રામોદન્ત · શ્લોક 1*-20*

શ્રીપતિં પ્રણિપત્યાહં શ્રીવત્સાઙ્કિતવક્ષસમ્
શ્રીરામોદન્તમ્ આખ્યાસ્યે શ્રીવાલ્મીકિપ્રકીર્તિતમ્ ॥

પુરા વિશ્રવસઃ પુત્રો રાવણો નામ રાક્ષસઃ
આસીદ્ અસ્યાનુજૌ ચાસ્તાં કુમ્ભકર્ણવિભીષણૌ ॥

તે તુ તીવ્રેણ તપસા પ્રત્યક્ષીકૃત્ય વેધસમ્
વવ્રિરે ચ વરાન્ ઇષ્ટાન્ અસ્માદ્ આશ્રિતવત્સલાત્ ॥

રાવણો માનુષાદ્ અન્યૈર્ અવધ્યત્વં તથાનુજઃ
નિર્દેવત્વેચ્છયા નિદ્રાં કુમ્ભકર્ણો ઽવૃણીત ચ ॥

વિભીષણો વિષ્ણુભક્તિં વવ્રે સત્ત્વગુણાન્વિતઃ
તેભ્ય એતાન્ વરાન્ દત્ત્વા તત્રૈવાન્તર્દધે પ્રભુઃ ॥

રાવણસ્ તુ તતો ગત્વા રણે જિત્વા ધનાધિપમ્
લઙ્કાપુરીં પુષ્પકં ચ હૃત્વા તત્રાવસત્ સુખમ્ ॥

યાતુધાનાસ્ તતઃ સર્વે રસાતલનિવાસિનઃ
દશાનનં સમાશ્રિત્ય લઙ્કાયાં સુખમ્ આવસન્ ॥

મન્દોદરીં મયસુતાં પરિણીય દશાનનઃ
તસ્યામ્ ઉત્પાદયામ્ આસ મેઘનાદાહ્વયં સુતમ્ ॥

રસાં રસાતલં ચૈવ વિજિત્ય સ તુ રાવણઃ
લોકાન્ આક્રમયન્ સર્વાઞ્ જહાર ચ વિલાસિનીઃ ॥

દૂષયન્ વૈદિકં કર્મ દ્વિજાન્ અર્દયતિ સ્મ સઃ
આત્મજેનાન્વિતો યુદ્ધે વાસવં ચાપ્ય્ અપીડયત્ ॥

તદીયતરુરત્નાનિ પુનર્ આનાય્ય કિઙ્કરૈઃ
સ્થાપયિત્વા તુ લઙ્કાયામ્ અવસચ્ ચ ચિરાય સઃ ॥

તતસ્ તસ્મિન્ન્ અવસરે વિધાતારં દિવૌકસઃ
ઉપગમ્યોચિરે સર્વં રાવણસ્ય વિચેષ્ટિતમ્ ॥

તદ્ આકર્ણ્ય સુરૈઃ સાકં પ્રાપ્ય દુગ્ધોદધેસ્ તટમ્
તુષ્ટાવ ચ હૃષીકેશં વિધાતા વિવિધૈઃ સ્તવૈઃ ॥

આવિર્ભૂયાથ દૈત્યારિઃ પપ્રચ્છ ચ પિતામહમ્
કિમ્ અર્થમ્ આગતો ઽસિ ત્વં સાકં દેવગણૈર્ ઇતિ ॥

તતો દશાનનાત્ પીડામ્ અજસ્ તસ્મૈ ન્યવેદયત્
તચ્ છ્રુત્વોવાચ ધાતારં હર્ષયન્ વિષ્ટરશ્રવાઃ ॥

અલં ભયેનાત્મયોને ગચ્છ દેવગણૈઃ સહ
અહં દાશરથિર્ ભૂત્વા હનિષ્યામિ દશાનનમ્ ॥

આત્માંશૈશ્ ચ સુરાઃ સર્વે ભૂમૌ વાનરરૂપિણઃ
જાયેરન્ મમ સાહાય્યં કર્તું રાવણનિગ્રહે ॥

એવમ્ ઉક્ત્વા વિધાતારં તત્રૈવાન્તર્દધે પ્રભુઃ
પદ્મયોનિસ્ તુ ગીર્વાણૈઃ સમં પ્રાયાત્ પ્રહૃષ્ટધીઃ ॥

અજીજનત્ તતઃ શક્રો વાલિનં નામ વાનરમ્
સુગ્રીવમ્ અપિ માર્તાણ્ડો હનુમન્તં ચ મારુતઃ ॥

પુરૈવ જનયામ્ આસ જામ્બવન્તં ચ પદ્મજઃ
એવમ્ અન્યે ચ વિબુધાઃ કપીન્ અજનયન્ બહૂન્ ॥