જાતકમાલા · શ્લોક 72-91

પક્ષિવિરાજિતપર્વતશૃઙ્ગં શૃઙ્ગશિલાતલસંસ્થિતસિદ્ધમ્ ।
સિદ્ધવધૂજનરમ્યનિકુઞ્જં કુઞ્જનિષેવિતમત્તશકુન્તમ્

મત્તશિખણ્ડિકલસ્વનરમ્યં રમ્યગુહામુખનિર્ગતસિંહમ્ ।
સિંહનિનાદભયાકુલનાગં નાગમદામ્બુસુગન્ધિસમીરમ્

ક્વ ચિદ્ ઉપચિતવારણદન્તશિખાશનિદારિતશિખરતટં પ્રવિરૂઢવિલાસશિખાગરુવૃક્ષવનં ક્વ ચિદ્ ઉપરિપયોધરભારતરધ્વનિઞ્જિતશિખિકુલવિસ્તૃતપિચ્છકલાપવિચિત્રિતચારુતટમ્ ।
ક્વ ચિદ્ અનિલવિકમ્પિતપુષ્પતરું સ્ખલિતોજ્જ્વલસુરભિજલં કુસુમપ્રબલપ્રતિવાસિતસાનુશિખં ⏑ ⏑ ⏑ ⏑ ⏑ ⏑ – ⏑ ⏑ – ⏑ ⏑ – ⏑ ⏑ – ⏑ ⏑ ⏑ ⏑ ⏑ ⏑ – ⏑ ⏑ – ⏑ ⏑ – ⏑ ⏑ – ⏑ ⏑ – ⏑ ⏑ –

તથાપરં દદર્શ ।
લિખન્તં કરાલૈર્ નભઃ શૃઙ્ગજાલૈઃ ક્ષિપન્તં મયૂખૈસ્ તમઃ સાગરાણામ્ ।
વહન્તં સમુદ્રામ્બરામ્ અદ્રિગુર્વીં ક્ષરન્તં ક્વ ચિત્ કાઞ્ચનામ્ભઃપ્રવાહમ્

ફલિતામલભૂષણકલ્પતરું તરુખણ્ડવિરાજિતસાનુશિખમ્ ।
શિખરસ્થિતદેવવધૂમિથુનં મિથુનૈર્ દહતાં વયસાં મધુરમ્

ક્વ ચિદ્ અર્કમહારથચક્રનિર્વાતવિખણ્ડિતમયૂખકલાપકરાલિતનૈકમહામણિપલ્લવસંચયમૌલિભરાવનતોન્નતભાસુરવજ્રધરં
ક્વ ચિદ્ ઇન્દ્રકરીન્દ્રવિમર્દતરઙ્ગરયભ્રમિતપ્રચલત્કલહંસકુલાવલિહારનભઃસરિદમ્બુવિધૌતશિલં ।
ક્વ ચિદ્ અણ્ડજરાજવિલાસસમુચ્છ્રિતપક્ષમહાભુજવજ્રવિપાટિતસાગરવારિતલોદ્ધૃતપન્નગભોગધરં
ક્વ ચિદ્ એવ સુરાસુરસંયુગશસ્ત્રવિપન્નમહાસુર-
વૈદ્યુતશોણિતરઙ્ગમહાવલયમ્

દૃષ્ટ્વૈવમ્ આહ ।
એતે પર્વતશૃઙ્ગચન્દનતરુચ્છાયાસ્થલં સંસૃતાઃ
કર્ણપ્રાવરણં નવારુણકરચ્છાયાસમાનશ્રિયઃ ।
પ્રેક્ષન્તે મદવારિલોલમધુલિટ્પ્રોલ્લીઢગણ્ડસ્થલં
દર્પાત્ કેસરિણો બલેન મહતા પ્રોન્મથ્યમાના ગજમ્

ઇત્ય્ એવમ્ અસાવ્ અતિકાન્તારદુર્ગં સલિલફલાહારમાત્રપરાયણઃ પરિભ્રમન્ન્ અજ્ઞાનતમઃપટલાવગુણ્ઠિતમ્ ઇવ જગત્ સંસારપઙ્કે ત્રિભુવનસ્વામીવોદયદ્ રમણકં નામ નગરં દદર્શ ।
સમુચ્છ્રિતોત્તુઙ્ગચલત્પતાકૈઃ પતત્પતત્રિસ્વનવાવદૂકૈઃ ।
સુવર્ણસાલૈર્ મણિહેમશૃઙ્ગૈર્ મહીધરાકારગૃહૈઃ સુગુપ્તૈઃ

