રામોદન્ત · શ્લોક 61*-80*

વ્રજન્ વનેન કાકુત્સ્થો વિરાધં વિધિચોદિતમ્
સદારાનુજમ્ આત્માનં હરન્તમ્ અવધીત્ તદા ॥

શરભઙ્ગાશ્રમમ્ પ્રાપ્ય સ્વર્ગતિં તસ્ય વીક્ષ્ય સઃ
પ્રતિજજ્ઞે રાક્ષસાનાં વધં મુનિભિર્ અર્થિતઃ ॥

તસ્માદ્ ગત્વા સુતીક્ષ્ણં ચ પ્રણમ્યાનેન પૂજિતઃ
અગસ્ત્યસ્યાશ્રમં પ્રાપ્ય તં નનામ રઘૂત્તમઃ ॥

રામાય વૈષ્ણવં ચાપમ્ ઐન્દ્રં તૂણીયુગં તથા
બ્રાહ્મં ચાસ્ત્રં ચ ખડ્ગં ચ પ્રદદૌ કુમ્ભસંભવઃ ॥

તતઃ સ ગચ્છન્ કાકુત્સ્થઃ સમાગમ્ય જટાયુષમ્
વૈદેહ્યાઃ પાલનાયૈનં શ્રદ્દધે પિતૃવલ્લભમ્ ॥

તતઃ પઞ્ચવટીં પ્રાપ્ય તત્ર લક્ષ્મણનિર્મિતામ્
પર્ણશાલામ્ અધ્યુવાસ સીતયા સહિતઃ સુખમ્ ॥

તત્રાભ્યેત્યૈકદા રામં વવ્રે શૂર્પણખાભિકા
તન્નિરસ્તા લક્ષ્મણં ચ વવ્રે સોઽ; પિ નિરાકરોત્ ॥

રામમ્ એવ તતો વવ્રે કામાર્તા કામસંનિભમ્
પુનશ્ ચ ધિક્કૃતા તેન સીતામ્ અભ્યદ્રવદ્ રુષા ॥

લક્ષ્મણેન તદા રોષાત્ કૃત્તશ્રવણનાસિકા
સા તુ ગત્વા જનસ્થાનં ખરાયૈતન્ ન્યવેદયત્ ॥

તદ્ આકર્ણ્ય ખરઃ ક્રુદ્ધો રાઘવં હન્તુમ્ આયયૌ
દૂષણત્રિશિરોમુખ્યૈર્ યાતુધાનૈઃ સમન્વિતઃ ॥

તત્ ક્ષણં લક્ષ્મણે સીતાં નિધાય રઘુનન્દનઃ
ખરં સહાનુગં સંખ્યે જઘાનાલઘુવિક્રમઃ ॥

તતઃ શૂર્પણખા ગત્વા લઙ્કાં શોકસમન્વિતા
ન્યવેદયદ્ રાવણાય વૃત્તાન્તં સર્વમ્ આદિતઃ ॥

તચ્ છ્રુત્વા રાવણઃ સીતાં હર્તું કૃતમતિસ્ તદા
મારીચસ્યાશ્રમં પ્રાપ્ય સાહાય્યે તમ્ અચોદયત્ ॥

સો ઽપિ સ્વર્ણમૃગો ભૂત્વા સીતાયાઃ પ્રમુખે ઽચરત્
સા તુ તં મૃગમ્ આહર્તું ભર્તારં સમયાચત ॥

નિયુજ્ય લક્ષ્મણં સીતાં રક્ષિતું રઘુનન્દનઃ
અન્વગચ્છન્ મૃગં તૂર્ણં દ્રવન્તં કાનનાન્તરે ॥

વિવ્યાધ ચ મૃગં રામઃ સ નિજં રૂપમ્ આસ્થિતઃ
હા સીતે લક્ષ્મણેત્ય્ એવં રુદન્ પ્રાણાન્ સમત્યજત્ ॥

એતદ્ આકર્ણ્ય વૈદેહ્યા લક્ષ્મણશ્ ચોદિતો ભૃશમ્
તદ્રક્ષાં દેવતાઃ પ્રાર્થ્ય પ્રયયૌ રાઘવાન્તિકમ્ ॥

તદ્ અન્તરે સમાસાદ્ય રાવણો યતિરૂપધૃત્
સીતાં ગૃહીત્વા પ્રયયૌ ગગનેન મુદાન્વિતઃ ॥

તતો જટાયુર્ આલોક્ય નીયમાનાં તુ જાનકીમ્
પ્રાહરદ્ રાવણં પ્રાપ્ય તુણ્ડપક્ષનખૈર્ ભૃશમ્ ॥

છિત્ત્વૈનમ્ ચન્દ્રહાસેન પાતયિત્વા ચ ભૂતલે
ગૃહીત્વા રાવણઃ સીતાં પ્રાવિશન્ નિજમન્દિરમ્ ॥