ગોપાલસ્તુતિઃ · અધ્યાય 1

શ્રી ગણેશાય નમઃ ।
ૐ નમો વિશ્વરૂપાય વિશ્વસ્થિત્યન્તહેતવે ।
વિશ્વેશ્વરાય વિશ્વાય ગોવિન્દાય નમો નમઃ

નમો વિજ્ઞાનરૂપાય પરમાનન્દરૂપિણે ।
કૃષ્ણાય ગોપીનાથાય ગોવિન્દાય નમો નમઃ

નમઃ કમલનેત્રાય નમઃ કમલમાલિને ।
નમઃ કમલનાભાય કમલાપતયે નમઃ

બર્હાપીડાભિરામાય રામાયાકુણ્ઠમેધસે ।
રમામાનસહંસાય ગોવિન્દાય નમો નમઃ

કંસવશવિનાશાય કેશિચાણૂરઘાતિને ।
કાલિન્દીકૂલલીલાય લોલકુણ્ડલધારિણે

વૃષભધ્વજવન્દ્યાય પાર્થસારથયે નમઃ ।
વેણુવાદનશીલાય ગોપાલાયાહિમર્દિને

બલ્લવીવદનામ્ભોજમાલિને નૃત્યશાલિને ।
નમઃ પ્રણતપાલાય શ્રીકૃષ્ણાય નમો નમઃ

નમઃ પાપપ્રણાશાય ગોવર્ધનધરાય ચ ।
પૂતનાજીવિતાન્તાય તૃણાવર્તાસુહારિણે

નિષ્કલાય વિમોહાય શુદ્ધાયાશુદ્ધવૈરિણે ।
અદ્વિતીયાય મહતે શ્રીકૃષ્ણાય નમો નમઃ

પ્રસીદ પરમાનન્દ પ્રસીદ પરમેશ્વર ।
આધિવ્યાધિભુજઙ્ગેન દષ્ટં મામુદ્ધર પ્રભો

શ્રીકૃષ્ણ રુક્મિણીકાન્ત ગોપીજનમનોહર ।
સંસારસાગરે મગ્નં મામુદ્ધર જગદ્ગુરો

કેશવ ક્લેશહરણ નારાયણ જનાર્દન ।
ગોવિન્દ પરમાનન્દ માં સમુદ્ધર માધવ

॥ ઇત્યાથર્વણે ગોપાલતાપિન્યુપનિષદન્તર્ગતા ગોપાલસ્તુતિ સમાપ્તા ॥