પ્રતીત્યસમુત્પાદમહાયાનસૂત્ર · ભાગ 11

આર્યપ્રતીત્યસમુત્પાદો નામ મહાયાનસૂત્રમ્ ।
એવં મયા શ્રુતમ્ । એકસ્મિન્ સમયે ભગવાન્ ત્રાયસ્ત્રિંશાનાં દેવાનાં મધ્યે વિહરતિ સ્મ પાણ્ડુકમ્બલકલ્પે શિલાતલે જિતાશ્વાદિમહાશ્રાવકૈઃ આર્યમૈત્રેયાવલોકિતેશ્વરવજ્રહસ્તાદિભિર્બોધિસત્ત્વૈર્મહાસત્ત્વૈઃ અપ્રમેયગુણરત્નાલંકૃતૈઃ મહાબ્રહ્મસહાંપતિનારાયણમહેશ્વરાદિભિર્દેવૈઃ શક્રેણ દેવાનામિન્દ્રેણ ગન્ધર્વરાજેન પઞ્ચશિખેન ચ સાર્ધમ્ । અથાવલોકિતેશ્વરો બોધિસત્ત્વો મહાસત્ત્વઃ ઉત્થાયાસનાત્ એકાંસમુત્તરાસઙ્ગં કૃત્વા દક્ષિણં જાનું મેરુપૃષ્ઠે ઽવષ્ટભ્ય યેન ભગનાન્ તેનાઞ્જલિં પ્રણમ્ય ભગવન્તમેતદવોચત્ - એતે હિ ભગવન્ દેવાઃ ચૈત્યનમસ્ક્રિયામણ્ડનાઃ એતત્પરિષન્મણ્ડલપતિતાઃ કથમપિ બ્રહ્મચર્યપુણ્યપ્રસવાઃ સદેવકે સમારકે સબ્રહ્મકે લોકે સશ્રમણબ્રાહ્મણપ્રજાસુ ભિક્ષવો ભિક્ષુણ્યઃ ઉપાસકોપાસિકાઃ સુબહુલપુણ્યપ્રસવાઃ ભગવતો ધર્મદેશનાં યાચન્તે ઇતિ । તદા ભગવાંસ્તેષાં પ્રતીત્યસમુત્પાદગાથામવોચત્ -
યે ધર્મા હેતુપ્રભવા હેતું તેષાં તથાગતો હ્યવદત્ ।
તેષાં ચ યો નિરોધ એવં વાદી મહાશ્રમણઃ ॥
યદિદમવલોકિતેશ્વર અયં પ્રતીત્યસમુત્પાદસ્તથાગતાનાં ધર્મકાયઃ । યઃ પ્રતીત્યસમુત્પાદં પશ્યતિ, સ તથાગતં પશ્યતિ । યશ્ચ અવલોકિતેશ્વર કુલપુત્રઃ કુલદુહિતા વા શ્રદ્ધાસમન્વિતઃ અપ્રતિષ્ઠિતે પૃથિવીપ્રદેશે આમલકમાત્રં ચૈત્યં સૂચીમાત્રં બોધિવૃક્ષં બકુલપુષ્પમાત્રં છત્રં કૃત્વા પ્રતીત્યસમુત્પાદધર્મધાતુગાથાં પઠતિ, સ બ્રાહ્મં પુણ્યં પ્રસવતિ । ઇતઃ પ્રચ્યાવ્ય મરણકાલં કૃત્વા બ્રહ્મલોકે ઉત્પદ્યતે । તતઃ પ્રચ્યાવ્ય કાલં કૃત્વા શુદ્ધાવાસકાયિકાનાં દેવાનાં સભાગતાયામુત્પદ્યતે ॥
એવમવોચદ્ભગવાન્ । સ ર્વે ચ તે શ્રાવકાઃ, તે ચ બોધિસત્ત્વા મહાસત્ત્વાઃ, સર્વાવતી ચ સા પર્ષત્, સદેવમનુષ્યાસુરગન્ધર્વલોકશ્ચ ભગવતો ભાષિતમભ્યનન્દન્ ॥
આર્યપ્રતીત્યસમુત્પાદો નામ મહાયાનસૂત્રમ્ ॥