લઘુયમસ્મૃતિ · શ્લોક 21 -40

દણ્ડ્યાસ્ તત્ પુત્રમિત્રાણિ પ્રત્યેકં પણિકં દમમ્ ।
પ્રાયશ્ચિત્તં તતઃ કુર્યુર્ યથા શાસ્ત્રપ્રચોદિતમ્ ॥

જલાદ્યુદ્બન્ધનભ્રષ્ટાઃ પ્રવ્રજ્યાનાશકચ્યુતાઃ ।
વિષપ્રપતનપ્રાય શસ્ત્રઘાતહતાશ્ ચ યે ॥

નવૈતે પ્રત્યવસિતાઃ સર્વલોકબહિષ્કૃતાઃ ।
ચાન્દ્રાયણેન શુધ્યન્તિ તપ્તકૃચ્છ્રદ્વયેન વા ॥

ઉભયાવસિતઃ પાપઃ શ્યામાચ્ છબલકાચ્ ચ્યુતઃ ।
ચાન્દ્રાયણાભ્યાં શુધ્યેત દત્ત્વા ધેનું તથા વૃષમ્ ॥

શ્વશૃગાલપ્લવઙ્ગાદ્યૈર્ માનુષૈશ્ ચ રતિં વિના ।
દષ્ટઃ સ્નાત્વા શુચિઃ સદ્યો દિવા સંધ્યાસુ રાત્રિષુ ॥

અજ્ઞાનાદ્ બ્રાહ્મણો ભુક્ત્વા ચણ્ડાલાન્નં કદાચન ।
ગોમૂત્રયાવકાહારો માસાર્ધેન વિશુધ્યતિ ॥

ગોબ્રાહ્મણગૃહં દગ્ધા મૃતં ચોદ્બન્ધનાદિના ।
પાશાંશ્ છિત્ત્વા તથા તસ્ય કૃચ્છ્રમ્ એકં ચરેદ્ દ્વિજઃ ॥

ચણ્ડાલપુક્કસાનાં ચ ભુક્ત્વા ગત્વા ચ યોષિતમ્ ।
કૃચ્છ્રાબ્દમ્ આચરેજ્ જ્ઞાનાદ્ અજ્ઞાનાદ્ ઐન્દવદ્વયમ્ ॥

કાપાલિકાન્નભોક્તૄણાં તન્નારીગામિનાં તથા ।
કૃચ્છ્રાબ્દમ્ આચરેજ્ જ્ઞાનાદ્ અજ્ઞાનાદ્ ઐન્દવદ્વયમ્ ॥

અગમ્યાગમને વિપ્રો મદ્યગોમાંસભક્સણે ।
તપ્તકૃચ્છ્રપરિક્ષિપ્તો મૌઞ્જી હોમેન શુધ્યતિ ॥

મહાપાતકકર્તારશ્ ચત્વારો ઽપ્ય્ અવિશેષતઃ ।
અગ્નિં પ્રવિશ્ય શુધ્યન્તિ સ્થિત્વા વા મહતિ ક્રતૌ ॥

રહસ્યકરણે ઽપ્ય્ એવં માસમ્ અભ્યસ્ય પૂરુષઃ ।
અઘમર્ષણસૂક્તં વા શુધ્યેદ્ અન્તર્જલે સ્થિતઃ ॥

રજકશ્ ચર્મકારશ્ ચ નટો બુરુડ એવ ચ ।
કૈવર્તમેદભિલ્લાશ્ ચ સપ્તૈતે અન્ત્યજાઃ સ્મૃતાઃ ॥

ભુક્ત્વા ચૈષાં સ્ત્રિયો ગત્વા પીત્વાપઃ પ્રતિગૃહ્ય ચ ।
કૃચ્છ્રાબ્દમ્ આચરેજ્ જ્ઞાનાદ્ અજ્ઞાનાદ્ ઐન્દવદ્વયમ્ ॥

માતરં ગુરુપત્નીં ચ સ્વસૃદુહિતરૌ સ્નુષામ્ ।
ગત્વૈતાઃ પ્રવિશેદ્ અગ્નિં નાન્યા શુદ્ધિર્ વિધીયતે ॥

રાજ્ઞાં પ્રવ્રજિતાં ધાત્રીં તથા વર્ણોત્તમામ્ અપિ ।
કૃચ્છ્રદ્વયં પ્રકુર્વીત સ ગોત્રામ્ અભિગમ્ય ચ ॥

અન્યાસુ પિતૃગોત્રાસુ માતૃગોત્રગતાસ્વ્ અપિ ।
પરદારેષુ સર્વેષુ કૃચ્છ્રં સાંતપનં ચરેત્ ॥

વેશ્યાભિગમને પાપં વ્યપોહન્તિ દ્વિજાતયઃ ।
પીત્વા સકૃત્ સુતપ્તં ચ પઞ્ચરાત્રં કુશોદકમ્ ॥

ગુરુતલ્પવ્રતં કેચિત્ કેચિદ્ બ્રહ્મહણો વ્રતમ્ ।
ગોઘ્નસ્ય કેચિદ્ ઇચ્છન્તિ કેચિચ્ ચૈવાવકીર્ણિનઃ ॥

દણ્ડાદ્ ઊર્ધ્વપ્રહારેણ યસ્ તુ ગાં વિનિપાતયેત્ ।
દ્વિગુણં ગો વ્રતં તસ્ય પ્રાયશ્ચિત્તં વિનિર્દિશેત્ ॥