ગણેશભુજઙ્ગમ્ · અધ્યાય 1

રણત્ક્ષુદ્રઘણ્ટાનિનાદાભિરામં
ચલત્તાણ્ડવોદ્દણ્ડવત્પદ્મતાલમ્ .
લસત્તુન્દિલાઙ્ગોપરિવ્યાલહારં
ગણાધીશમીશાનસૂનું તમીડે .. ૧ ..
ધ્વનિધ્વંસવીણાલયોલ્લાસિવક્ત્રં
સ્ફુરચ્છુણ્ડદણ્ડોલ્લસદ્બીજપૂરમ્ .
ગલદ્દર્પસૌગન્ધ્યલોલાલિમાલં
ગણાધીશમીશાનસૂનું તમીડે .. ૨ ..
પ્રકાશજ્જપારક્તરન્તપ્રસૂન-
પ્રવાલપ્રભાતારુણજ્યોતિરેકમ્ .
પ્રલમ્બોદરં વક્રતુણ્ડૈકદન્તં
ગણાધીશમીશાનસૂનું તમીડે .. ૩ ..
વિચિત્રસ્ફુરદ્રત્નમાલાકિરીટં
કિરીટોલ્લસચ્ચન્દ્રરેખાવિભૂષમ્ .
વિભૂષૈકભૂશં ભવધ્વંસહેતું
ગણાધીશમીશાનસૂનું તમીડે .. ૪ ..
ઉદઞ્ચદ્ભુજાવલ્લરીદૃશ્યમૂલો-
ચ્ચલદ્ભ્રૂલતાવિભ્રમભ્રાજદક્ષમ્ .
મરુત્સુન્દરીચામરૈઃ સેવ્યમાનં
ગણાધીશમીશાનસૂનું તમીડે .. ૫ ..
સ્ફુરન્નિષ્ઠુરાલોલપિઙ્ગાક્ષિતારં
કૃપાકોમલોદારલીલાવતારમ્ .
કલાબિન્દુગં ગીયતે યોગિવર્યૈ-
ર્ગણાધીશમીશાનસૂનું તમીડે .. ૬ ..
યમેકાક્ષરં નિર્મલં નિર્વિકલ્પં
ગુણાતીતમાનન્દમાકારશૂન્યમ્ .
પરં પરમોંકારમાન્માયગર્ભં .
વદન્તિ પ્રગલ્ભં પુરાણં તમીડે .. ૭ ..
ચિદાનન્દસાન્દ્રાય શાન્તાય તુભ્યં
નમો વિશ્વકર્ત્રે ચ હર્ત્રે ચ તુભ્યમ્ .
નમોઽનન્તલીલાય કૈવલ્યભાસે
નમો વિશ્વબીજ પ્રસીદેશસૂનો .. ૮ ..
ઇમં સુસ્તવં પ્રાતરુત્થાય ભક્ત્યા
પઠેદ્યસ્તુ મર્ત્યો લભેત્સર્વકામાન્ .
ગણેશપ્રસાદેન સિધ્યન્તિ વાચો
ગણેશે વિભૌ દુર્લભં કિં પ્રસન્ને .. ૯ ..