાન્મહાત્મા જગ્રાહ ચક્રં રિપુસઙ્ઘનાશનઃ

જ્વલચ્ચ ચક્રં નિશિતં ભયંકરં સુરાસુરાણાં ચ સુદર્શનં રણે ।
ચકર્ત દૈત્યસ્ય શિરસ્તદાનીં કરાત્પ્રમુક્તં મધુઘાતિનશ્ચ તત્

તં દૃષ્ટ્વા સહસા વિઘ્નમભિષેકે ષડાનનઃ ।
ત્યક્ત્વા તુ તત્ર સંસ્થાનં ચચાર વિપુલં તપઃ

મુક્તં ચક્રં વિનાશાય હરિણા લોકધારિણા ।
દ્વિદલં દાનવં કૃત્વા પપાત વિમલે જલે

તદા પ્રભૃતિ તત્તીર્થં ચક્રતીર્થમિતિ શ્રુતમ્ ।
સર્વપાપવિનાશાય નિર્મિતં વિશ્વમૂર્તિના

ચક્રતીર્થે તુ યઃ સ્નાત્વા પૂજયેદ્દેવમચ્યુતમ્ ।
પુણ્ડરીકસ્ય યજ્ઞસ્ય ફલમાપ્નોતિ માનવઃ

તત્ર તીર્થે તુ યઃ સ્નાત્વા પૂજયેદ્બ્રાહ્મણાઞ્છુભાન્ ।
શાન્તદાન્તજિતક્રોધાન્સ લભેત્કોટિજં ફલમ્

તત્ર તીર્થે તુ યો ભક્ત્યા ત્યજતે દેહમાત્મનઃ ।
વિષ્ણુલોકં મૃતો યાતિ જયશબ્દાદિમઙ્ગલૈઃ

ક્રીડયિત્વા યથાકામં દેવગન્ધર્વપૂજિતઃ ।
ઇહાગત્ય ચ ભૂયોઽપિ જાયતે વિપુલે કુલે

એતત્પુણ્યં પાપહરં ધન્યં દુઃખપ્રણાશનમ્ ।
કથિતં તે મહાભાગ ભૂયશ્ચાન્યચ્છૃણુષ્વ મે

॥ ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં પઞ્ચમ આવન્ત્યખણ્ડે રેવાખણ્ડે સેનાપુરે ચક્રતીર્થમાહાત્મ્યવર્ણનં નામ નવોત્તરશતતમોઽધ્યાયઃ ॥