ગુરુક્રિયાક્રમ · ભાગ 11

ગુરુ-ક્રિયા-ક્રમઃ
સર્વબુદ્ધબોધિસત્ત્વેભ્યો નમઃ
પ્રથમં પ્રામાણિક આચાર્યઃ શિષ્યે પ્રસાદ-સમ્પ્રત્યયાભિલાષાત્મિકાં શ્રદ્ધાં જનયેત્ । તતો બોધિચિત્તાનુશંસામ્ ઉક્ત્વા ઉત્સાહં જનયેત્ । તતઃ પરં વિશિષ્ટવિહારે વિશિષ્ટપૂજોપકરણં સ્થાપયેત્ । આર્યસંઘાન્ આમન્ત્ર્ય, પ્રણમ્ય, પાદૌ પ્રક્ષાલ્ય, આસનં પ્રદાય, ઉત્તરાનુત્તરપૂજોપકરણૈઃ સમ્પૂજ્ય પૂજામેઘમન્ત્રાનપિ ત્રિરુચ્ચરેત્ ।
સ્તોતા સુગતવિશિષ્ટગુણસ્મરણદ્વારા સાદરં સ્તુત્વા તત્તદ્વૃદ્ધિકરાણ્યપિ પદાનિ ઉચ્ચરેત્ । તતશ્ચ દેશના-અનુમોદના-અધ્યેષણા-પ્રાર્થના-પરિણામનાદયઃ કરણીયાઃ । તતઃ શ્રદ્ધાવાન્ શિષ્ય આચાર્ય પ્રણમેત્ । અધ્યેષણાદિભિર્દ્વિવિધં બોધિચિત્તં સમુત્પાદ્ય તેષાં સ્વસ્વભાવં ભેદં વૈશિષ્ટ્યઞ્ચાપિ ખ્યાપયેત્ ।
તતઃ બોધિચર્યા (ણાં_) ષટ્પારમિતાનાં, ચતુઃસંગ્રહવસ્તૂનાં ચતુરપ્રમાણાદીનાં ચ લક્ષણં, હેતું, ફલં, શિક્ષાક્રમં, ચ્યુત્યચ્યુતિદોષગુણાન્ યથાવિધિશિક્ષાદિકમપિ વિસ્તરેણ નિર્દિશેત્ । સા ચ અપ્રમાદેન સમ્પ્રજન્યેન સ્મૃત્યા ચ ગ્રહણીયેતિ શિક્ષેત ।
તેષાં લક્ષણં ક્રમં ચ્યુત્યચ્યુતિદોષગુણાદીનપિ શિક્ષેત । તદનુષ્ઠાનાયાપિ તીવ્રવીર્યમુત્પાદ્ય નિધ્યાનદુઃખાધિવાસનાક્ષાન્તિમ્ અવિક્ષિપ્ત-સમાધિં પ્રજ્ઞાનિઃસ્વભાવતાં ચ જ્ઞાત્વા ત્રિશિક્ષાં ત્રિવિધપ્રજ્ઞાં વા સમાધાય ચર્યાપથવિધિના શિક્ષેત ઇતિ નિર્દિશેત્ । અન્તે પ્રણિધાનેન પરિસમાપયેદ્ ઇત્યપિ વદેત્ ।
અયં હિ આચાર્યદેશનાક્રિયાક્રમઃ । શિષ્યો ઽપિ યથાવિધિરુપદિષ્ટઃ તથા શિક્ષેત । અયં તુ લાક્ષણિકમહાયાનચિત્તોત્પાદ-શિક્ષા-દેશના-વિધિઃ ક્રમો વા ઔદારિકતયા દર્શિતઃ । વિસ્તરેણ તુ પરતો જ્ઞાતવ્યમ્ ।
સંક્ષિપ્તગુરુક્રિયાક્રમઃ મહાપણ્ડિતાચાર્યદીપઙ્કરશ્રીજ્ઞાનવિરચિતઃ સમાપ્તઃ ॥