રામોદન્ત · શ્લોક *6.65-156*

રાજા પર્યગ્રહીદ્ એવ ભાર્યાં રાવણદૂષિતામ્
ઇત્ય્ અજ્ઞજનવાદેન રામસ્ તત્યાજ મૈથિલીમ્ ॥

તદ્ વિદિત્વાથ વાલ્મીકિર્ આનીયૈનાં નિજાશ્રમમ્
અન્તર્વત્નીં સમાશ્વાસ્ય તત્રૈવાવાસયત્ સુખમ્ ॥

ઋષિભિઃ પ્રાર્થિતસ્યાથ રાઘવસ્ય નિયોગતઃ
શત્રુઘ્નો લવણં યુદ્ધે નિહત્યૈનાન્ અપાલયત્ ॥

તપસ્યન્તં તતઃ શૂદ્રં શમ્બૂકાખ્યં રઘૂત્તમઃ
હત્વા વિપ્રસ્ય કસ્યાપિ મૃતં પુત્રમ્ અજીવયત્ ॥

રામે હેમમયીં પત્નીં કૃત્વા યજ્ઞં વિતન્વતિ
આનીય સસુતાં સીતાં તસ્મૈ પ્રાચેતસો દદૌ ॥

શઙ્ક્યમાના પુનશ્ ચૈવં રામેણ જનકાત્મજા
ભૂમ્યા પ્રાર્થિતયા દત્તં વિવરં પ્રવિવેશ સા ॥

લક્ષ્મણઃ સભયભ્રંશાદ્ રામેણ સમુપેક્ષિતઃ
માનુષં દેહમ્ ઉત્સૃજ્ય સ્વકં રૂપં સમાવિશત્ ॥

અથ રામસ્ય નિર્દેશાત્ પૌરૈઃ સહ વનૌકસઃ
નિમજ્જ્ય સરયૂતીર્થે દેહં ત્યક્ત્વા દિવં યયુઃ ॥

તતો ભરતશત્રુઘ્નૌ નિજં રૂપમ્ અવાપતુઃ
રામો ઽપિ માનુષં દેહં ત્યક્ત્વા ધામાવિશત્ સ્વકમ્ ॥

શ્રીરામોદન્તમ્ આખ્યાતમ્ ઇદં મન્દધિયા મયા
સમીક્ષ્ય નિપુણૈઃ સદ્ભિઃ સંશોધ્ય પરિગૃહ્યતામ્ ॥

યેષાં પ્રસાદાદ્ રામસ્ય ચરિતં કીર્તિતં મયા
તાન્ ગુરૂન્ સર્વદા નૌમિ નારાયણપરાયણાન્ ॥

યસ્ તુ દાશરથિર્ ભૂત્વા રણે હત્વા ચ રાવણમ્
રરક્ષ લોકાન્ વૈકુણ્ઠઃ સ માં રક્ષતુ ચિન્મયઃ ॥