પૈપ્પલાદ-સંહિતા · અધ્યાય 2.40

ઇહેત દેવીર્ અયમ્ અસ્તુ પન્થા
અયં વો લોકઃ શરણાય સાધુઃ ।
ઇદં હવિર્ જુષમાણા ઉદેત
ક્ષિપ્રા રાજ્ઞા વરુણેન પ્રસૂતાઃ ॥

ઇહૈતુ રાજા વરુણો ઽજિરાભિર્
દેવો દેવીભિર્ હવિષો જુષાણઃ ।
કૃણુષ્વ પન્થામ્ ઉદયાનમ્ ઊર્મિભિર્
અનેન બભ્રો મહતા પૃથિવ્યાઃ ॥

પ્રિયે ધ્રિયધ્વમ્ ઉદયાનમ્ ઉન્દતીર્
ઓક ઔઘાનામ્ ઇહ રારણીતુ ।
અનેન વેગાન્ અસૃજત્ પ્રજાપતિર્
ઇહ ધ્રિયધ્વં શરણં સરસ્વતીઃ ॥

ઇહ વો જૂતિર્ ધ્રિયતાં સમાન્ય્
અપામ્ અગ્નીનાં વરુણસ્ય સોમ ।
અનેન વેગાન્ અસૃજત્ ત્વિષીમતો
ઽહિંસ્રાઞ્ છમ્ભૂન્ અજિરાઁ અતૃષ્ણજઃ ॥

યે પારતો મધ્યતો યે તે અન્તયોર્
અપ્સુષદો નિહિતાસ્ તીરે અગ્નયઃ ।
તે દેવજા ઇહ નો મૃડયન્ત્વ્
આપશ્ ચ જન્મન્ન્ ઉભયે સબન્ધવઃ ॥

ઇદં વ આપો હૃદયમ્
અયં વત્સ ઋતાવરીઃ ।
ઇહેત્થમ્ એત શક્વરીર્
યત્રેમઁ વેશયામસિ ॥