નિર્વાણષટ્કમ્ · અધ્યાય 1

નિર્વાણષટ્કમ્
મનોબુદ્ધ્યહંકારચિત્તાનિ નાહં
ન ચ શ્રોત્રજિહ્વે ન ચ ઘ્રાણનેત્રે ।
ન ચ વ્યોમભૂમિર્ન તેજો ન વાયુઃ
ચિદાનન્દરૂપઃ શિવોઽહં શિવોઽહમ્

ન ચ પ્રાણસંજ્ઞો ન વૈ પઞ્ચવાયુઃ
ન વા સપ્તધાતુર્ન વા પઞ્ચકોશઃ ।
ન વાક્પાણિપાદં ન ચોપસ્થપાયૂ
ચિદાનન્દરૂપઃ શિવોઽહં શિવોઽહમ્

ન મે દ્વેષરાગૌ ન મે લોભમોહૌ
મદો નૈવ મે નૈવ માત્સર્યભાવઃ ।
ન ધર્મો ન ચાર્થો ન કામો ન મોક્ષઃ
ચિદાનન્દરૂપઃ શિવોઽહં શિવોઽહમ્

ન પુણ્યં ન પાપં ન સૌખ્યં ન દુઃખં
ન મન્ત્રો ન તીર્થો ન વેદા ન યજ્ઞઃ ।
અહં ભોજનં નૈવ ભોજ્યં ન ભોક્તા
ચિદાનન્દરૂપઃ શિવોઽહં શિવોઽહમ્

ન મે મૃત્યુશઙ્કા ન મે જાતિભેદઃ
(અથવા)
ન મૃત્યુર્ન શઙ્કા ન મે જાતિભેદઃ
પિતા નૈવ મે નૈવ માતા ન જન્મ ।
ન બન્ધુર્ન મિત્રં ગુરુર્નૈવ શિષ્યઃ
ચિદાનન્દરૂપઃ શિવોઽહં શિવોઽહમ્

અહં નિર્વિકલ્પો નિરાકારરૂપઃ
વિભુત્વાચ્ચ સર્વત્ર સર્વેન્દ્રિયાણામ્
(અથવા)
વિભુર્વ્યાપ્ય સર્વત્ર સર્વેન્દ્રિયાણામ્ ।
ન ચાસઙ્ગતં નૈવ મુક્તિર્ન મેયઃ
(અથવા)
સદા મે સમત્વં ન મુક્તિર્ન બન્ધઃ
ચિદાનન્દરૂપઃ શિવોઽહં શિવોઽહમ્