નિલીનપદ્માલિકુલાલિપદ્મૈઃ સમુન્મિષત્પદ્મરજઃપિશઙ્ગૈઃ ।
કલપ્રલાપાણ્ડજરાવરમ્યૈર્ મન્દાનિલૈર્ આવસથીકૃતં સદા

સુરકરિકરદઘ્નકલ્પવૃક્ષૈર્ મરકતરત્નતૃણૈઃ શુકાંશુનીલૈઃ ।
મણિકનકલતાબદ્ધશાખૈઃ ક્વ ચિદ્ ઉરુભિસ્ તરુભિઃ પ્રકામહારિ

વિકસિતનવકર્ણિકારગૌરૈઃ કનકગૃહૈર્ બહુરત્નશૃઙ્ગચિત્રૈઃ ।
સ્વકિરણરુચિરોરુરત્નસાનોર્ અચલપતેઃ સકલશ્રિયં દધાનમ્

ક્વ ચિદ્ અમરવિલાસિનીકરાગ્રપ્રહતમહામુરજસ્વનાભિરામમ્ ।
ક્વ ચિદ્ ઉપરિપયોદતૂર્યનાદપ્રમુદિતમત્તશિખણ્ડિવૃન્દકીર્ણમ્

તતસ્ તદ્દર્શનાત્ સમુત્પન્નજીવિતાશો ઽસૌ રમણં નગરમ્ ઉપસસર્પ । તસ્માન્ નગરાદ્ વિનિઃસૃત્ય ચતસ્રો ઽપ્સરસો દ્રવિતનવકનકરસરાગાવદાતમૂર્તયઃ પ્રવિકસિતામ્બુજકુસુમરુચકરુચિનયનયુગલોત્પલવિલાસાઃ ક્વણદ્રુચિરવિવિધમણિમેખલાપભારમન્દવિલાસગતયઃ કનકકલશાકારપૃથુતરપયોધરભરાવનમિતતનુમધ્યા દિવસકરકરસ્પર્શવિબોધિતામ્લાનકમલપલાશભાસુરાધરકિસલયા વિવિધવિભૂષણશતા નિરામયદર્શનાઃ શિરસિ વિરચિતોભયકમલાઞ્જલયો મૈત્રકન્યકસ્ય બોધિસત્ત્વસ્ય પાદયોર્ વિન્યાસિતશિરસઃ પ્રાહુઃ ।
સુસ્વાગતં ચન્દ્રસમાનનાય નારીજનપ્રીતિવિવર્ધનાય ।
કૃપામૃતાહ્લાદિતમાનસાય બોધૌ ચિરાબદ્ધવિનિશ્ચયાય

અદ્યૈવ દુહ્ખાનિ શમં ગતાનિ [!] અદ્યૈવ નો જીવિતગાત્રસારમ્ ।
નિરત્યયપ્રેમવિશેષભદ્રાણ્ય્ અદ્યૈવ સૌખ્યાનિ પુરઃસ્થિતાનિ

ઇમાનિ દુઃખાઙ્કુશખણ્ડિતાનિ મનાંસિ નઃ શોકપરિક્ષતાનિ ।
ભવન્તમ્ આસાદ્ય વસન્તકાલે વનાન્તરાણીવ વિજૃમ્ભિતાનિ

યાન્ય્ અર્જિતાન્ય્ અન્યભવાન્તરેષુ કર્માણિ શુક્લાનિ શુભોદયાનિ ।
તેષાં ફલં વીક્ષણમ્ એવ તે ઽલં સઙ્ગસ્ ત્વયા કિં પુનર્ એવ દીર્ઘમ્

અદ્યૈવ મા બન્ધુસુહૃદ્વિયોગશોકં કૃથાઃ કસ્ય ન સન્ત્ય્ અપાયાઃ ।
દાસ્યો વયં તે ઽપ્સરશ્ ચતસ્રશ્ છાયા ન તે લઙ્ઘયિતું સમર્થાઃ

રત્નાનિ વાસાંસિ સમુજ્જ્વલાનિ શય્યાશ્રયાશ્ ચારુતરા વયં ચ ।
સંત્યક્તભર્તા સુરરાજયોગ્યા શક્તિર્ વિધેનેહ સુખં ભજસ્વ

અપિ ચ
દુઃખે મહત્ય્ અપ્રતિકારઘોરે યે વર્તમાનાશ્ ચિરમ્ ઉદ્વહન્તિ ।
તે દુઃખભારોપનિપાતમૂઢાસ્ તત્રૈવ શીઘ્રં નિધનં પ્રયાન્તિ

નિત્યે વિયોગે મરણાત્ પુરઃસ્થિતે શોચન્તિ તે દૈવકૃતે વિયોગે ।
સંસ્મૃત્ય રાગોપનિપાતમૂઢાઃ કામપ્રહારં વિષમં પ્રપન્નાઃ