ગૌરીદશકમ્ · અધ્યાય 1

..
ગૌરીદશકમ્ .
.
..
શ્રીઃ ..
..
ગૌરીદશકમ્ ..
લીલાલબ્ધસ્થાપિતલુપ્તાખિલલોકાં
લોકાતીતૈર્યોગિભિરન્તશ્ચિરમૃગ્યામ્ .
બાલાદિત્યશ્રેણિસમાનદ્યુતિપુઞ્જાં
ગૌરીમમમ્બામમ્બુરુહાક્ષીમહમીડે .. ૧..
પ્રત્યાહારધ્યાનસમાધિસ્થિતિભાજાં
નિત્યં ચિત્તે નિર્વૃતિકાષ્ઠાં કલયન્તીમ્ .
સત્યજ્ઞાનાનન્દમયીં તાં તનુરૂપાં
ગૌરીમમ્બામમ્બુરુહાક્ષીમહમીડે .. ૨..
ચન્દ્રાપીડાનન્દિતમન્દસ્મિતવક્ત્રાં
ચન્દ્રાપીડાલંકૃતનીલાલકભારામ્ .
ઇન્દ્રોપેન્દ્રાદ્યર્ચિતપાદામ્બુજયુગ્માં
ગૌરીમમ્બામમ્બુરુહાક્ષીમહમીડે .. ૩..
આદિક્ષાન્તામક્ષરમૂર્ત્યા વિલસન્તીં
ભૂતે ભૂતે ભૂતકદમ્બપ્રસવિત્રીમ્ .
શબ્દબ્રહ્માનન્દમયીં તાં તટિદાભાં
ગૌરીમમ્બામમ્બુરુહાક્ષીમહમીડે .. ૪..
મૂલાધારાદુત્થિતવીથ્યા વિધિરન્ધ્રં
સૌરં ચાન્દ્રં વ્યાપ્ય વિહારજ્વલિતાઙ્ગીમ્ .
યેયં સૂક્ષ્માત્સૂક્ષ્મતનુસ્તાં સુખરૂપાં
ગૌરીમમ્બામમ્બુરુહાક્ષીમહમીડે .. ૫..
નિત્યઃ શુદ્ધો નિષ્કલ એકો જગદીશઃ
સાક્ષી યસ્યાઃ સર્ગવિધૌ સંહરણે ચ .
વિશ્વત્રાણક્રીડનલોલાં શિવપત્નીં
ગૌરીમમ્બામમ્બુરુહાક્ષીમહમીડે .. ૬..
યસ્યાઃ કુક્ષૌ લીનમખણ્ડં જગદણ્ડં
ભૂયો ભૂયઃ પ્રાદુરભૂદુત્થિતમેવ .
પત્યા સાર્ધં તાં રજતાદ્રૌ વિહરન્તીં
ગૌરીમમ્બામમ્બુરુહાક્ષીમહમીડે .. ૭..
યસ્યામોતં પ્રોતમશેષં મણિમાલા-
સૂત્રે યદ્વત્ક્કાપિ ચરં ચાપ્યચરં ચ .
તામધ્યાત્મજ્ઞાનપદવ્યા ગમનીયાં
ગૌરીમમ્બામમ્બુરુહાક્ષીમહમીડે .. ૮..
નાનાકારૈઃ શક્તિકદમ્બૈર્ભુવનાનિ
વ્યાપ્ય સ્વૈરં ક્રીડતિ યેયં સ્વયમેકા .
કલ્યાણીં તાં કલ્પલતામાનતિભાજાં
ગૌરીમમ્બામમ્બુરુહાક્ષીમહમીડે .. ૯..
આશાપાશક્લેશવિનાશં વિદધાનાં
પાદામ્ભોજધ્યાનપરાણાં પુરુષાણામ્ .
ઈશામીશાર્ધાઙ્ગહરાં તામભિરામાં
ગૌરીમમ્બામમ્બુરુહાક્ષીમહમીડે .. ૧૦..
પ્રાતઃકાલે ભાવવિશુદ્ધઃ પ્રણિધાના-
દ્ભક્ત્યા નિત્યં જલ્પતિ ગૌરિદશકં યઃ .
વાચાં સિદ્ધિં સંપદમગ્રયાં શિવભક્તિં
તસ્યાવશ્યં પર્વતપુત્રી વિદધાતિ .. ૧૧..
ઇતિ શ્રીમત્પરમહંસપરિવ્રાજકાચાર્યસ્ય
શ્રીગોવિન્દભગવત્પૂજ્યપાદશિષ્યસ્ય
શ્રીમચ્છંકરભગવતઃ કૃતૌ
ગૌરીદશકમ્ સંપૂર્ણમ્ ..