દેવ્યપરાધક્ષમાપનસ્તોત્રમ્ · અધ્યાય 1

અથ દેવ્યપરાધક્ષમાપણસ્તોત્રમ્
ન મન્ત્રં નો યન્ત્રં તદપિ ચ ન જાને સ્તુતિમહો
ન ચાહ્વાનં ધ્યાનં તદપિ ચ ન જાને સ્તુતિકથાઃ ।
ન જાને મુદ્રાસ્તે તદપિ ચ ન જાને વિલપનં
પરં જાને માતસ્ત્વદનુસરણં ક્લેશહરણમ્

વિધેરજ્ઞાનેન દ્રવિણવિરહેણાલસતયા
વિધેયાશક્યત્વાત્તવ ચરણયોર્યા ચ્યુતિરભૂત્ ।
તદેતત્ ક્ષન્તવ્યં જનનિ સકલોદ્ધારિણિ શિવે
કુપુત્રો જાયેત ક્વચિદપિ કુમાતા ન ભવતિ

પૃથિવ્યાં પુત્રાસ્તે જનનિ બહવઃ સન્તિ સરલાઃ
પરં તેષાં મધ્યે વિરલતરલોઽહં તવ સુતઃ ।
મદીયોઽયં ત્યાગઃ સમુચિતમિદં નો તવ શિવે
કુપુત્રો જાયેત ક્વચિદપિ કુમાતા ન ભવતિ

જગન્માતર્માતસ્તવ ચરણસેવા ન રચિતા
ન વા દત્તં દેવિ દ્રવિણમપિ ભૂયસ્તવ મયા ।
તથાપિ ત્વં સ્નેહં મયિ નિરુપમં યત્પ્રકુરુષે
કુપુત્રો જાયેત ક્વચિદપિ કુમાતા ન ભવતિ

પરિત્યક્તા દેવા વિવિધવિધસેવાકુલતયા
મયા પઞ્ચાશીતેરધિકમપનીતે તુ વયસિ ।
ઇદાનીં ચેન્માતસ્તવ યદિ કૃપા નાપિ ભવિતા
નિરાલમ્બો લમ્બોદરજનનિ કં યામિ શરણમ્

શ્વપાકો જલ્પાકો ભવતિ મધુપાકોપમગિરા
નિરાતઙ્કો રઙ્કો વિહરતિ ચિરં કોટિકનકૈઃ ।
તવાપર્ણે કર્ણે વિશતિ મનુવર્ણે ફલમિદં
જનઃ કો જાનીતે જનનિ જપનીયં જપવિધૌ

ચિતાભસ્માલેપો ગરલમશનં દિક્પટધરો
જટાધારી કણ્ઠે ભુજગપતિહારી પશુપતિઃ ।
કપાલી ભૂતેશો ભજતિ જગદીશૈકપદવીં
ભવાનિ ત્વત્પાણિગ્રહણપરિપાટીફલમિદમ્

ન મોક્ષસ્યાકાઙ્ક્ષા ભવવિભવવાઞ્છાપિ ચ ન મે
ન વિજ્ઞાનાપેક્ષા શશિમુખિ સુખેચ્છાપિ ન પુનઃ ।
અતસ્ત્વાં સંયાચે જનનિ જનનં યાતુ મમ વૈ
મૃડાની રુદ્રાણી શિવ શિવ ભવાનીતિ જપતઃ

નારાધિતાસિ વિધિના વિવિધોપચારૈઃ
કિં રુક્ષચિન્તનપરૈર્ન કૃતં વચોભિઃ ।
શ્યામે ત્વમેવ યદિ કિઞ્ચન મય્યનાથે
ધત્સે કૃપામુચિતમમ્બ પરં તવૈવ

આપત્સુ મગ્નઃ સ્મરણં ત્વદીયં
કરોમિ દુર્ગે કરુણાર્ણવેશિ ।
નૈતચ્છઠત્વં મમ ભાવયેથાઃ
ક્ષુધાતૃષાર્તા જનનીં સ્મરન્તિ

જગદમ્બ વિચિત્રમત્ર કિં
પરિપૂર્ણા કરુણાસ્તિ ચેન્મયિ ।
અપરાધપરમ્પરાપરં
ન હિ માતા સમુપેક્ષતે સુતમ્

મત્સમઃ પાતકી નાસ્તિ પાપઘ્ની ત્વત્સમા ન હિ ।
એવં જ્ઞાત્વા મહાદેવિ યથાયોગ્યં તથા કુરુ

ઇતિ શ્રીશઙ્કરાચાર્યવિરચિતં દેવ્યપરાધક્ષમાપનસ્તોત્રં સમ્પૂર્ણમ્ ।