નૃસિંહસ્તોત્રમ્ · અધ્યાય 1

શ્રી ગણેશાય નમઃ ।
બ્રહ્મોવાચ ।
નતોઽસ્મ્યનન્તાય દુરન્તશક્તયે વિચિત્રવીર્યાય પવિત્રકર્મણે ।
વિશ્વસ્ય સર્ગસ્થિતિસંયમાન્ગુણૈઃ સ્વલીલયા સન્દધતેઽવ્યયાત્મને

શ્રીરુદ્ર ઉવાચ ।
કોપકાલો યુગાન્તસ્તે હતોઽયમસુરોઽલ્પકઃ ।
તત્સુતં પાહ્યુપસૃતં ભક્તં તે ભક્તવત્સલ

ઇન્દ્ર ઉવાચ ।
પ્રત્યાનીતાઃ પરમ ભવતા ત્રાયતાં નઃ સ્વભાગા
દૈત્યાક્રાન્તં હૃદયકમલં ત્વદ્ગૃહં પ્રત્યબોધિ ।
કાલગ્રસ્તં કિયદિદમહો નાથ શુશ્રૂષતાં તે
મુક્તિસ્તેષાં ન હિ બહુમતા નારસિંહાપરૈઃ કિમ્

ઋષય ઊચુઃ ।
ત્વં નસ્તપઃ પરમમાત્થ યદાત્મતેજો યેનેદમાદિપુરુષાત્મગતં સસર્જ ।
તદ્વિપ્રલુપ્તમમુનાદ્ય શરણ્યપાલ રક્ષાગૃહીતવપુષા પુનરન્વમંસ્થાઃ

પિતર ઊચુઃ ।
શ્રાદ્ધાનિ નોઽધિબુભુજે પ્રસભં તનૂજૈર્દત્તાનિ તીર્થસમયેઽપ્યપિબત્તિલામ્બુ ।
તસ્યોદરાન્નખવિદીર્ણવપાદ્ય આર્ચ્છત્તસ્મૈ નમો નૃહરયેઽખિલ ધર્મગોપ્ત્રે

સિદ્ધા ઊચુઃ ।
યો નો ગતિં યોગસિદ્ધામસાધુરહારષીદ્યોગતપોબલેન ।
નાનાદર્પં તં નખૈર્નિર્દદાર તસ્મૈ તુભ્યં પ્રણતાઃ સ્મો નૃસિંહ

વિદ્યાધરા ઊચુઃ ।
વિદ્યાં પૃથગ્ધારણયાઽનુરાદ્ધાં ન્યષેધદજ્ઞો બલવીર્યદૃપ્તઃ ।
સ યેન સંખ્યે પશુબદ્ધતસ્તં માયાનૃસિંહં પ્રણતાઃ સ્મ નિત્યમ્

નાગા ઊચુઃ ।
યેન પાપેન રત્નાનિ સ્ત્રીરત્નાનિ હૃતાનિ નઃ ।
તદ્વક્ષઃપાટનેનાસાં દત્તાનન્દ નમોઽસ્તુ તે

મનવ ઊચુઃ ।
મનવો વયં તવ નિદેશકારિણો દિતિજેન દેવ પરિભૂતસેતવઃ ।
ભવતા ખલઃ સ ઉપસંહૃતઃ પ્રભો કરવામ તે કિમનુશાધિ કિઙ્કરાન્

પ્રજાપતય ઊચુઃ ।
પ્રજેશા વયં તે પરેશાભિસૃષ્ટા ન યેન પ્રજા વૈ સૃજામો નિષિદ્ધાઃ ।
સ એષ ત્વયા ભિન્નવક્ષાનુશેતે જગન્મઙ્ગલં સત્ત્વમૂર્તેઽવહારઃ

ગન્ધર્વા ઊચુઃ ।
વયં વિભો તે નટનાટ્યગાયકા યેનાત્મસાદ્વીર્યબલૌજસા કૃતાઃ ।
સ એષ નીતો ભવતા દશામિમાં કિમુત્પથસ્થઃ કુશલાય કલ્પતે

ચારણા ઊચુઃ ।
હરે તવાંગ્ઘ્રિપઙ્કજં ભવાપવર્ગમાશ્રિતાઃ ।
યદેવ સાધુ હૃચ્છયસ્ત્વયાઽસુરઃ સમાપિતઃ

યક્ષા ઊચુઃ ।
વયમનુચરમુખ્યાઃ કર્મભિસ્તે મનોજ્ઞૈસ્ત ઇહ દિતિસુતેન પ્રાપિતા વાહકત્વમ્ ।
સ તુ જનપરિતાપં તત્કૃતં જાનતા તે નરહર ઉપનીતઃ પઞ્ચતાં પઞ્ચવિંશઃ

કિમ્પુરુષા ઊચુઃ ।
વયં કિમ્પુરુષાસ્ત્વં તુ મહાપુરુષ ઈશ્વર ।
અયં કુપુરુષો નષ્ટો ધિક્કૃતઃ સાધુભિર્યદા

વૈતાલિકા ઊચુઃ ।
સભાસુ સત્રેષુ તવામલં યશો ગીત્વા સપર્યાં મહતીં લભામહે ।
યસ્તાં વ્યનૈષીદ્ભૃશમેષ દુર્જનો દિષ્ટ્યા હતસ્તે ભગવન્યથામયઃ

કિન્નરા ઊચુઃ ।
વયમીશ કિન્નરગણાસ્તવાનુગા દિતિજેન વિષ્ટિમમુનાઽનુકારિતાઃ ।
ભવતા હરે સ વૃજિનોઽવસાદિતો નરસિંહ નાથ વિભવાય નો ભવ

વિષ્ણુપાર્ષદા ઊચુઃ ।
અદ્યૈતદ્ધરિનરરૂપમદ્ભુતં તે દૃષ્ટં નઃ શરણદ સર્વલોકશર્મ ।
સોઽયં તે વિધિકર ઈશ વિપ્રશપ્તસ્તસ્યેદં નિધનમનુગ્રહાય વિદ્મઃ

॥ ઇતિ શ્રીમદ્ભાગવતાન્તર્ગતે સપ્તમસ્કન્ધેઽષ્ટમધ્યાયે નૃસિંહસ્તોત્રં સમ્પૂર્ણમ્ ॥