navagrahastotram · અધ્યાય 1

॥ અથ નવગ્રહસ્તોત્રમ્ ॥
॥ રવિઃ ॥
જપાકુસુમસઙ્કાશં કાશ્યપેયં મહાદ્યુતિમ્।
તમોઽરિં સર્વપાપઘ્નં પ્રણતોઽસ્મિ દિવાકરમ્

॥ સોમઃ ॥
દધિશઙ્ખતુષારાભં ક્ષીરોદાર્ણવસમ્ભવમ્।
નમામિ શશિનં સોમં શમ્ભોર્મુકુટભૂષણમ્

॥ મઙ્ગલઃ ॥
ધરણીગર્ભસમ્ભૂતં વિદ્યુત્કાન્તિસમપ્રભમ્।
કુમારં શક્તિહસ્તં તં મઙ્ગલં પ્રણમામ્યહમ્

॥ બુધઃ ॥
પ્રિયઙ્ગુકલિકાશ્યામં રૂપેણાપ્રતિમં બુધમ્।
સૌમ્યં સૌમ્યગુણોપેતં તં બુધં પ્રણમામ્યહમ્

॥ ગુરુઃ ॥
દેવાનાં ચ ઋષીણાં ચ ગુરું કાઞ્ચનસન્નિભમ્।
બુદ્ધિભૂતં ત્રિલોકેશં તં નમામિ બૃહસ્પતિમ્

॥ શુક્રઃ ॥
હિમકુન્દમૃણાલાભં દૈત્યાનાં પરમં ગુરુમ્।
સર્વશાસ્ત્રપ્રવક્તારં ભાર્ગવં પ્રણમામ્યહમ્

॥ શનિઃ ॥
નીલાઞ્જનસમાભાસં રવિપુત્રં યમાગ્રજમ્।
છાયામાર્તણ્ડસમ્ભૂતં તં નમામિ શનૈશ્ચરમ્

॥ રાહુઃ ॥
અર્ધકાયં મહાવીર્યં ચન્દ્રાદિત્યવિમર્દનમ્।
સિંહિકાગર્ભસંભૂતં તં રાહું પ્રણમામ્યહમ્

॥ કેતુઃ ॥
પલાશપુષ્પસઙ્કાશં તારકાગ્રહમસ્તકમ્।
રૌદ્રં રૌદ્રાત્મકં ઘોરં તં કેતું પ્રણમામ્યહમ્

॥ ફલશ્રુતિઃ ॥
ઇતિ વ્યાસમુખોદ્ગીતં યઃ પઠેત્સુસમાહિતઃ।
દિવા વા યદિ વા રાત્રૌ વિઘ્નશાન્તિર્ભવિષ્યતિ॥
નરનારીનૃપાણાં ચ ભવેદ્દુઃસ્વપ્નનાશનમ્।
ઐશ્વર્યમતુલં તેષામારોગ્યં પુષ્ટિવર્ધનમ્॥
ગ્રહનક્ષત્રજાઃ પીડાસ્તસ્કરાગ્નિસમુદ્ભવાઃ।
તાઃ સર્વાઃ પ્રશમં યાન્તિ વ્યાસો બ્રૂતે ન સંશયઃ॥
॥ ઇતિ શ્રીવ્યાસવિરચિતમ્ આદિત્યાદિનવગ્રહસ્તોત્રં સમ્પૂર્ણમ્ ॥
॥ અથ નવગ્રહપીડાહરસ્તોત્રમ્ ॥
॥ રવિઃ ॥
ગ્રહાણામાદિરાદિત્યો લોકરક્ષણકારકઃ।
વિષમસ્થાનસમ્ભૂતાં પીડાં હરતુ મે રવિઃ

॥ સોમઃ ॥
રોહિણીશઃ સુધામૂર્તિઃ સુધાગાત્રઃ સુધાશનઃ।
વિષમસ્થાનસમ્ભૂતાં પીડાં હરતુ મે વિધુઃ

॥ મઙ્ગલઃ ॥
ભૂમિપુત્રો મહાતેજા જગતાં ભયકૃત્સદા।
વૃષ્ટિકૃદ્દૃષ્ટિહર્તા ચ પીડાં હરતુ મે કુજઃ

॥ બુધઃ ॥
ઉત્પાતરૂપો જગતાં ચન્દ્રપુત્રો મહાદ્યુતિઃ।
સૂર્યપ્રિયકરો વિદ્વાન્ પીડાં હરતુ મે બુધઃ

॥ ગુરુઃ ॥
દેવમન્ત્રી વિશાલાક્ષઃ સદા લોકહિતે રતઃ।
અનેકશિષ્યસમ્પૂર્ણઃ પીડાં હરતુ મે ગુરુઃ

॥ શુક્રઃ ॥
દૈત્યમન્ત્રી ગુરુસ્તેષાં પ્રાણદશ્ચ મહામતિઃ।
પ્રભુસ્તારાગ્રહાણાં ચ પીડાં હરતુ મે ભૃગુઃ

॥ શનિઃ ॥
સૂર્યપુત્રો દીર્ઘદેહો વિશાલાક્ષઃ શિવપ્રિયઃ।
દીર્ઘાચારઃ પ્રસન્નાત્મા પીડાં હરતુ મે શનિઃ

॥ રાહુઃ ॥
અનેકરૂપવર્ણેશ્ચ શતશોઽથ સહસ્રદૃક્।
ઉત્પાતરૂપો જગતાં પીડાં હરતુ મે તમઃ

॥ કેતુઃ ॥
મહાશિરા મહાવક્ત્રો દીર્ઘદંષ્ટ્રો મહાબલઃ।
અતનુશ્ચોર્ધ્વકેશશ્ચ પીડાં હરતુ મે શિખીઃ

॥ ઇતિ બ્રહ્માણ્ડપુરાણોક્તં નવગ્રહપીડાહરસ્તોત્રં સમ્પૂર્ણમ્ ॥
—