કાલાગ્નિરુદ્રોપનિષત્ · અધ્યાય 1

॥ કાલાગ્નિરુદ્રોપનિષત્ ॥
ૐ સહ નાવવતુ । સહ નૌ ભુનક્તુ । સહવીર્યં કરવાવહૈ । તેજસ્વિનાવધીતમસ્તુ મા વિદ્વિષાવહૈ ॥
ૐ શાન્તિઃ શાન્તિઃ શાન્તિઃ ॥
ૐ અથ કાલાગ્નિરુદ્રોપનિષદઃ સંવર્તકોઽગ્નિરૄષિરનુષ્ટુપ્છ્ન્દઃ । શ્રીકાલાગ્નિરુદ્રો દેવતા । શ્રીકાલાગ્નિરુદ્રપ્રીત્યર્થે ભસ્મત્રિપુણ્ડ્રધારણે વિનિયોગઃ

અથ કાલાગ્નિરુદ્રં ભગવન્તં સનત્કુમારઃ પપ્રચ્છ અધીહિ ભગવંસ્ત્રિપુણ્ડ્રવિધિં સતત્ત્વં કિં દ્રવ્યં કિયત્સ્થાનં કતિ પ્રમાણં કા રેખા કે મન્ત્રાઃ કા શક્તિઃ કિં દૈવતં કઃ કર્તા કિં ફલમિતિ ચ

તં હોવાચ ભગવાન્કાલાગ્નિરુદ્રઃ યદ્દ્રવ્યં તદાગ્નેયં ભસ્મ સદ્યોજાતાદિપઞ્ચબ્રહ્મમન્ત્રૈઃ પરિગૃહ્યાગ્નિરિતિ ભસ્મ વાયુરિતિ ભસ્મ જલમિતિ ભસ્મ સ્થલમિતિ ભસ્મ વ્યોમેતિ ભસ્મેત્યનેનાભિમન્ત્ર્ય માનસ્તોક ઇતિ સમુદ્ધૃત્ય મા નો મહાન્તમિતિ જલેન સંસૃજ્ય ત્રિયાયુષમિતિ શિરોલલાટવક્શઃસ્કન્ધેષુ ત્રિયાયુષૈસ્ત્ર્યમ્બકૈસ્ત્રિશક્તિભિસ્તિર્યક્તિસ્રો રેખાઃ પ્રકુર્વીત વ્રતમેતચ્છામ્ભવં સર્વેષુ દેવેષુ વેદવાદિભિરુક્તં ભવતિ તસ્માત્તત્સમાચરેન્મુમુક્ષુર્ન પુનર્ભવાય

અથ સનત્કુમારઃ પપ્રચ્છ પ્રમાણમસ્ય ત્રિપુણ્ડ્રધારણસ્ય

ત્રિધા રેખા ભવત્યાલલાટાદાચક્ષુષોરામૂર્ધ્નોરાભ્રુવોર્મધ્યતશ્ચ

યાસ્ય પ્રથમા રેખા સા ગાર્હપત્યશ્ચાકારો રજો ભૂર્લોકઃ સ્વાત્મા ક્રિયાશક્તિરૃગ્વેદઃ પ્રાતઃસવનં મહેશ્વરો દેવતેતિ

યાસ્ય દ્વિતીયા રેખા સા દક્શિણાગ્નિરુકારઃ સત્વમન્તરિક્ષમન્તરાત્મા ચેચ્છાશક્તિર્યજુર્વેદો માધ્યંદિનં સવનં સદાશિવો દેવતેતિ

યાસ્ય તૃતીયા રેખા સાહવનીયો મકારસ્તમો દ્યૌર્લોકઃ પરમાત્મા જ્ઞાનશક્તિઃ સામવેદસ્તૃતીયસવનં મહાદેવો દેવતેતિ

એવં ત્રિપુણ્ડ્રવિધિં ભસ્મના કરોતિ યો વિદ્વાન્બ્રહ્મચારી ગૃહી વાનપ્રસ્થો યતિર્વા સ મહાપાતકોપપાતકેભ્યઃ પૂતો ભવતિ સ સર્વેષુ તીર્થેષુ સ્નાતો ભવતિ સ સર્વાન્વેદાનધીતો ભવતિ સ સર્વાન્દેવાઞ્જ્ઞાતો ભવતિ સ સતતં સકલરુદ્રમન્ત્રજાપી ભવતિ સ સકલભોગાન્ભુઙ્ક્તે દેહં ત્યક્ત્વા શિવસાયુજ્યમેતિ ન સ પુનરાવર્તતે ન સ પુનરાવર્તત ઇત્યાહ ભગવાન્કાલાગ્નિરુદ્રઃ

યસ્ત્વેતદ્વાધીતે સોઽપ્યેવમેવ ભવતીત્યોં સત્યમિત્યુપનિષત્

ૐ સહ નાવવતુ । સહ નૌ ભુનક્તુ । સહવીર્યં કરવાવહૈ । તેજસ્વિનાવધીતમસ્તુ મા વિદ્વિષાવહૈ ॥
ૐ શાન્તિઃ શાન્તિઃ શાન્તિઃ ॥
॥ ઇતિ કાલાગ્નિરુદ્રોપનિષત્સમાપ્તા ॥
અધિકાધ્યયનાય