શારદાભુજઙ્ગસ્તોત્રમ્ · અધ્યાય 1

॥શારદાભુજઙ્ગપ્રયાતાષ્ટકમ્‌॥
સુવક્ષોજકુમ્ભાં સુધાપૂર્ણકમ્ભાં
પ્રસાદાવલમ્બાં પ્રપુણ્યાવલમ્બામ્‌ ।
સદાસ્યેન્દુબિમ્બાં સદાનોષ્ઠબિમ્બાં
ભજે શારદામ્બામજસ્રં મદમ્બામ્‌

કટાક્ષે દયાર્દ્રાં કરે જ્ઞાનમુદ્રાં
કલાભિર્વિનિદ્રાં કલાપૈઃ સુભદ્રામ્‌ ।
પુરસ્ત્રીં વિનિદ્રાં પુરસ્તુઙ્ગભદ્રાં
ભજે શારદામ્બામજસ્રં મદમ્બામ્‌

લલામાઙ્કફાલાં લસદ્ગાનલોલાં
સ્વભક્તૈકપાલાં યશઃશ્રીકપોલામ્‌ ।
કરે ત્વક્ષમાલાં કનત્પ્રત્નલોલાં
ભજે શારદામ્બામજસ્રં મદમ્બામ્‌

સુસીમન્તવેણીં દૃશા નિર્જિતૈણીં
રમત્કીરવાણીં નમદ્વજ્રપાણીમ્‌ ।
સુધામન્થરાસ્યાં મુદા ચિન્ત્યવેણીં
ભજે શારદામ્બામજસ્રં મદમ્બામ્ ‌

સુશાન્તાં સુદેહાં દૃગન્તે કચાન્તાં
લસત્સલ્લતાઙ્ગીમનન્તામચિન્ત્યામ્‌ ।
સ્મૃતાં તાપસૈઃ સર્ગપૂર્વસ્થિતાં તાં
ભજે શારદામ્બામજસ્રં મદમ્બામ્‌

કુરઙ્ગે તુરઙ્ગે મૃગેન્દ્રે ખગેન્દ્રે
મરાલે મદેભે મહોક્ષેઽધિરૂઢામ્‌ ।
મહત્યાં નવમ્યાં સદા સામરૂપાં
ભજે શારદામ્બામજસ્રં મદમ્બામ્‌

જ્વલત્કાન્તિવહ્નિં જગન્મોહનાઙ્ગીં
ભજે માનસામ્ભોજસુભ્રાન્તભૃઙ્ગીમ્‌ ।
નિજસ્તોત્રસંગીતનૃત્યપ્રભાઙ્ગીમ્‌
ભજે શારદામ્બામજસ્રં મદમ્બામ્‌

ભવામ્ભોજનેત્રાજસમ્પૂજ્યમાનાં
લસન્મન્દહાસપ્રભાવક્ત્રચિહ્નામ્‌ ।
ચલચ્ચઞ્ચલાચારુતાટઙ્કકર્ણાં
ભજે શારદામ્બામજસ્રં મદમ્બામ્‌

॥ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છઙ્કરભગવતઃ કૃતૌ શારદાભુજઙ્ગપ્રયાતાષ્ટકમ્॥