પૈપ્પલાદ-સંહિતા · અધ્યાય 9.27

ઉચ્ચૈર્ ઘોષો દુન્દુભિઃ સત્વનાયં
વાનસ્પત્યઃ સંભૃત ઉસ્રિયાભિઃ ।
વાચં ક્ષણુવાનો દમયન્ સપત્નાન્
સિંહ ઇવ જ્યેષ્યન્ન્ અભિ તંસ્તનીભિઃ ॥

સિંહ ઇવાસ્તાનીદ્ દ્રુવયો વિબદ્ધો
ઽભિક્રન્દન્ન્ ઋષભો વાશિતામ્ ઇવ ।
વૃષા ત્વં વધ્રયસ્ તે સપત્ના
ઐન્દ્રસ્ તે શુષ્મો અભિમાતિષાહઃ ॥

સંજયન્ પૃતના ઊર્ધ્વમાયુર્
ગૃહ્યા ગૃહ્ણાનો બહુધા વિ ચક્ષ્વ ।
દૈવીં વાચમ્ આ હુર ગુરસ્વ વેધાઃ
શત્રૂણામ્ ઉપ ભરસ્વ વેદઃ ॥

વૃષેવ યૂથં સહસો વિદાનો
ગવ્યન્ન્ અભિ રુવ સંધનાજિત્ ।
શુચા વિધ્ય હૃદયં પરેષાં
હિત્વા ગ્રામાન્ પ્રચ્યુતા યન્તુ શત્રવઃ ॥

દુન્દુભેર્ વાચં પ્રયતાં વદન્તીમ્
આશૃણ્વતી નાથિતા ઘોષબુદ્ધા ।
નારી પુત્રાન્ ધાવતુ હસ્તગૃહ્ય-
-અમિત્રી ભીતા સમરે વધાના ॥

ધીભિઃ કૃતઃ પ્ર ભરસ્વ વાચમ્
ઉદ્ ધર્ષય સત્વનામ્ આયુધાનિ ।
અમિત્રસેનામ્ અભિજઞ્જભાનો
દ્યુમદ્ વદ દુન્દુભે સૂનૃતાવત્ ॥

પૂર્વો દુન્દુભે વિ ષહસ્વ શત્રૂન્
ભૂમ્યાઃ પૃષ્ઠે વદ બહુ રોચમાનઃ ।
ઇન્દ્રમેદી સત્વનઃ સં હ્વયસ્વ
મિત્રૈર્ અમિત્રાન્ અવ જઙ્ઘનીહિ ॥

અન્તરેમે નભસી ઘોષો અસ્તુ
પૃથક્ તે ધ્વનયો યન્તુ શીભમ્ ।
અભિ ક્રન્દ સ્તનયોત્પિપાનાં
શ્લોકકૃન્ મિત્રતૂર્યાય સ્વર્ધિ ॥

સંક્રન્દનઃ પ્રવેદો ધૃષ્ણુષેણઃ
પ્રવેદકૃદ્ બહુધા ગ્રામઘોષી ।
શ્રેયો વન્વાનો વયુનાનિ વિદ્વાન્
કીર્તિં બહુભ્યો વિ ભજ દ્વિરાજે ॥

શ્રેયઃકેતો વસુજિત્ સહીયાન્
મિત્રં દધાનસ્ ત્વિષિતો વિપશ્ચિત્ ।
અંશૂન્ ઇવ ગ્રાવાધિષવણે અદ્રિર્
ગવ્યં દુન્દુભે અધિ નૃત્ય વેદઃ ॥

શત્રૂષાણ્ નીષાડ્ અભિમાતિષાહો
ગવેષણઃ સહમાન ઉદ્ભિત્ ।
વાગ્વી મન્ત્રં પ્ર જનયસ્વ વાજિન્
સાઙ્ગ્રામજિત્યાયેષમ્ ઉદ્ વદેહ ॥

અચ્યુતચ્યુત્ સમદો ગમિષ્ઠો
મૃધો જેતા પૃતનાષાડ્ અયોધ્યઃ ।
ઇન્દ્રેણ ક્લ્̥પ્તો વિદથા નિચિક્યદ્
ધૃદ્દ્યોતનો દ્વિષતાં યાહિ શીભમ્ ॥